मर्कूस 12
12
फेम्माला कमे खित्कान्ते मिओन कथा
(मत्ती २१:३३-४६; लूका २०:९-१९)
1थेमे येशूकी होथे छ्ये छ्ये पूजारीताङ धर्मे गुरू गाङेला दोक सिन कथा लाःपाला स्यूसुङ। च्यि सासीन “ठाउँज्यीक्तु स्यीङगी धनीज्यीक ओताक्वालो। थेकी थे खोरोङ स्यीङला अंगूर बिरूवा चुदुक्लो। स्यीङगी फेरोला ग्वारा खादुक्लो। अंगूर रस छिराला कोल जोदुक्लो। थेमे अंगूर स्युङकान्ते मि देताला पलीज्यीगोङ जोदुक्लो। थेमे थे स्यीङ फेम्माला बिन्गीन थे खोरोङचेन ज्येन लुङबाला गाल्गीन देत्तुक्लो। 2तिरी अंगूर छोनामेई थेकी थे खोरोङ काम खित्कान्ते मिज्यीकला थे खोरोङ बो लिन्दाला ताङदुक्लो। 3तर थे फेम्माला कमे खित्कान्ते मिओनगी थेला दुकीन दुकीन छ्याःङ मेतेरा खाईन तोङबाराङ ग्युरगीन ताङदुक्लो। 4थे स्यीङगी धनीकी लोक्ला थे खोरोङ काम खित्कान्ते ज्येनज्यीक मिला थे खोरोङ बो लिन ताङदुक्लो। तर थेबेकी थेलाङ दुकीन गोःराङ काकीन इज्जत बेइज्जत खाईन ग्युरगीन ताङदुक्लो। 5लोक्ला ज्येनज्यीकला तोङजीन थेलानी झन सेत्तुकराङलो। थेरूकी ज्येन ज्येनला तोङजीनोङ थे मिओनगी कोईला दुकीन ठाकच्युर माकच्युर जोकीन उरगीन ताङदुक्लो। कोईलाचेन सेत्तुकराङलो।
6थोक ओङनामेकी था थेकी फुज्युङतेकामा तोङा थुप्च्या ओताक्वालो। थेते फुज्युङज्यीककामा ओतानलो। थेकी थेला आउदी ङिङज्ये खिन ओतानलो। थेमे थे मिकी च्यि खादुक्लो सासीन दिलानी थेबेकी मान खाला छ्याःङ मेलेबा मिक्कितासीन सिन थेलाराङ थे खोरोङ अंगूर बो लिन ताङदुक्लो। 7धनीते फुज्युङला खोपरोङ ओत्सादु ओङा थोङगीन थेबेकी ‘तोना, थेकीनी फुज्युङतेलाराङका ताङदुक। थेला सेत्की। थेमे ईन्सीन दि स्यीङ ङुरूङतेराङनी ओङगो,’ सिन बात खाईन 8थेला जुम्गीन ग्याप्कीन सेत्कीन स्यीङदुकी फिला खेरगीन क्युरदुक्लो। 9लो ख्योकोन विचार खि, था थे स्यीङगी धनीकी थे मिओनला च्यि खाओङा। च्यि थेकी वाला थोक खित्कान्ते मिओनला सेत्ला थे स्यीङ ज्येनला फेम्माला मेतेरोतरो? 10च्यि ख्योकोनगी परमेश्वर बातला दोक सिन टिबाते बात पढे खासीनोङ खोबा मेत? थेरूचेन चुक सिन टिबा ओते सासीन
‘जुन दोला कर्मीओनगी कामराङ लै मिक्किओ सिन क्युरा ओतान, थे दोराङ आउदी काम लै खित्च्या थे मेताला छ्याःङ खिता मुथुप्च्या ओङसुङ।
11प्रभु परमेश्वरगीराङ थे दोला दोक जोबाते ईन। थेकी थोक अचम्ब काम खाबाते ङ्योकोनगी थोङा ओत,’ सिन टिबा ओत,” सिन सिदुक।#भजन ११८:२२-२३
12थेकी साबाते थे अंगूर स्यीङ फेम्माला बिन्दाते कथा थोनामेई थे छ्ये छ्ये पूजारीताङ धर्मे गुरूओनगी दिकी थोक साबातेनी ङुरूङला छ्येर ग्यापातेका ईन सिन थेजीनराङ थेला जिन्दा चाल्सुङ। तर थेरू ओताते ज्येन मि ज्यीबेकी थेबेकी छ्याःङ खिता माथुपेई थोकराङ गाल्सुङ।
रोमी गेल्बोला तिरो ज्येल्च्येते बात
(मत्ती २२:१५-२२; लूका २०:२०-२६)
