Lou2a 10
10
YASOU3 byeb3at el-tneyna-w-sab3een
1Min ba3da 3ayyan el-RAB YASOU3 tneyna-w-sab3een telmiz ghayr hawdik, w-ba3aton tnen tnen ta-yesba2ouh 3a-kell madine aw day3a 2arrar enno yrou7 3leya.
2W-2allon: "fi zar3 ktir baddo 2atf, bass el-3emmel 2lel. Sallo la-RAB el-zar3 ta-yeb3at 3emmel yo7osdoulo.
3Rou7o, ana be3etkon metl el-khwerif bayn el-dyeb.
4Ma te7emlo kees, wala zouwwede, wala sobbat, wala tsallmo 3ala 7ada bel-tari2.
5El-beyt yalle bitfouto 3le, 2oulo awwal shi: el-salem 3a-hal-beyt.
6W-eza ken fi honik 2eben salem, salemkon bi7ell fih, wa-ella byerja3 el-salem elkon.
723edo bi-hal-beyt, kelo w-shrabo min yalle 3endon yeh, li2anno el-fe3il byest7e2 ejerto, w-ma tene2lo min beyt la-beyt.
8El-madine yalle bitfouto 3leya w-ahla bye2baloukon, kelo min yalle bi2admoulkon yeh.
9Shfou mardahon w-2oulo: malakout ALLAH 2arrab.
10Wel-madine yalle bitfouto 3leya w-ahla ma bye2baloukon, tla3o 3ala tor2ata w-2oulo:
117atta el-ghabra yalle 3el2a bi-ejreyna min madinetkon mnenfeda. Bass 3rafo enno malakout ALLAH 2arrab.
12B7ebb 2elkon: Sour w-Sayda ra7 ykoun massiron bi-yawm el-deynoune ar7am min massir hal-madine.
El-moudon el-kefra
132al YASOU3: "ya weylik ya Kourazin! Ya weylik ya Beyt-Sayda! Law el-3ajeyeb yalle saro 3endkon, ysiro bi Sour w-Sayda, keno ahla tebo min zamen w-lebso el-mes7 w-2a3ado 3al-rmed.
14Bass Sour w-Sayda ra7 ykoun massiron bi-yawm el-deynoune ar7am minkon.
15W-ente ya Kfarna7oum, baddik tousale bel-2ouwwe 3al-sama? Ra7 tou2a3e 3a-jhannam."
16W-2al YASOU3 la-tlemizo: "yalle byesma3elkon byesma3le. W-yalle rafadkon rafadne, w-yalle rafadne rafad yalle ba3atne."
Roujou3 el-tneyna-w-sab3een
17W-rej3o el-tneyna-w-sab3een rasoul mabsoutin w-2alo la-YASOU3: "ya RAB, 7atta el-shyateen khada3oulna bi-esmak."
182allon: "ana kent sheyif el-shaytan we2i3 min el-sama metl el-bar2.
193titkon soultan ted3aso el-7ayyet wel-3a2areb w-kell 2ouwwe lal-3adouw, bidoun ma yserelkon shi.
20Bass ma tefra7o bi-enno el-arwe7 3am yokhda3oulkon, bel-3aks, fra7o bi-enno asamikon maktoube bel-sama."
YASOU3 bihallel
21W-bi-haydik el-se3a feri7 YASOU3 bel-ROU7 el-2ODOS, w-2al: "bishekrak ya Bayye, ya RAB el-sama wel-ard, li2annak khfit hal-eshya 3an ahl el-7ekme wel-azkiya, w-bayyanta lal-zghar. Eh, ya bayye, enta hek baddak.
22Bayye sallamne kell shi. Ma 7ada bya3rif meen bikoun el-2eben ella el-ãb, wala meen bikoun el-ãb ella el-2eben w-yalle baddo el-2eben enno yenkashaf la-elo."
23W-ltafat sawb tlemizo, w-2allon minnon elo: "niyyel yalle bi-shouf yalle ento 3am bitshoufouh!
24B7ebb 2elkon: ktar min el-anbiya wel-moulouk tmanno yshoufo yalle ento 3am bitshoufouh w-ma shefouh, w-enno yesma3o yalle ento 3am tesma3ouh w-ma sem3ouh."
Matal el-Semiri el-sale7
25W-2am wa7ad min 3oulama el-shari3a, w-2al la-YASOU3 ta-ye7erjo: "ya mou3allim, shou badde a3mil ta-ourat el-7ayet el-abadiyye?"
26Jewabo YASOU3: "shou bit2oul el-shari3a? W-keef btefhama?"
272al el-rejjel: "7ebb el-RAB Ilehak min kell 2albak, w-min kell nafsak, w-min kell 2ouwwtak, w-min kell fekrak, w-7ebb 2aribak metl ma bit7ebb 7alak."
282allo YASOU3: "jawebak mazbout. 3mol hal-shi bitle2e el-7ayet."
29Bass mou3allim el-shari3a sar baddo ybarrir 7alo, 2al la-YASOU3: "w-meen houe 2aribe?"
30Jewabo YASOU3: "ken fi rejjel nezil min Ourashalim la-Ari7a, wa2a3 bayn 2iden lsous, shalla7ouh tyebo w-darabouh, w-min ba3da tarakouh bayn mayyit w-3ayish.
31W-se2abet enno meri2 kehen nezil min haydik el-tari2, lamma shefo bay3ad 3anno w-kaffa tari2o.
32W-nafs el-shi sar ma3 wa7ad lawi, eja w-shef el-rejjel bay3ad 3anno w-meshe bi-tari2o.
33Bass ken fi Semiri msefar mara2 min honik, w-lamma shefo shef2 3le.
342arrab minno w-sakab zeyt w-nbeed 3ala jrou7ato, w-7emlo 3ala 7maro w-jebo 3ala hotel w-htamm fih.
35W-tene nhar talla3 el-Semiri dinaren, w-dafa3on la-sa7ib el-hotel w-2allo: htamm fih, w-shou ma sarafet zyede breddellak yehon wa2et berja3.
36Ayya wa7ad min hal-tlete ken bi-ra2yak 2arib yalle wa2a3 bi-2iden el-lsous?"
37Jewabo mou3allim el-shari3a: "yalle ra7amo." 2allo YASOU3: "rou7 w-3mol enta metlo."
YASOU3 3end Marta w-Maryam
38W-henne w-meshyin, fet YASOU3 day3a, w-sta2baleto bi-beyta mara esma Marta.
39W-ken 3enda ekht esma Maryam, 2a3adet 3end ejren el-RAB YASOU3 ta-tesma3 kalemo.
40W-kenit Marta mashghoule bel-khedme wel-diyafe, ejet w-2alet la-YASOU3: "ya RAB, mish sheyif enno ekhte terketne ekhdom wa7de? 2ella tse3edne!"
41Jewaba el-RAB: "Marta, Marta, ente 3am tehtamme w-te3ej2e 7alik bi-eshya ktire,
42ma3 enno el-matloub shaghle we7de. Maryam na'2et el-shi el-afdal, w-ma 7ada ra7 yekhdo minna."
Currently Selected:
Lou2a 10: BB3arabe
Highlight
Share
Copy
Want to have your highlights saved across all your devices? Sign up or sign in
Lebanese.bible © 2024 Bible Society Lebanon
Bible Society street Bible Society Center Sed El Bouchryeh Beirut - Lebanon P.O.Box: 11-0747 Riad El Solh, Beirut 1107 2060, Lebanon
All Rights Reserved.
