मत्ती 9
9
येशूकी कुज्येला ख्याम्बा थुप्च्या जोबाते
(मर्कूस २:१-१२; लूका ५:१७-२६)
1येशू याङराङ डुङ्गाला जेकीन समुन्द्रे छुरकेनपा वाकीन थे खोरोङ देत्च्येते सारनापा गाल्सुङ। 2थेमे थेकी ठाक्पा खाला तेरस्यीत सिन कोई कोईकी ख्याम्बाराङ मुथुप्कानज्यीक कुज्येज्यीकला मालज्यामताङराङ डोलो खाईन खुरगीन थे ओत्सादु क्याल्सुङ। थेकी ठाक्पा खिता थुप्क्यो सिन थेबेकी थे खोरोङला थोक विश्वास खाबा थोङगीन थेकी थे कुज्येला “फुज्यो, था खो ज्यीबा माकेत। ङे खुई खाबाते पाप गाङे माफ खाबान,” सिन सिदुक। 3थेकी थोक सिरजीन थेरू ओताते धर्मे गुरूओन कोई कोईकी मिकी खाबाते पाप माफ खाबान सिरकान च्यि दि परमेश्वर ईनरो? दिकीनी परमेश्वर विरोध खासुङ सिन विचार खिताला स्यूसुङ। 4थेबे सेमगी बात छ्या स्येकीन थेकी “ख्योकोन च्यिला थोकस्यिक विचार खिते? 5ङे दि मि पाप माफ खाबान सिरजीन ख्योकोनला ङे खेकीकामा दोक साबाच्योक ओङसुङ मेन? च्यि ङे दिला लाला ख्याम ज्युताचेन मुथुबो साबाप? 6परमेश्वर ओत्सादुई वाबाते मि ङात्ताङ मिओन पाप माफ खित्च्येते अधिकार ओत सिन ङा था ख्योकोनला कामगीराङ खाला तेन्ग्यो,” सिनकामा थेकी थे कुज्येला “लो खोक ल्वा थेमे खोरोङ खोन्च्या दिङच्या खुरला खाँपा ग्युक,” सिन सिदुक। 7थेरूई थे मि खोक लाकीन खाँपा गाल्सुङ। 8थेरू थोक ओङा थोङगीन मि गाङेराङ आउदी खाईन आते खासुङ। थेमे थेबेकी परमेश्वरगी मिलाङ दोक छ्येज्यीक शक्ति बिन्दा ओताक्वा सिन परमेश्वरते जय जय खासुङ।
येशूकी मत्तीला थे खोरोङ चेला जोबाते
(मर्कूस २:१३-१७; लूका ५:२७-३२)
9थेमे येशू थेरूई ख्याम्सुङ। डुइन ओत्जीनराङ थेकी कर लिन्कान्ते मत्ती सिराते मिला थे खोरोङ अफिसदु देता ओताते थोङसुङ। थेमे थेकी थेला ठेत्कीन “लो खो ङे चेला ओङला ङात्ताङ ख्योम,” सिन सिदुक। थोक सानामेई मत्ती खोक लाकीन येशूताङ ख्याम्सुङ। 10थे तिरी येशू मत्ती खाम्बादु साप सेइन ओतान। थे चेलाओनोङ थेत्ताङराङ ओतान। कर लिन्कान्तेबा थेमे ज्येनगी पापी साबाते ज्येनोङ मि काल्बेई थेबाताङ ङ्योम्बुराङ देत्ला साप सेइन ओतान। 11थेबा थोक खाईन ङ्योम्बुराङ साप सेइन ओता थोङगीन कोई कोई फरिसी पाटी मिकी येशू चेलाओनला “ए ख्योकोन गुरू च्यिला दि कर लिन्कान्तेबा थेमे ज्येन पापीओनताङ ङ्योम्बुराङ देत्ला साप सेइका?” सिन सिराला स्यूसुङ। 12थेबेकी थोक सिरजीन येशूकी थेबाला “नाबाते मिओनलाका डाक्टर गोक्यो, सन्चाराङ ओत्कानलाका च्यि डाक्टर गोकीतेरो? 13ख्योकोनगी परमेश्वर बात लेमु खाला पढे खाला च्याला थेरू परमेश्वरगी ‘ङाला सिन भोग बिन्ला जेसुकै चढे खाला खिता भन्दा बरू ख्योकोनगी ज्येनला ङिङज्ये खि,’ सिन साबाते बात खोबा खि। थोगी ङाङ पापीओनला परमेश्वर छ्य्वापा लै खि सिराला वाबाते ईन। धर्मतीतेबाला दोक खि सिराला वाबाते मेन,” सिन सिदुक।
येशूकी लोप्च्येतेताङ फरिसी पाटी मिओन बात मिडिगो
