SEEMTIRNAK 15
15
Abram Hnenih Pathian Thukam
1Cuih hnuah Abram hnenah Bawipa a lang ih, “Abram, na thinphang hlah; Keimah cu a lo humtu phaw ka si. Na hnenih ka laksawng cu a uakzet ding,” ti ah a sim.
2Cutikah Abram in, “Maw Pathian Bawipa, fa le ka nei lo. Ka hnenih na laksawng cu ziangso a si ding? Ka rocotu #15.2 Rocotu tiih lehmi hi Hebru ṭong in a tican a fiang lo. cu Damaskas khua ih Eliezer lawng a si. 3Fa pakhatte hman i pe lo ih, curuangah ka ro cu ka salpa pakhat in a co a ṭul ko,” ti ah a ti. 4Cun Bawipa in Abram hnenah, “Hi na salpa hi na rocotu a si lo ding; na rocotu cu nangmah ih fapa ngaingai a si ding,” ti ah a sim sal. 5Bawipa in Abram cu lengah a suahpi ih, “Van khi zoh awla arsi pawl khi na siar thei asile siar hnik; khi arsi zat in na tesinfa pawl cu an tam ding a si,” ti ah a ti. 6Cule Abram in Bawipa cu a zum ih acuih zumnak cu Bawipa in dingnakah a co sak.
7Cun Bawipa in Abram hnenah, “Keimah cu Bawipa ka si. Hi ram hi na ta siter dingah Khaldea ram Ur khua ihsin ka lo ṭhawnter a si,” a ti. 8Sikhalsehla Abram in, “Maw Pathian, ka Bawipa ziangtinso ka ta a si ti ka theih ding?” ti ah a sut. 9Cutikah Pathian in, “Ka hnenah kum thum kim cawla, kum thum kim mela, kum thum kim tuucang, thuro pakhat le laileng pakhat rak keng aw,” ti ah a ti. 10Abram in Pathian hnenah a zatein a rak keng ih an laifang ciar in phel hnih ah a phel ih phel khat cu a dang phel khat hmaiah artlang in tlar hnih ah a ret; vatesa cu a phel lo. 11Langta pawl in sa cu an rung tlan naón Abram in a rak dawi hai.
12Zanlam ni a tlak cuahco tikah Abram cu a itthat. Cutikah a hnenah ṭihnung tuksumza khuathim a rung thleng. 13Bawipa in a hnenah, “Na tesinfa pawl cu ramdang ah mivai an si ding. Cuih ramah cun sal an si ding ih kum zali sung hremmi an si ding. 14Asinain na tesinfa a tisiattu ram cu ka hrem ding; thilri tampi thawn cutawk cun an suak leh ding. 15Nang cu tlamtling in tarkuun tiang na nung ding ih thinlung thlangamte in na thi ding; cule phum na si ding. 16Na tesinfa pawl cu san li hnuah hi ramah an rakir sal ding; ziangahtile hi tawkih Amor mi pawl hi miṭha lozet ah an cang ding ih hremnak an tuar tik lawngah hi ram ihsin ka dawi leh hai ding,” ti ah a ti.
17Cun ni a tlak ih khua a thim tikah, hmakhatte-ah a khu ih a alh hluahhlo mi beel le a alh hluahhlo mi meifar an lang ih sa tlar hnih ih retmi karlak ihsin an lan zuahzo. 18A cuih ni ah Bawipa in Abram hnenah thukamnak a tuah ih, “Hi ram hmuahhmuah hi na tesinfa pawl hnenah ka pe ding ti ah ka lo kam a si. Izipt ramri ih tiva ihsin Eufrates vapi tiang a si ding; 19cun Ken ram, Keniz ram, Kadmon ram, 20Hit ram, Periz ram, Refaim ram, 21Amor ram, Kanaan ram, Girgash ram le Jebus ram pawl tla an tel ding,” ti ah a ti.
Currently Selected:
SEEMTIRNAK 15: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
