1 SAMUEL 5
5
Filistin Mi Hnenah Thukam Kuang
1Pathian Thukam Kuang cu Filistin mi pawl ih an lon ngah hnuah Ebenezer ihsin Ashdod khua ah an phur. 2Dagon an timi an khuazing biaknak inn ah an fehpi ih Dagon kiangah an ret. 3A thaizing ah Pathian ih Thukam Kuang hmaiah Dagon ih lempi cu a bokkhup in a tluk kha Ashdod khuami pawl in an hmu. An tung saal ih a um keel in an ret. 4A thaizing zingpitah Bawipa ih Thukam Kuang hmaiah Dagon ih zukpi cu a bokkhup in a tluk sal lala kha an hmu. A lu le a ban pawl a tan-aw thluh ih sangka kiangah an ril teptep. A ruangpi lawnglawng a taang. 5Curuangah tuihsan tiangin Ashdod khua ih puithiam pawl le Dagon a biatu pawl cun Dagon a tluknak hmun cu pal loin an lan ṭheu.
6Ashdod khuami pawl cu Bawipa in nasazet in a hrem ih an thin a phang ringring. Ashdod khuami lawng si loin a kiangkap khuami pawl khal a hrem ih khuaihli hma in an hma thluh. 7Cutiih a si cu misenpi in an hmuh tikah, “Israel mi pawl ih Pathian in kanmah le kan khawzing Dagon tiangin in hrem a si. Thukam Kuang cu hitawk ih umter hrih dingah a cang nawn lo,” tiah an ti. 8Curuangah mi an thlah ih Filistin mi pawl hotu lal panga an ko khawm ih, “Israel mi pawl Pathian ih Thukam Kuang hi ziangtinso kan tuah ding?” tiah an sut.
Cutikah annih in, “Gath ah va ret uh,” an ti. An ti bangtuk in Gath ahcun an va ret. 9Asinain Gath ih an ret vete in Bawipa in Gath khawsungmi pawl a hrem ih an van a sang ngaingai. Gath khawsungmi hmuahhmuah a tum a sen in khuaihli hma an tuar ṭheh. 10Curuangah Thukam Kuang cu Ekron khua ah an kuat. Ekron khua an thlenpi vete in khuasungmi pawl cu, “Israel mi Pathian ih Thukam Kuang an rak thlenpi ih in that thluh ding,” tiah an au ciamco. 11Curuangah Filistin mi pawl ih lal pawl cu an ko khawm lala ih, “Israel mi pawl ih Thukam Kuang cu a rak umnak ah kuat sal uh; cuticun kanmah le kan sungkhat pawl kan thi lo ding,” tiah an ti. Nasazet in Pathian in a hrem hai ruangah khawsungmi pawl cu an awlok a song ngaingai. 12A thi lomi pawl khal cu khuaihli hma in an na ih mi hmuahhmuah in an khawzing pawl hnenah bomnak dil in an au ciamco.
Currently Selected:
1 SAMUEL 5: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
