मत्ती 13
13
सोन देप्कान्ते मि कथा
(मर्कूस ४:१-९; लूका ८:४-८)
1थे छोमुराङ येशू थे खाम्बादुकी समुन्द्रे खानामा गाल्गीन थेरू देत्सुङ। 2थेरू आउदी काल्बेई मि जम्मा ओङेकी थेबेकी थे खोरोङ बात लेमु खाला थोस्यीत सिन येशूचेन डुङ्गाज्यीकला जेकीन देत्सुङ। मिओनचेन गाङेराङ समुन्द्रे छेउकी नाङला लाकीन देत्सुङ। 3मिओनला परमेश्वर बात लोप्जीन थेकी काल्बा च्योक्ते कथा लाःप्कीन ओतान। थेमे थेकी थेबाला दोक सिनकामा लोपाला स्यूसुङ। चुक सासीन “बाजिई मिज्यीक सोन देपाला गाल्दुक्लो। 4सोन देप्जीन कोई सोन लामला फाप्तुक्लो। थेमे थे सोनचेन छ्योज्युङमेकी वाकीन गाङे सोदुक्लो। 5याङराङ कोई सोनचेन टिक्पी टिक्पीकामा सबी थेमे दो काल्बेई ओत्साला फाप्तुक्लो। तीङला माफापेकी थे क्यापनी होत्ता केदुक्लो। 6तर चाप्रेन तीङला क्योङा माथुपेकी ङीमा खित्जीन गाङे काम्गीन स्यिदुक्लो। 7थोकराङ खाईन कोई सोनचेन चाङगी बुटे नाङला फाप्तुक्लो। थेमे केनामेकी चाङगी बुटेकीराङ सोदुक्लो। 8सबी लेमु ओत्साला फापाते सोनचेन लेमु खाईन केकीन लेदुक्लो। ङिमा तुला मुरला ताजीन कोईला गेडा सयज्यीक, कोईला गेडा खाल सुम थेमे कोईलाचेन गेडा खालज्यीकताङ च्युताम्बा स्यूबा ओता थेप्तुक्लो। 9ङेन्दा सेम ओत्कान्ते मिकी दि बातओन लेमु खाला ङेन,” सिन सिदुक।
येशूकी च्यिला कथा लाःप्ला लोप्कीन ओताने
(मर्कूस ४:१०-१२; लूका ८:९-१०)
10येशूकी थोक साकीन सिन्नामेकी चेलातेबेकी दोन्दु वाकीन “गुरू, खो ज्येन ज्येनला परमेश्वर बात लोप्जीनचेन च्यिला कथा लाःप्ला लोप्कीते?” सिन ठिसुङ। 11थोक सिरजीन थेकी “स्वर्गे राज्य सिराते च्यि ईन्दे थेमे परमेश्वरगी चुक खाला मि नाङ राज्य खिते सिरच्येते बात ख्योकोनलानी परमेश्वरगी खो च्युता ओत। ज्येनलाचेन दि बात खो च्युता मेत। 12च्यि सासीन स्वर्गे राज्य बात ङेन्ला लेमु खाला खोबा छोल्कानला दोक्ते बात झन काल्बेई छ्या स्येस्यीत सिन लाप्ला तेरग्यो। थे बात थोलाङ खोबा मोछोल्कान्ते मिलाचेन टिक्पी टिक्पी छ्या स्येबा ओताते बादोङ टोक ज्येत ज्युत्क्यो। 13बात दोक ईन्देकीराङ ङा ज्येन ज्येनला लोप्जीनचेन कथालाकामा लोप्क्यो, कथे अर्थचेन मालाःबो। च्यिला सासीन थेबेकी परमेश्वरगी खिन ओताते काम थोङसीनोङ च्यि खिता चालाते ईन्ताका सिन छ्याःङ मोखोदुक। थेमे परमेश्वर बात थोसीनोङ च्यि साबाते ईन्दे सिन छ्याःङ छ्या मेस्येदुक। 14थोगी यशैयेकी थाङबोका परमेश्वरगी थे खोरोङला सिर च्युताते बात खित्जीन दोक सिन होदोक्ते मिओन बात खाबा ओतान। परमेश्वरगी सिर च्युताते बात खिन थेकी
‘मिवे, ख्योकोन ङे बात ङेन्दानी ङेन्गीदुक तर च्यि साबाते ईन्दे सिन छ्याःङ मोखोदुक। थोकराङ खाला
