यूहन्ना 14
14
येशूराङ आबा ओत्साने डोच्येते लाम ईन
1थेमे येशूकी चेलातेबा गाङेला “ख्योकोन पीर माकेत, ज्यीबाङ माकेत। परमेश्वरला विश्वास खिता मातोङ। ङालाङ विश्वास खिन देत। 2ङे आबे खाम्बादु देत्च्येते ठाउँ काल्बेई ओत। थोक मेता ईन्सीन ङा ओत सिरच्या मेतान। ङा ख्योकोन लाईदु ठाउँ ठीक खिताला डुइओ। 3ठाउँ ठीक खाला ङा ख्योकोनला लिन्दाला लोक्ला ओङगो। थेमे ख्योकोनोङ ङात्ताङ ङ्योम्बुराङ देता ङेत्स्यीत सिन ङा ख्योकोनलाङ ङाराङ देत्सादुराङ देताला खेरग्यो। 4ङा डोसादु लेप्च्येते लाम ख्योकोनलाङ छ्या ओत,” सिन सिदुक।
5थेमे थोमेकी “प्रभु, खो खापा डुइते सिन ङ्योकोनला छ्या मेत। थोगी खो डोसादु लेप्च्येते लाम ङ्योकोनगी चुक खाला छ्या स्येकीते?” सिन सिदुक। 6थोक सिरजीन येशूकी “आबा ओत्साने डोच्येते लाम ङाराङ ईन। सत्यते परमेश्वरला छ्या स्ये ज्युत्कान्तेङ ङाराङ ईन। थेमे मिओनला नोमुङ मिसिन्च्येते जुनी तेरकान्तेङ ङाराङ ईन। ङे छ्य्वापेई मेन्दाला सुङ आबा ओत्साने ड्वा मुथुबो। 7ङा सु ईन्दे सिन छ्या स्येबा ईन्सीन ख्योकोनगी आबालाङ लेमु खाला छ्या स्येच्या ओतान। थानामेईचेन ख्योकोनगी थेला थोङला छ्या स्येक्यो,” सिन सिदुक।
8थेमे फिलिपकी “प्रभु, ङ्योकोनला आबा चुकस्यिक ओते सिन तेन्ला नाङ, दोस्यिक खासीन ङ्योकोनला ओङगो,” सिन सिदुक। 9थेरूई येशूकी “ङा ख्योकोनताङ दोक काल्बासाक ङ्योम्बु देत्सीनोङ च्यि खुई ङाला छ्या स्येबा मेतरो फिलिप? ङाला थोङकान्ते मिकी आबालाङ थोङाते ईन। थेमे चुक खाला खो ‘आबा चुकस्यिक ओते सिन तेन्ला नाङ,’ सिते? 10आबाताङ ङा दोक्पोईराङ ईन सिन च्यि खो पत्ते मिक्किओ? ङे ख्योकोनला साबाते बातओन दोक्पोईओङ ङाराङगी जोकीन साबाते मेन। थे बाततेबा गाङे आबेकीका साबाते ईन। थेकीचेन ङे छ्य्वापेई थे खोरोङ कामओन खिन ओत। 11आबाताङ ङा दोक्पोईराङ ईन सिन ङे साबाते बात पत्ते खि। ङे साबाते बात सेमला मागाल्सीनोङ ङे खाबाते कामतेबा ताला ख्योकोन दि बात पत्ते खि। 12दि बात ङेन। ङाला विश्वास खित्कान्ते मिकीचेन ङे खाबा च्योक्ते कामराङ खिओ। थेकी दिबा भन्दाङ छ्ये छ्ये काम खिओ। दोक खिता थुप्च्येते च्यिला ईन्दे सासीन था ङा आबा ओत्साने ग्युरला डुइओ। 13थेमे ख्योकोनगी ङे मिन लाकीन नाङ खाबाते जे कुरोङ ङा तेरग्यो। ङा फुज्युङगी दोक खानामेई आबा चुक छ्ये ईन्दे सिन ख्योकोनगी छ्या स्येक्यो। 14ख्योकोनगी ङे मिन लाकीन जे नाङ सासीनोङ ङा ख्योकोनला तेरग्यो।
येशूकी परमेश्वर आत्मा ओङगो साबाते
15ख्योकोनगी ङाला ङिङज्ये खासीन ङे खि सिन कोतातेङ खिओ। 16ख्योकोनला सल्लाह तेरकान्ते ज्येनज्यीकला थोङ सिन ङा आबाताङ बिन्ती खिओ। थे वाला सधैँभरि ख्योकोनताङ ङ्योम्बुराङ देत्क्यो। 17थेचेन परमेश्वर आत्मा ईन। थेकी ख्योकोनला सत्यते परमेश्वर छ्या स्ये ज्युत्क्यो। दि सा लुङबे मिओनगी दिङ सु ईन्देरो सिराच्योक खाला थेला छ्याःङ वास्ता मिक्किओ। च्यिला सासीन थेबेकी थे सु ईन्दे सिन छ्याङ मेस्येओ, थेला थोङाङ मुथुबो। तर ख्योकोनगीचेन थेला छ्या स्येक्यो। थे ख्योकोनताङ नोमुङ माठाला खाला ख्योकोन सेमगी नाङराङ देत्क्यो।