13थेरूई गाल्नामेई थेबेकी येशूकी खाबाते बातला खइँदा गल्ती तेन्दा थुप्कीता सिन विचार खाईन कोई कोई फरिसी पाटी मि थेमे हेरोद गेल्बो पाटी मिओनला येशूताङ बात खित ताङसुङ। 14थेमे थे मिओनगी येशू ओत्सादु लेप्कीन “गुरू, मिओनला खुई साँचोते बातकामा खिओ सिन ङ्योकोनला छ्या ओत। परमेश्वर बात लोप्जीन खो छ्ये छ्ये मि सुङताङ ज्यीबा मिक्किओ। परमेश्वरगी च्यि च्यि खि साबा ओते सिन छ्ये टेक्टे मेडेला खाला खुई गाङेला लेमु खाला लोप्क्यो। थोगी ङ्योकोन गुरू खोल्ला बातज्यीक ठामीन। ङुरूङगी रोमी गेल्बोला तिरो ज्येला परमेश्वर नियमताङ डिगीताना मिडिक्ते? 15ङ्योकोनगी थेला तिरो ज्येला फाप्कीताना माफाप्ते?” सिन सासुङ। थेबेकी च्यि सेमगी थोक साबाते ईन्दे सिन छ्या स्येकीन थेकी थेबाला “ख्योकोन च्यिला ङे सेम ता छोल्गीते? खै ङाला चाँदी डबलज्यीक नाङते। थेमे ङा ख्योकोनला सिरामीन,” सिन सिदुक। 16थेबेकी चाँदी डबल बिन्नामेई थेकी थेबाला “दि डबलला सुई गोः नक्सा दुका? थेमे सुई छाप दुका?” सिन ठिसुङ। थोक सिरजीन थेबेकी “रोमी गेल्बोते,” सिन सासुङ। 17थेमे थेकी “थोक ईन्देकी रोमी गेल्बोला तेरा फाप्च्येते थेला बिन, परमेश्वरला तेरा फाप्च्येतेचेन परमेश्वरलाराङ बिन,” सिन सिदुक। थेकी थोक सानामेई थेबाला आउदी अचम्ब लासुङ। थेकी थोक सितासीन सिन थेबेकी सेमगी छेउलाङ नोबा मेतान।
स्याप्ते मिओन सोम्बो लोक्च्येते बात
(मत्ती २२:२३-३३; लूका २०:२७-४०)
18थेरूकी कोई कोई सदुकी पाटी मिङ येशूताङ बात खिताप सिन थे ओत्सादु लेप्सुङ। थेबाचेन मि पालोई स्यिनामेई स्याप्ते स्यापराङ ओङगो सिन ओतान। स्याप्ते मिओनला परमेश्वरगी तिरी सोम्बो लोइओ सिरच्येते बात पत्ते खिन मेतान। येशूकी दि बातला च्यि सिरच्या ईन्दाका सिन थेबेकी 19“गुरू, मोशेकी टिबाते परमेश्वर नियमला चुक साबा ओते सासीन सुइँदेते आज्योते जैजन्मराङ मायाङाला स्यिसुङ सासीन थेकी आज्योतेते सन्तान ओङस्यीत सिन आज्योते फेम्मे खुलाङा फाप्क्यो। थेमे थेबेते केबाते फिजाचेन आज्योतेते च्योक ओङगो सिन टिबा ओत। 20बाजिई चुक ओङकालो सासीन ठाउँज्यीक्तु पुन दुईन आज्यो न्वा ओतानलो। थेबे नाङ छ्येतेते फाङमा ओङगीन जैजन्मराङ मायाङाला स्यिदुक्लो। 21थोक ओङनामेई थे फेम्मे मिला फार्बातेकी खुलादुक्लो। तर थेङ फिजाराङ माकेबाला स्यिदुक्लो। थेमे साहिँलाते पालोङ थोकराङ ओङदुक्लो। 22थोक खाईन पुन दुईनकारगी थे फेम्मे मित्ताङ फाङमा खाईन फिजाज्यीगोङ मेकेबा खाईन स्यिदुक्लो। तिरी थे फेम्मे मिङ स्यिदुक्लो। 23था तिरी स्याप्ते मिओन सोम्बो लोक्जीन थे फेम्मे मिला खाङगी फेम्मे सिन सिरच्ये ओना? थेलानी गोमा पुन दुईनकारगी फाङमा खाबा ओतान,” सिन सासुङ।
