यूहन्ना 6
6
येशूकी हजार ङा मिला सा बिन्दाते
(मत्ती १४:१३-२१; मर्कूस ६:३०-४४; लूका ९:१०-१७)
1दि टिक्पी दिन तिरी येशूबा गालील समुन्द्रे फारकेनपा गाल्सुङ। थे समुन्द्रलाचेन तिबेरियास समुन्द्रङ सिरच्येते खिन ओतान। 2थे थेपा ड्वा थोङगीन मि काल्बेई थे तिङ ङ्याकीन गाल्सुङ। च्यिला सासीन थेबेकी येशूकी नाबाते मिओनला ठाक्पा खाबाते अचम्ब अचम्बतेन्दे काम थोङा ओतान। 3थेपा लेप्कीन येशूचेन टिक्पीई खेनला बोमज्यीकने गाल्गीन चेलातेबाताङ देत्सुङ। 4थे बेलाला यहूदीओनते निस्तार चाड लेपा खाबा ओतान।
5थोक खाईन देत्सादुकी ताजीन येशूकी होथे हूलताङ हूल मि थे खोरोङ ओत्सादु ओङगीन ओता थोङसुङ। थेमे थेकी फिलिपला “था दर्गेई दर्गेई मिला ङुरूङगी खापेकी च्यि ङ्योला सा तेरच्ये?” सिन सिदुक। 6ईन्दालाचेन थेकी फिलिपकी चुक सिरच्या ईन्दाका सिन थे सेम ताप्लाकामा थोक सिन ठिबा ओतान। दि मिओनला दोकराङ खाला साप तेरामीन सिन थेकी गोमाका विचार खाईन सिन्दा ओतान। 7थेमे फिलिपकी “आबिई, दोक काल्बेई मिला खालि टिक्पी टिक्पी जाराकामा बिन्सीनोङ चाँदी डबल सय ङिकी स्योबेनगीङ मादाङो,” सिन सिदुक। 8थोक सिरजीन चेलातेबे नाङ शिमोन पत्रुसबे आज्यो अन्द्रियासकीचेन 9“थेबे नाङ ख्योओ फिजाज्यीगी स्योबेन ङाताङ ङ्या ङि खुलाला दुक। थोस्यिककीङ दोक काल्बेई मिला च्यि पत्ता लेबोङा?” सिन सिदुक।
10थेरूई थेकी चेलातेबाला “लो दि मि गाङेला साला लेमु खाला देत सिन सि,” सिन सिदुक। थेरू थे पाङ खाङ आउदी काल्बेई सो केबा ओतान। थेमे मितेबा गाङेराङ देत्सुङ। थोक खाला थेरू देत्कान्तेबे नाङ हजार ङाजो ख्योओ मिकामा ओतान। 11थेमे येशूकी थे स्योबेन ङा लाःक्तु लाकीन परमेश्वरला धन्यवाद बिन्नामेई मिओनला थेबेकी सा थुपथुप गोकीन बिन्सुङ। ङ्याङ थोकराङ खाईन सा बिन्सुङ। 12मिओनगी सुबा खाङ सोकीन डाकीन सिन्नामेकी थेकी चेलातेबाला “लो था सोकीन लूबाते स्योबेन टुक्रातेबा गाङे जम्मा खि, चिमाईओङ क्युरा मेङगो,” सिन सिदुक। 13थेमे चेलातेबेकीङ साबा च्योकराङ खाईन स्योबेन टुक्रा रूकीन तोलुम च्युन्ङी काङसुङ। थे स्योबेन ङेकीराङ थोक काल्बेई सोला मोयोक्च्या स्योबेन ओङा ओतान।
14येशूकी खाबाते दि अचम्बते काम थोङगीन थे मिओनगी “दिनी पक्काराङ दुरू ओङगो साबाते परमेश्वर बात खित्कान्तेराङ दुका,” सिन सासुङ। 15था थे मिओनगी वाला थे खोरोङला जबरजस्ती थेबे गेल्बो जोइओ सिन येशूकी छ्या स्येसुङ। थोक ईन्देकी थे दाक थेरूकी थे खोरोङकामा बोमने गाल्सुङ।
येशू छ्युई लाकताङ लाक ख्याम्बाते
