यूहन्ना 4
4
येशूताङ सामरी फेम्मे मि बात
1येशूकी यूहन्नेकी भन्दाङ काल्बेई चेला जोइन दुक्लो थेमे मिओनला बप्तिस्मा तेरगीदुक्लो सिन फरिसी पाटी मिओनगी थोदुक्लो सिन प्रभु येशूकी छ्या स्येसुङ। 2ईन्दानी थे खोरोङगी बप्तिस्मा तेरगीन मेतान। दि काम चेलातेबेकी खिन ओतान। 3थे बात छ्या स्येकीन थे यहूदिये अञ्चलदु मेदेता खाईन याङराङ गालीलपा गाल्सुङ। 4थेपा ड्वाप्ला सामरिये अञ्चलपेकी खाला ड्वा फाप्कीन ओतान। 5थोगी डुइन डुइन थे सामरिये अञ्चल सुखार सिराते सारदु ख्योल्सुङ। थे सारचेन याकूबकी थे खोरोङ फुज्युङ यूसुफला बिन्दाते स्यीङगी खादुकी आता थारी मेतान। 6थेरू याकूबकी ठुबाते छ्युई इनारोङ ओतान। ख्याम्गीन ख्याम्गीन थाङोङ छ्येतेकी येशू थे इनार खादुराङ लेप्कीन ङा सोसुङ। ङीम्मु बाह्र बजे नाङला थे थेरू लेपा ओतान।
7थेजीनराङ सामरीमाज्यीक छ्यु लिन्दाला थे इनारदु ख्योल्सुङ। थेमे येशूकी थेला “ङालाङ छ्यु टिक्पीई थुङा नाङते,” सिन सिदुक। 8चेलातेबाचेन साच्येते ङ्य्वाप्ला सारनापा गाला ओतान। 9थेमे थे फेम्मे मिकी “ङानी सामरीका ईन। ख्योकोन यहूदीला छ्यु चले मिक्किओ। थोगी खो चुक खाला ङे बिन्दे छ्यु थुङगीते?” सिन सिदुक। यहूदीओनगी सामरीओनला सानु जाति सिन थेबे नाङ लिनदिन छ्याःङ ओङगीन मेतान। 10थे फेम्मे मिकी थोक सानामेई थेकी “परमेश्वरगी च्यि तेरगीते सिन खुई छ्या स्येबा ईन्सीन थेमे थाल्ला खोल्ला छ्यु नाङ सिरकान्ते सु ईन्दे सिन छ्या स्येबा ईन्सीन खुईका ङाला छ्यु थुङा नाङ सिरच्या ओतान। थेमे ङा खोल्ला जुनी ङेत्च्येते छ्यु थुङा तेरच्या ओतान,” सिन सिदुक। 11थोक सिरजीन थे फेम्मे मिकी “हजूर, खुई लाःक्तु छ्यु थेन्च्येते नोदोङ मिन्दुक। लोक्ला छ्युङ आउदी तीङला इनार स्यामनामा दुक। थेमे खो थे जुनी ङेत्च्येते छ्यु खापेकी खुलाङा सिते? 12दि इनार ङ्योकोन ज्युज्यु याकूबकी ङ्योकोनला बिन्गीन ज्याक्पाते ईन। थेत्ताङ थे फुज्युङबा थेमे थेबे रा ठोन्डोकीङ दि इनार छ्युराङ थुबाते ईन। थोक ईन्सीन च्यि खो ङ्योकोन ज्युज्यु याकूब भन्दाङ छ्ये ईन ओना?” सिन सिदुक।
