मर्कूस 14

येशूला सेताला ठो खाबाते

(मत्ती २६:१-५; लूका २२:१-२; यूहन्‍ना ११:४५-५३)

1थेमे निस्‍तार चाडताङ सोडा मुलुबा खाला स्‍योबेन स्‍येला साच्‍येते चाड ओङाला ङीमा ङिकामा बाँकी ओतान। थे बेलालाराङ छ्ये छ्ये पूजारीताङ धर्मे गुरूओनचेन चुक खाला मि सुङगीङ थाहा मेङेता खाला येशूला जुम्‍ला सेता थुबोङा सिन मौका तेइन ओतान। 2थेला सेत्‍च्‍ये ठो खिन थेबेकी “दि चाडगी बेलाला ङुरूङगी थेला सेता मेङगो। चाडगी बेलाला थोक खासीन मिओनगी हूलदङ्गा खाओङ,” सिन सासुङ।

फेम्‍मे मिज्‍यीगी येशूला मान खाबाते

(मत्ती २६:६-१३; यूहन्‍ना १२:१-८)

3थेमे येशू बेथानीदु शिमोन सिराते जेबो खाम्‍बादु देत्‍ला साप सेइन ओते बेलाला फेम्‍मे मिज्‍यीक सिसी खाङ आउदी स्‍यीम्‍बु बास्‍ना चले खित्‍च्‍येते मोर्गु खुरगीन थेरू लिच्‍युङ। थे आउदी महँगोते सक्‍कलीते मोर्गु ओतान। थेमे थेकी येशूला मान खिन सिसी च्‍यागीन थे मोर्गु जति गाङे थे गोःनामा पुकीन बिन्‍सुङ। 4थेकी थोक खाबा थोङगीन थेरू ओताते कोई कोई मि थेत्ताङ स्‍येदाङ खिन “फाबा थोक महँगो जा दिकी च्‍यिला दोक खाईन नाश ताङसुङा? 5दि च्‍वाबा ईन्‍सीन चाँदी डबल सय सुम भन्‍दाङ ल्‍हाक्‍पा पैसा ङेत्‍च्‍या ओतान। थेमे थे पैसा दुक्‍पा ङेताते मिओनला गोकीन बिन्‍दा ईन्‍सीन लेमु ओङच्‍या ओतान,” सिन थे फेम्‍मे मिला आउदी खाईन ङारसुङ। 6थोक स्‍येदाङ खाईन थेबेकी थे फेम्‍मे मिला ङारा थोङगीन येशूकी थेबाला “ख्‍योकोन च्‍यिला दिला दोक खाला थाप्‍कीते? दिला माङार। दिकीनी ङाला खिता सोई खित्‍च्‍येते कामराङ खाबाते ईन। 7दुक्‍पा ङेताते मिओननी सधैँ ओत्‍कीन ओत। थेमे ख्‍योकोनगी थेबाला तेरा चालाते जहिलेङ तेरा थुप्‍क्‍यो। ङानी था काल्‍बासाक ख्‍योकोनताङ देत्‍च्‍येते मेन। 8ङा स्‍यिनामेई ङे रोला कुता फाप्‍च्‍येते मोर्गु दि फेम्‍मे मिकी थरिङराङ कुकीन बिन्‍गीन ङाला सासगास खिताला ठीक खाबाते ईन। दिकी ङाला दि मोरोङगी खिता थुप्‍च्‍याज्‍यीक खासुङ। 9ङा ख्‍योकोनला च्‍यि सिते सासीन था दि सा लुङबा खाङ मिओनला गा लाङच्‍येते बात लोप्‍जीन दि फेम्‍मे मिलाङ सम्‍झे खिन दिकी थरिङ खाबाते काम लेमुते काम ईन सिनोङ गाङेपा लोप्‍क्‍यो,” सिन सिदुक।

यहूदा इस्‍करियोतकी चुक खासुङा

(मत्ती २६:१४-१६; लूका २२:३-६)