ङे खाबाते काम थोङानी थोङगीदुक तर च्यि खिता चालाते ईन्ताका सिन छ्याःङ छ्या मेस्येदुक।
15च्यिला सासीन थेबा छ्याःङ खोबा मुथुप्च्या गाल्ला दुक। थेबे नामज्योक थुक्पु गाल्ला दुक। थोकराङ खाईन थेबेकी छ्याःङ मोथोङस्यीत सिन खोपरोङ मिक चुम्ला दुक।
थोक मेन्दा ईन्सीन थेबे मिगी थोङच्या ओतान, नामज्योककी थोच्या ओतान थेमे बात लेमु खाला खोला ङे छ्य्वापा लै खित्च्या ओतान।
थेमे थोक खानामेई ङा थेबाला थेबे पापदुकी टाल्ला लेमु खित्च्या ओतान,’ सिन सिर च्युता ओतान।#यशैया ६:९-१०
16तर ख्योकोनचेन भाग्यमानी ईन। ख्योकोनगी खेराङ मिक चुम्बा मेतेकी थेमे नामज्योक थुक्पु जोबा मेतेकी खित्सादु स्वर्गे राज्य वाबाते थोङा ओत। थेमे थे राज्य बादोङ खोबा ओत। 17ङा ख्योकोनला च्यि सिते सासीन ख्योकोनगी थोङा ङेताते स्वर्गे राज्य ताप सिन परमेश्वर बात खित्कान्ते मिओन थेमे परमेश्वरगी खि साबाते ङेन्कान्ते मि काल्बेई गुकीन देता ओतान। ईन्सीनोङ थेबे पालोला ता माङेत्सुङ। थोकराङ खाईन ख्योकोनगी थोबा ङेताते स्वर्गे राज्य बात चुक दुका सिन थोबा चाल्सीनोङ थेबेकी थे बेलाला थोबा माङेत्सुङ।
सोन देप्कान्ते मि कथे अर्थ च्यिन्दे
(मर्कूस ४:१३-२०; लूका ८:११-१५)
18लो था ङे आनाङका साबाते सोन देप्कान्ते मि कथे अर्थ च्यि ईन्दे सिन ङा ख्योकोनला लाःप्क्यो, लेमु खाला ङेना। 19सोन देप्जीन कोई कोई लामला फाप्क्यो। लामला फाप्कीन छ्योज्युङमेकी तुकीन सोबाते सोन साबातेचेन स्वर्गे राज्य बात थोकान्तेबे नाङ थरीज्यीक मिला साबाते ईन। थोक्ते मितेचेन स्वर्गे राज्य बात ङेन्च्ये सेमराङ मेतेकी थे बात थोसीनोङ थे च्यि ईन्दे सिन लेमु खाला मोखोओ। थोक ईन्देकी मिला मेलेबा खित्कान्ते शैतानगी थेबेकी थोबाते बात होत्ताराङ टोक ज्येत ज्युत्क्यो। 20थेमे टिक्पी टिक्पीकामा सबी थेमे दो काल्बेई ओत्साला फापाते सोन साबातेचेन ज्येन थरीज्यीक मिला साबाते ईन। थोक्ते मिओनगी स्वर्गे राज्य बात थोबासात्तु आउदी गा खिन ङेन्ग्यो। 21ईन्सीनोङ थे बात लेमु खाला सेमगी नाङ मोज्योओ। थोगी थे बात ङेन्देकी खित्सादु तिरी खइँदा दुक्पा ङेत्जीन, ज्येनगी खेदापानी खित्जीन थेबेकी थे बात ङेन्दा दाक तोङगो। 22लोक्ला चाङगी बुटे नाङला फाप्कीन केकीनोङ चाङगी बुटेकीराङ सोबाते सोन साबातेचेन थोरूमोङ ज्येन थरीज्यीक मिला साबाते ईन। थोक्ते मिओनगी स्वर्गे राज्य बातनी ङेन्ग्यो। ईन्सीनोङ साच्या थुङच्याताङ खोन्च्ये पीर थेमे सम्पत्ति लोभकी खित्सादु थेबेकी थोबाते बात दाक टोक ज्येत्ला छ्याःङ काम लै मिक्किओ। 23कोई कोईकीचेन स्वर्गे राज्य बात थोनामेई च्यि साबाते ईन्दे सिन लेमु खाला खोला थेरू खि साबा साबा च्योकराङ खिओ। थोगी सबी लेमु ओत्साला फापाते सोन साबातेचेन होथोक्ते मिओनला साबाते ईन। थे सोनगी नाङ कोईला गेडाज्यीक्ते गेडा सयज्यीक, कोईला गेडा खाल सुम थेमे कोईला गेडा खालज्यीकताङ च्युताम्बा स्यूकीन लेबा च्योकराङ स्वर्गे राज्य बात लेमु खाला ङेन्कान्ते मिओनगीङ होथोकराङ खाला लेमु काम खिओ,” सिन सिदुक।
