लूका 4
4
येशूला ल्हन्डीक गेल्बो शैतानगी ल्वा चालाते
(मत्ती ४:१-११; मर्कूस १:१२-१३)
1परमेश्वर आत्मा ङेत्कीन येशू परमेश्वर आत्मेकी खाङाते मि ओङा ओतान। थोक ओङनामेई परमेश्वर आत्मेकी थेला यर्दन चाङबोदुकी रीला टीकीन खेरसुङ। 2थेमे ङीमा खाल ङिसाक येशू थेङलाराङ देत्सुङ। थेजीन ल्हन्डीक गेल्बो शैतानगी थेला परी परी खाईन लुकीन पाप खित ज्युता चाल्सुङ। ङीमा खाल ङिसाक छ्याःङ मास्साबा खाईन देतेकी थेला आउदी त्वाबा लाबा ओतान। 3थे थोक खाईन त्वाबेकी स्याप खाबा ओते बेलाला दोन्दु वाकीन शैतानगी थेला “खो परमेश्वर फुज्युङ ईन, मेन ओना? लो परमेश्वर फुज्युङ ईन सासीन खो उदि दोओनला साप डोर छ्युत,” सिन सिदुक। 4थोक सिरजीन येशूकी “ङा दोक मिक्किओ। च्यिला सासीन परमेश्वर बातला ‘मि जुनीला गाङे भन्दा छ्येते बात साच्या थुङच्येते मेन,’ सिन साबा ओत,” सिन सिदुक।
5थेमे शैतानगी थेला आउदी थोम्बोज्यीक बोमदु खेरगीन च्याकीन रकस्यिकला दि सा लुङबा खाङ ओताते जोदाते टेक्टेते लुङबा गाङे तेन्सुङ। 6थेमे थेकी “ङा खोल्ला ङे थाल्ला तेन्दाते लुङबा गाङेला राज्य खित ज्युत्क्यो। थेमे दि लुङबा लुङबाला ओताते सम्पत्ति गाङे खोल्ला तेरग्यो। दिबा गाङे ङाला बिन्दाते ईन। दि गाङे ङाराङला सुला तेरा सेम लाङगीका ङा थेलाराङ तेरग्यो। 7थोगी खुई ङाला माने खिओ सिन से खासीन खुई थाल्ला थोङाते जति गाङे खुईतेराङ ओङगो,” सिन सिदुक। 8थेकी थोक सिरजीन येशूकी “परमेश्वर बातला ‘प्रभु परमेश्वरला माने खिओ सिन से खि। थेमे थेलाकामा माने खिता फाप्क्यो,’ सिन साबा ओत,” सिन सिदुक।
9याङराङ थेकी येशूला यरूशलेमपा खेरगीन परमेश्वर मन्दिर टुप्पो लाक्तु जेत्कीन “खो परमेश्वर फुज्युङ मेनरो? लो दुरूकी फाल ग्योप। 10च्यिला सासीन खोल्ला छ्याःङ मेलेबा मेङगो सिन परमेश्वर बातला दोक सिन टिबा ओत। चुक सासीन ‘खोल्ला जोए खिताला परमेश्वरगी थे खोरोङ दूतओन तोङगो। 11खुई काम्बा दोई लाक्तु माफाप्स्यीत थेमे खोल्ला माज्यीगोङ मोथोत्स्यीत सिन परमेश्वर दूतओनगी लाक्पा सेत्ला खोल्ला जिन्ग्यो,’ सिन टिबा ओत,” सिन सिदुक। 12थोक सिरजीनोङ येशूकी थेला “ ‘प्रभु परमेश्वरगी साबा च्योकराङ खित्च्या ईन्दाकाना मेन्दाका सिन नोमुङ थे सेम ता मेङगो,’ सिनोङ परमेश्वर बातला टिबा ओत,” सिन थेकी खि साबाते छ्याःङ माङेन्सुङ। 13थोक खाईन जस्तो खाला लुजीनोङ येशूला थे खोरोङ छ्य्वापा लै खित ज्युता माथुपेकी शैतानगी टिक्पी दिन थेला ल्वापराङ ताङसुङ।
येशूकी थे खोरोङ काम खिताला स्यूबाते
(मत्ती ४:१२-१७; मर्कूस १:१४-१५)