10थेमे येशू चेला च्‍युन्‍ङी नाङ यहूदा इस्‍करियोत छ्ये छ्ये पूजारी ओत्‍सादु गाल्‍सुङ। थेमे येशूला थेबे लाःक्‍तु सोम्‍पे खिता थुप्‍क्‍यो सिन बात खासुङ। 11थे बात थोकीन थेबाला आउदी गा लासुङ। थोक खासीन थेला थेबेकी पैसा तेरग्‍यो सिन सासुङ। थेबाताङ ठो खाईन गाल्‍नामेई थेकी था च्‍यि छोमु येशूला जिन ज्‍युता थुप्‍कीका सिन मौका तेइनराङ देत्‍सुङ।

निस्‍तार चाडगी भोज ठीकठाक खाबाते

(मत्ती २६:१७-१९; लूका २२:७-१३)

12थेमे सोडा मुलुबा खाला स्‍योबेन स्‍येला साच्‍येते चाड ख्‍योला ओतान। थे चाडगीते गोमे छोमु निस्‍तार चाड माने खिताला लुई रीउ सेता फाप्‍कीन ओतान। थेमे चेलातेबेकी येशूला “गुरू, ङ्योकोनगी खोल्‍ला सिन निस्‍तार चाडगी भोज खापा गाल्‍ला ठीक खिसे, ङ्योकोन खापा ग्‍युगे?” सिन ठिसुङ। 13थेमे थेकी चेलातेबा मेरा ङिला “ख्‍योकोन दुरूकी सारनापा ग्‍युक। सारदु लेप्‍नामेई ख्‍योकोनगी गरीला छ्यु खुरला डुइन ओताते ख्‍योओ मिज्‍यीकला ठेत्‍क्‍यो। ख्‍योकोन थे मि तिरी तिरी ग्‍युक। 14थेमे थे मि खाङ खाम्‍बे नाङ स्‍यूइका थेरूराङ स्‍यूला थे खाम्‍बे धनीला ‘गुरूताङ ङ्योकोन देत्‍ला निस्‍तार चाडगी भोज साच्‍येते कोठा खाङ ईन्‍देलो सिन गुरूकी खोल्‍ला ठिलो,’ सिन सि। 15थेमे ख्‍योकोनला थेकी देताला जेसुकै ठिक्‍क ओताते ताले लाकने जोदाज्‍यीक कोठा तेन्‍ला तेरग्‍यो। भोज साप्‍ला जेसुकै ख्‍योकोनगी थेरूराङ ठीक खि,” सिन थेरूकी ताङसुङ। 16सारनापा डोजीन थेबा ङिबोकी येशूकी साबा च्‍योकराङ खाईन मि ठेत्‍कीन गाङे बात थेकी साबा च्‍योकराङ ओङसुङ। थोक खाईन थेबेकी भोज साप्‍ला जेसुकै ठीकठाक खासुङ।

येशूकी प्रभु भोज साच्‍येते शुरू खाबाते

(मत्ती २६:२०-३०; लूका २२:१४-२३)

17थेमे नाम स्‍योनामेकी येशूताङ थे चेलातेबा मेरा च्‍युन्‍ङी भोज साप्‍ला ठीकठाक खाबाते खाम्‍बादु लेप्‍सुङ। 18थेमे थेरू साप सेइन सेइनलाराङ येशूकी थेबाला “ङा ख्‍योकोनला बातज्‍यीक सिओ। च्‍यि सासीन ख्‍योकोन नाङ दोक्‍पोईकी था ङाला धोका तेरग्‍यो। थेचेन थाल्‍ला ङात्ताङ ङ्योम्‍बुराङ देत्‍ला सेइन ओत,” सिन सिदुक। 19खोपरोङ नाङ दोक्‍पोईकी थेला थोक खिओ सिरजीन थेबाला आउदी मेलेबा लासुङ। थेमे थोक खित्‍कान्‍ते खोपरोङ नाङ सु ईन्‍ताका सिन “प्रभु, खोल्‍ला थोक खित्‍कान्‍ते ङानी मेन्‍दाना?” सिन रेरे रेरे खाईन ठाप्‍ला स्‍यूसुङ। 20थोक खित्‍जीन थेकी “ख्‍योकोन मेरा च्‍युन्‍ङी नाङ दोक्‍पोई ईन। थेकी थाल्‍ला ङात्ताङ पालोईला छाप्‍टो नाङमा स्‍योबेन पाबा ओत। ङाला धोका तेरकान्‍ते होथेराङ ईन। 21परमेश्‍वर ओत्‍सादुई वाबाते मि ङानी परमेश्‍वर बातला टिबा ओताच्‍योक खाला स्‍यापराङ फाप्‍क्‍यो। थोक ईन्‍सीनोङ ङाला धोका तेरकान्‍ते मिकी ज्‍यीबा लाङच्‍याई सजाय ङेत्‍क्‍यो। बरू थेनी केराङ माकेबा ईन्‍सीन लेमु ओङच्‍या ओतान,” सिन सिदुक।