ठे स्यीङला तापाते ह्रीमे कथा
24याङराङ येशूकी थेबाला ज्येनज्यीक कथाङ लाःप्कीनकामा “परमेश्वरगी स्वर्गे राज्य कामोङ दोकराङ खाला खिओ। चुक सासीन मिज्यीगी थे खोरोङ स्यीङदु ठा ताप्तुक्लो। 25थेमे होत्ताराङ ग्वामाई च्यि ओङकालो सासीन मि गाङेराङ ङ्याला ओते बेलाला थे मि शत्रुगी वाकीन ठा ताप्सादु ह्रीमा ताप्कीन गाल्दुक्लो। 26थोक ओङनामेई ठा केकीन ङिमा स्यूक्पे बेलाला ह्रीमाङ थोङाला स्यूदुक्लो। 27थोक थोङनामेकी थे स्यीङगी धनी खाम्बादु काम खित्कान्ते मिओनगी वाकीन थेला ‘हजूर, खुईनी स्यीङदु ठाका तापा ओतान मेन? थेमे चुक खाईन थेरू थोक काल्बेई ह्रीमाङ केताका,’ सिन ठिदुक्लो। 28थोक सिरजीन थेकी ‘दि काम सुइँदा ङे शत्रुगी खाबाते ईन,’ सिन सादुक्लो। लोईन थेबेकी ‘हजूर, ना ङ्योकोन थे ह्रीमा फाल्ला क्युरे?’ सिन ठिजीन 29थेकी ‘मेन मेन ओत्स्यीत, थोक माकेत। च्यिला सासीन ख्योकोनगी ह्रीमा फाल्जीन कोई कोई ठे झाङोङ फालोङ। 30थोगी ठा छो छोसाक ङिकाराङ देत्स्यीत। थेमे ठा थोक्पा गाल्नामेईकामा ठा ङाला गोमा ह्रीमाचेन टाल्ला मेला स्येला क्युर। ठाचेन जोतकी नाङ ल्हुक सिन ङा खेतालाओनला कोतामीन,’ सादुक्लो,” सिन सिदुक।
स्यीम्मीज्यीक सोनताङ सोडे बात
(मर्कूस ४:३०-३४; लूका १३:१८-२१)
31याङराङ येशूकी थेबाला “स्वर्गे राज्य जोदा डोच्येतेचेन दि बात च्योकराङ ईन। च्यि सासीन मिज्यीगी थे खोरोङ स्यीङदु तोरी सोन देप्क्यो। 32दि तोरी सोन च्योक स्यीम्मीनी ज्येन छ्याःङगीङ सोन मेङगो। दोक स्यीम्मीराङ ओत्सीनोङ ताप्कीन केनामेई दि छारला दोङबो छेतराङ डुइओ। छोमा सा ओङच्येते नाङ दिते छेत जोदा झाङ ज्येन छ्याःङगीतेङ मेङगो। दि तोरी झाङलाचेन छ्योज्युङमेकी छाङोङ ज्वा थुप्क्यो,” सिन सिदुक।
33दोक सानामेई याङराङ थेकी “स्वर्गे राज्य बात गाङेपा फैले खित्च्येते बातचेन दि बात च्योकराङ ईन। च्यि सासीन सुइँदा फेम्मे मिकी स्योबेन स्येक्पे बेलाला फाम सुमजो ज्येन्ताक ङेक्जीन सोडा टिक्पीस्यिककामा लुक्यो। छुस्सईकामा लुक्सीनोङ थेराङ गाङेपा ठाम्ला थे ज्येन्ताक लेमु खाला फुले खिओ,” सिन सिदुक।
34दोक खाईन थेकी थेरू जम्मा ओङाते मिओनला स्वर्गे राज्य बात कथालाकामा लाप्सुङ। कथा मिसिरा खाईनचेन थेकी बातज्यीगोङ मालाप्सुङ। 35थोक खाईन थाङबोका परमेश्वरगी थे खोरोङ बात खित्कान्ते छ्य्वापेकी साबाते दि बात साबा च्योकराङ ओङसुङ। थेकी “ङा मिओनला कथा लाःप्लाकामा ङाराङ बात लोप्क्यो। थोक खाला ङा थेबाला दि साताङ नाम जोजीनमेकी थातासाक छ्या स्ये च्युता मेताते बातओन लाप्ला तेरग्यो,” सिन साबा ओतान।#भजन ७८:२