13थेमे येशूकी “दि इनार छ्यु थुङकान्ते मिला याङराङ कोम्बा लाङगो। 14ङे तेरच्येते छ्यु थुङकान्ते मिलाचेन नोमुङ कोम्बा मालाङो। ङे तेरच्येते छ्यु थुङकान्ते मि नाङ थे छ्युराङ जहिलेङ बुलुङलुङ दोल्गीन देत्च्येते छ्युई मोन च्योक ओङगो। थेमे थे मिकी नोमुङ मिसिन्च्येते जुनी ङेत्क्यो,” सिन सिदुक। 15थेरूई थे फेम्मे मिकी “लो ओना हजूर, थे छ्यु ङाला नाङ। थेमे ङाला लोक्ला कोम्बाङ मालाङो। दि इनार छ्यु लिन्दाला याङ याङ दुरू ओङाङ माफाबो,” सिन सिदुक। 16थोक सिरजीन येशूकी “गाल्ला खुई ख्योबोलाङ काताङला खोरच्योक,” सिन सिदुक। 17थे फेम्मे मिकीचेन “अहँ, ङेतेनी ख्योबोराङ मेत” सिन सिदुक। थोक सानामेई येशूकी “खुई ‘ङेतेनी ख्योबोराङ मेत,’ साबाते बात साँचो ईन। 18थातासाकला खुईते मेरा ङा ख्योबो छाङगीन सिन्दुक। थेमे थरिङोला खोत्ताङ ओताते मिङ खुई ख्योबो मेन। ईन, खुई ङाला साँचोते बात लाःप्सुङ,” सिन सिदुक। 19थेमे थेकी “हजूर, खोनी पक्काराङ परमेश्वर बात खित्कान्ते मि दुका। 20ङ्योकोन ज्युज्यु पुर्खेकी दि बोमदुराङ परमेश्वरला माने खिन ओतान। तर ख्योकोन यहूदीओनचेन ङुरूङगी परमेश्वरला माने खिता फाप्च्येतेचेन यरूशलेमदुराङ ईन सिन सिओ,” सिन सिदुक।
21थेकी थोक सिरजीन येशूकी “आज्यी, ङा खोल्ला दि बात सिओ। च्यि सासीन था समयज्यीक ओङगो। थेजीन आबा परमेश्वरला माने खिताला मिओन दि बोमदुङ ओङा माफाबो, यरूशलेमपाङ ड्वा माफाबो। 22ख्योकोन सामरीओनला खेराङगी सुला माने खिन ओते सिन छ्या मिन्दुक। ङ्योकोनलानी ङेराङगी सुला माने खिन ओते सिन लेमुराङ खाला छ्या ओत। च्यिला सासीन मिओनला पापताङ दुक्पादुकी डेल्कान्तेचेन यहूदी नाङदुईराङ ओङगो। 23थेमे था समयज्यीक ओङगो। सिइ सासीन थे समय वाकीन सिन्दा ओत। आबा परमेश्वरला चुक खाला माने खिता फाप्कीते सिन था परमेश्वर आत्मेकी मिओनला छ्या स्ये च्युत्ला थेला जस्तो खाला माने खिता फाप्च्येते ईन होथोकराङ खाला माने खित ज्युत्क्यो। आबा परमेश्वरगीङ थे खोरोङला होदोक खाला माने खित्कान्ते मिओनराङ छोल्ग्यो। 24परमेश्वरचेन आत्मा ईन। थोगी थेला माने खित्कान्ते मिओनगी परमेश्वर आत्मेकी छ्या स्ये च्युत्कीन बिन्दा च्योकराङ खाला थेला जस्तो खाला माने खिता फाप्च्येते ईन, होथोकराङ खाला माने खिता फाप्क्यो,” सिन सिदुक। 25थेमे थे फेम्मे मिकी “ङाला दि बात छ्या ओत। च्यि सासीन था ख्रीष्ट सिराते मसीह ओङगो। थे वानामेई थेकीराङ ङ्योकोनला दि गाङे बात लोप्क्यो,” सिन सिदुक। 26थोक सिरजीन येशूकी “होथेचेन थाल्ला खोरोङताङ बात खिन ओताते ङाराङ ईन,” सिन सिदुक।