22थेबा गाङेराङ सेइनराङ ओतान। थेजीनराङ येशूकी स्‍योबेनज्‍यीक लाःक्‍तु लाकीन थे लाईदु परमेश्‍वरला धन्‍यवाद बिन्‍सुङ। थोक खानामेई थेकी थे स्‍योबेन च्‍यागीन “लो या, दि सो। दिचेन ङे जीउ ईन,” सिनकामा चेलातेबाला गोकीन बिन्‍सुङ। 23थोकराङ खाईन अंगूर छ्याङ लुक्‍पाते कचौराज्‍यीक लाःक्‍तु लाकीन थेकी थे लाईदुङ परमेश्‍वरला धन्‍यवाद बिन्‍सुङ। थेमे थेङ थेबाला “लो या, दिङ थुङ,” सिन बिन्‍नामेई थेबा गाङेकी पालो पालो खाईन थुसुङ। 24थे थुङा तेरगीन थेकी “दिचेन ङे ठाक ईन। मि काल्‍बेई लाईदु स्‍यिजीन ङे जीउदुकी थेन्‍दाते ठागी खित्‍सादु परमेश्‍वरगी मिओनताङ तिरी खिओ साबाते जमान पूरो खित्‍च्‍येते ईन। 25दि बात ङेन। परमेश्‍वर राज्‍य पूरो मायाङथुपचेन ङा याङराङ नोमुङ अंगूर छ्याङ मुथुङो। थे राज्‍य पूरो ओङनामेकीकामा ङा याङराङ अंगूर छ्याङ थुङगो,” सिन सिदुक। 26थेरूई परमेश्‍वरला छ्ये जोच्‍येते भजन लाकीन च्‍याकीन थेबाबरी जैतुन बोमनापा गाल्‍सुङ।

येशूकी पत्रुसकी थे खोरोङला चुक खिते सिन साबाते

(मत्ती २६:३१-३५; लूका २२:३१-३४; यूहन्‍ना १३:३६-३८)

27थेमे थेकी चेलातेबाला “था ख्‍योकोन गाङेकी ङाला ताङला छ्योङगो। थोक ओङगो सिन परमेश्‍वर बातला परमेश्‍वरगी ‘ङा गोठालाला सेत्‍क्‍यो, थेला सेत्‍नामेई लुकओनचेन जतासुकैपा छरपुट्ट डुइओ,’ सिन साबा ओत।#जकरिया १३:७ 28थोक ईन्‍सीनोङ ख्‍योकोन ज्‍यीबा माकेत। ङा स्‍यिसादुकी सोम्‍बो लोक्‍नामेकी याङराङ ख्‍योकोनला ठेताला ख्‍योकोन भन्‍दाङ गोमा गालीलपा डुइओ,” सिन सिदुक। 29गाङेकी ताङला छ्योङगो सिरजीन पत्रुसकीचेन “गुरू, ज्‍येन गाङेकी खोल्‍ला ताङगीन छ्य्‌वासीनोङ ङाचेन खोल्‍ला तोङराङ मोतोङो,” सिन सिदुक। 30पत्रुसकी थोक सिरजीन थेकी “पत्रुस, खो दोक छ्ये खाला बात माकेत। था ङोमु पाखे छ्योबो बाजि ङि फोत फोतसाकला पालो सुम ज्‍येन मि दोन्‍दु खुई ङाला ङोराङ मेस्‍येओ सिन सिओ,” सिन सिदुक। 31थोक सिरजीन झन फिरगीनकामा पत्रुसकी “मेन मेन गुरू, ङा खोत्ताङ स्‍यापराङ फाप्‍सीनोङ खोल्‍ला ङो मेस्‍येओ सिनचेन नोमुङ मिसिरो,” सिन सिदुक। ज्‍येन चेलातेबेकीङ गाङेकी पत्रुसकी साबा च्‍योकराङ सासुङ।