(मर्कूस २:१८-२२; लूका ५:३३-३९)
14थेमे यूहन्ने चेलाओनगीङ येशू ओत्सादु वाकीन “गुरू, ङ्योकोनबरी बेला बेलाला बर्त देत्क्यो। फरिसी पाटी मिओनगीङ थोकराङ खिदुक। खुई चेलाओनचेन च्यिला बर्त मेदेत्का?” सिन ठिसुङ। 15थोक सिरजीन थेकी “बेउला खोपरोङ दोन्दु ओत्कीन ओत्कीन फाङमाला वाबाते मि सु साप मास्साबा खाला पीर खिन देत्कीतेरो? था मिओनगी वाला बेउलाला जबरजस्ती फाङमादुकी जुम्ला खेरग्यो। थोक खानामेईचेन फाङमा सार वाबाते मिओन पीरगी खित्सादु तुक्पाराङ देत्क्यो।
16ख्योकोनगी दि बादोङ ङेन। च्यि सासीन ङिङबाते खोलाकला साम्बाते टालो ताप्सुङ सासीन तिरी ठुत्जीन टालो खुम्च्ये खाला थे खोलाक झन मेलेबा खाला राल्ग्यो। 17थेमे सुङगीङ गोमाका छ्याङ ङ्याल्गीन ङिङबा गाल्गीन सिन्दाते कोक्तेन गीउला छ्याङ मोङ्योलो, मेन ओना? थोक खासीन छ्याङ ङाकीन मासिन्दालाराङ गीउ बोङ फोङला छ्याङ छ्याङ नाश डुइओ, गीउ गीउ ङ्येक्यो। थोगी भर्खर लाबाते छ्याङचेन साम्बाते कोक्तेन गीउला लुक्ला ज्य्वाक्यो। थोक खानामेकी छ्याङोङ गीउओङ ङिकाराङ मेङ्येओ, मेन?” सिन सिदुक।
येशूकी स्याप्ते फेम्मे फिजाला सोम्बो लोक्पाते
(मर्कूस ५:२१-४३; लूका ८:४०-५६)
18येशू दि बात खिन ओते बेलालाराङ मिटिङ खित्च्येते खाम्बे छ्येते मिज्यीगी थे ओत्सादु वाकीन थेला काम्बाला से खासुङ। थेमे “हजूर, ङेते थाल्ला भर्खर फुमु स्यिसुङ। ओर्च्ये, रकस्यिक ङात्ताङ गाल्ला खुई लाक्पा थे लाक ज्याक्ला नाङ। दोक खानामेई थे दाक सोन्ग्यो,” सिन सिदुक। 19थेमे येशू खोक लाकीन थे मित्ताङ ख्याम्सुङ। चेलातेबाङ थे द्वामाराङ गाल्सुङ।
20थेबा डुइनराङ ओतान। थेमे लो च्युन्ङी गोमामेकी ठाक ऊरच्येते बेथेकी नाबाते फेम्मे मिज्यीगी वाकीन येशूकी खोन्दाते खोलाक छेउला ल्हाकनापेई छुस्स दोसुङ। 21ङे येशूकी खोन्दाते खोलाककामा द्वा ङेत्सीनोङ ङेते दि बेथा ठाइओ सिन विचार खाईन थेकी थोक खाबा ओतान। 22थे खोरोङला दोनामेई थेकी ख्युर ग्युरगीन ल्हाकनापा तासुङ। थेमे थे फेम्मे मिला “फुमो, खो ज्यीबा माकेत। खुई ङाला विश्वास खाबेकी खित्सादु खो ठाक्पाते ईन,” सिन सिदुक। थे बेलामेकी थे फेम्मे मिते थे बेथा दाक ठाक्सुङ।
23थेरूई येशू थे छ्येते मि खाँपा सरासर गाल्सुङ। थेपा लेप्जीन थेकी मि स्यिजीन फुत्च्येते मुरली फुत्कान्तेबा थेमे आउदी कस्स्ये खाला दुङाल खिन ओताते मि काल्बेई थोङसुङ। 24थेकी थेबाला “लो ख्योकोनबरी गाङे फिनामा ग्युक, दुरू दोक माकेत। थे फिजा स्या मेत, थेनी ङिक गालातेकामा ईन,” सिन सिदुक। थेकी थोक सिरजीन दिकी च्यि लेम्बे बात खिका सिन थे मिओनगी थेला खिस्यी खासुङ। 25होथे मिओनला फिनामा तेन्गीन ताङनामेकी येशूकी थे स्याप्ते फेम्मे फिजा ओताते कोठादु गाल्गीन थे फिजे लाक्पाला जुम्सुङ। थेमे थे फेम्मे फिजा खोक लासुङ। 26दोक खाईन थे फिजा सोन्दाते बात थेङला गाङेपा फैले खासुङ।