24थेबेकी थोक सिरजीन येशूकी “ख्योकोनगी मि स्यिनामेई तिरी सोम्बो मोलोगो सिन सिओ। दि बात ईनराङ मेन। परमेश्वर बात पढे खित्जीन थेरू च्यि साबाते ईन्दे सिन ख्योकोनगी खोबा ईन्सीन थेमे परमेश्वरताङ जेङ खिता थुप्च्येते शक्ति ओत सिन छ्या स्येबा ओता ईन्सीन मि तिरी सोम्बो मोलोगो सिन सिरच्या मेतान। 25था तिरी स्याप्ते मिओन सोम्बो लोक्नामेई थेबानी स्वर्गने देत्कान्ते परमेश्वर दूतओन च्योकराङ फाङमाराङ मिक्किता खाला देत्क्यो। थेजीन फाङमा खित्च्येते बात सिराते छ्याःङ मेङगो। 26थेमे स्याप्ते मिओनला परमेश्वरगी सोम्बो लोइओ सिरच्येते बातनी मोशेकी टिबाते बात तालाङ छ्या स्येक्यो। थेकी टिबाते बाराते बुटादु ओङाते बात पढे खित्जीन ख्योकोनगी दि बात खोबा फाप्च्येते ईन। थेरूचेन प्रभु परमेश्वरगी मोशाला ‘ङा अब्राहाम, इसहाक थेमे याकूब परमेश्वर ईन,’ सिन थे खोरोङला साबाते बात मोशेकी टिबा ओत।#प्रस्थान ३:६ 27मि स्यिनामेई थोकराङ तोरला डोच्या ईन्दा ईन्सीन परमेश्वरगी मोशाला ङा खुई ज्युज्यु पुर्खे परमेश्वर ईन सिन सिरच्या मेतान। मि स्यिनामेई स्यिसुङ स्यिसुङ, तिरी सोम्बो मोलोगो सिन ख्योकोनगी सिरच्येते बात ईनराङ मेन्दे बात ईन,” सिन सिदुक।
परमेश्वरगी बिन्दाते छ्येते नियम च्यि ईन्दे
(मत्ती २२:३४-४०; लूका १०:२५-२८)
28येशू सदुकी पाटी मिओनताङ बात खिन ओते बेलाला धर्मे गुरूज्यीक थेरू लेप्सुङ। थेकी थेबा गाङेकी खाबाते बात गाङे थोसुङ। येशूकी थेबाताङ लेमु खाईन बात खाबा थोङगीन ङाङ दिला बातज्यीक ठामीन सिन थेकी “गुरू, दि बातला खो चुक सिते? परमेश्वरगी ङुरूङला बिन्दाते नियम नाङ छ्येते खाङ ईन्दे?” सिन ठिसुङ। 29थोक सिरजीन थेकी थेला “परमेश्वरगी ङेन साबाते छ्येते नियम दिराङ ईन। थे नियमला चुक खि साबा ओते सासीन ‘इस्राएलीवे, दि बात लेमु खाला ङेन। ङुरूङ प्रभु परमेश्वरलाकामा माने खिओ। प्रभु परमेश्वर थेकामा ईन। 30थोगी प्रभु परमेश्वरला खेराङ आत्माताङ बुद्धिकी थेमे स्येतकी थुपासम्म सेमदुकीराङ ङिङज्ये खि,’ सिन साबा ओत। 31दि तिरी ङेन्दा फाप्च्येते नियमलाचेन दोक सिन साबा ओत। च्यि सासीन ‘दाक्पोन ज्यानला माया खिता च्योकराङ खाला ज्येनलाङ ङिङज्ये खि,’ सिन टिबा ओत। परमेश्वरगी बिन्दाते नियम नाङ दि नियम ङिबो छेत छ्येते ज्येन नियम ओतराङ मेत,” सिन सिदुक।
32थोक सिरजीन थे धर्मे गुरूकी “ईन गुरू, खुई ठीकराङ सिदुक। खुई साबाते बात पक्काराङ ईन। प्रभु परमेश्वर थे दोक्पोईकामा ईन। थे बाई ज्येन ओतराङ मेत। 33ङुरूङगी परमेश्वरला दाक्पोन आत्माताङ बुद्धिकी थेमे स्येतकी थुपासम्म सेमदुकीराङ ङिङज्ये खिता फाप्क्यो। थेमे दाक्पोन ज्यानला माया खिता च्योकराङ खाला ज्येनलाङ ङिङज्ये खिता फाप्क्यो। ङुरूङगी दि नियम ङिबो ङेन्दा छेत छ्येते ज्येन छ्याःङ मेन। दि नियम ङिबो ङेन्च्येतेचेन परमेश्वरला भोग बिन्ला स्येक्च्येते थेमे भोग तेरच्येते जति भोग बिन्दा भन्दाङ छ्येते ईन,” सिन सिदुक। 34परमेश्वरगी खि साबाते बात थे मिकी लेमु खाईन छ्या स्येबा ओता थोङगीन येशूकी थेला “परमेश्वरगी खि साबाते बात खुई लेमु खाईन खोबा ओताक्वा। था खो परमेश्वर राज्य छ्य्वापा लै खिता खादुक,” सिन सिदुक। थे तिरीचेन सुङगीङ येशूला खइँदा बात ठिच्ये आँट माक्यासुङ।