18ङा ख्योकोनला ट्वारा टिङग्रे जोला क्युरला मोज्योओ। ङा लोक्ला ख्योकोन ओत्सादु ग्युरला ओङगो। 19था टिक्पी दिन तिरीमेकी दि सा लुङबे मिओनगी ङाला थोङराङ मोथोङो। ईन्सीनोङ ख्योकोनगीचेन ङाला थोङगो। ङा सधैँभरि सोन्ला देतेकी खित्सादु ख्योकोनोङ सोन्लाराङ देत्क्यो। 20ङाला थोङे छोमु आबाताङ ङा दोक्पोईराङ दुका, ङा ख्योकोन सेमगी नाङ देत्च्याक्वा थेमे ख्योकोनोङ ङात्ताङ जीउज्यीकराङ ओङा ओताक्वा सिन ख्योकोनगी लेमु खाला छ्या स्येक्यो। 21जसकी ङे खि सिन कोताते ङेन्ला खि साबाच्योक खिदुक, ङाला ङिङज्ये खित्कान्ते मि थेराङ ईन। ङाला ङिङज्ये खित्कान्ते मिलाचेन आबेकीङ ङिङज्ये खिओ। थोकराङ खाला ङाङ थेला ङिङज्ये खिओ थेमे ङा चुक छ्ये ईन्दे सिन थेला झन लेमु खाला छ्या स्ये ज्युत्क्यो,” सिन बात खासुङ।
22थेरू यहूदा इस्करियोत मेनगी ज्येनज्यीगोङ यहूदा सिराज्यीक चेला ओतान। थेकी “प्रभु, खोरोङ चुक छ्ये ईन्दे सिन खो च्यिला दि सा लुङबे मिओनला मेन, ङ्योकोनलाकामा छ्या स्ये ज्युत्कीते?” सिन सासुङ। 23थोक सिरजीन थेकी “ङाला ङिङज्ये खित्कान्ते मिकी ङे लापाते बात ङेन्ग्यो। थोक्ते मिला आबेकी ङिङज्ये खिओ। थेमे आबाताङ ङा वाला थोक्ते मि सेमदुराङ देत्क्यो। 24ङाला ङिङज्ये मिक्किकान्ते मिकीचेन ङे लापाते बात मेङेनो। ङे ख्योकोनला लापाते बाततेबा ङाराङगी जोकीन लापाते मेन। दि बातओननी ङाला दुरू तोङकान्ते आबेकी सिर च्युतातेका ईन।
25खेराङताङ ङ्योम्बु ओत्जीनराङ ङे ख्योकोनला दि गाङे बात लाःपा ओत। 26था आबेकी ख्योकोनला सल्लाह तेरकान्तेला ङे छ्य्वापेकी तोङगो। थेचेन परमेश्वर आत्मा ईन। थेकी वाला ख्योकोनगी च्यि खिता फाप्कीते, चुक खिता फाप्कीते सिन गाङे लाप्ला तेरग्यो। थेमे ङे ख्योकोनला लाप्कीन बिन्दाते गाङे बात ठेम्बा लोङगो। 27ङा ख्योकोन सेमला ढुक्क लोङगो। ङे खित्सादु ख्योकोन सेम ढुक्क खाला देता ङेत्क्यो। दि सा लुङबे मि सुङगीङ ख्योकोनला सेमला ढुक्क लोङा मुथुबो। ख्योकोन पीर माकेत, ज्यीबाङ माकेत। 28‘ङा ख्योकोनला ताङला डुइन ओत। थेमे लोक्ला ख्योकोन ओत्सादु ग्युरला ओङगो,’ सिन ङे ख्योकोनला साबाते ख्योकोनगी थोबाराङ ओत। ख्योकोनगी ङाला ङिङज्ये खाबा ओता ईन्सीन ङा आबा ओत्साने ग्युरला डोजीन ख्योकोन गा खित्च्या ओतान। ङा भन्दाचेन थेराङ छ्ये ईन। 29ङे दि बातओन ख्योकोनला गोमाका लाःपातेचेन तिरी दोक ओङजीन ख्योकोनगी ङे साबाते पक्काराङ दुका सिन पत्ते खित्स्यीत सिनराङ ईन। 30था ङा काल्बासाक ख्योकोनताङ बात खिन देता मेङेदो। था दि सा लुङबे गेल्बो शैतान होत्ता ओङगीन ओत। थे ङा भन्दा छ्ये मेन। थेमे थेकी ङाला छ्याःङ खिता मुथुबो। 31ङे आबाला ङिङज्ये खित्च्याक्वा थेमे थेकी खि साबा साबाकामा खित्च्याक्वा सिन दि सा लुङबे मिओनगी छ्या स्येबाराङ फाप्क्यो। लो ल्वा, था ङुरूङ दुरूकी डुइ,” सिन सिदुक।
Currently Selected:
यूहन्ना 14: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
