शक्ति काम 12
12
याकूबला सेतातेताङ पत्रुसला जेलदु लुक्पाते बात
1थे बेले नाङपाराङ हेरोद गेल्बोकी येशू ख्रीष्ट मिओन कोई कोईला आउदी मेलेबा खाईन दुक्पा तेराला स्यूसुङ। 2थेकी यूहन्ने आज्यो याकूबला जुम्गीन तरवारगी तुप्कीन सेत च्युत्सुङ। 3थेला थोक खानामेई यहूदीओन खुशी ओङा थोङगीन थेकी झन छ्ये खिनकामा पत्रुसलाङ जुम्गीन जेलदु लुक्सुङ। थे बेलाला यहूदीओनते सोडा मुलुबा खाला स्योबेन स्येला साच्येते चाड शुरू ओङा ओतान। 4थोगी थेकी थे निस्तार चाड माने खाईन सिन्नामेकीकामा पत्रुसला मि गाङे दोन्दु खुलाला थेबा गाङे दोन्दु सजाय तेरच्ये विचार खासुङ। थेमे पत्रुसला ज्याक्पाते जेलदु मिल्टेरी च्युरूक खटे खासुङ। थेबाचेन मेरा स्यी स्यी पालो खाला खाला पत्रुसला स्युङगीन ओतान। 5थोक खाईन थेला जेलदु लुक्नामेई येशू ख्रीष्ट मिओनचेन गाङेराङ रूला थे लाईदु परमेश्वरला आउदी खाला प्रार्थना खिन ओतान।
परमेश्वरगी पत्रुसला जेलदुई तेन्दाते
6हेरोद गेल्बोकी पत्रुसला मि गाङे दोन्दु खुलाङच्येते दिन ङीमाईकामा बाँकी ओतान। थेमे थे छोमु ग्वाका पत्रुसचेन जेलदु ङिक गाला ओतान। थेला नेल ङि कोन्दा ओतान। थेमे थे नेलला साङलो ताप्कीन नाङने फारताङ छुरला देत्कान्ते मिल्टेरी ङिबो लाक्पा रेरेला कोन्दा ओतान। जेलगी गोदुङ मिल्टेरीओन देता ओतान। 7थेमे थे छोमु च्यि ओङसुङा सासीन पत्रुस दोन्दु प्रभु परमेश्वर दूतज्यीक ख्योल्सुङ। थेमे थे कोठादु आउदी नाम्दाक ओङसुङ। थेरूई थे परमेश्वर दूतकी पत्रुसला “ल्वा ल्वा,” सिन योम्सुङ। थेमे थेला कोन्दाते नेलोङ ठोल्गीन साला ङीम्सुङ। 8थेमे थे दूतकी “काराक छ्यि, काचाप खोन,” सिन सासुङ। पत्रुसकी थोक खानामेकी याङराङ थेकी “लाक्तु खोन्च्येते खोलाक खोन्ला ङे तिरी स्योक,” सिन सिदुक। 9थोक खाईन सिन्नामेकी पत्रुस थे दूतकी तिरी तिरी गाल्सुङ। थोक ओङाते साँच्चीराङ ईन सिन थेला छ्याःङ छ्या मेतान। थेलानी मिलाम खाबा च्योकका लाबा ओतान। 10थोक खाला पत्रुसताङ थे दूत थेरू स्युङगीन ओताते मिल्टेरी गाङेला योल्ला डोजीनोङ थेबा सुङगीङ छ्याःङ थाहा माङेत्सुङ। थोक खाईन थेबा जेलदुकी फिनामा थेन्च्येते च्याकी गोदु लेप्सुङ। थे गोङ थाराङ फेत्सुङ। थेमे थेबा ङिबो फिनामा लामला थेन्सुङ। लामला थेन्गीन फजेकसाक गाल्नामेई परमेश्वर दूतचेन पत्रुसला ताङगीन गाल्सुङ।