येशूकी अन्ध मेन्दा ङिला थोङा थुप्च्या जोबाते
27थेमे येशू थे खाम्बादुई ख्याम्सुङ। थेरूकी ख्याम्नामेई लामला अन्ध मेन्दा ङिकी “ए प्रभु, दाऊद गेल्बो सन्तान, ङ्योकोन दुक्पा थोङला नाङ,” सिन छेरा खिनकामा थे तिङ ङ्यासुङ। 28येशू थे खोरोङ देत्च्येते खाम्बे नाङने स्यूक्जीन थेबा ङिबोङ थे तिरी तिरी नाङनेराङ स्यूसुङ। थेमे थेकी “च्यि ङे ख्योकोन मिक थोङच्या ज्वा थुप्क्यो सिन ख्योकोन पत्ते खिओ?” सिरजीन थेबेकी “खिओ प्रभु, खुई थोक खिता थुप्क्यो,” सिन सिदुक। 29थेबेकी थोक सानामेकी थेकी थेबे मिकला दोइनकामा “लो ओना, ख्योकोनगी ङाला विश्वास खाबा च्योकराङ ओङस्यीत,” सिन सिदुक। 30थोक खानामेकी थेबे मिक दाक थोङच्या गाल्सुङ। थेमे थेकी “त्वा दि बात सुङलाङ मासेर याङ,” सिन थेबाला थेरूकी ताङसुङ। 31तर चुक ओङसुङा सासीन थेबा ङिबोकीचेन थेरूई गाल्गीन येशूकी खोपरोङला खाबाते कामगी बात थेङला गाङेपा फैले खासुङ।
येशूकी लेम्बाते मिला बात खिता थुप्च्या जोबाते
32थे मि ङिबो थेरूई फिला थेन्दाईताङ मिज्यीकला टीकीन कोई कोई मि येशू ओत्सादु ख्योल्सुङ। थे मिचेन ल्हन्डीक खोकीन बातराङ खिता मुथुप्च्या गालाई ओतान। 33येशूकी थे ल्हन्डीक तेन्गीन ताङनामेकी थे मिकी बात खिताला स्यूसुङ। थोक थोङगीन थेरू ओताते मिओन छक्क परे खिन “ओहो, दोक्ते अचम्बते कामनी थातासाक ङुरूङ इस्राएल लुङबादु सुङगीङ खिता थोङा मेत,” सिन सिराला स्यूसुङ। 34तर थेरू ओताते फरिसी पाटी मिओनगीचेन “दि छ्याःङ अचम्बते बात मेन। ल्हन्डीक गेल्बो शैतानताङ डिक्लाका दिकी थे शक्तिदुकीराङ ल्हन्डीक तेन्ला तोङच्येते ईन,” सिन सिदुक।
स्वर्गे राज्य काम खित्कान्ते मि काल्बा मेताते बात
35दोक खाला येशूचेन युल युलला, सार सारला गाङेपा युगीन थेङला ओताते मिटिङ खित्च्येते खाम्बे नाङला स्वर्गे राज्यते गा लाङच्येते बात च्यि ईन्दे सिन लोप्कीन ख्याम्गीन ओतान। थेमे थरी थरीतेन्दे रोग लै खाबाते थेमे नाबाते मिओनला ठाक्पा खिन ओतान। 36थोक खाला ख्याम्जीन थे खोरोङ ओत्सादु ओङकान्ते हूलताङ हूल मिला थोङजीन थेला आउदी ङिङज्ये लाङगीन ओतान। च्यिला सासीन जेसुकै पीरताङ तापकी खित्सादु खापाङ छ्याःङ आश खित्च्येते लामराङ मेतेई सेम स्यिइन थेबा गोठाला मेताते लुक च्योकराङ गाला ओतान। 37-38थोगी थेकी चेलातेबाला “स्यीङदु थोक्पा रूक्पा फाप्च्येते बाली काल्बेई ओत्कीन खेतालाचेन टिक्पीईकामा ओत्सीन स्यीङगी धनीला ज्येनोङ खेताला गोच्या दुक सिन सिरा फाप्क्यो मेन? थोकराङ खाला ज्येनला परमेश्वर बात लोप्कान्ते मि टिक्पीईकामा ओतेकी थोक्ते मि काल्बेई फेल छ्युत सिन ख्योकोनगी परमेश्वरला प्रार्थना खि। च्यिला सासीन स्वर्गे राज्यदु स्यूक्पा छोल्कान्ते मि आउदी काल्बेई दुक,” सिन सिदुक।
Currently Selected:
मत्ती 9: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