(मत्ती १४:२२-३३; मर्कूस ६:४५-५२)
16थेमे ग्वासेला चेलातेबाचेन समुन्द्रे छेउनामा फाप्सुङ। 17थेमे डुङ्गाज्यीकला जेकीन कफर्नहुमपा ड्वाप्ला स्यूसुङ। थे बेलाला नाम स्योकीन सिन्दा ओतान। थेजीनसाकोङ येशू चेलातेबा ओत्सामा लेपा मेतान। 18आउदी कस्स्ये खाईन हुन्डी चले खाईन समुन्द्रला ज्यीबा लाङच्येतेन्दे छाल लाङाला स्यूसुङ। 19थे बेलासाकला थेबेकी डुङ्गा चले खाईन कोस ङिचो थारी क्याल्गीन सिन्दा ओतान। थेमे थेजीनराङ येशू छ्युई लाकताङ लाक ख्याम्गीन थेबा खोपरोङ डुङ्गे खानापा ओङगीन ओताते थेबेकी थोङसुङ। दोक थोङजीन थेबा आउदी खाईन ज्यीबा खासुङ। 20थेबा थोक खाईन ज्यीबा खाबाते छ्या स्येकीन येशूकी “ङा ईन ङा, ज्यीबा माकेत,” सिन बात खासुङ। 21थेमे गा खिन थेबेकी थेला डुङ्गे नाङ स्योक सिरा चाल्सुङ। तर मिक छुम खा माक्याबाला थेबानी खोपरोङ ड्वा चाल्सादु लेप्कीन सिन्दा ओतान।
मिओनगी येशूला चालाते
22थेमे समुन्द्रे छुरकेनपा थेङलाराङ स्यासा देताते होथे हूलगी मिओनला ङारो च्योक्ते दि बात ठेम्बा लासुङ। च्यि सासीन थे समुन्द्रे खादु डुङ्गाज्यीककामा ओताते थेमे चेलातेबा थे डुङ्गा जेला डोजीन येशू थेबाताङ ङ्योम्बु मेताते थेबाला ठेम्बा लासुङ। 23थेजीनराङ तिबेरियास नाङपेकी वाबाते डुङ्गा काल्बेई थे समुन्द्रे छेउकी नाङला ख्योल्सुङ। थे समुन्द्रे छेउकी खादुराङ गोमे छोमु प्रभु येशूकी स्योबेनताङ ङ्ये लाईदु परमेश्वरला धन्यवाद बिन्नामेई मिओनला सा बिन्दा ओतान। 24थेमे थेरू येशूताङ थे चेलाओन सुङ माथोङनामेकी थे मिओन होथे डुङ्गाओनलाराङ जेकीन लोक्ला येशूला छोलाला कफर्नहुमपाला गाल्सुङ।
येशू छ्य्वापेईकामा जुनी ङेत्क्यो
25फारकेनपा लेप्कीन येशूला ठेत्नामेकी थेबेकी “गुरू, खो दुरू नाम वाबे?” सिन ठिसुङ। 26थोक सिरजीन थेकी “ङा ख्योकोनला दि बात सिओ। ख्योकोनगी ङाला चालातेचेन ङे खाबाते अचम्बते कामतेबा थोङगीन मेन्देकी सुबा खाङ सा ङेतेकीकामा ईन। 27खालि साच्या थुङच्ये विचारकामा माकेत। दिनी दि जुनी लाईदुकामा ईन। बरू ख्योकोनगी चुक खाला नोमुङ मिसिन्च्येते जुनी ङेत्च्येते साप ङेदोङा सिरच्येते विचार खि। ख्योकोनला थे साप तेरकान्तेचेन परमेश्वर ओत्सादुई वाबाते मि ङाराङ ईन। आबा परमेश्वरगीराङ ङाला थोक खित्च्येते अधिकार बिन्दा ओत,” सिन सिदुक। 28थोक सानामेई थेबेकी “थोक ईन्सीन परमेश्वरगी खि साबाते काम खिताला ङ्योकोनगी च्यि खिता फाप्कीते ओना?” सिन ठिसुङ। 29थोक सिरजीन थेकी “परमेश्वरगी खि साबाते कामचेन थेकी दुरू ताङाते मिला विश्वास खित्च्येतेराङ ईन,” सिन सिदुक।