27दि बेलालाराङ चेलातेबा ग्युरगीन थेरू लेप्सुङ। थे थोक खाईन फेम्मे मिज्यीकताङ बात खिन देता ओता थोङजीन थेबा छक्क परे खासुङ। ईन्सीनोङ “ए गुरू, खुई दि फेम्मे मित्ताङ च्यि बात खाबे? च्यिला बात खिते?” सिन खाङगीङ माठिसुङ। 28थेमे थे फेम्मे मि छ्युई गरीङ थेरूराङ ज्याइन सारनापा छ्य्वाकीन गाल्गीन मिओनला 29“ए ख्योकोनबरी मिज्यीकला तार स्योक्ते। थेकी थरिङसाक ङे च्यि च्यि खाका सिन गाङे बात ङाला लाःप्सुङ। परमेश्वरगी तोङगो साबाते ख्रीष्ट ना थेराङ ईन्ताका?” सिन सिदुक। 30थेकी थोक सिरा थोबाईताङ सारगी मि गाङेराङ येशू ओत्सापा लिच्युङ।
31थे मिओन येशू ओत्सापाला ओङगीनराङ ओतान। थेजीनराङ चेलातेबेकी येशूला “गुरू, टिक्पीस्यिक खइँदा साप सोना,” सिन सासुङ। 32तर थेकी “ङेते साप ज्येनज्यीकराङ ओत। थे च्यि ईन्दे सिन ख्योकोनला छ्याःङ छ्याराङ मेत,” सिन सिदुक। 33थोक सिरजीन चेलातेबेकीचेन “गुरूला सुइँदेकी साप खुलाकीन बिन्ताकाना च्यिन्ताका?” सिन खोपरोङ नाङ बात खासुङ। 34थेमे येशूकी “ङे सापचेन ङाला दुरू तोङकान्तेकी खिता चाला चालाच्योक गाङे खाला सिन्दा खित्च्येते ईन। 35ख्योकोन नाङ ‘था दावा स्यी तिरीनी बाली थोक्पा रूक्पा ङेत्क्यो,’ सिन बात खिओ मेन? तर ङा च्यि सिते सासीन ख्योकोन लेमु खाला स्यीङगी नाङला तोते। बाली छोकीन थोक्पा रूक्पा गाल्गीन सिन्ला दुक। 36बाली थोक्कान रूक्कान्ते मिकी थाल्लेई थाल्ला थे बनी ङेत्च्या दुक। च्यि सासीन बाली थोक्पा रूक्पाच्योक खाला थे मिकी थाल्लेई थाल्ला ज्येनला नोमुङ मिसिन्च्येते जुनी ङेत्च्येते लाम तेन्ला तेरा थुप्च्या दुक। दोक खाला बाली लै खित्कान्तेङ बाली थोक्कान रूक्कान्तेङ ङिकाराङ गा खिता ङेत्क्यो। 37‘दोक्पोईकी बाली लै खिओ थेमे ज्येनज्यीगी त्वाला रूला थन्के खिओ,’ सिन वाबाते बात ईन्दातेराङ ईन। 38च्यि सासीन ङे ख्योकोनला खेराङगी दुक्पा खाईन खाईन लै खाबाते बाली थोक्पा रूक्पाला मेन्देकी सुइँदा ज्येनगी दुक्पा खाईन लै खाबाते बाली थोक्पा रूक्पाला ताङाप। ख्योकोनचेन खेराङगी मेन्गीन ज्येनगी दुक्पा खाईन खाईन लै खाबाते बाली थोक्सा रूक्साला स्यूबाते ईन,” सिन सिदुक।
सामरीओनगी येशूला विश्वास खाबाते
39थे फेम्मे मिकी “थेकी थरिङसाक ङे च्यि च्यि खाका सिन गाङे बात ङाला लाःप्सुङ,” सिन थे मोरोङला ओङाते बात साबेकी सामरी काल्बेईकी येशूला विश्वास खासुङ। 40थोक खाईन येशू ओत्सादु लेप्कीन ङीमाई ङीमा ङि थेबाताङ देत सिन थेबेकी थेला बिन्ती खासुङ। थोगी थे ङीमा ङिसाक थेबाताङ देत्सुङ। 