14थेमे येशू गालील अञ्चलपा ग्युरगीन गाल्सुङ। परमेश्वर आत्मे शक्ति थेत्ताङ ओतान। येशूताङ छ्येज्यीक शक्ति ओताते बात मिओनगी थाहा ङेत्कीन फार छुर गाङेपा थे बातकामा खिन ओतान। 15थेमे थेकी युल युलला गाल्गीन थेङला ओताते यहूदीओनते मिटिङ खित्च्येते खाम्बे नाङला गा लाङच्येते बात लोपाला स्यूसुङ। थे बात थोकान्ते मिओनगी “ओहो, दिकी चुक लेमु खाला लोप्कीका,” सिन थेला आउदी खाईन मान खिताला स्यूसुङ।
येशूला दाक्पोन युल्बेकीराङ मेलेबा खाबाते
(मत्ती १३:५३-५८; मर्कूस ६:१-६)
16दोक खिन लोप्कीन लोप्कीन डोजीन येशू नासरतपा लेप्सुङ। थे थेरूराङ हुर्के खाबा ओतान। सधैँ च्योकराङ खाईन थे थेरूङ सन्चारी छोमु मिटिङ खित्च्येते खाम्बादु गाल्सुङ। थेमे थे थेरू जम्मा ओङाते मिओन दोन्दु परमेश्वर बात पढे खिताला लासुङ। 17थेमे परमेश्वर बात खित्कान्ते यशैयेकी टिबाते किताब बिन्नामेई थेकी थे किताब खोले खित्जीन दोक सिन टिबाते थेप्सुङ। थेमे गाङेकी थोच्या खाईन थे बात पढे खिताला स्यूसुङ। 18थेरू चुक सिन टिबा ओताने सासीन
“प्रभु परमेश्वरगी ङाला थे खोरोङ आत्मा बिन्दा ओत। थेकी ङाला छ्याःङ मेताते मिओनला गा लाङच्येते बात लोपाला खटे खाबाते ईन।
दोस्यिककामा मेन, थेकी ङाला जेलदु देता ओत्कानला था थेरूकी थेन्दा ङेत्क्यो सिन सि, अन्धओनला थोङा थुप्च्या जो, ज्येनगी अन्याय खाईन दुक्पा ङेताते मिओनला दुक्पादुकी ठोल
19थेमे प्रभु परमेश्वरगी मिओनला पापताङ दुक्पादुकी टाल्ला लेमु खित्च्येते बेला लेप्सुङ सिन सिराला ताङाते ईन,” सिन टिबा ओतान।#यशैया ६१:१-२
20यशैयेकी टिबाते थे बात पढे खाईन सिन्नामेकी थे किताब बन्द खाईन थे मिटिङ खित्च्येते खाम्बादु काम खित्कान्ते मिला बिन्गीन च्याकीन येशू साला देत्सुङ। थेरू जम्मा ओङा ओताते मिओनचेन था थेकी च्यि बात खिका सिन ऊरी ऊरी थेलाराङ ताकीन देत्सुङ। 21थेमे थेकी थेबाला “यशैयेकी टिबाते दि बात थाल्ला ख्योकोनगी थोनामेई साबा च्योकराङ ओङसुङ,” सिनकामा थेबाताङ बात खिताला स्यूसुङ। 22थेकी खाबाते बात थोजीन थे मिओन छक्क परे खिन दिकी लोप्कीन ओताते बातनी ङेन्गीनराङ देत्की सिराच्योक दुक सिन बात खिताला स्यूसुङ। बात खिन खिन याङराङ थेबेकी “दि सु ईन्देरो? यूसुफ फुज्युङराङनी ईन,” सिनोङ सासुङ।