येशूकी गेतसमनीदु खाबाते प्रार्थना

(मत्ती २६:३६-४६; लूका २२:३९-४६)

32थेमे चेलातेबाताङराङ येशू जैतुन बोमदु गेतसमनी सिरसादु लेप्‍सुङ। थेरू लेप्‍नामेकी थेकी थेबाला “लो ख्‍योकोन दुरूराङ देत, ङाचेन गाल्‍ला परमेश्‍वरला प्रार्थना खितामीन,” सिन सिदुक। 33थोक खाला डोजीन थेकी पत्रुस, याकूबताङ यूहन्‍नालाचेन ङ्योम्‍बुराङ खेरसुङ। थे खोरोङला था चुक दुक्‍पा ओङगीते सिरच्‍ये ज्‍यीबाताङ पीरगी खित्‍सादु थेजीन थेते सेमोङ स्‍यिइन सिन्‍दा ओतान। 34थेमे थेकी थेबा सुमबोला “था ङाराङला चुक दुक्‍पा ओङगीते सिरच्‍ये पीरगी खित्‍सादु ङे सेम छोकीन सिन्‍सुङ। ख्‍योकोन ङात्ताङ र्‍वा खिन दुरू जागोराङ देत,” सिन साकीन 35थे खोरोङचेन टिक्‍पी फजेकपा गाल्‍गीन खोबुकला देत्‍कीन था थे खोरोङला ओङा खाबाते दुक्‍पा भोगे खिता माफाप्‍सीन ओङच्‍या ओतान सिन परमेश्‍वरला प्रार्थना खिताला स्‍यूसुङ। 36थेकी “आबा, खुई खिता मुथुप्‍च्‍येते काम छ्याःङ मेत। थुप थुपला दि ओङा खाबाते दुक्‍पा ङे भोगे खिता माफाप्‍सीन ओङच्‍या ओतान। ईन्‍सीनोङ ङे थोक माक्‍याबाला मेङगो सासीन ङे साबाच्‍योक मेन्‍दाला आबा खुई साबा च्‍योकराङ ओङस्‍यीत,” सिन प्रार्थना खासुङ।

37प्रार्थना खाला चेलातेबा सुमबो ओत्‍सादु ग्‍युरजीन थेबाचेन ङिक गाला ओता थोङसुङ। थेमे थेकी पत्रुसला “शिमोन, च्‍यि खो ङिक गालाप? खो ङात्ताङ र्‍वा खिन घण्‍टाज्‍यीगोङ लाकीन देता माथुप्‍सुङ?” सिन 38थेबा गाङेला “ख्‍योकोन च्‍याङबो खाला देत। था दि दुक्‍पे बेलाला खेराङगी ङाला विश्‍वास खिनराङ देता थुप्‍स्‍यीत सिन परमेश्‍वरला प्रार्थना खि। ख्‍योकोन लेमु खिता छोल्‍गीदुक। तर खेराङगी खिता चालाच्‍योक खिता मुथुप्‍तुक,” सिन सिदुक। 39थेमे थे याङराङ गाल्‍गीन लोईन गोमा खाबाते प्रार्थनाराङ खासुङ। 40लोक्‍ला थे थेरू ग्‍युरला ओङजीनोङ थेबा सुमबो ङिकराङ गाल्‍गीन देता ओतान। ङिगी जाप्‍की खित्‍सादु थेबेकी मिगोङ बेता थुपा मेतान, थेत्ताङ लेमु खाला बात खिताङ थुप्‍कीन मेतान। 41तिरी पालोला प्रार्थना खाला ग्‍युरला ओङजीन थोरूमोङ थेबा सुमबो ङ्याल्‍गीनराङ देता ओता थोङगीन थेकी “च्‍यि ख्‍योकोन थोरूमोङ ङ्याल्‍गीनराङ देता ओत? थोरूमोङ ङ्याल्‍गीन मादाङसुङ? थानी ङेते दुक्‍पे बेलाङ लेप्‍कीन सिन्‍सुङ। था परमेश्‍वर ओत्‍सादुई वाबाते मि ङा पापीओन लाःक्‍तु फाप्‍कीन सिन्‍सुङ। 42लो ल्‍वा, था डुइ उ थोङसुङ? ङाला धोका तेरकान्‍ते मि देपा ओङगीनराङ दुक,” सिन सिदुक।

