यूहन्ना 19
19
पिलातसकी येशूला सेत्च्येते हुकुम बिन्दाते
(मत्ती २७:१५-३१; मर्कूस १५:६-२०; लूका २३:१३-२५)
1थेमे पिलातसकी येशूला थेरूई खेरगीन कोर्रा लै खित च्युत्सुङ। 2मिल्टेरीओनगीचेन चाङगी बुटे श्रीपेज जोकीन येशू गोःला कोन्गीन बिन्सुङ। थोकराङ खाईन मोर्मुते रंग ग्यापाते लाक्तु खोन्च्येते खोलाक कोन्सुङ। 3थेमे थे खादु गाल्गीन “यहूदीओन गेल्बो काल्बासाक सोन्स्यीत, खुईते जय जय ओङस्यीत,” सिन खिस्यी खासुङ। थेमे थेबेकी थेला छ्येतनापाराङ छ्येतनापा ग्याप्सुङ।
4पिलातसकी फिनामा वाकीन लोईन थेरू जम्मा ओङा ओताते यहूदीओनला “लो थे मिला ङा फिनामा ख्योकोन दोन्दुराङ खुलाङगो। थेला सजाय तेराला ङे थेते छ्याःङ गल्ती माथेप्तुक सिन ख्योकोनगी छ्या स्येबा खि,” सिन सिदुक। 5येशू थे खोरोङला कोन्दाते चाङगी श्रीपेजताङ थे खोलाक खोन खोनबाराङ फिनामा वानामेई पिलातसकी “लो तो मि दिराङ ईन,” सिन सिदुक। 6येशूला थोङासात्तु छ्ये छ्ये पूजारी थेमे मन्दिरदु देत्कान्ते पुलिसओनगी “दिला सेताराङ फाप्क्यो। दिला स्यिङगी थामला टाँए खाला सेत,” सिनकामा आउदी खाईन छेरा खासुङ। थेबेकी थोक खित्जीन थेकी “लो खेराङराङ दिला खेरला स्यिङगी थामला टाँए खाला सेत। दिला च्यि सजाय तेरच्ये? ङेनी दिकी छ्याःङ गल्ती खाबा माथोङसुङ,” सिन सिदुक। 7थेमे थे यहूदीओनगी “दिकी दि खोरोङला परमेश्वर फुज्युङ ईन खिदुक। ङ्योकोनते नियमज्यीक ओत। थे नियम ताजीन थोक साबेकी खित्सादु दिला सेताराङ फाप्क्यो,” सिन सिदुक।
8थेबेकी थोक सानामेई थे झन ज्यीबा खासुङ। 9थेमे लोईन नाङने स्यूकीन थेकी येशूला “खो खापे मि ईन्दे?” सिन ठिसुङ। तर येशू खाराक्पा देत्सुङ। 10थोगी थेकी “च्यि खो ङात्ताङ बात मिक्किओ? खोल्ला थाराङ तोङच्याना स्यिङगी थामला टाँए खाला सेत ज्युत्च्ये सिरच्येते अधिकार ङात्ताङ ओत सिन च्यि खोल्ला छ्या मेत?” सिन सिदुक। 11थोक सिरजीन येशूकी “स्वर्गने ओताते परमेश्वरगी ङाला दोक खि सिन खोल्ला अधिकार बिन्देकी खित्सादुकामा खुई ङे न्याय खिता ङेताते ईन। ङाला खुई लाःक्तु सोम्पे खित्कान्ते मिकी झन आउदी पाप खाबाते ईन,” सिन सिदुक। 12थेकी येशूला दोस्यिकलाराङ ताङला तोङा चाला ओतान। तर यहूदीओनगी छेरा खिनकामा “खुई दि मिला ताङगीन ताङसीन खो रोमी गेल्बोताङ डिक्कान्ते मि मेन। जसकी ङा गेल्बो ईन खिदुक, थेकी रोमी गेल्बो विरोध खाबाते ईन,” सिन सासुङ। 13थेबेकी दोक सानामेई थेकी येशूला फिनामा खुलाङ च्युत्कीन च्याकीन थे न्याय खित्कान्ते मि देत्च्येते ठाउँदु देत्सुङ। थे ठाउँचेन दोई छापे खाईन जोबा ओतान। हिब्रू बातला थे ठाउँला गब्बथा सिन ओतान। 14निस्तार चाड शुरू ओङगीन ङारो च्योक्ते सन्चारी लाईदु जेसुकै ठीकठाक खिता फापे छोमु ङीम्मु बाह्र बजे नाङपा दोक दोक ओङगीन ओतान। थेमे पिलातसकी यहूदीओनला “लो खेराङ गेल्बोला तोसा,” सिन सिदुक। 15थेकी थोक सानामेई “दिला ङ्योकोन मिगी दोन्दु माज्यो, दिला खेरला स्यिङगी थामला टाँए खाला सेत,” सिन थेबा झन नामज्योक बुराङ साच्या खाईन छेरा खिताला स्यूसुङ। थेमे थेकी “च्यि ङे ख्योकोन गेल्बोला स्यिङगी थामला टाँए खाला सेत्च्या?” सिन सिदुक। थोक सिरजीन छ्ये छ्ये पूजारीकी “ङ्योकोनतेनी रोमी गेल्बो बाई ज्येन गेल्बो ओतराङ मेत,” सिन सासुङ। 16थोक थोक ओङनामेई पिलातसकी येशूला स्यिङगी थामला टाँए खाला सेताला थेबे लाःक्तुराङ सोम्पे खासुङ। थेमे थेला सेताला मिल्टेरीओनगी जिम्मा लासुङ।
