1 SANSIARNAK 28
28
Biakinn Hrangih David Thucah Mi
1David in Israel ram sungih upa le bawi hmuahhmuah cu Jerusalem ah suak thluh dingin a kokhawm. Curuangah Israel hrin hmuahhmuah ih bawi upa pawl, Israel ram uktu bawi pawl, an hrinih hotu ciar, siangpahrang le a fapa pawl thilri le ṭilva pawl zohtu upa pawl hmuahhmuah, siangpahrang inn ih bawi pawl le ralbawi pawl le khawsung upa pawl hmuahhmuah cu Jerusalem khua ah an tongkhawm aw.
2Cun siangpahrang David cu an zate hmaiah a ding ih an hnenah, “Ka ramsung minung ulenau pawl, i ngaihnik uh! Thukam Kuang ret ringringnak dingah le Bawipa kan Pathian in a ke a retnak dingah inn pakhat sak ka tum. Pathian hminthannak hrangih biakinn saknak ah thilri pawl ka tawlrel thluh zo. 3Asinain raldotu ka rak si ih thisen tampi ka luanter zo ruangah cuih inn keimah ih sak ding cu Bawipa in i kham a si. 4Bawipa Israel ih Pathian in keimah le ka tesinfa pawl cu kumkhua in Israel uktu si dingah in hril zo. Judah hrin cu mi hotu si dingah a hril ih Judah hrin sungin ka pa ih innsang a hril. Ka pa ih innsang sungin Israel ram hmuahhmuah uktu siangpahrang dingah keimah Bawipa in i hril a si. 5Amah in fapa tampi i pe ih cuih sungin Bawipa ih uknak Israel ram siangpahrang dingah Solomon a hril.
6“Cule Bawipa in ka hnenah, ‘Ka Biakinn a satu cu na fapa Solomon a si ding. Amah cu ka fapa si dingah ka hril zo ih keimah cu a pa ka si ding. 7Ka daan le ka thupekmi ralringzet in atu vekih a thlun ringring asile a uknak cu kumkhua hrangin ka hngetter ding,’ a ti.
8“Curuangah ka ramsung mipawl, hi nan luahmi ramṭha hi nan co thei ringringnak dingah le nan tesinfa hnenah sankhat hnu sankhat nan co thei ringringnak dingah Bawipa kan Pathian ih thupekmi pawl cu fimkhur zetin nan thlun pei, tiah Bawipa ih mithmuh ah le Bawipa ih minung hih Israel mi a ra khawmmi theihhngan ah thu ka lo cah hai a si.
9“Cule nang, ka fapa Solomon, na pa ih Pathian cu ṭihzah awla lung khat nei in a thu thlun duhnak thinlung thawn a hna cu ṭuan hram aw. Amah in kan ruahnak le kan thinlung cu a zatein a thei ṭheh. A hnenih na rat a si ahcun amah in a lo pom ding; asinain na dungtun a si ahcun kumkhua in a lo thlauthla ding. 10Bawipa in a Biakinn thianghlim satu dingah a lo hril zo hi ciing ringring aw. Cuih hnaṭuan cu thok awla taimak suah in ṭuan aw,” tiah a ti.
11Cun David in Solomon hnenah Biakinn sak dingmi hrangih ruangrai zingmi pawl: Biakinn hrangah hulhliap ih ruangrai, thilri retnak khaan ruangrai, inn khaan dangdang ruangrai le sual ngaithiamnak hrangah timi Hmun Thianghlim Bik khaan ruangrai pawl cu a pek. 12A thinlung in a tumtahmi Biakinn sung a khaan pawl le a kimvel ih khaan pawl ruangrai, biakinn thilri retnak khaan le Bawipa hnenih pekmi laksawng retnak khaan ruangrai pawl tla a pek. 13Cuih hlei ah David in puithiam le Levi mi pawl an ṭuanvo zem awknak le Biakinn ih an hnaṭuan ding pawl le biakinn thilri an zohnak ding hrangih an ṭuan dingmi pawl a pek ṭheh. 14Biakinn khokheng hrangah sui le ngun a cem ding zat, 15mei-vannak pawl hrang le mei vannak ṭhuam hrangah sui le ngun a cem ding zat, 16Pathian hnenih pekmi sang pawl retnak sui cabuai le ngun cabuai pawl hrangah sui le ngun a cem ding zat kha kimtein a cah ṭheh. 17Cuih tlunah thirthul pawl, maihum pawl le khuat pawl hrangah sui hlir ziangzat a cem ding tile, pakan pawl tuahnak ah sui le ngun ziangzat a cem ding tile, 18rimhmui urnak biakṭheng le Bawipa ih Thukam Kuang tlunah an thla pharh in a ummi Cherubim #Cherubim timi cu ramsa bangtuk, vancungmi bangtuk, a lem an si ih Thukam Kuang parah thla pahnih nei in an cuantermi zuk a si. timi pawl an cuannak leng hrangah sui hlir in ziangzat a cem ding tikha feltein a cah ṭheh. 19Siangpahrang David in, “Hi hmuahhmuah cu Bawipa amah rori in a kut in a ngan ih ka hnenah tuahsuak dingih i cahmi an si,” a ti.
20Cun siangpahrang David in a fapa Solomon hnenah cun, “Hngetkhoh zet le ralṭha zetin um awla taima zetin ṭuan aw; zianghman in na thin lo nauter hlah seh. Bawipa Pathian, ka biakmi Pathian cu na hnenah a um ding. A lo dungtun lo ding ih a lo thlauthla fawn lo ding; a Biakinn sak na ṭheh hlanlo na hnenah a um ringring ding. 21Puithiam le Levi mi pawl cu Biakinn hna an ṭuan dingmi zem ṭheh an si zo. Hnaṭuantu le zungthiam a phunphun nangmah bawmtu dingah an um ih misenpi le an hotu pawl cu na thupekmi vekih ṭuan dingah an tiar-aw thluh zo a si,” tiah a ti.
Currently Selected:
1 SANSIARNAK 28: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