येशूला पक्रे खाबाते

(मत्ती २६:४७-५६; लूका २२:४७-५३; यूहन्‍ना १८:३-११)

43दि बात खिन खिनलाराङ थे खोरोङ चेला च्‍युन्‍ङी नाङ यहूदाचेन तरवार जेरातेताङ फेर्का खुराते हूलज्‍यीक मि टीकीन थेबे गोमा गोमा थेरू ख्‍योल्‍सुङ। थेत्ताङ ओताते मिओनला छ्ये छ्ये पूजारी, धर्मे गुरूओन थेमे यहूदीओनते ज्‍येनोङ छ्ये छ्ये मिकी ताङा ओतान। 44थोक खाला थेला धोका तेरकान्‍ते यहूदेकी थे खोरोङताङ डोकान्‍ते मिओनला गोमाकाराङ “ङे गाल्‍गीन पुक खाबाते मिलाराङ ख्‍योकोनगी जुम्‍ला फ्रो मुज्‍युता खाला खेर, येशू थेराङ ईनो,” सिन साबा ओतान। 45थोगी थेकी ज्‍येनतोक बात छ्याःङ मिक्‍किता खाईन येशू खादु गाल्‍गीन “नमस्‍ते गुरू,” सिनकामा थेला पुक खासुङ। 46थेमे थे मिओनगी येशूला दाक जुम्‍सुङ। 47थोक खाला जिन्‍दा थोङकान्‍तेबे नाङ दोक्‍पोईकीचेन तरवार ओक थेन्‍गीन गाङे भन्‍दा छ्येते पूजारी योक्‍पोला ग्‍याप्‍कीन थेते नामज्‍योकराङ बेत च्‍येत्‍कीन ताङसुङ। 48थे खोरोङला जिन्‍जीन येशूकी थे मिओनला “ङाला जिन्‍दाला च्‍यिला तरवार जेरगीन थेमे फेर्का खुरगीन ओङा फाप्‍सुङारो? च्‍यि ङा डाँका ईनरो? 49ङीमे ठाङमा ङानी ख्‍योकोनताङराङ परमेश्‍वर मन्‍दिर नाङला देत्‍ला मिओनला लोप्‍कीन ओतान, मेन? थेजीनराङ ख्‍योकोनगी ङाला जिन्‍दा थुप्‍च्‍या ओतान तर माजुम्‍सुङ। परमेश्‍वर बात खित्‍कान्‍तेबेकी टिबाते बात साबाच्‍योक ओङालाराङ दि गाङे दोक दोकराङ ओङाते ईन,” सिन सिदुक। 50थेकी दि बात साकीन सिन्‍नामेई चेलातेबाचेन गाङे थेला ताङगीन छ्य्‌वासुङ। 51थेला जुम्‍ला खेरजीन स्‍याराते मिज्‍यीक थे तिरी तिरी गाल्‍सुङ। थेकी गाज्‍यीक खोन्‍दा ओतान। येशूला जुम्‍ला खेरकान्‍ते मिओनगी थेङ येशू मि ईन्‍दा च्‍यिन्‍दा सिन जुम्‍सुङ। 52जिन्‍जीन थे खोरोङगी खोन्‍दाते गाङ क्‍युरगीन स्‍योरगीन थे पेर्दुङबाराङ छ्य्‌वासुङ।

येशूला यहूदीओन छ्ये छ्ये मि दोन्‍दु क्‍यालाते

(मत्ती २६:५७-६८; लूका २२:६६-७१; यूहन्‍ना १८:१२-१३,१९-२४)