येशूला स्यिङगी थामला टाँए खाबाते
(मत्ती २७:३२-४४; मर्कूस १५:२१-३२; लूका २२:२६-४३)
17मिल्टेरीओनगी जिम्मा लानामेई येशू थे खोरोङला टाँए खाला सेत्च्येते स्यिङगी थाम खुरगीन खप्पर ठाउँ सिरसापा ख्याम्सुङ। थे ठाउँला हिब्रू बातला गलगथा सिनोङ सिरच्येते खिन ओतान। 18थेरू क्याल्गीन मिल्टेरीओनगी येशूला लाक्पा काम्बाला काँटी ग्याप्कीन स्यिङगी थामला टाँए खाईन लाङसुङ। थेबेकी येशूला किल्दु पारे खाईन थे फारताङ छुरला ज्येन मेन्दा ङि मिलाङ थेला च्योकराङ खाईन स्यिङगी थाम रेरेला टाँए खासुङ। 19पिलातसकी पाटीज्यीकला “दि नासरतपे येशू यहूदीओन गेल्बो ईन” सिन टिक च्युता ओतान। थेमे थे पाटी थेला टाँए खाबाते स्यिङगी थामला ठोके खाईन ज्याक्पा ओतान। 20थोक खाईन थेला स्यिङगी थामला टाँए खाबाते ठाउँ सारदुकी आता थारी मेतेकी काल्बा च्योक यहूदीओन थेरू लेपा ओतान। थेमे थेबेकी थे पाटीला टिबाते बात पढे खासुङ। दि बात हिब्रू, ल्याटिन थेमे ग्रीक भाषाला टिबा ओतान। 21थे पाटीला टिबाते बात यहूदीओन छ्ये छ्ये पूजारीला मन परे माक्यासुङ। थेमे थेबेकी पिलातसला “दि यहूदीओन गेल्बो ईन सिन मेन, बरू दिकी थे खोरोङला यहूदीओन गेल्बो ईन सिदुक सिन टि,” सिन सिदुक। 22थोक सिरजीन थेकीचेन “ङे जे टिबाप टिबाप था थोकराङ देत्स्यीत,” सिन सिदुक।
23थोक खाईन थेला स्यिङगी थामला टाँए खानामेकी थे मिल्टेरीओनगी थेते खोलाक बो स्यी जोकीन मेन्दा स्यीकारगी गोकीन खासुङ। थेमे खोलाकज्यीकचेन रोला मिडिक्च्याज्यीक ईनेकी मिमासाकराङ ल्हाबाई ओतान। 24थोगी थेबेकी “फाबा दिचेन मोरोल्गी, बरू सुला फाप्कीका सिन चिट्ठा देइ,” सिन चिट्ठा ग्याप्सुङ। थेबेकी थोक खानामेई परमेश्वर बातला दोक सिन टिबाते बात साबा च्योकराङ ओङसुङ। थेरू च्यि साबा ओते सासीन “थेबेकी ङे खोलाकतेबा खोपरोङ नाङ गोसुङ, खोलाकज्यीकलाचेन चिट्ठा ग्याप्सुङ,” सिन टिबा ओत।#भजन २२:१८ थे मिल्टेरीओनगी साँच्चीराङ थोकराङ खासुङ।
25थेरू येशू आमा, येशू आमे नुमु, क्लोपास फेम्मे मरियम थेमे मरियम मग्दलिनीबाचेन थेला टाँए खाबाते स्यिङगी थामगी खादुराङ देता ओतान। 26थेमे येशूकी आमातेताङ थे खोरोङते ङिङज्येते चेलातेला थेरू थोङगीन आमातेला “आमा, था होथेराङ खोरोङ फुज्युङ ईन,” सिन सिदुक। 27थेमे थेकी चेलातेलाङ “थरिङमेई थेराङ खुईते आमा ईन,” सिन सासुङ। थेमे थे छोमुमेई थेकी येशू आमाला थे खोरोङ खाम्बादु खेरगीन आमाला च्योकराङ खाईन ज्याक्सुङ।
येशू स्याप्ते बात
(मत्ती २७:४५-५६; मर्कूस १५:३३-४१; लूका २३:४४-४९)
