SEEMTIRNAK 19

Sodom Mipawl An Sualzia

1Zanlam nitla zawng ah vancungmi pahnih Sodom khua an thlen tikah Lot cu minung an ton awk ṭheunak khuasuah ah a rak to. Lot in vancungmi pahnih a hmuh tikah hmuak dingin a va feh. Leilung dai in a kuun ih, 2“Ka bawipale uh, in zaangfah asile ka inn ah ra riak hram uh. Ka inn ah ra riak uhla nan ke tla ra kholh uh. Thaizing ah zingpit tein nan feh sal leh ding,” ti ah a ti. Annih in, “A si thei lo ding; tuih zan cu hi khawpi-ih kotthler ah kan riak ding,” ti ah an ti. 3Asinain Lot in a innih riak ding cun a leem rero ih neta bik ah a innih riak ding cun an lung a kim sal. Cule Lot cun thilnu tel lo sang a tuah ih zanriah thawzet a dar ih an ei.

4Cuih zan cu a mikhual pawl an ih hlanah, Sodom khuasungmi in Lot ih inn cu an kulh ṭheh. Upa nauhak ti loin an zatein an tel ṭheh. 5Lot cu an vun ko ih, “Na hnenih tuih zan a ra riakmi na mikhual pawl khuiah an si? Rak suah hnik, kan sualpi pei,” ti ah an au.

6Lot cu sangka in a va suak ih a kharsal hnuah, 7“Rualle uh, cuvek thil ṭha lo cu a tuah tum hram hlah uh, ti ah ka lo dil. 8Zoh uh, hinah fanu himte pahnih ka nei. Ka rak suahpi pei ih nan duh bangtuk in tuah uh. Asinain hi mi pawl parah cun zianghman tuah hram hlah uh; ziangahtile ka mikhual an si ih ka inn ah an thleng zo a si,” ti ah a ti.

9Asinain annih in, “Nang ramdang mi taak ko; in kian sawn; cucu tuah uh, khakha tuah uh, ti ah ziangtinso nang in in ti thei? ṭhawn sawn aw; culole nangmah riangri kan lo tuahmawh ngah sawn ding,” an ti ih Lot cu an tuul ih a sangka cu a bauh an tum. 10Cutikah a mikhualte pahnih cun Lot cu sangka cun an hei dawh ih innsungih an hnuh lut hnuah sangka cu an khar. 11Cuih hnuah sangka lengih a ummi mipi pawl cu nauta bik in upa bik tiang an mit an cawtter thluh ih sangka an hmu thei nawn lo.

Lot Cu Sodom Khua In A Suak

12Cun a mikhual pahnih in Lot hnenah, “Sungte dang na nei lai maw? Na fapa pawl, na fanu pawl le na fanu ih pasal pawl ko thluh awla zamrangte in hi khua in suak uh; 13ziangahtile hi khua hi kan siatsuah thluh ding a si. Bawipa in hi khawsungmi sualnak le borhhlawhnak a theifiang zo ih Sodom khua hi siatsuah dingah in thlah a si,” ti ah an sim. 14Cutikah Lot cu zamrangte in a feh ih a fanu pawl ih pasal dingmi tlangval pawl hnenah, “Zamrangte in hi hmun in suak uh; ziangahtile Bawipa in hi khawpi cu a siatsuah ding a si,” ti ah a sim hai. Asinain annih cun capoh men ah an ruat.