41थोक खाला थेबाताङ देत्जीन थेकी लापाते बाततेबा थोकीन झन मि काल्बेईकी थेला विश्वास खासुङ। 42थेमे थेबेकी थे फेम्मे मिला “थानी खुई साबाते बात थोबेकी खित्सादु मेन, येशूकी साबाते बाततेबा ङेराङगीराङ थोबेकी ङ्योकोन थेला विश्वास खिताला स्यूबाते ईन। थेमे दि सा लुङबे मिओनला पापदुकी डेल्कान्तेचेन थेराङ ईन सिन ङ्योकोनगी छ्या स्येसुङ,” सिन सासुङ।
येशूकी छ्येते मिज्यीक फुज्युङ ठाक्पा खाबाते
43दोक खाईन सामरिये अञ्चलदु ङीमा ङि देत्कीन येशू गालील अञ्चलपा गाल्सुङ। 44“परमेश्वर बात खित्कान्ते मिला थे खोरोङ युल्बाओनगी मान मिक्किओ,” सिन येशूकी पालोई साबा ओतान। 45ईन्सीनोङ गालीलदु लेप्नामेकी थेरू मिओनगी थेला आउदी लेमु खासुङ। च्यिला सासीन निस्तार चाडगी बेलाला थेबा यरूशलेमदु ओत्जीन थेकी खाबाते गाङे काम थेबेकीङ खोपरोङ मिगीराङ थोङा ओतान।
46थेमे येशू लोईन गालील अञ्चल काना सारनापा गाल्सुङ। थे सारदुराङ थोङला बाजिई थेकी छ्युला अंगूर छ्याङ जोबा ओतान। थेमे थे कानादु ओते बेलालाराङ गेल्बो छ्येते मिज्यीक्ते कफर्नहुमदु फुज्युङते नाकीन स्याप खाबा ओतान। 47येशू यहूदियापेकी गालीलदु लेपाते बात थोकीन थे कफर्नहुमदुकी थे ओत्सादु गाल्सुङ। थेमे खाँपा गाल्ला च्याला नाकीन स्याप खाबा ओताते फुज्युङतेला ठाक्पा खाला नाङ सिन बिन्ती खासुङ। 48थे मिकी थोक खित्जीन येशूकी थेला “अचम्ब अचम्बतेन्दे काम माथोङथुपचेन ख्योकोनगी ङाला विश्वासराङ मिक्किदुक,” सिन सिदुक। 49थे मिकीचेन “हजूर डुइना, ङे फुज्युङते ङेपाक ओत्केलाराङ डुइ, ओर्च्ये,” सिन सिदुक। 50थोक सिरजीन येशूकी “ग्युक ग्युक, खुई फुज्युङ सोन्ग्यो,” सिन सिदुक।
थोक सानामेकी येशूकी साबाच्योक पक्काराङ ओङगो सिन थे मि थेरूई ग्युरगीन गाल्सुङ। 51थे खाँपा डुइन डुइनला थे खाम्बादु काम खित्कान्ते मिओनगी थेला लामनापाराङ ठेता खाईन वाकीन “हजूर, खुईते फुज्युङ ठाक्सुङ,” सिन लाःप्सुङ। 52थेमे थेकी “च्यि बेलामेकी थे ठाक्सुङा?” सिन ठिजीन थेबेकी “दाङ एक बजे नाङपेई थेते ठास्युम छ्याक्सुङ,” सिन सिदुक। 53येशूकी थे खोरोङला “खुई फुज्युङ सोन्ग्यो,” साबाते ठीक थे बेलालाराङ ईन सिन थेकी छ्या स्येसुङ। थोगी थे मि थेमे थे खाम्बादु ओताते गाङेकी येशूला विश्वास खासुङ।
54दित्ताङचेन येशूकी यहूदियापेई गालीलदु वाकीन खाबाते अचम्बते काम ङि छाङा ओतान।
Currently Selected:
यूहन्ना 4: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
