1 TIMOTE 3
3
Kawhhran Hruaitu
1“Zo khal in kawhhran hruaitu si a duh ahcun hnaṭuan ṭha duhtu a si,” timi hi thudik a si. 2Kawhhran hruaitu cu soiselnak nei lomi a si ding. Nupi pakhat lawng a neitu,#3.2 Nupi pakhat lawng a neitu timi hi Nupi voikhat lawng a ṭhitu ti khal a si thei. rit theinak thil ih a suup aw theimi, a uk aw theimi, felfai zoh rem in a nungmi, mikhual a zohthiamtu le mi zirh a thiamtu a si ding. 3Zurit hmangmi a si lo ding ih, thinsuup aw thei lo, midang thawn a to aw ṭheumi khal a si lo ding. Sikhalsehla mi lungnem le daihnak a duhtu a si ding. Tangka duh tukmi a si lo ding. 4A innsang ṭhatein a ho theitu a si ding ih a faate pawl cu mi thu a ngaimi le mi upat thiammi a si ding. 5Amah ih innsang hman ṭhatein a kilkhawi thei lo ahcun ziangtinso Pathian ih kawhhran a kilkhawi thei ding. 6Zumnak lamah lungthleng pekte a si lo ding; culo ahcun a zum aw sual pang ding ih Satan cu hnon a rak ton vekin anih khal hnon a tong ve pang ding. 7Pathian awi lo misenpi pawl ih an upatmi a si ding; cubangtuk a si lo ahcun mi ih relsiat a tong ding ih Satan ih thang ah a awk aw ding.
Kawhhran Upa
8Kawhhran Upa pawl cu ziaza ṭha a neimi le ṭong tam lo thinlung tluangtlammi si hai seh. Zu in le tangka a duh tukmi an si lo pei. 9Pathian ih a run phuanmi thutak kha a siaṭha thleidannak thinlung thiangte in hngette ih a pomtu an si ding. 10Upa ṭuan a duh pawl cu hniksak hmaisa an si pei ih soiselnak um lo an si le an ṭuan pei. 11An nupi khal#3.11 An nupi khal timi hi Nunau Khristian upa ti khal a si thei. ziaza ṭhami an si ding ih mi relsia ih ṭong tammi an si lo pei. Zu in lomi an si ding ih ziangtinkim ah mifel an si ding. 12Kawhhran Upa cu nupi pakhat lawng a neitu#3.12 nupi pakhat lawng a neitu timi hi nupi voikhat lawng a ṭhitu ti khal a si thei. a si ding ih a innsang le a faate pawl ṭhatein a uk theitu a si ding. 13An hnaṭuan felteih a ṭuan theitu upa cu upat an co ih Khrih Jesuh an zumnak thu kha ralṭha zetin an phuang ngam a si.
Thuthup Tumpi
14Na hnenih hi cakuat ka ngan laiah hin a rei hlanah ka ra lo tong cing ding tiin ka ruat. 15Sikhalsehla ka tlai pang a si ahcun Pathian innsang a si mi kawhhran sungah ziang bangtuk in so kan umtlandan a si ding, ti kha hi ka cakuatmi in a lo sim ding. Pathian innsang cu kumkhua in a nungmi Pathian ih kawhhran a si ih cuih kawhhran cu thudik hramṭoh-nak le a dinhngettu ṭhuam a si. 16Kan biaknak sungih thuthup hi a tum ngaingai a si, ti cu zokhal in an el thei lo ding:
Amah cu minung taksa in a suak,
a dikmi a si thu Thlarau in
a langter;
Cule vancungmi khal in an hmu;
A thuhla cu miphun zakip hnenah
phuan a si ih leilung
khuazakipah an zum.
Cule sunlawinak ah lakso a si.
Currently Selected:
1 TIMOTE 3: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