ठे स्यीङला तापाते ह्रीमे कथे अर्थ च्यिन्दे
36थेमे येशू थे मिओनताङ ठाल्गीन थे खोरोङ देत्कीन ओताते खाम्बादु ख्योल्सुङ। थेमे चेलातेबेकी दोन्दु वाकीन च्याकीन “गुरू, ङ्योकोनला आनाङका साबाते ठे स्यीङला तापाते ह्रीमे कथे अर्थ लाःप्ला नाङना,” सिन सिदुक। 37थोक सानामेकी थेकी “लो ङेना,” सिन थेबाला थे कथे अर्थ दोक सिन लाःपाला स्यूसुङ। च्यि सासीन “ठा देप्कान्ते मि साबाते परमेश्वर ओत्सादुई वाबाते मि ङाराङ ईन। 38स्यीङ साबातेचेन दि सा लुङबा ईन। ठे सोन साबाते स्वर्गे राज्य बात ङेन्गीन परमेश्वर छ्य्वापा लै खाईन सिन्दाते मिओन ईन। थेमे ह्रीमा साबातेचेन मिला मेलेबा खित्कान्ते शैतानताङ डिक्कान्ते मिओन ईन। 39थे ह्रीमा देप्कान्ते शत्रु साबाते शैतान ईन। थेमे ठा थोक्च्ये बेला साबातेचेन दि जुग सिन्च्येते समय साबाते ईन। खेतालाओन साबातेचेन परमेश्वर दूतओन ईन।
40ठाताङ टाल्नामेकी ह्रीमा रूला स्येला क्युरा च्योकराङ था तिरी दि जुग सिन्जीनोङ दोकराङ ओङगो। 41चुक सासीन थेजीन परमेश्वर ओत्सादुई वाबाते मि ङा ङाराङ दूतओनला तोङगो। थेमे थेबेकी ङे राज्यदु गाङेपा गाल्ला ज्येनला पाप खित ज्युत्कान्तेबा थेमे मेलेबा मेलेबा काम खित्कान्ते मि गाङेला रूला 42नरककुण्डमा मे धुनी नाङमा क्युरग्यो। थेमाचेन गाङेराङ स्येदाङगी सा थागीन खोक्पो खाला ङुइन देत्क्यो। 43थेमे परमेश्वरगी साबा साबा च्योकराङ खित्कान्ते मिओनचेन स्याराते ङीमा च्योकराङ ओङला आबा परमेश्वर राज्यदुराङ देता ङेत्क्यो। ङेन्दा सेम ओत्कान्ते मिकी दि बातओन लेमु खाला ङेन।
ब्वाबाते सम्पत्तिताङ लेमुते मोती बात
44थोरूमोङ ज्येन बात च्यि सासीन पालोई मिज्यीगी स्यीङज्यीक्तु सुइँदेकी ब्वाकीन ज्याक्पाते सम्पत्ति थेप्तुक्लो। थोक ओङनामेई थेकी गा खिनकामा थे सम्पत्ति याङराङ थे स्यीङदुराङ ब्वादुक्लो। थेमे थेकी च्यि खाकालो सासीन थे खोरोङताङ ओताते जति जेसुकै च्वाकीन थे स्यीङ ङ्योदुक्लो। स्वर्गे राज्य सिरातेङ सुइँदेकी स्यीङज्यीक्तु ब्वाकीन ज्याक्पाते मिज्यीगी थेपाते सम्पत्ति च्योकराङ ईन।
45लोक्ला च्यि सासीन पालोई मोती बेपारीज्यीक आउदी लेमुते मोती खापा ङेदोङा सिन छोल्गीन गाल्दुक्लो। 46थेमे थेकी थे खोरोङगी साबा च्योक्ते मोती थेप्नामेकी थे खोरोङताङ ओताते जति जेसुकै च्वाकीन थे मोती ङ्योदुक्लो। स्वर्गे राज्यदु स्यूक्च्येते साबातेङ होथे बेपारीकी खाबाच्योक खित्च्येते ईन।
ङ्या सेत्च्येते जालगी कथा