30थेमे थेबेकी “ङ्योकोन खोल्ला चुक खाला विश्वास खित्च्ये? खोल्ला परमेश्वरगी ताङाते ईन सिन तेन्दाला था खो ङ्योकोनला च्यि अचम्बते काम खाला तेन्गीते? 31ङ्योकोन ज्युज्यु पुर्खेकीनी ठाःकताङ बालुवा बाई छ्याःङ मेत्साला देत्जीन साप साप्ला मन्न ङेता ओतान। थोक ओङा ओतान सिनचेन ‘थेकी साप्ला सिन थेबाला स्वर्गनेकी साप बिन्दा ओतान,’ सिन परमेश्वर बातला टिबा ओत,” सिन सासुङ।#भजन ६८:२४ 32थोक सिरजीन थेकी “दि बात ङेन। थेजीन मोशेकी बिन्दाते थे साप स्वर्गे साप मेन। ख्योकोनला मेताला ओङराङ मेङच्येते स्वर्गे सापनी ङे आबेकीका तेरग्यो। 33परमेश्वरगी तेरच्येते सापचेन स्वर्गनेकी दुरू वाबाते मिराङ ईन। थेकीराङ दि सा लुङबे मिओनला नोमुङ मिसिन्च्येते जुनी तेरग्यो,” सिन सिदुक। 34थेमे थेबेकी “हजूर, लो थोक ईन्सीन थानामेई ङ्योकोनला खुई बात खाबाते होथे सापराङ नाङ,” सिन सिदुक।
35थेबेकी थोक सानामेकी येशूकी “नोमुङ मिसिन्च्येते जुनी ङेत्च्येते सापचेन ङाराङ ईन। सुइँदा ङे छ्य्वापा लै खिदुक सासीन थेला नोमुङ त्वाबा मालाङो। थेमे ङाला विश्वास खित्कान्ते मिलाचेन नोमुङ कोम्बा मालाङो। 36ङे गोमामेई सिन वाबा च्योकराङ खेराङ मिगीराङ थोङसीनोङ ख्योकोनगी ङाला विश्वास मिक्किदुक। 37आबेकी ङे जिम्माला तेरच्येते मि जति गाङे ङे छ्य्वापा लै खिओ। थोक खित्कान्ते सुङलाङ ङा ङे छ्य्वापा माङ सिन नोमुङ मिसिरो। 38ङा ङाराङ खुशीकी च्यि खिता सेम लाङगीका थोकराङ खिताला स्वर्गनेकी दुरू वाबाते मेन। ङानी ङाराङला देमा तोङकान्तेकी खिता चाला चाला खितालाका वाबाते ईन। 39ङाला दुरू तोङकान्तेकी खिता चालाते कामचेन थे खोरोङगी ङे लाःक्तु जिम्मा बिन्दाते जति सुङलाङ ङाराङ छ्य्वापेई ठाल मुज्युत्च्येते थेमे न्याय खिते छोमु थेबाला सोम्बो लोक्च्येते ईन। 40ङाला थे खोरोङ फुज्युङ दुका सिन छ्या स्येला विश्वास खित्कान गाङेकी नोमुङ मिसिन्च्येते जुनी ङेत्स्यीत सिरच्येते ङे आबेते आउदी सेम ओत। थोक्ते मिओनलाचेन न्याय खिते छोमु ङा सोम्बो लोइओ,” सिन सिदुक।
41थेकी थे खोरोङला परमेश्वरगी तेरच्येते स्वर्गे साप ईन सिन साबाते बात थेरू ओताते यहूदीओन सेमला मागाल्सुङ। 42थोगी थेबा “आबिई, च्यि दि यूसुफ फुज्युङ येशू मेनरो? दि आबा आमाबा सु ईन्दे सिन ङुरूङला लेमुराङ खाला छ्या ओत। थेमे दिकी च्यिला ‘ङाचेन स्वर्गनेकी वाबाते ईन,’ सिन सिका?” सिन बात खिताला स्यूसुङ। 