ख्रीष्टचेन गेल्बो दाऊद सन्तानकामा मेन
(मत्ती २२:४१-४६; लूका २०:४१-४४)
35थेमे परमेश्वर मन्दिरदु बात लोप्कीन ओते बेलाला येशूकी थेरू ओताते मिओनला दि बात खिताला स्यूसुङ। थेकी च्यि सिका सासीन “परमेश्वरगी तोङगो साबाते ख्रीष्टला गेल्बो दाऊद सन्तान ईन सिन धर्मे गुरूओनगी चुक खाला सिरा थुप्कीते? 36च्यिला सासीन ख्रीष्टकी विषयला बात खित्जीन परमेश्वर आत्मे छ्य्वापेई गेल्बो दाऊद खोरोङगीराङ दोक सिन टिबा ओत। चुक सासीन
‘प्रभु परमेश्वरगी ङे प्रभुला ङे खुई शत्रुओनला ग्याल्गीन खुई तिङबे ओक्तु माज्याकथुप
खो दुरू स्योक, ङे सामे छ्य्वापा देत,’ सिन साबाते बात टिबा ओत।#भजन ११०:१
37थोक खाईन गेल्बो दाऊद खोरोङगीराङ ख्रीष्टला मान खिन प्रभु सानामेकी चुक खाईन ख्रीष्ट थे सन्तान ओङसुङा? विचार खिते,” सिन सिदुक। दिकी चुक लेमु खाला लोप्कीका सिन मि गाङेराङ गा खिन येशूकी लोप्च्येते बात ङेन्गीन ओतान।
येशूकी धर्मे गुरूओनगी च्योक माकेत सिन साबाते
(मत्ती २३:१-३६; लूका २०:४५-४७)
38बात लोप्कीन लोप्कीन येशूकी थेबाला “धर्मे गुरूओनताङ ख्योकोन च्याङबो खाला देत। थेबेकी च्योकराङ माकेत। थेबाचेन छ्ये मि ईन सिन तेन्दाला खोलाक रीम्बुतेन्दे खोन्ला ख्याम्गीदुक। थेमे मि छ्वासा रूसाला युक्जीन ज्येनगी खोपरोङला मान खिन नमस्ते सिरजीन थेबा आउदी गा खिदुक। 39थोकराङ खाला मिटिङ खित्च्येते खाम्बे नाङला थेमे भोजलाङ थेबाचेन छ्ये छ्ये मि देत्च्येते ठाउँलाकामा देता छोल्गीदुक। 40परमेश्वरला आउदी खाला माने खित्कान्ते ईन सिन तेन्दाला थेबाचेन काल्बासाक प्रार्थना खिन देत्कीदुक। लेमु खाईन तासीन नाङ नाङलाचेन थेबेकी ख्योबो स्यिइन सिन्दाते फेम्मे मिओन सम्पत्ति ठगे खाईन सोकीन सिन्दा ओङगो। था तिरी थेबेकी आउदी छ्येज्यीक सजाय ङेत्क्यो,” सिन सिदुक।
ख्योबो स्याप्ते मिकी चढे खाबाते भेटी बात
(लूका २१:१-४)
41मन्दिरदु परमेश्वरला भेटी चढे खित्से खादु देत्कीन येशूचेन मिओनगी भेटी चढे खाबाते तेइन देत्सुङ। छ्युक्पुते मि काल्बेईकी आउदी काल्बातेन्दे भेटी लुक्पाते थेकी थोङसुङ। 42थेमे फेम्मे मिज्यीगीङ वाकीन स्यीम्मीते पैसा ङि भेटी चढे खासुङ। थेते ख्योबो स्यिइन सिन्दा ओतान। थेमे थे आउदी दुक्पा ङेताज्यीक ओतान। मिओनगी थोक खाईन भेटी लुक्पाते गाङे येशूकी थोङसुङ। 43थेमे थेकी चेलातेबाला दोन्दु काताङगीन “ङा ख्योकोनला दि बात सिओ। च्यि सासीन दुरू भेटी चढे खित्कान्ते मि नाङ गाङे भन्दा काल्बेईचेन थे दुक्पा ङेताते फेम्मे मिकी चढे खासुङ। 44च्यिला सासीन ज्येन ज्येनगी भेटी काल्बातेन्दे चढे खासीनोङ थेबाताङ थोरूमोङ सम्पत्ति थुप्रो ओत। तर थे फेम्मे मिकीचेन मोरोङताङ ओताते जति गाङे भेटी चढे खासुङ। थेतेनी खाम्बादुङ छ्याःङ मेत,” सिन सिदुक।
Currently Selected:
मर्कूस 12: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
