متّی 19

طلاق بارے یسُوع دی تعلیم

1جِیں ویلے یسُوع ایہ گالھیں کر گِھدیاں تاں او گلیل تُوں روانہ تھی تے یردن دے پار یہُودیہ دے علاقے ءچ آیا۔ 2بہُوں سارے لوک اُوندے پِچُھوں تھی پئے تے اُوں اُنہاں کُوں شِفا بخشی۔

3کُجھ فریسی اُونکُوں ازماوݨ کیتے اُوندے کولھ آ تے آکھنڑ لگے، ”کیا بندے دا آپنڑی ذال کُوں کہیں وی وجہ کنُوں چھوڑ ڈیوݨ جائز ہے؟“

4اُوں جواب ءچ آکھیا، ”کیا تُساں نئیں پڑھیا جو مُنڈھ کنُوں خالق اُنہاں کُوں مرد تے عورت بنڑایا تے آکھیا جو 5’اِیں وجہ تُوں مرد آپنڑے ماء پِیُو کنُوں اَنج تھی تے آپنڑی ذال نال راہسی تے او ہِک تَن ہوسن#پیدائش 2‏:24۔؟‘ 6بس او ڈُو نئیں بلکہ ہِک تَن ہِن۔ اِیں واسطے جِینکُوں خُدا جوڑیا ہے اُونکُوں اِنسان جُدا نہ کرے۔“

7اُنہاں پُچھیا، ”وَل مُوسیٰ ایہ حُکم کیوں ڈِتا ہے جو طلاق نامہ لِکھ تے اُونکُوں چھوڑ ڈے؟“

8یسُوع جواب ڈِتا، ”مُوسیٰ تاں تُہاڈی سخت دِلی دے سببّوں آپنڑی ذال کُوں چھوڑ ڈیوݨ دی اِجازت ڈِتی ہئی پر مُنڈھ کنُوں اِینویں نہ ہا۔ 9مَیں تُہاکُوں آدھا ہاں جو جیہڑا کوئی آپنڑی ذال کُوں اُوندی حرامکاری دے سِوا کہیں بئی وجہ کنُوں چھوڑ ڈیوے تے کہیں بئی عورت نال شادی کر گِھنے او زِنا کریندے [ تے جیہڑا کوئی اُوں چھوڑی ہوئی نال شادی کریندے او وی زِنا کریندے۔]“

10شاگرداں اُونکُوں آکھیا، ”جے مرد دا ذال نال ایجھا ای حال ہے تاں شادی نہ کرݨ ای چنگا ہے۔“

11اُوں اُنہاں کُوں آکھیا جو ”اِیں گالھ کُوں ہر کوئی قبول نئیں کر سگدا پر اُوہو جِنہاں کُوں قُدرت ڈِتی گئی ہے۔ 12کیوں جو کُجھ تاں جماندرُو شادی کرݨ دے قابل نئیں ہوندے، تے کُجھ کُوں لوکاں شادی کرݨ دے ناقابل بنڑا ڈِتے، تے کُجھ ایجھے ہِن جِنہاں اسمان دی بادشاہی دی خاطر غیر شادی شدہ راہنڑ قبول کیتا۔ جیہڑا قبول کر سگدے او قبول کرے۔“

یسُوع چھوٹے بالاں کُوں برکت ڈیندے

13اُوں ویلے لوک بالاں کُوں یسُوع دے کولھ گِھن آئے تاں جو او اُنہاں اُتے ہتھ رکھے تے دُعا ڈیوے پر شاگرداں اُنہاں کُوں جِھڑکیا۔ 14پر یسُوع آکھیا، ”بالاں کُوں میڈے کولھ آوݨ ڈیؤ تے اُنہاں کُوں نہ ہٹکو کیوں جو اسمان دی بادشاہی ایجھیاں ای دی ہے۔“

