1 SANSIARNAK 21

David In Mipum A Siar

(2 Sam 24.1-25)

1Satan in Israel parah harsatnak thlenter a duh ruangah David cu thusia a forh ih Israel mipum siar duhnak thinlung a neihter. 2Curuangah David in Joab le a ralbawi dangdang hnenah, “Israel ram khatlam deng Beersheba ihsin khatlam deng Dan tiang feh uhla mipum siar hnik uh. Minung ziangzat an um ti theih ka duh,” tiah thu a pek.

3Cutikah Joab in, “Bawipa in Israel mi pawl cu atu hnakih a let zakhat in karhzaiter hram seh! Ziangzat an va si khalle Bawipa nangmah cu an siangpahrang na si ih an zatein na sal an si ko. Ziangah so an mipum siar cu na duh? An mipum na siarsuak ngaingai asile Israel miphun cu mawhphurtu na canter ding a si!” a ti. 4Sikhalsehla David in a thu cu a ṭhin duh cuang lo. Curuangah Joab cu Israel ram pumpi hmuahhmuah ah a feh ih cuih hnuah Jerusalem ah a kir. 5Siangpahrang David hnenah cun thu a than ih, “Ralkap ṭuan thei ding lawnglawng Israel ah million khat le thawng zakhat an um ih, Judah ah thawng zali le thawng sawmsarih an um,” a ti. 6Joab in David ih thupekmi a lung a kim lo ruangah Levi mi le Benjamin mi pawl cu mipum a siar lo.

7Cuih thil an tuahmi parah Bawipa cu a lung a awi lo ih Israel pawl cu a hrem. 8Cutikah David in, “Maw Bawipa, thil ṭha lozet ka tuah ih ka sual zo a si. I ngaithiam hram aw. Aat hna ka ṭuan a si,” a ti.

9Cule Bawipa in David ih profet Gad hnenah, 10“Va feh awla David va sim aw; thil hril ding pathum ka pek. Pakhatkhat a hril pei ih cumi cu ka tuahsuak ding,” a ti.

11Gad cu David hnenah a feh ih Bawipa ih ṭongmi cu a sim, “Khuimi so na hril ding? 12Kum thum sung paam maw? Asilole na ral pawl in thla thum sung dawi le hual rero maw? Asilole ni thum sung Bawipa ralnam cu a vancungmi in hmang in Israel ram sungah natsia le thihnak thlenter maw? Pakhatkhat hril awla cumicu Bawipa ka sim ding,” a ti.

13Cutikah David in Gad hnenah, “Ka awlok a song tuk lawmmam! Asinain milai kut sungih tlak hnak cun Pathian kut sungih tlak ka duh sawn; ziangahtile Bawipa cu zaangfahnak neitu a si,” a ti.

14Curuangah Bawipa in Israel mi tlunah pulhnat a tlunter ih thawng sawm sarih an thi. 15Pathian in Jerusalem siatsuah thluh dingah vancungmi a thlah; asinain a thinlung a thleng sal ih vancungmi hnenah cun, “Cawl aw; tawk thlang seh,” a ti. Cule vancungmi cu Jebus mi Araunah ih fang ciilnak puum kiangah a ding.

16David in a hun zoh tikah van le leilung karlakah Jerusalem siatsuah dingih namsaupi thlir in vancungmi a din kha a hmu. Cutikah David le Israel mi hotu pawl cu buri puan hruk in an hmai leilung dai tiangin an kuun. 17David in, “Maw Pathian, a sualtu cu keimah ka si. Mipum siar dingih thu petu cu keimah ka si. Himi pawl in ziangso tuah sual mi an neih? Maw Bawipa, ka Pathian, keimah le ka innsang hi in hrem awla hi na minung, na tuurual hi cu luatter hram aw,” tiah thla a cam.

18Cule Bawipa ih vancungmi in Gad hnenah, “David cu feh sehla Bawipa ih hrangah Jebus mi Araunah fang ciilnak hmunah biakṭheng donseh,” tiah thu a pek. 19Bawipa ih thupekmi cu Gad ih sim vekin David cun a thlun. 20Araunah le a fapa pali cu sangvut an ciil rero. Vancungmi an hmuh tikah a fapa pawl cu an zaam ih an relh. 21Araunah in amah ih lamih siangpahrang David a rat rero kha a hmuh tikah zamrangte in a tlan ih a hmai lei dai in David hmaiah cun a kun. 22David in, “Na sangvut ciilnak hmun hi i zorh aw; Bawipa hrangah biakṭheng ka dawl duh a si. Culo cun pulhnat hi a reh lo ding. A man cu na ngenzat ka lo pe ko ding,” a ti.

23Araunah cun, “Bawipa, la ko aw; na duh vekin hmang aw. Biakṭheng parih mei-ur thawinakah hinah cawcang an um; thing hrangah puum ih donmi zial an um ih thlairawl thawinak hrangah sangvut a um ko. Ka lo pe thluh ding,” a ti.

24Asinain siangpahrang bawipa cun, “Asilo, a man kimtein ka lo pe ding. Na ta cu a lakin ka la lo ding, keimah ih a man ka pek lomi cu Bawipa ih hnenah pek ka duh lo,” a ti. 25Cule Araunah cu sui tangka fai zaruk a pek. 26Cutawkah Bawipa ih hrangah biakṭheng a dawl ih mei-ur thawinak le remawk thawinak a pek. Thla a cam ih Bawipa in a theihsak ruangah van ihsin meisa a run thlak ih biakṭheng parih a pekmi thawinak pawl cu a kang ṭheh.

27 Bawipa in vancungmi cu a namsau re sal dingin thu a pek ih a ret sal. 28Cumi cu David in a hmuh tikah Bawipa in ka thlacamnak i theih sak a si, ti a thei ih Araunah fang ciilnak hmunih a dawlmi biakṭheng parah cun thawinak a tuah. 29Bawipa ih umnak Puanthlam, Moses in ramṭhing ih a sak mi le thawinak pawl an urnak biakṭheng cu cuih caanah Pathian an biaknak hmun Gibeon ah a um laifang a si. 30Asinain David cu Bawipa bia dingah cutawkah cun a feh ngam lo; ziangahtile Bawipa ih vancungmi ih namsaupi cu a ṭih tata.

Currently Selected:

1 SANSIARNAK 21: FCL

Highlight

Copy