15Zingpit khuafing a cah in vancungmi cun Lot hnenah, “Zamrang aw; na nupi le na fanu pahnih hruai awla suak zaang aw; hi khua hi siatthluh a si ih a hloral tikah nan tel ve pang dah pei,” ti ah an ti. 16Sikhalsehla Lot cu a ṭhukṭhun deuh. Cutikah Bawipa in a zaangfah thotho ih Lot le a nupi le a fanu pahnih cu vancungmi in an kut in an hruai ih khuapawn ah an fehpi. 17Khawpawn an thlen tikah vancungmi pakhat in, “Nan nunsuaknak dingah tlan uh; nan dunglam hoikir hlah uhla hmunrawn ahhin tangphah hlah uh. Tlang parah tlan uhla nan thi lo ding,” ti ah a ti. 18Asinain Lot in, “Bawipa, cuticun si hram hlah seh, 19i zaangfah ih ka nunnak cu i zuah zo. Tlangpar cu ka thleng thei hrimhrim lo ding; a hlazet lai ih khitawk ka thlen hlanah siatsuahnak in i man thotho ding. 20Bawipa, khi khua fate khi na hmu ko. Khi khua fate cu a naite pam ih ka thleng man ko ding. Ka luatnak dingah khi khua ah ka feh ko pei,” ti ah a dil. 21Cutikah vancungmi in, “Na dil vekin ka lo lungkimpi a si; khi khua cu ka siatsuah lo ding. 22Zamrang in tlan zaang aw. Khi khua na thlen hlan cu zianghman ka tuah lo ding,” ti ah a ti. A cuih khua cu, “Khua fate,” ti ah Lot in a ti ruangah Zoar#19.22 Zoar timi cu Hebru ṭong in A fate ti thawn a aw suah a bang aw. ti ah an run kota.

Sodom Le Gomorrah Siatsuahnak

23Ni a hung suak ih Lot cu Zoar khua a va thlen tikah, 24Bawipa in Sodom le Gomorrah khua parah kaat mei-alh van in a suurter. 25Cuticun khawpi pawl le nelrawn pawl, khuasungih a ummi minung hmuahhmuah le leiram parih a khomi hmuahhmuah thawn Bawipa in a siatsuah thluh. 26Asinain Lot ih nupi cu dunglam a hoikir ruangah ciṭhuamah a cangta.

27A thaizing ah Abraham cu Pathian thawn an ton awknak hmunah zamrangte in a feh. 28Sodom le Gomorrah khua le nelrawn tluan cu a vun zoh tikah cahmang meipikhu vekin meikhu a kai luailo kha a hmu. 29Sikhalsehla Pathian in nelrawn ih khawpi pawl a siatsuah tikah Abraham cu a hngilh lo ih Lot cu himte in a luatter.

Moab Mi Le Ammon Mi Suahkehnak

30Lot cu Zoar khua ih um a ṭih ruangah a fanu pahnih thawn tlangpar ah an ceer ih lungpuk sungah an um. 31Cutikah a upa deuh nu in a naunu hnenah, “Ka pa hi a tar vivo thlang a si. Faate kan neih theinak dingah a daan keelih in ra ṭhitu ding leilung parah mipa an um fawn lo. 32Curuangah ra hnik, ka pa thawn pawl aw-in faate tla kan neih theinak dingah sabitti ri ko in kan tul hnik pei,” ti ah a ti. 33A cuih zan cu an pa cu sabitti an pek ih a upa nu le a pa cu an pawl aw; asinain sabitti a rit tuk ruangah a pa cun an pawl awk cu a thei lo. 34A thaisun ah a naunu hnenah, “Mizan ah ka pa thawn kan pawl aw. Tuihzan khal sabitti kan pe lala pei ih nangmah thawn nan pawl aw pei. Cuticun kan pahnih in kan pa ih fa kan nei ding,” ti ah a ti. 35Curuangah acuih zan khal an pa cu sabitti an pek ih a ri lala ih a fanu nauta thawn an pawl aw. Ahmaisa vekin an pa cu sabitti a rit tuk ruangah a fanu nauta thawn an pawl awk cu a thei thotho lo. 36Cutiin Lot ih fanu pahnih cu an pa ih fa an vun veve. 37A fanu upa sawn in fapa a nei ih a hmin ah Moab#19.37 Moab timi cu Hebru ṭong in Ka pa ih hnen ihsin ti thawn a aw suah a bang aw. ti ah a fanu in a sak. Cuih fapa cu tuihsan Moab mipawl cithlahtu a si. 38A fanu nauta khal in fapa a nei ve ih, Ben-ammi ti ah a fanu cun hmin a sak. Ben-ammi#19.38Ben-ammi timi cu Ka sungkhat ih fapa tican a si ih Hebru ṭong in Ammon mi ti thawn a aw suah a bang aw. cu tuihsan Ammon mipawl cithlahtu a si.

Currently Selected:

SEEMTIRNAK 19: FCL

Highlight

Copy