43थेमे थेकी थेबाला “ख्योकोन दोक खाला खेराङ नाङ बात खिता माफाबो। 44ङाला दुरू तोङकान्ते आबेकी ङे छ्य्वापा खुला मावाथुपनी सुङ ङे छ्य्वापा लै खिताराङ मुथुबो। ङे छ्य्वापा लै खित्कान्ते मिलाचेन ङा न्याय खिते छोमु सोम्बो लोइओ। 45परमेश्वर बात खित्कान्ते मिओनगी ‘परमेश्वरगीराङ मि गाङेला थे खोरोङ बात लाप्ला तेरग्यो,’ सिन टिबा ओत। आबेकी साबाते बात ङेन्ला खि साबाच्योक खित्कान्ते मि जति ङे छ्य्वापा लै खिओ। 46परमेश्वर ओत्सानेकी ओङकान्तेकी बाई आबाला दोकस्यिकराङ दुक सिन सुङगीङ थोङा मेत। थे ओत्सानेकी ओङकान्तेकीकामा थेला थोङा ओत। 47ङा ख्योकोनला दि बात सिओ। च्यि सासीन ङाला विश्वास खित्कान्ते मिकीचेन नोमुङ मिसिन्च्येते जुनी ङेत्कीन सिन्दा ओत। 48नोमुङ मिसिन्च्येते जुनी ङेत्च्येते सापचेन ङाराङ ईन। 49ख्योकोन पुर्खेकी ठाःकताङ बालुवा बाई छ्याःङ मेत्साला देत्जीन मन्न सोबा ओतान। ईन्सीनोङ थेबा स्यिइन गाल्सुङ। 50स्वर्गनेकी देमा वाबाते सापचेन मन्न च्योक्ते मेन। दि साप साकान्ते मिचेन नोमुङ मिस्यिओ। 51स्वर्गनेकी वाबाते नोमुङ मिसिन्च्येते जुनी ङेत्च्येते सापचेन ङाराङ ईन। दि साप साकान्ते मिकीचेन नोमुङ मिसिन्च्येते जुनी ङेत्क्यो। दि सापचेन ङे जीउराङ ईन। दि सा लुङबे मिओनगी नोमुङ मिसिन्च्येते जुनी ङेत्स्यीत सिन ङा ङाराङ ज्यान बिन्ला स्यिइओ” सिन सिदुक।
52थेकी थोक सानामेईनी यहूदीओन थेत्ताङ झन स्येदाङ खिन “दिकी चुक खाला ङुरूङला दि खोरोङ जीउ सो सिन तेरगीते? थेमे चुक खाला ङुरूङगी दि स्या साच्ये?” सिराला स्यूसुङ। थेकी साबाते बातला माडिगीन थेबा खोपरोङ नाङ थोम्मु खिताला स्यूसुङ। 53थेमे येशूकी थेबाला “ङा ख्योकोनला दि बात सिओ। च्यि सासीन परमेश्वर ओत्सादुई वाबाते मि ङे स्या मासोसीन थेमे ङे ठाक माथुसीन ख्योकोनगी नोमुङ मिसिन्च्येते जुनी ङेतराङ मेङेदो। 54ङे स्या साकान्तेताङ ङे ठाक थुङकान्ते मिकीचेन नोमुङ मिसिन्च्येते जुनी ङेत्क्यो। थेमे थोक्ते मिला ङा न्याय खिते छोमु सोम्बो लोइओ। 55ङे स्याचेन साँच्चीराङ साच्येते साप ईन। थेमे ङे ठागोङ साँच्चीराङ थुङच्येते ईन। 56ङे स्या साकान्तेताङ ठाक थुङकान्ते मिचेन ङात्ताङ डिक्लाराङ देत्क्यो। थेमे ङाङ थेत्ताङ डिक्लाराङ देत्क्यो। 57गाङेला जुनी तेरकान्ते आबेकी ङाला दुरू ताङाते ईन। थेकी खित्सादुराङ ङा सोन्गीन देता ओत। थोगी ङे स्या साकान्तेताङ ठाक थुङकान्ते मिङ ङे खित्सादु सोन्ला देत्क्यो। 58स्वर्गनेकी देमा वाबाते सापकी बातचेन होदिराङ ईन। स्वर्गनेकी वाबाते सापचेन ख्योकोन ज्युज्यु पुर्खेकी सोबाते साप च्योक्ते मेन। थेबानी थे साप सोसीनोङ तिरी दाक स्यिसुङ। ङे थाल्ला साबाते साप साकान्ते मिकीचेन नोमुङ मिसिन्च्येते जुनी ङेत्क्यो,” सिन सिदुक। 59थेकी दि बाततेबा कफर्नहुमदु मिटिङ खित्च्येते खाम्बादु मिओनला लोप्जीन खाबाते ईन।
