1 SANSIARNAK 24

Puithiam Pawl Hnaṭuan

1Aaron tesinfa pawl cu a tanglam vekin hnaṭuan an zem aw. Aaron in fapa pali a nei ih Nadab, Abihu, Eleazar le Ithamar an si. 2Nadab le Abihu cu an pa hlanah an thi ih faate tla an neih lo ruangah an unau Eleazar le Ithamar lawng puithiam an ṭuan. 3David in Aaron tesinfa pawl cu an hnaṭuanmi tikcu caan vekin a ṭhen. Hiti a ṭhen tikah David cu Eleazar ih tefa Zadok le Ithamar ih tefa Ahimelek in an bawm. 4Eleazar tesinfa pawl cu ṭhen hleiruk ah an ṭhen ih Ithamar tesinfa pawl cu ṭhen riat ah an ṭhen. Eleazar tesinfa lakah mipa, innsang ih lubik a si mi an tam deuh ruangah ṭhen tam deuh ih an ṭhennak cu a si. 5Eleazar le Ithamar tesinfa lakah Biakinn upa le thlarau lam hotu an um fingfing ruangah hnaṭuantu dingih an ṭhen tikah camcawhfung zuk in an ṭhen. 6Eleazar tesinfa le Ithamar tesinfa pawl in a haha in camcawhfung cu an zuk. Cutiih an tuah tikah Levi mi cazi Nethanel fapa Shemaiah in cabu sungah a khum. Cule siangpahrang bawipa, a kuthnuai bawi pawl, puithiam Zadok, Abiathar fapa Ahimelek, puithiam innsang ih lubik ciar le Levi mi innsang ih lubik ciar cu theihpitu an si.

7Pakhatnak Jehoiarib,

Pahnihnak Jedaiah,

8Pathumnak Harim,

Palinak Seorim,

9Panganak Malkhijah,

Paruknak Mijamin,

10Pasarihnak Hakkoz,

Pariatnak Abiah,

11Pakuanak Jeshua,

Pahranak Shekaniah,

12Hleikhatnak Eliashib,

Hleihnihnak Jakim,

13Hleithumnak Huppah,

Hleilinak Jeshebeab,

14Hleinganak Bilgah,

Hleiruknak Immer,

15Hleisarihnak Hezir,

Hleiriatnak Happizzez,

16Hleikuanak Pethahiah,

Kulnak Jehezkel,

17Hluankhatnak Jakhin,

Hluanhnihnak Gamul,

18Hluanthumnak Delaiah,

Hluanlinak Maaziah.

19Himi pawl cu Bawipa, Israel ih Pathian thupek vekin le an pupa Aaron ih daan rettami vekin, Bawipa ih Biakinn hnaṭuantu dingah ṭhenmi an si.

Levi Mi Pawl

20Levi tesinfa pawl an hrinih lu ciar cu hihi an si: Shebuel hrin in Amram tesinfa Jehdeiah;

21Rehabiah tesinfa Isshiah;

22Shelomith hrinah Izhar tesinfa Jahath;

23Hebron hrinah a sangsang in Jeriah, Amariah, Jehaziel le Jekameam;

24Mikah sungin Uzziel tesinfa Shamir;

25Mikah unau Isshiah sungin Uzziel tesinfa Zekhariah;

26Merari tesinfa pawl Mahli, Mushi le Jaaziah. 27Jaaziah in fapa pathum a nei ih Shoham, Zakkur le Ibri an si. 28Mahli in fapa pahnih Eleazar le Kish a nei. Eleazar cu fapa a nei lo; 29Kish in fapa pakhat Jerahmeel a nei. 30Mushi cun fapa pathum Mahli, Eder le Jerimoth a nei.

Hi pawl cu Levi mi ih sungkhat pawl an si.

31An sungkhat, Aaron tesinfa puithiam pawl ih an rak tuah zo vekin an hnaṭuan dingmi hrilnakah an innsang ih lubik le a naule pawl lak ihsin mi pakhat in camcawhfung an zuk fingfing. Siangpahrang David, Zadok, Ahimelek, puithiam sungkhat ih lubik le Levi mi innsang ih lubik pawl cu a hmutu tetti an si.

Currently Selected:

1 SANSIARNAK 24: FCL

Highlight

Copy