47याङराङ स्वर्गे राज्यदु चुक ओङगीते सिन थोरूमोङ ङा ख्योकोनला कथाज्यीक लाःप्क्यो। चुक सासीन ङ्या सेत्कान्तेबेकी समुन्द्रे नाङमा जोदाज्यीक जाल देइओ। थेमे थेबेकी जोदाते टेक्टेते थेमे थरी थरीतेन्दे ङ्या थेप्क्यो। 48जाल ङ्येकी खाङनामेकी थेबेकी जाल ठुत्ला समुन्द्रे छेउला देन्ग्यो। थेमे सा ओङच्येते ङ्यातेबा थेबेकी नोतकी नाङ लुक्यो। सा मेङच्येतेबाचेन थोकराङ क्युरग्यो। 49दि जुग सिन्जीनोङ होथोकराङ ओङगो। चुक सासीन परमेश्वर दूतओनगी वाला पापीओनलाचेन परमेश्वरगी साबा साबा च्योकराङ खित्कान्तेबे नाङदुकी टाल्ला 50नरककुण्डमा मे धुनी नाङमा क्युरग्यो। थेमाचेन गाङेराङ स्येदाङगी सा थागीन खोक्पो खाला ङुइन देत्क्यो,” सिन सिदुक।
साम्बाते धर्मे गुरू बात
51थोक साकीन च्याकीन येशूकी चेलातेबाला “च्यि ङे साबाते दि गाङे बात ख्योकोनगी खोसुङ?” सिन ठिसुङ। थेमे थेबेकी “अँ, खोसुङ गुरू,” सिन सिदुक। 52थेमे थेकी “थोगी थानामेईचेन स्वर्गे राज्य सिराते च्यिन्दे, थे चुक्ते ईन्दे सिन लेमु खाईन छ्या स्येबाते धर्मे गुरूओन ओङगो। थेबाचेन खाम्बादु जेसुकै खटेन खित्कान्ते खाम्बे धनी च्योक्ते ईन। चुक खाला सासीन खाम्बे धनीकी गोमामेकी साकीन ज्याक्पाते थेमे भर्खर ज्याक्पाते सामानतेबा खाम्बे मिओनला गोजीन गोजीन जोतकी नाङदुकी थेन्दा च्योकराङ खाला थेबेकीङ खोपरोङगी गोमामेकी छ्या स्येबा ओताते थेमे थरिङोला खोबाते परमेश्वर बात ज्येनला लोपा थुप्क्यो,” सिन सिदुक।
येशूला दाक्पोन युल्बेकीराङ मेलेबा खाबाते
(मर्कूस ६:१-६; लूका ४:१६-३०)
53दि कथाओन लाःप्कीन सिन्नामेई येशू थेरूई ख्याम्सुङ। 54थेमे थेरू थे खोरोङ युलदु मिटिङ खित्च्येते खाम्बादु मिओनला लोपाला स्यूसुङ। थेकी लापाते बाततेबा थोनामेई थे युल्बाओन छक्क परे खिनकामा “आबिई, दोक छ्ये छ्ये बात दिकी चुक खाईन छ्या स्येताका? थेमे थोक अचम्बते कामओन दिकी चुक खाईन खाताका? 55दिनी दुरू स्यिङगी काम खित्कान्ते मि फुज्युङराङनी ईन। दिते आमाते मरियमराङ मेनरो? दि याकूब, यूसुफ, शिमोनताङ यहूदाबे आज्योराङनी ईन। 56थेमे दिते नुमुतेबाङनी गाङे दुरूराङ ओत,” सिन थेला दिङ सु ईन्देरो सिराच्योक खासुङ। थेबेकी थेला छ्याःङ मान माक्यासुङ। 57थे खोरोङ युल्बाओनगी थोक खाबा थोङगीन थेकी थेबाला “परमेश्वर बात खित्कान्ते मिला ज्येन ठाउँकी मि गाङेकी थे बात ङेन्ला मान खिओ। तर थे खोरोङ युल्बाओनताङ खाम्बे मिओनगीचेन थेला छ्याःङ मान मिक्किओ,” सिन सिदुक। 58थेत्ताङ परमेश्वर शक्ति ओत सिन थे खोरोङ युल्बाओनगी पत्ते माक्याबेकी थेरूचेन थेकी अचम्बते काम काल्बा माक्यासुङ।
Currently Selected:
मत्ती 13: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
