1 SAMUEL 7

1Curuangah Bawipa ih Thukam Kuang cu Kiriath Jearim khua mi pawl in an phur ih, tlang parih a ummi Abinadab ih inn ah an ret. Abinadab ih fapa Eleazar kha a kiltu dingah an fial ih Pathian hnenih pumpeknak an tuahsak.

Samuel In Israel A Uk

2Kiriath Jearim khua ah Bawipa ih Thukam Kuang cu kum kul lai a um. Hi sung hmuahhmuah ah Israel mi pawl in Pathian hnenah bomnak dil in an ai-hram ringring.

3Cutikah Samuel in, “Nan thinlung taktak ih Bawipa nan pan duh a si ahcun ramdang khawzing pawl le Astartes khawzingnu ih zuk pawl hi nan hlon ṭheh pei. Nan nunnak a zatein Bawipa hnenah pek ṭheh uhla amah lawng biak uh. Cuticun Filistin mi pawl ih nehnak sung ihsin Bawipa in a lo luatter ding a si,” tiah a ti. 4Curuangah Israel mi pawl in Baal khawzing le Astartes khawzingnu ih zuk pawl cu an hlon ṭheh ih Bawipa lawnglawng an biak.

5Cule Israel mi pawl cu Mizpah khua ah tongkhawm aw dingin Samuel in a cah hai ih, “Cutawkah Pathian hnenah nan hrangah thla ka cam ding,” a ti. 6Curuangah Mizpah ahcun an tong-aw khawm ṭheh. Tidai an khai ih Bawipa hnenih thawinak peknak ah tidai cu an thlet. Cule sunvu rawl an ul. “Bawipa ih parah kan sual a si,” tiah an sual an phuang. Mizpah ah Israel mi pawl ih thu an neih mi cu Samuel in a ṭhensak.

7Israel mi pawl Mizpah ih an khawm-awk ṭhehnak thu cu Filistin mi pawl in an rak theih tikah ra do dingah Filistin ih lal panga le an ralkap pawl cu an pok. Cuih thu cu Israel mi pawl in an theih tikah an ṭih ngaingai ih, 8Samuel hnenah, “Filistin pawl ih kut sungin in run suak theinak dingah Bawipa kan Pathian hnenah cat loin thlacam aw,” tiah an ti.

9Cutikah Samuel in tuu faate a that ih a pum in mei-ur thawinak ah Bawipa hnenah a pek. Israel mi bawm dingah Bawipa hnenah Samuel in thla a cam ih a thlacamnak cu Bawipa in a theih sak. 10Samuel in thawinak a pek rero laifangah rin lopi in Filistin mi pawl in an run nam ciamco. Cutikah Bawipa in van ihsin khawripi in a ron tlir durdo ih Filistin mi pawl cu thinphang in an buai ih an tlan thluh. 11Cuvete in Israel mi pawl cun Filistin mi pawl cu Mizpah ihsin Bethkar thleng tiang an dawi hai. An dawinak lamtluan ah Filistin mi pawl cu an that phah vivo.

12Cule Samuel in lungto a lak ih Mizpah le Shen khua karlak ah a phun ih, “Bawipa in lamzin tluan in bawm a si,” a ti ih “Ebenezer,”#Ebenezer ti cu Bomnak lungto tinak a si. tiah hmin a sak. 13Cutiin Filistin mi cu ral an sung ih Samuel ih nunsung hmuahhmuah Israel ram do thei lo dingah Bawipa in a kham. 14Ekron le Gath khua karlak ih a ummi khua hmuahhmuah Filistin mi pawl ih an lonmi khua pawl cu Israel mi hnenah an pek sal ih cuticun Israel mi in an ram hmuahhmuah cu an ngah sal a si. Cule Israel mi le Kanaan mi karlak khalah remnak a um.

15Samuel cu a nunsung hmuahhmuah Israel uktu a si. 16Kumtin tein Bethel, Gilgal le Mizpah ah a feh ih thubuainak a ummi pawl thu a ṭhensak vivo. 17Cuih hnuah Ramah khua ih a inn ah a kirsal ṭheu ih Ramah khalah cun Israel pawl ih thuṭhentu a ṭuan. Cule Ramah khua ah Bawipa hrangah biakṭheng a don.

Currently Selected:

1 SAMUEL 7: FCL

Highlight

Copy