1 SAMUEL 3

Samuel Hnenah Bawipa A Lang

1Nauhakpa Samuel cu Eli ih kuthnuai ah Bawipa ih hnaṭuanin a um. Cuih tikcu ah Bawipa ih ṭongkam a mal vivo ih Bawipa ih langnak khal a um tuk nawn lo. 2Eli cu a mit a mal thlang. Zankhat cu a ihnak khaan ah a it ih, 3Samuel cu Bawipa ih thukam kuang retnak khaan ah a it ve. Khua a vang hrih lo, Bawipa ih mei-inn a vanglai. 4Samuel cu Bawipa in a run ko. Samuel in, “Bawipa, ka um ko,” tiah a ti ih, 5Eli hnenah a va tlan ih, “Ka ra zo, ziangah so i kawh?” tiah a ti.

Eli in, “Ka lo ko lo, feh awla va it sal aw,” tiah a ti. Curuangah Samuel cu a va it sal.

6Cule Bawipa in, “Samuel” tiah a ko sal. Samuel cu a tho ih Eli hnenah a feh ih, “Ka ra zo, ziangah so i kawh?” tiah a ti.

Eli cun, “Ka fapa, ka lo ko lo; feh awla va it sal aw,” tiah a ti. 7Samuel cun Bawipa in i ko, ti a thei lo; ziangahtile Bawipa ih ṭongkam cu Samuel hnenah phuan in a um dah lo.

8Voithum tiang Bawipa in Samuel cu a ko. Samuel cu a tho ih Eli hnenah a feh lala ih, “Ka ra zo, ziangah so i kawh?” tiah a ti.

Cutikah Samuel kotu cu Bawipa a si, tiah Eli in a thei ih a hnenah, 9“Va feh awla va it sal aw; a lo ko sal asile ‘Bawipa na sim duhmi sim aw; na aw ka thei a si,’ tiah na ti pei,” a ti. Cutiin Samuel cu a va it sal.

10 Bawipa cu a ra ih a kiangah a ding, “Samuel, Samuel,” tiah a hlan bangtuk thotho in a ko.

Cutikah Samuel in, “Bawipa, na sim duhmi cu sim aw. Na salpa in na aw ka thei a si,” tiah a ti.

11Cule Bawipa in, “Israel mi pawl ih parah ṭihnungza thil pakhat ka tuah ding ih cuih ka tuahmi a theitu hmuahhmuah in an tuk a sum ding. 12A cuih ni ahcun Eli ih sungkhat pawl hrangah thusia ka simmi hmuahhmuah ṭongkam pakhat hman hrelh loin ka kimter thluh ding. 13A fapa pawl in ka thang in siatter ruangah a sungkhat pawl cu ka hrem hai ding a si, tiah Eli ka sim cia zo. A fapa pawl ih thil ṭha lo an tuahmi a thei naón a kham lo. 14Curuangah ziangvek thawinak le thil an pek khalle hitluk sualnak tum an tuahmi cu a tlengfai thei nawn lo pei, tiah Eli sungkhat pawl hnenah fiangtein ka run phuang a si,” tiah Samuel hnenah a ti.

15Samuel cu khawvang tiang a it. Cuih hnuah a tho ih biakinn sangka pawl a ong. A hmuhmi le a theihmi pawl cu Eli hnenah a sim ngam lo. 16Cule Eli in, “Ka fapa, Samuel,” tiah a ko.

Samuel in, “Hinah ka um!” tiah a ti.

17Cutikah Eli in, “Bawipa in ziangso a lo sim? Zianghman pheh hlah aw. Ka hnenih na sim ṭheh lo asile Pathian in nasazet in a lo hrem ding a si,” tiah a ti. 18Curuangah Samuel in a sim ṭheh. A phehmi pakhat hman a um lo. Cule Eli in, “Amah cu Bawipa a si ih a mithmuh ah a ṭha bik a timi tuah ko seh,” tiah a ti.

19Samuel cu a ṭhang vivo. Bawipa a hnenah a um ih a simmi hmuahhmuah Bawipa in a kimter ṭheh. 20Curuangah Israel mi hmuahhmuah in, an ram zim le dengih a ummi pawl tiangin, Samuel cu Bawipa ih profet a si tiah an thei ṭheh. 21Samuel hnenih a langnak le a ṭongnak hmun Shiloh ahcun Bawipa cu cat loin a lang ringring a si. Cule Samuel a ṭong tikah Israel mi pawl in an ngai duhzet.

Currently Selected:

1 SAMUEL 3: FCL

Highlight

Copy