23थेबेकी थे खोरोङला चुक खिन दुका सिन छ्या स्येकीन थेकी थेबाला “ज्येनला ठाक्पा खित्कान्ते डाक्टरगी थे खोरोङलाङ ठाक्पा खिता फाप्क्यो सिरच्येते ङुरूङते उखानज्यीक ओत। ख्योकोनचेन ङाला होथे उखानला साबा च्योकराङ खित ज्युता छोल्गीदुक। च्यि सासीन कफर्नहुमदु खाबा च्योक्ते अचम्बते काम खो दुरू दाक्पोन युलदुङ खि। थेमेकामा ङ्योकोन खुई बात पत्ते खिओ सिराच्योक खिदुक। 24तर ङा ख्योकोनला च्यि सिते सासीन परमेश्वर बात खित्कान्ते मि सुङलाङ थे खोरोङ युल्बाओनगी मान मिक्किओ, थेबेकी थे बात ङेनराङ मेङेनो। 25ङुरूङ ज्युज्यु पुर्खे पालोला ओङाते दि बातओननी ख्योकोनला छ्याराङ ओतासीन। च्यि सासीन परमेश्वर बात खित्कान्ते एलिये पालोला लो सुमताङ दावा ठुकसाक छ्यार्बा मेदेक्जीन इस्राएल लुङबा खाङ आउदी खाईन अनिकाल लाबा ओतान। ख्योबो स्याप्ते मिओनगी आउदी दुक्पा ङेता ओतान। थेजीन थेरू थोक्ते फेम्मे मि काल्बेई ओतान। 26थोक ईन्सीनोङ परमेश्वरगी एलियाला थेबा ओत्सादु मोतोङा खाईन सीदोन खादु फाप्च्येते सारफत सिरसादु ओताते ख्योबोते स्यिइन दुक्पा ङेताते फेम्मे मिज्यीकला मद्धत खिताला ताङा ओतान। 27थोकराङ खाईन परमेश्वर बात खित्कान्ते एलीशे पालोलाङ चुक ओङा ओताने सासीन इस्राएल लुङबादु जेबो काल्बेई ओतान। ईन्सीनोङ थेबाला ठाक्पा मिक्किता खाईन एलीशेकीचेन सिरिये लुङबेते नामान सिराते मिलाकामा ठाक्पा खाबा ओतान,” सिन सिदुक।
28थेकी दोक सानामेई था थेकी ज्येन ठाउँला च्योकराङ थेरू अचम्बते काम मिक्किच्याक्वा सिन थे मिओनगी खोसुङ। थेमे थेबाला स्येदाङगी मे बारसुङ। 29थेमे थेबेकी थेला ठाःकनामा पुल्ला रिल्ला तोङाप सिन जुम्गीन ठुत्कीन सारदुई तेन्गीन बोमदु खेरसुङ। थे सारचेन थे बोमगी लाक्तुराङ ओतान। 30तर थेबेकी थेला छ्याःङ खिता माथुप्सुङ। थोगी येशूचेन थे मि हूलदुकी थेन्गीन सरासर थे खोरोङ लामला गाल्सुङ।
येशूकी मिला खोबाते ल्हन्डीक तेन्गीन ताङाते
(मर्कूस १:२१-२८)
31थेरूई येशू कफर्नहुम सारनापा गाल्सुङ। दि सारोङ गालील अञ्चलदुराङ फाप्कीन ओतान। थेरूङ थेकी सन्चारी छोमु मिटिङ खित्च्येते खाम्बादु गाल्गीन मिओनला लोपाला स्यूसुङ। 32थेकी लापाते बात थोकीन थेरू मि गाङेराङ छक्क परे खासुङ। च्यिला सासीन थेत्ताङ परमेश्वरगी बिन्दाते अधिकार ओतेकी थेकी आउदी लेमु खाला लोप्कीन ओतान। 33थेमे थे मिटिङ खित्च्येते खाम्बादुराङ मिज्यीकचेन ल्हन्डीक खोबाई ओतान। थेला खोबाते ल्हन्डीककी कस्स्ये खाला छेरा खिनकामा 34“ए नासरतपे येशू, खुई सेमला पाप सिराते छ्याःङ मेत, खोल्ला परमेश्वरगी ताङाते ईन सिन ङाला छ्या ओत। खो ङ्योकोनला दुक्पा तेराला दुरू च्यिला वाबे? ङ्योकोनला था नरककुण्डमा तोङच्या ईनज्योक मेन?” सिन सासुङ। 35थोक सिरजीन येशूकी “खो काल्बा बात माकेत। दि मिदुकी छिटो थेन्ला ग्युक,” सिन थे ल्हन्डीकला ङारसुङ। थेमे थे ल्हन्डीककी थे मिला मि गाङे ङोन्दु ज्याङे रिल्गीन थेन्गीन गाल्सुङ। दोक खाईन रिल्गीन ताङसीनोङ थे मिला छ्याःङ मेलेबा मायाङसुङ।