53थेमे थे मिओनगी येशूला गाङे भन्‍दा छ्येते पूजारी खाम्‍बादु क्‍याल्‍सुङ। थेरू छ्ये छ्ये पूजारी, यहूदीओन छ्ये छ्ये मि थेमे धर्मे गुरूओन गाङे जम्‍मा ओङगीन देता ओतान। 54थोक खाला थेला थेपा खेरजीन पत्रुसोङ थेबेकी मोथोङा खाईन थेबे तिङ ङ्योगीन गाल्‍गीन थे खाम्‍बे स्‍याङकादुराङ लेप्‍सुङ। थेमे थे खाम्‍बे पालेओनताङ ङ्योम्‍बुराङ देत्‍कीन मे दाप्‍ला स्‍यूसुङ।

55थेमे थेरू रूबाते छ्ये छ्ये पूजारी, धर्मे गुरूओन थेमे यहूदीओनते ज्‍येनोङ छ्ये छ्ये मि गाङेकी थेला सेता फाप्‍च्‍येते थेते खइँदा गल्‍ती थेप्‍कीता सिन मि काल्‍बेईला साक्षी बके खित च्‍युत्‍सुङ। थोक खासीनोङ थेते छ्याःङ गल्‍ती देन्‍दा माथुप्‍सुङ। 56ईन्‍दानी थे साक्षी बके खित्‍कान्‍ते मिओनगी दिकी दोक दोक खाबाते ईन सिन थेकी खाराङ माक्‍याबाते बात काल्‍बेई खासुङ। ईन्‍सीनोङ थेबेकी साबाते बात खोपरोङ नाङराङ माडिक्‍सुङ। 57थोक ओङनामेई ज्‍येन मेरा ङिचो सुमजोकीङ थेकी खाराङ माक्‍याबाते बात खिन गाङे दोन्‍दु लाकीन 58“दिकी दुरू ओताते मिकी जोबाते परमेश्‍वर मन्‍दिर राम्‍ला च्‍याला मिला जोर मुज्‍युता खाला ङीमा सुमलाराङ ज्‍येन मन्‍दिर जोइओ सिन साबाते बात ङ्योकोनगी थोबाप,” सिन सिदुक। 59ईन्‍सीनोङ थेबेकी साबाते बादोङ माडिक्‍सुङ।

60मिओनगी थोक थोक सानामेकी गाङे भन्‍दा छ्येते पूजारीकी गाङे दोन्‍दु लाकीन येशूला “खो च्‍यिला खाराक्‍पा देत्‍कीते? दिबेकी खुई थोक थोक खासुङ सिन साबाते बात पक्‍काराङ ईन्‍दाना च्‍यिन्‍दे?” सिन ठिसुङ। 61थेकी थोक सिरजीन येशू छ्याःङ मिसिरा खाईन खाराक्‍पाराङ देत्‍सुङ। लोईनराङ थेकी “च्‍यि खो परमेश्‍वरगी तोङगो साबाते ख्रीष्‍टराङ ईन? थोक ईन्‍सीन खो प्रभु परमेश्‍वर फुज्‍युङ ईन्‍दासीन मेन?” सिन ठिसुङ। 62थेमे येशूकी “ईन, ङा थेराङ ईन। थानामेकीचेन ख्‍योकोनगी परमेश्‍वर ओत्‍सादुई वाबाते मि ङाला छ्येज्‍यीक शक्ति ओताते परमेश्‍वर सामे छ्य्‌वापा देताते थेमे था तिरी स्‍वर्गनेकी मुक्‍पे लाक्‍तु देत्‍ला दुरू ग्‍युरगीन वाबातेङ थोङगो,” सिन सिदुक। 63थोक सिराईताङ गाङे भन्‍दा छ्येते पूजारीकी येशूकी परमेश्‍वर विरोध खासुङ सिन तेन्‍दाला थे खोरोङगी खोन्‍दाते खोलाक रोल्‍गीन “दि दोषीराङ ईन सिराला था ज्‍येनतोक बयानका च्‍यि गोसुङारो? 64मि ईन्‍गीनोङ दि खोरोङला परमेश्‍वर फुज्‍युङ ईन साकीन दिकी परमेश्‍वर विरोध खासुङ। दिकी थाल्‍ला च्‍यि सिका सिन ख्‍योकोनगीङ दाक थोसुङ, मेन? लो था ख्‍योकोनराङ सि, दिला च्‍यि सजाय तेरा फाबोङा?” सिन सासुङ। थोक सिरजीन थेरू जम्‍मा ओङा ओताते मिओनगी खाज्‍यीकराङ खाईन “दिलानी सेताराङ फाप्‍क्‍यो,” सिन सिदुक। 65थेमे ईन्‍सीन थेबे नाङ कोई कोईकी येशूला छ्यिम्‍तोर ग्‍याप्‍सुङ। थेमे थे मिक उप्‍ला देइनकामा “थाल्‍ला खोल्‍ला देक्‍कान्‍ते सु ईन्‍दे ओना, सिते?” सिन सिराला स्‍यूसुङ। थेबेकी थोक खानामेई थे खाम्‍बे पालेओनगीङ खेरगीन येशूला दुसुङ।

