You7anna 7
7
YASOU3 w-ekhweto
1Min ba3da meshe YASOU3 bel-Jaleel, w-ma 2ebl yemshe bel-Yahoudiye, li2anno el-Yahoud keno baddon ye2etlouh.
2W-lamma 2arrab 3id el-khyem 3end el-Yahoud,
32aloulo ekhweto: "trok hal-matra7 w-rou7 3al-Yahoudiye 7atta yshoufo el-tlemiz a3melak,
4ma 7ada byeshteghil bel-mekhfe eza baddo enno el-nes ya3erfouh. W-ma zelak 3am ta3mil hal-a3mel, kshof 7alak lal-3alam."
5W-keno ekhweto nafson ma bi2ãmno fih.
62allon YASOU3: "ma eja wa2te ba3d. Baynama ento, el-wa2et 3atoul houe wa2etkon.
7Ento ma byobghedkon el-3alam, bass byobghedne ele li2anno 3am besh'had 3ala fased a3melo.
8Tla3o ento, w-ana ma ra7 etla3 3al-3id, li2anno wa2te ma eja ba3d."
92allon hal-shi w-be2e bel-Jaleel.
YASOU3 bi-3id el-khyem
10W-lamma tel3o ekhweto 3al-3id, toli3 min ba3don bel-mekhfe bidoun ma yshoufouh.
11W-keno el-Yahoud 3am bifattsho 3le bel-3id w-3am yes2alo: "wayno?"
12W-sar jidel ktir 7awlo, nes y2oulo: "hayda rejjel sale7." W-ghayron y2oulo: "la2, hayda 3am yekhda3 el-sha3b."
13W-ma 7ada 7eke 3anno bi-sawt 3ale li2anno khafo min rou2asa el-Yahoud.
14W-ken el-3id sar bi-nosso, toli3 YASOU3 3al-haykal w-sar y3allim.
15T3ajjabo el-Yahoud w-2alo: "keef bya3rif el-ketob el-m2addase, w-ma t3allam?"
16Jewabon YASOU3: "ta3lime mish min 3ende, ta3lime min 3end yalle ba3atne.
17Yalle bya3mil iradet ALLAH, byar3if eza hal-ta3lim min 3end ALLAH w-enno ma 3am be7ke min 3ende.
18Yalle bye7ke min zeto byetlob el-majd la-7alo, bass yalle byetlob el-majd la-yalle ba3ato, houe sade2 w-ma fiyo ayya ghesh.
19Mish Moussa houe yalle 3atakon el-shari3a? W-ma 7ada minkon 3eml fiya. Leysh badkon te2etloune?"
20Jewabo el-nes: "enta fik shaytan, meen baddo ye2etlak?"
212al YASOU3: "ma 3melt ella 3amal wa7ad, w-t3ajjabto kellkon.
222amarkon Moussa bel-khatn, w-ma ken el-khatn min Moussa, ken min el-bayyet, fa-serto tekhetno el-2ensen yawm el-sabt.
23Eza kento btekhetno el-2ensen yawm el-sabt ta-ma tkhelfo shari3et Moussa, keef bteghdabo 3leyye li2anno shafet 2ensen kello sawa yawm el-sabt?
24Ma te7ekmo 3al-mazaher, 7kemo bel-3adl."
YASOU3 houe el-MASI7?
252alo nes min ahl Ourashalim: "mish hayda houe yalle baddon ye2etlouh?
26Shoufo keef 3am ye7ke bi-sawt 3ale eddem kell el-nes w-ma 3am bi2ouloulo shi. Awlkon 2tana3o el-rou2asa enno houe el-MASI7?
27Bas ne7na mna3rif min wayn eja hal-rejjel. Baynama el-MASI7, ma 7ada bya3rif lamma byeje min wayn jeye."
282al YASOU3 bi-sawt 3ale houe w-3am bi3allim bel-haykal: "ento bta3erfoune w-bta3erfo min wayn ana, bass ana ma jeet min 3ende. Yalle ba3atne houe 7a2i2a, w-ento ma bta3erfouh.