36थेकी कोताते ल्हन्डीककीङ थोक खाईन ङेन्दा थोङगीन मि गाङेराङ छक्क परे खिन “आबिई, दिकी चुक अचम्ब खाला बात खिका। दित्ताङ ल्हन्डीक स्यिन्डीपला ग्याल्च्येते शक्ति ओतेकी थेबाला थेन्ला ग्युक सिराईताङ थेबा होत थेन्ला डुइदुक,” सिन खोपरोङ नाङ बात खिताला स्यूसुङ। 37दि बात थेरूकामा मेन्देकी थे फेरोला ओताते युल युलगी मि गाङेकी खिताला स्यूसुङ।
येशूकी नाबाते मि काल्बेईला ठाक्पा खाबाते
(मत्ती ८:१४-१७; मर्कूस १:२९-३९)
38थेमे येशू थे मिटिङ खित्च्येते खाम्बादुकी थेन्नामेकी शिमोन खाम्बापा गाल्सुङ। थेजीन थे आबीते मे च्योकराङ द्वा मुथुप्च्या ठास्युम लाकीन ठास्युमगी नाबा ओतान। थेमे थे खाम्बे मिओनगी येशूला “शिमोन आबी नाला दुक। थेला ठाक्पा खाला नाङ,” सिन बिन्ती खासुङ। 39थेमे गाल्गीन थेकी “खोल्ला ठास्युम तोरस्यीत,” सिन सानामेकी थेते ठास्युम दाक छ्याक्सुङ। थेमे थेकी लाकीन गाङेला साप जोकीन बिन्सुङ।
40शिमोन आबी ठाक्पाते बात थोनामेकी थेङले मिओनगी थे छोमु ङीमा गानामेकी नाबाते मि गाङेला येशू ओत्सादु खुला लिच्युङ। थेबा खुदुक खुदुक रोग लै खाईन नाबा ओतान। थेकी थेबा मेन्दा रेरे लाक्तु लाक्पा ज्य्वाकीन गाङेला ठाक्पा खाला तेरगीन खासुङ। 41ल्हन्डीक खोबाते मिओन नाङदुकीङ ल्हन्डीकओनला थेन्ला ग्युक सिन कोत्कीन सालसुल तेन्गीन ताङसुङ। ज्यीबेकी ल्हन्डीकओनचेन “खो परमेश्वर फुज्युङ ईन,” सिन छेरा खिनकामा मिदुकी थेन्ला डुइन ओतान। ल्हन्डीकओनगी थेला परमेश्वरगी तोङगो साबाते ख्रीष्टराङ ईन सिन छ्या स्येबा ओतेकी येशूकी थेबाला छ्याःङ बात खित माच्युत्सुङ।
42थेमे ङारो च्योक्ते नाम लानामेई येशू थे सारदुकी थेन्गीन थे खोरोङ च्यिकराङ देताप सिन पाङगी नाङपा गाल्सुङ। थेमे थे सारगी मिओनचेन थे खापा गाल्ताका सिन थेला छोल्गीन गाल्सुङ। थेला ठेत्नामेकी थेबेकी “ओर्च्ये, खो ङ्योकोनताङ देत, दुरूकी मान्डो,” सिन थे सारदुकी थेला मोतोङा चाल्सुङ। 43तर थेकी थेबाला “ङा ख्योकोनताङकामा देता मेङेदो। था परमेश्वर राज्य गा लाङच्येते बात ङे दुरूकामा मेन्दाला ज्येन ज्येन ठाउँलाङ गाल्ला लोपा फाप्क्यो। दोक खितालाराङ परमेश्वरगी ङाला छाने खाईन देमा ताङाते ईन,” सिन सिदुक। 44थेमे थेचेन थे लुङबा खाङराङ मिटिङ खित्च्येते खाम्बा खाम्बाला गाल्गीन गा लाङच्येते बात लोपाला स्यूसुङ।
Currently Selected:
लूका 4: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
