Matthaisioi Phrinzangpo 8

1Ni, kho de riikana babspana mibongs mangmo khoe lzaa yongs. 2Yang ltosang, rdzenjan chikchik yongse khoa rchore juid : Kasa Ashipa taqdir yerang ranna nga rtsangma rtsangdaq chhachukpa yaranga khyuded.

3Yang Yeshus laqpao rshkyangse khoa thus basena moled : Nga raned khyerang rtsangma rtsangdaq songshik! Yang dya tho khurika khoe rdzeo daq. 4Yang Yeshus khoa mols : Snanga bos khyeres sua mazer, dobasang songse kohonpoa ? kherang ston yang lloshos skalskhan de skalpo khonga chhebji chhe mingna tong!

5Dekana Yeshu Kaphernahumiangnuk skyodedna rgyarshponchik khoe shitia yongse khoa, rchore. 6Dyu zored : Kasa Ashipa ngi duksmi chhanguika khangmaa nyale/zermo rshantek yongen yod. 7Yang Yeshus khoa mols Nga yongse kho noro chhachuktuk. 8Yang rgyarshponpos tamlaniang jus Kasa Ashipa yerang ngi khangmi thoqi yoqa skyodchao nga byormoek na men dobasang yeres tam chikchik tsa molba zadang yang ngi duksmiyu noro chhok! 9Chiazerbana ngarangang yang chikchigi yoqa yodkhan yang ngari yoqaang rshmaqmiun yodkhan chik in, yang ngas de chikchipoa song zesna kho chhed, yang echikchiga yong zesna kho yonged, yang ngari tson poa de las bos zesna khos bed. 10Yang Yeshu dyu goana rgyal yang lzaa yongkhanunla mols: Chhakhika ngas khyentanga zered dinda chhopo chhesluks sheskhan chik ngaa Israeliangang mathob. 11Amma ngas khyentanga zered mangmo sharkha nang Nubkha na yongse rshnami rgyastridiang Abraham nang Isaak nang Yakob nadrese zachaa dukcha chhok. 12Amma rgyastridi buthsaun phyistaa yodkhan ṯhubiang phangcha chhok, der nguin yang so muren dukcha chhok.

13Yang Yeshus rgyarshponpoa mols : Song! Khyeres rangi chhesluks baspao na zomse khyeranga songshik! Dyana tho khurika khoe duksmiyu noro song.

14Yang Yeshu Petrosi khangmeang skyodpana Petrosi ama zgyukmo nyale thsad loqse yodpao khoa thong. 15Yang khos khoe laqpeka thus bas, yang de thsadpo lens, yang kho langse khongi jabshia duks.

16Dekana rgongs ranmana dre byarskhan mangmo khoe shitia khyongs yang khos tamchigika phings; yang khos mardea yodkhanun saq noro chhachuks.

17Ni, Esayas khyenkhani lches molcha songmao : "Nganti ngadmedilukspo khores lens, yang nganti nadun khurs" gangrgya chhe phya songsuk; 18Ni Yeshua rangi kridkhori chhopo mibongsun thongmana pharkha-a dongshik zere mols. 19Yang chhoszbrikhan chikchik shitia yongse khoa jus: Kasa Ltsabkhan yerang garang skyodna nga yeri lzaa yongnuk (ju)! 20Yang Yeshus khoa mols : Watseunla wathsangs na yod, phurkhan chhachuunla thsangs na yod amma Miwi Buthsawa rangi go kanmi malsek med. 21Ni, khoe lzadrulbakhanuniangna yang chikchigis khoa jus : Kasa Ashipa, nga snanla ngi atao kaba chhachukpa zadang. 22Amma Yeshus khoa mols: Khyerang ngi lzaa yong, shiskhanunla rangi shimiun kabchuk. 23Yang kho nayoeang skyodpana khoe lzadrulbakhanun khoe jukjukna yongs. 24Yang misto, thsoeka chhopo hlungdraqshik langs, ni, chhuzbraunis base nayowa rgyab bas, amma khoa zims yongse yodpin. 25Yang khong shitia yongso khoa zims chadchuksena juid : Kasa Ashipa ngacha laqor khomchugang ngacha shid!

26Yang khos khonga mols : Wahunik, chhesluks yangmo yodkhanun, chia jiksed? Dekana khorang langse hlungdraqpo nang thsoa zings; yang chhopo hlod song.

27Ni, de miunis rgyalena zered : Hlung nang thsosang khoe tamnyanbakhan dyu gatsuk mik in?

28Yang kho oltek pharkhaa Gorgasapauni rgyastridiang hlebana dro byarkhan mi nyis rongkhanguniangna bingen khona thuk. Doun mand draqpo yodpaos de lampos drulba sua nyanma medsuk. 29Ni, misto, khongis kustabsona zerod : Kasa Ashipi Rshras Yeshu! Ngacha yerang nadrese chi las ? Tho mahleba ngachaa naḵẖs stanma yorang dir skyodsa ? 30Ni, deka lchongun na thaqringroga phaq mangmo yodkhan thso chikchik rtsoa traden yodsuk. 31Ni, drounis Yoshua rchorona juid : Taqdir yeres ngacha phingse tangcha kaṯo inna de phaqi thsoeang ngacha jukshuk! 32Khos dounla mols : Songshik! Ni, khong bingsena de phaquni thsoeang juks. Yang ltosang phaqi thso jung shalmeangna yoqa thsoeang hyanga chhongs, yang chhuiang nubse shi. 33Amma phaqrdziun shor, yang grongdusiang songse sperao saq drebyarkhanuni rshmangpo hagochuks. 34Yang misto, yuli sharba tsoq Yeshu na suse bingse yongs, yang khongunla kho thongmana khonti rgyastridi thaa bingse skyod zere khongunis khoa rchore jus.

Currently Selected:

Matthaisioi Phrinzangpo 8: SOMA

Highlight

Copy