15وَل او اُنہاں اُتے ہتھ رکھ تے اُتھوں روانہ تھی گِیا۔

دولت مند جوان

16تے ڈیکھو ہِک بندہ یسُوع دے کولھ آ تے آکھنڑ لگا، ”اُستاد! مَیں کیہڑی نیکی کراں جو ہمیشاں دی زندگی حاصل کراں؟“

17اُوں اُونکُوں آکھیا جو ”تُوں مَیں کنُوں نیکی بارے کیوں پُچھدیں؟ نیک تاں بس ہِک ای ہے پر جے تُوں زندگی ءچ داخل تھیوݨ چاہندیں تاں حُکماں اُتے عمل کر۔“

18اُوں اُونکُوں آکھیا، ”کیہڑے حُکماں اُتے؟“

یسُوع جواب ڈِتا، ”خون نہ کر، زِنا نہ کر، چوری نہ کر، کُوڑی گواہی نہ ڈے۔ 19آپنڑے ماء پِیُو دی عزت کر، تے آپنڑے ہمسائے نال آپنڑے وانگُوں محبت کر#خرُوج 20‏:12‏-16۔۔“

20اُوں جوان آکھیا جو ”مَیں اِنہاں ساریاں اُتے عمل کیتا ہے۔ ہُنڑ میڈے ءچ کیہڑی گالھ دی کمی ہے؟“

21یسُوع اُونکُوں آکھیا، ”جے تُوں کامِل تھیوݨ چاہندیں تاں وَنج تے آپنڑاں سبھ کُجھ ویچ تے غریباں کُوں ڈے۔ تیکُوں اسمان اُتے خزانہ مِلسی تے آ تے میڈے پِچُھوں تھی پو۔“

22پر او جوان ایہ گالھ سُنڑ تے غمگین تھی تے چلیا گِیا کیوں جو بہُوں مالدار ہا۔

23تے یسُوع آپنڑے شاگرداں کُوں آکھیا، ”مَیں تُہاکُوں سچ آدھا ہاں جو دولت مند دا اسمان دی بادشاہی ءچ داخل تھیوݨ مُشکل ہے۔ 24مَیں وَل آدھا ہاں جو اُٹھ دا سُوئی دے نکے ءچوں لنگھ ونجنڑ، دولت مند دے اسمان دی بادشاہی ءچ داخل تھیوݨ کنُوں زیادہ سوکھا ہے۔“

25شاگرد ایہ سُنڑ تے بہُوں حیران تھئے تے پُچھنڑ لگے، ”وَل کوݨ نجات پا سگدے#19‏:25 لوکاں دے خیال ءچ دولتمند ہووݨ خُدا دی برکت دا نشان ہا۔؟“

26یسُوع اُنہاں دو ڈیکھ تے آکھیا، ”اِنسان کیتے تاں ایہ نا ممکن ہے پر خُدا کیتے سبھ کُجھ ممکن ہے۔“

27وَل پطرس اُونکُوں آکھیا، ”ڈیکھو اساں سبھ کُجھ چھوڑ تے تُہاڈے پِچُھوں تھی پئے ہیں۔ بس ساکُوں کیا مِلسی؟“

28یسُوع اُنہاں کُوں آکھیا، ”مَیں تُہاکُوں سچ آدھا ہاں جو نوِیں دُنیا ءچ جِیں ویلے اِبنِ آدم آپنڑے جلالی تخت اُتے بَہسی تاں تُساں وی جیہڑے میڈے پِچُھوں تھی پئے ہیوے بارہاں تختاں اُتے بہہ تے بنی اِسرائیل دے بارہاں قبیلیاں دا اِنصاف کریسو۔ 29تے جئیں کہیں گھراں یا بِھرانواں یا بھینڑاں یا پِیُو یا ماء یا بالاں یا رَڑھاں کُوں میڈے ناں دی خاطر چھوڑ ڈِتے اُونکُوں سو گُنا مِلسی، تے او ہمیشاں دی زندگی دا وارث تھیسی۔ 30پر بہُوں سارے جیہڑے اوّل ہِن آخر تھی ویسن تے آخر اوّل۔“

Currently Selected:

متّی 19: SKRV

Highlight

Copy