मि काल्बेई येशूताङ ठालाते
60येशूकी साबाते दि बाततेबा थेत्ताङ ख्याम्कान्ते ज्येन चेलाओन सेमला मागाल्सुङ। थोगी थेबा “दोक बादोङ सुई ङेन्गीते? दिकी साबाते बातनी सुङगीङ सेमला डोच्या मिन्दुक,” सिराला स्यूसुङ। 61थेबेकी थोक खाईन बात खाबाते छ्या स्येकीन थेकी “च्यि ङे साबाते बात ख्योकोन सेमला मागाल्सुङ? 62था ख्योकोनगी परमेश्वर ओत्सादुई वाबाते मि ङा गोमा ङाराङ देता ओत्सानेराङ ग्युरगीन ड्वा थोङसीन चुक ओङोङा याङ? 63मिओनला नोमुङ मिसिन्च्येते जुनी तेरकान्ते परमेश्वर आत्मा ईन। मिकीचेन दोक खिताराङ मुथुबो। ङे ख्योकोनताङ खाबाते बाततेबा परमेश्वर आत्मेते थेमे नोमुङ मिसिन्च्येते जुनी बात ईन। 64दोक ईन्सीनोङ ख्योकोन नाङ कोई कोई ङाला विश्वास मिक्किकानोङ ओत,” सिन सिदुक। सु सुकी थे खोरोङला विश्वास मिक्किते थेमे सुई थेला धोका तेरगीते सिन थेला शुरूमेईराङ छ्या ओत्कीन ओतान। 65थोरूमोङ बात खिन थेकी “थोगीराङ ङे ख्योकोनला गोमाका ङे आबेकी ङे छ्य्वापा खुला मावाथुपनी सुङ ङे छ्य्वापा लै खिताराङ मुथुबो सिन साबाते ईन,” सिन सिदुक।
66थेमे थे छोमुमेकी येशू चेलातेबा काल्बेई थेत्ताङ माख्याम्च्या खाईन थेला ताङगीन गाल्सुङ। 67दोक ओङनामेई थेकी चेलातेबा च्युन्ङीला “ख्योकोनचेन च्यि खिते याङ? च्यि ख्योकोनोङ ङाला ताङला डुइओ?” सिन ठिसुङ। 68थोक सिरजीन शिमोन पत्रुसकी “प्रभु, खोल्ला ताङला ङ्योकोन खापा डोच्ये? थेमे सुई तिरी ख्याम्च्ये? मिओनगी नोमुङ मिसिन्च्येते जुनी ङेत्च्येते खुई बात ङेन्लाराङ ईन। 69खुई सेमला पाप सिराते छ्याःङ मेत, खोल्ला परमेश्वरगीराङ ताङाते ईन सिन ङ्योकोनगी छ्या स्येबा ओत। दि बात ङ्योकोन पत्ते खिओ,” सिन सिदुक। 70थेमे थेकी “च्यि ङे ख्योकोन मेरा च्युन्ङी गाङेला छाने खाबाते मेनरो? दोक ईन्सीनोङ ख्योकोन नाङ दोक्पोईचेन शैतानराङ ईन,” सिन सिदुक। 71दि बात थेकी शिमोन इस्करियोत फुज्युङ यहूदा इस्करियोत विषयला साबा ओतान। थेङ येशूते चेला च्युन्ङी नाङ दोक्पोई ईन्सीनोङ टिक्पी तिरी थेकी येशूला धोका तेराला ठीक खाबा ओतान।
Currently Selected:
यूहन्ना 6: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