29Bass ana ba3erfo, li2anno min 3endo jeet, w-houe yalle ba3atne."
30W-ken baddon yekemshouh, bass ma madd 7ada 2ido 3le, li2anno se3to kenit ma ejet ba3d.
31Bass ktar min el-nes 2ãmano fih w-2alo: "awlkon ra7 ya3mil el-MASI7, lamma yeje, 3ajeyeb aktar min ma 3eml hal-rejjel?"
32W-sem3o el-ferrisiyyin enno el-nes 3am ye7ko 3al-wate bi-hal-eshya 3an YASOU3, fa-ba3ato henne w-rou2asa el-kahane 7aras ta-yekemshouh.
332al YASOU3: "ra7 eb2a ma3kon wa2et alil, w-min ba3da ra7 rou7 la-3and yalle ba3atne.
34Ra7 tetolboune w-ma ra7 tle2oune, w-matra7 ma bkoun ana ma bte2daro ento tejo."
352alo el-Yahoud bayn ba3don: "la-wayn raye7 hayda, w-ma mne2dar enno nle2ih? Awlkon baddo yrou7 la-3and el-Yahoud el-mshattatin bayn el-Youneniyyin la-y3allim el-Youneniyyin?
36Shou 2asdo lamma 2al: ra7 tetolboune w-ma ra7 tle2oune, w-matra7 ma bkoun ana ma bte2daro ento enno tejo?"
Anhar may 7ayy
37We2f YASOU3 bi-ekher yawm min el-3id w-houe ahamma yawm, w-2al bi-sawt 3ale: "eza 7ada 3otsh, yeje la-3ande ta-yeshrab.
38W-yalle bi2ãmen fiyye, metl ma 2al el-kteb, byetfajjar min sadro anhar may 7ayy."
39W-2asad bi-kalemo el-rou7 yalle ra7 yekhdo el-mou2minin fih, li2anno el-rou7 ma ken n3ata la-7ada ba3d, li2anno YASOU3 ma ken ba3d tmajjad.
In2isam el-ra2y bi-YASOU3
40W-2alo ktar min yalle sem3o kalem YASOU3: "7a2i2atan hayda houe el-nabe."
41W-fi ghayron 2alo: "hayda houe el-MASI7!" w-2alo ghayron: "awlkon min el-Jaleel ra7 yeje el-MASI7?
42Mish el-kteb 2al enno el-MASI7 byeje min sleelet Daoud, w-min Beyt-La7m madinet Daoud?"
43W-n2asam ra2y el-nes fih.
44W-ken fi nes baddon yekemshouh, bass ma 7ada madd 2ido 3le.
45W-rej3o el-7aras la-3and rou2asa el-kahane wel-ferrisiyyin, yalle 2aloulon: "leysh ma jebtouh la-hon?"
46Jewabo el-7aras: "wala 2ensen min abl 7eke metl hal-rejjel!"
472aloulon el-ferrisiyyin: "khada3kon kamen elkon?
48Shefto shi wa7ad min el-rou2asa aw el-ferrisiyyin 2ãman fih?
49W-kell el-be2yin yalle ma bya3erfo el-shari3a, el-la3ne 3leyon."
502al Nikodimos, w-ken min el-ferrisiyyin, w-houe yalle eja min abl la-3and YASOU3:
51"shari3etna bte7kom 3ala 7ada abl ma tesma3o w-ta3rif shou yalle 3emlo?"
52Jewabouh: "ma tkoun enta kamen min el-Jaleel? Fattesh bitle2e enno ma fi nabe byetla3 min el-Jaleel."
53[Min ba3da fallo kellon 3ala byouton].
Currently Selected:
You7anna 7: BB3arabe
Highlight
Share
Copy
Want to have your highlights saved across all your devices? Sign up or sign in
Lebanese.bible © 2024 Bible Society Lebanon
Bible Society street Bible Society Center Sed El Bouchryeh Beirut - Lebanon P.O.Box: 11-0747 Riad El Solh, Beirut 1107 2060, Lebanon
All Rights Reserved.
