GALATI 3
3
Daan Maw Zumnak So?
1Galati mi-aa rual! Zoso a lo polhtu? Jesuh Khrih thinglamtah parih a thihnak cu nan mit ah fiang zetin a cuang a sisi! 2Hi thil hi i simhnik uh: Pathian Thlarau nan comi hi Daan ih a lo fialmi nan tuah ruangah maw, a si lole Thuthang ṭha nan theihnak le nan rinnak in so nan ngah? 3Hi tluk lawmmam in nan aa maw si! A hram nan thok laiah cun Thlarau thawn nan thok; a net lam atu ahcun nanmah ih cahnak thawn netter nan tum maw si? 4Nan nunnak ih nan ton ciami hmuahhmuah thuphan ah maw a can ṭheh? Thuphan cu an si ṭheh lo ding naón! 5Pathian in Thlarau a lo pek ih nanmah lakah mangbangza a tuahmi kha Daan ih a lo fialmi nan tuah ruangah maw a si? a si lole Thuthang ṭha nan thei ih nan zum ruangah so a si?
6Abraham ih thu kha ruathnik uh. Ca Thianghlim ah, “Abraham in Pathian a zum ih cutiih a zumnak ruangah Pathian in miding ah a co,”#Seem 15.6; Rom 4.3 tiah a um. 7Nan theih dingmi cu, Abraham ih tefa ngaingai cu zumnak neimi hi an si. 8Ca Thianghlim in, “An zumnak ruangah Zentail mi pawl cu Pathian in miding ah a co ding a si,” tiah a rak ti cia zo. Curuangah Abraham hnenah, “Nangmah thawngin mi hmuahhmuah Pathian in a thlawsuah ding,”#Seem 12.3 tiah Ca Thianghlim in Thuthang ṭha cu a rak than. 9Abraham in a zum ruangah thlawsuahnak a co. Cubangtuk in zumtu hmuahhmuah cu thlawsuahnak an co ve ding.
10Daan thlunnak a rinsantu cu camsiatnak hnuai ih a ummi an si. Ziangahtile Ca Thianghlim in, “Zozo khal Daan cabu sungih nganmi vek rori ih a thlun ringring lotu cu Pathian ih camsiatnak hnuai ah an um a si,”#Daan 27.26 tiah a ti. 11Ca Thianghlim in, “Zumnak ruangih Pathian thiamcotermi lawng an nung ding,”#3.11 Habakkuk 2.4 ihsin lakmi a si ih, ‘Pathian hmaiah thiamcotermi cu zumnak thawngin an nung ding,’ ti tla a si thei. a ti ruangah Daan thlunnak in zohman thiamcoter an si lo, ti cu a fiang zo. 12Curuangah Daan le zumnak cu pehtlaih awknak an nei lo. Ca Thianghlim in, “Daan ih fialmi vek rori ih a tuah ṭhehtu cu a nung ding,”#Pui 18.5 a ti.
13Sihmansehla Khrih cu kan hrangih camsiatmi a si ruangah Daan ih a thlenpimi camsiatnak ihsin in runsuak zo. Ziangahtile Ca Thianghlim in, “Zokhal thing parih thlai a si mi cu Pathian camsiatnak cotu a si,”#Daan 21.23 tiah a ti. 14Cuticun Khrih Jesuh ih zaarah Pathian in Abraham hnenih a tiammi thlawsuah cu Zentail mi in an conak dingah le zumnak thawngin Pathian ih tiam ciami Thlarau kan conak dingah a si.
Daan Le Thutiam
15U le nau pawl, nitin kan hmuh kan tonmi ihsin tahṭhimnak ka la ding: thu pakhatkhatah mi pahnih an lungkim in lungkimnak an tuah tikah zohman in an phiat thei lo ih an beet thei fawn lo. 16Cuvekin Pathian in Abraham le a tefa hnenah thutiamnak a tuah. Ca Thianghlim in, “Tefa pawl,” ti ṭongfang a hmang lo, “Tefa,” ti lawng a ti ih a sim duhmi cu mi pakhat a si ih cucu Khrih a si. 17Ka sim duhmi cu, Pathian in Abraham thawn thukamnak a tuah ih cumi cu thlunsuak dingah a tiam aw. Kum zali le sawmthum hnu-ih pekmi Daan cun Pathian thukam cu a phiat thei lo. A thutiammi khal a lakah a cangter thei fawn lo. 18Ziangahtile Pathian ih laksawng cu Daan ruangah a si, ti a si ahcun Amah ih thutiamnak thawngin a si lo, tiah a cang ding. Sikhalsehla Abraham hnenah Pathian in laksawng a peknak san cu a hnenah thutiamnak a tuah zo ruangah a si.
19Cuti asile Daan ih ṭhathnemnak ziangso a si? Daan cu sualnak timi hi ziangso a si ti langternak ah a si ih Pathian ih tiam ciami Abraham ih tefa a ra thlen tiang um ringring dingih pekmi a si. Daan cu vanmi pawl ih pekmi a si ih vanmi le minung karlakah palai pakhat a rak um.#Vanmi pawl ih pekmi timi hi Daan 33:1-2; Tirh 7:38, 53; Heb 2:2, sungah zoh a theih. 20Asinain mi pakhat lawng hna a ṭuannak ahcun palai um a ṭul lo; Pathian cu pakhat lawng a si.
Daan Ih Tumtahmi
21Cuti asile Daan le Pathian ih thutiam cu an kalh-aw maw si? Kalh-aw hrimhrim hlah! Ziangahtile minung hnenah nunnak pe theitu daan rak um sehla, cuih daan thlunin Pathian hmaiah thiamcoter an si ṭheh ding. 22Sikhalsehla Ca Thianghlim in, “Leilung pumpuluk hi sualnak huham hnuai ah a um,” a ti. Curuangah Jesuh Khrih rinsannak thawng lawngih tiam ciami Pathian ih kammi laksawng cu a zumtu hnen lawngah pek a si.
23Asinain zumnak tikcu caan a thlen hlanah cun Daan in thawngtlami bangin in hrengtaar; cumicu rinnak a suah hlan sung a si. 24Curuangah rinnak thawngin Pathian hmaiih thiamcotermi kan si leh-nak dingah, Daan cu Khrih a rat hlan sung in khortu a si. 25Atu cu rinnak a ra thlen zo ruangah Daan cu in khortu a si nawn lo.
26Rinnak thawngin nan zatein Pathian ih fa nan si ih Khrih Jesuh thawn nan pehzom aw zo. 27Khrih thawn pehzom awknak sungih hnimmi nan si zo ih atu ahcun Khrih nunzia thawn nan thuam aw a si. 28Curuangah Judah mi le Zentail mi tiah thleidannak a um nawn lo; sal le miluat karlakah siseh, nunau le mipa karlak khalah siseh, thleidannak a um nawn lo. Nan zatein Khrih Jesuh thawn nan pehzom awknak sungah pakhat nan si. 29Khrih ta nan si ahcun Abraham ih tefa nan si ih Pathian thutiam cia vekin a ro cotu nan si.
Currently Selected:
GALATI 3: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.