28थेमे येशूकी थे खोरोङगी खिता फाप्च्येते काम जति खाईन सिन्दाते छ्या स्येकीन “ङाला कोम्बा लासुङ,” सिन सिदुक। थेकी थोक सानामेई परमेश्वर बातला टिबा ओताते बात साबा च्योकराङ ओङसुङ। 29थेरू किर्बुते छ्याङगी नोतज्यीक ओतान। थेमे मिल्टेरीओनगी खोलाक टालोज्यीक किर्बुते छ्याङनामा न्वाकीन च्याकीन हिसप सिराते दोङबो फेर्काला ठील्गीन येशू खाने क्याल्गीन बिन्सुङ। 30थे छ्याङ ज्यिप्नामेकी येशूकी “ङे खिता फाप्च्येते था गाङे खाईन सिन्सुङ,” सिन सिदुक। दोस्यिक साकीन थे गोः खुङ कुगीन ग्याङ स्यिसुङ।
31ङारो च्योक्ते सन्चारी ईन्गीन काम खिता मेङच्येते दिन ईन्देकी निस्तार चाड माने खिताला जेसुकै थे छोमुराङ ठीक खाला सिन्दा फाप्च्या ओतान। ङारो च्योक्ते सन्चारी चाडगीते छ्येते दिन फापा ओतेकी थे सन्चारी छोमु थोक खाला स्यिङगी थामला मिओन टाँए खाईन ज्याक्पाते थेबाला गा लाङगीन मेतान। थोगी थोक खाईन स्यिङगी थामला टाँए खाबाते मिओनते काम्बा च्याक्ला थेरूकी बेप छ्युत सिन यहूदीओनते छ्ये छ्ये मिकी पिलातसला बिन्ती खासुङ। 32थोगी मिल्टेरीओनगी येशूताङ पालोईला टाँए खाबाते मि ङिकारते पालो पालो खाईन घनगी ग्याप्कीन काम्बा च्याक्सुङ। 33थेरूई येशूला टाँए खाबाते स्यिङगी थामदु वाला ताजीन थे स्यिइन सिन्दा ओता थोङगीन थेबेकी थेते काम्बा माच्याक्सुङ। 34तर मिल्टेरीज्यीगी येशू कोखापा बार्सा रोपे खासुङ। थेरूकी ठाकताङ छ्यु थेन्सुङ। 35ख्योकोनगी दि बात पक्काराङ ईन्दाते दुका सिन पत्ते खित्स्यीत सिन थे खोरोङ मिगीराङ दोक दोक ओङाते थोङकान्ते मिकी दि बाततेबा साबाते ईन। थेकी मेन्दाते सिराते बातज्यीगोङ मिक्किता खाईन जस्तो जस्तो थोङा ओतान उस्तो उस्तोराङ साबा ओत। 36थे मिल्टेरीओनगी येशूते काम्बा माच्याक्नामेकी परमेश्वर बातला “थेतेचेन रूबाज्यीगोङ माछ्यागो,” सिन साबाते बात साबा च्योकराङ ओङसुङ।#भजन ३४:२० 37थेमे परमेश्वर बातला ज्येनज्यीक ठाउँदु “थेबेकी खोपरोङगी बार्सा रोपे खाबाते मिलाराङ तेइओ,” सिनोङ टिबा ओत।#जकरिया १२:१०
येशूला सासगास खाबाते
(मत्ती २७:५७-६१; मर्कूस १५:४२-४७; लूका २३:५०-५६)
38थेरू थोक थोक ओङगीन सिन्नामेकी अरिमाथियापे यूसुफकी वाकीन येशू रो खेरा नाङ सिन पिलातसला बिन्ती खासुङ। यूसुफोङ येशूला विश्वास खिन ओतान। ईन्सीनोङ यहूदीओन छ्ये छ्ये मि ज्यीबेकी थेकी दि बात सुङलाङ लाःपा मेतान। थेमे पिलातसकी खेर सिन सानामेई थेकी येशू रो तेगीन खेरसुङ। 39गोमा बाजिई ग्वाका येशू ओत्सादु ओङकान्ते निकोदेमसोङ थेरू वाबा ओतान। थेकीचेन आउदी स्यीम्बुज्यीक बास्ना चले खित्च्येते मूर्रताङ एलवा सिराते पाउडर स्येबाते किलो खालज्यीकताङ च्युक्सुमजो खुलाबा ओतान। 40थेमे थेबा ङिबोकी येशू रोला नाङ नाङला थे मूर्रताङ पाउडर स्येबाते थोरगीन कार्मुते खोलाककी ठील्सुङ। यहूदीओनते रो दिक्जीन थोक खित्च्येते चलन ओतान। 41येशूला थामला टाँए खासे खादुराङ बगैंचाज्यीक ओतान। थेमे थेरू रो ज्य्वाबाला सिन ठाःक ठुकीन जोबाते फुकज्यीक ओतान। थे नाङ गोमा सुङगीङ रो ज्याक्पा मेतान। 42थे छोमु स्वारी ईन्देकी थेमे थे फुकोङ थोक ङीबीलाराङ ओतेकी थेबेकी येशू रो थे फुकदुराङ खेरगीन ज्याक्सुङ।
Currently Selected:
यूहन्ना 19: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
