1 SAMUEL 9

Saul In Samuel A Tong

1Benjamin ramah Kish an timi pa pakhat a um. Amah cu Abiel ih fapa a si. Abiel cu Zeror ih fapa a si. Zeror cu Bekorath ih fapa a si. Bekorath cu Afiah ih fapa a si ih Afiah cu Benjamin phun a si. Kish cu milian le mi ih upat mi a si. 2Kish in Saul timi fapa a nei. Saul cu a sanṭhat laifang a si ih a piangzet fawn. Israel mi pawl hmuahhmuah lakah a piang bik a si ih mi dang hnakin pi khat a sang fawn.

3A pa Kish ih laak hrekkhat pawl cu an vakhlo ih curuangah a pa in, “Kan hnen-um pakhat hruai awla kan laak pawl va hawl uh,” tiah Saul cu a fial. 4Curuangah Efraim tlangpar ram le Shalishah ramah an feh ih an hawl naón an hmu lo. Shaalim peng sungah a ram pumpi in an hawl naón laak cu an um lo. Cuih hnuah Benjamin ram sungah an hawl ih an hmu cuang lo. 5Zuf peng sung an thlen tikah Saul in, “Kan tlung thlang pei. Ziangahtile laak thu ruat loin ka pa in kanmah riangri tla in helhkamter pang ding,” tiah a hnen-um pa hnenah a ti.

6Cutikah a hnen-um pa in, “Um hrihhnik; hih khua ah hin Pathian ih minung pakhat a um ih mi in an upat zetmi a si; ziangahtile a simmi hmuahhmuah a dik ṭheu. A hnenah kan va feh pei ih kan laak pawl umnak tla in sim thei men ding,” tiah a ti.

7“Kan va feh asile ziangso kan pek ding? Kan zaal sungah rawl a um nawn lo, zianghman pek ding kan neih ual lo,” tiah Saul in a ti.

8A hnen-um pa in, “Ngun tangka fangkhat ka pai ih cumi ka pek pei. Kan laak pawl an umnak in sim ding,” tiah a ti.

9Culai ahcun mi pakhat in Pathian hnenih sut duhmi a neih tikah, “Hmutu hnenah kan feh pei,” tiah a ti ṭheu. Ziangahtile cuih san ahcun profet cu hmutu tiah an rak ko. 10Cutikah Saul in, “Na ruahnak a ṭha a si. Kan feh pei,” a ti ih Pathian ih minung pa umnak khua ahcun an feh. 11An khuataw so an soh rero laifangah tidai khai dingih a rami fala pawl an tong. “Nan khawsung ih hmutu a um maw?” tiah fala pawl cu an sut.

12Fala pawl cun, “A um sokhaw! Nan hlan deuhte ah a ra thleng. Zamrang uhla nan hei man ding. Khawsung mi pawl in tuihsun tlangpar ih biakṭheng ah khawrai thawinak an pek ding. 13Khawsung nan luh vete in tlangpar ih rawl ei ding a feh hlanah nan tong ko ding. Tlangpar ih amah a thlen lo ahcun misenpi pawl rawl an ei lo ding; ziangahtile khawrai thawinak cu amah in thla a cam hmaisa ding ih cuih hnu lawngah senpi cu rawl an ei ding. Atu-ah feh uhla hmakhatte-ah nan tong ko ding,” tiah an ti.

14Cuticun an feh ih khawsung an luh zawng ah Samuel cu biaknak hmun ih feh dingin a ra suah kha an hmu.

15Saul a thlen ni ih a mizan sun ah Bawipa in Samuel hnen ah, 16“Thaisun atu tikcu ah Benjamin phun ihsin mipa pakhat na hnenah ka rak thlah ding. Ka minung Israel pawl uktu ah amah cu hriakculh awla Filistin pawl ih kut ihsin a humhim hai ding. Ka minung pawl ih tuarnak le zonzaihnak ka hmu zo ih bomnak dilih an aihramnak ka thei zo a si,” tiah a ti.

17Samuel in Saul cu a hmuh tikah, Bawipa in Samuel hnenah, “Ka lo timi cu hi pa hi a si. Ka minung pawl amah in a uk ding,” tiah a ti. 18Cule Saul cu Samuel hnenah kotka kiangah a va feh ih, “Khuiah so hmutu pa ih inn a um, i sim hram aw,” tiah a va ti.

19Cutikah Samuel cun, “Keimah hi hmutu cu ka si. Biaknak hmunah ka hmaiah feh aw. Tuihsun ah nan pahnih in ka hnenah rawl nan ei ding. Thaizing ah nan thusuh duhmi hmuahhmuah ka lo let pei ih cuih hnuah nan fehnak dingah ka lo thlah leh ding. 20An hlohnak ni thum a si zomi nan laak pawl cu helhkam duh hlah uh, ziangahtile an hmu zo. Sikhalsehla Israel mi pawl ih an ṭul zetmi cu zoso a si? Nangmah na si! Nangmah le na pa ih hrin pawl nan si,” tiah a ti.

21Saul in, “Kei cu Benjamin phun ka si; Israel miphun lakah phun fate bikmi ka si. Cun kan phunkhat sungah kannih sung cu santlai lo bik sung kan si fawn. Curuangah ziangtinso hiti in ka hnenah na ṭong?” tiah a ti.

22Cutikah Samuel in Saul le a hnen-um pa cu rawl einak khaan tumpi sungah a hruai ih, an sawmmi minung sawmthum tluk an tonak cabuaipi ih lu lamah a toter. 23Cule Samuel in rawl suang pa ih hnenah, “A dangte ih ka lo rettermi sa kha rak keng aw,” tiah a ti. 24Cule rawl suang pa cun sacawn le a kopmi thau pawl a hun suah ih Saul ih hmaiah cun a ret. Samuel in, “Himi cu nangmah hrangih retmi a si. Ei aw, ka sawmmi pawl thawn ei tlang dingah na hrangih retmi a si,” tiah a ti. Cuticun cuih ni ah Saul cu Samuel hnenah rawl a ei. 25Biaknak hmun ihsin khawsungih an vung kirsal tikah inn diphun parah Saul ih ihnak an tuah ih, cutawkah Saul cu a it. 26Zingpit ah an tho ih Samuel in Saul cu a hun ko ih, “Tho awla na fehnak ding zinah ka lo thlah ding,” a ti. Saul cu a tho ih Samuel thawn hmun khatah an feh. 27Khawhnar an thlen tikah Samuel in, “Na hnen-um pa hi hmaiah rak fehter aw,” tiah Saul cu a ti. Hnen-um pa cu hmaiah a rak feh. Cutikah Samuel in, “Malte in taangta hrih awla Pathian ih ṭong mi ka lo sim ding,” tiah a ti.

Currently Selected:

1 SAMUEL 9: FCL

Highlight

Copy