पत्रुसकी येशूला ङो मेस्‍येओ सिन साबाते

(मत्ती २६:६९-७५; लूका २२:५४-६२; यूहन्‍ना १८:१५-१८,२५-२७)

66नाङने थोक थोक ओङजीन पत्रुसचेन स्‍याङकादुराङ ओतान। थे गाङे भन्‍दा छ्येते पूजारी खाम्‍बादु काम खित्‍कान्‍ते फेम्‍मे मिज्‍यीक स्‍याङकादुई खाला डोजीन 67थेकी पत्रुसला थेरू मे देइन ओता थोङसुङ। थेमे थेकी दोन्‍दुराङ गाल्‍गीन लेमु खाईन ताकीन थेला “खोङ नासरतपे येशूताङराङ ओतान, मेनरो?” सिन सासुङ। 68थोक सिरजीन थेकी “खुई सुई बात खाबाते ईन्‍दे सिन ङेनी छ्याःङ माखोसुङ,” सिन सिदुक। थोक साकीन थे टिक्‍पी फजेकपा गाल्‍गीन देत्‍सुङ। थेमे ङोमु पाखे छ्योबो फोसुङ। 69थे फेम्‍मे मिकी लोईन थेला थोङगीन “दि मिङ येशूताङराङ ओतान,” सिन थेरू ओताते मिओनला लाःप्‍सुङ। 70थेकी लोईन “थेलानी ङा ङोराङ मेस्‍येओ,” सिन सिदुक। टिक्‍पी तिरी याङराङ थेरू ओताते मिओनगीङ “खो च्‍यिला मेन सिते? थेत्ताङ ख्‍याम्‍कान्‍तेबे नाङ दोक्‍पोई पक्‍काराङ खोङ ओङा फाप्‍क्‍यो। च्‍यिला सासीन खोङ गालीलपे मिराङ ईन,” सिन सिदुक। 71थोक सिरजीनोङ थेकीचेन “ख्‍योकोनगी साबाते मिलानी ङे ङोराङ मेस्‍येओ साबाप,” सिन ना केल्‍गीन “ङे ढाँर खाबाते ईन्‍सीन परमेश्‍वरगी ङाला भस्‍म तोङस्‍यीत,” सिन सिदुक। 72थोक सिराईताङराङ कुकुरी क्‍वाँ सिन छ्योबोङ फोसुङ। थे छ्योबो थाल्‍ला फोबाते बाजि ङि छाङा ओतान। थेमे ईन्‍सीनका पत्रुसला “था ङोमु पाखे छ्योबो बाजि ङि फोत फोतसाकला पालो सुम ज्‍येन मि दोन्‍दु खुई ङाला ङोराङ मेस्‍येओ सिन सिओ,” सिन गोमाका येशूकी साबाते बात ठेम्‍बा लासुङ। थे खोरोङगी थोक खाबेकी ङे च्‍यिला दोक मेलेबा खिता फाप्‍सुङा सिन थे ईमुक खाईन खाईन ङुसुङ।

Currently Selected:

मर्कूस 14: JUL

Highlight

Copy