11थे दूतकी थोक खाईन ताङगीन गाल्नामेकीका पत्रुसकी दिनी मिलाम खाबाते मेन्दाक्वा, साँच्चीराङका दुका। ङाला हेरोद गेल्बो लाःक्तुई थेमे यहूदीओनगी मेलेबा खिता चाल्सादुकी थार ज्युताला प्रभु येशूकी थे दूतला ताङाते दुका सिन छ्या स्येसुङ। 12दि बात मिलाम खाबाते मेन्दाक्वा सिन छ्या स्येनामेई थे यूहन्नाबे आमा मरियम खाँपा गाल्सुङ। यूहन्नालाचेन मिओनगी मर्कूस सिनोङ सिरच्येते खिन ओतान। थे खाम्बादु मि काल्बेई रूला परमेश्वरला प्रार्थना खिन ओतान। 13पत्रुसकी थेरू लेप्कीन गोनामा डोक डोक खासुङ। थोक खित्जीन थेरू काम खित्कान्ते रोदा सिराते फेम्मे मि सु ईन्दाका सिन तार गाल्सुङ। 14गो बेत डोजीन थेकी पत्रुस ङोरो थोसुङ। थेमे पत्रुस वाबा दुका सिन गाकी थे गोङ मेबेता खाईन ग्युरगीन गाल्गीन थेरू ओताते ज्येनतेबाला “फिनामा पत्रुस वाला दुक,” सिन सिदुक। 15थेकी थोक सिरजीन ज्येनतेबेकीचेन “खो ङ्योबासीन, थे चुक खाला दुरू ओङा थुप्कीते?” सिन सासुङ। याङराङ थेकी “मेन मेन, साँच्चीराङ ईन। ङे ढाँर माक्या,” सिरजीन थेबेकी “थोक सासीन बरू पत्रुस साटोला थेला ताकान्ते परमेश्वर दूत वाबासीन,” सिन सासुङ। 16पत्रुसचेन गो डोक डोक खिनराङ देत्सुङ। तिरी बल्ल बल्ल थेबेकी गो पेत्सुङ। गो पेत्ला ताजीन फिनामा साँच्चीराङ थेला थोङगीन थेबा गाङेराङ छक्क परे खिन “आबिई, साँच्चीराङ पत्रुसराङका दुका,” सिन सिराला स्यूसुङ। 17पत्रुसकी थेबाला थोक खाला छेरा माकेत सिन लाक्पेकी चाल खासुङ। थेमे प्रभु येशूकी थे खोरोङला चुक खाईन जेलदुकी तेन्गीन खुला लिच्युङा सिन गाङे बात लाःप्सुङ। थेमे थेकी थेबाला “दि बात याकूबला थेमे ज्येन ज्येन आज्यो न्वालाङ गाङेला लोबा,” सिन थे खोरोङचेन थेरूकी ज्येननापा गाल्सुङ।
18ङोमु नाम लाङजीन जेलदु पत्रुसला स्युङाला देताते मिल्टेरीओनगी थे थेरू माथोङसुङ। थोक ओङजीन थे खापा स्योरगीन गाल्ताका सिन ज्यीबेकी थेबेते ङिङगी ठाउँ ताङसुङ। 19थेमे हेरोद गेल्बोकी पत्रुस मिन्दुक्लो सिन थोनामेई खुलुन्दुर खाईन थेला छोल च्युत्सुङ। थोक खाईन चाल्सीनोङ थेला माथेप्नामेई थेकी थे मिल्टेरीओनला काताङगीन नामनामेकी थे तोरसुङा, च्यि ओङसुङा सिन ठिसुङ। तर थे मिल्टेरीओनगी छ्याःङ सिरा माथुप्नामेकी थेकी थेबालाराङ सेत च्युत्सुङ।
हेरोद गेल्बो स्याप्ते बात
थे तिरी हेरोद गेल्बो यहूदिये अञ्चलदुकी सिजरियामा गाल्गीन देत्सुङ। 20थेजीन थे टायरताङ सीदोन सारगी मिओनताङ आउदी खाईन स्येदाङ खाबा ओतान। थोक ईन्देकी गेल्बो हेरोदताङ मिले खित्च्येते बात खिता फाप्क्यो सिन सार ङिकार मि डिगीन खोपरोङ कोई कोई मिला थे ओत्सापा ताङसुङ। थेमे थेबेकी हेरोद गेल्बोते बलस्तस सिराते छ्येते मिला लाःक्तु लाकीन थेला गेल्बो हेरोदताङ डिक्पा खाला नाङ सिन बिन्ती खासुङ। हेरोद गेल्बो लुङबादुकीराङ खोपरोङला साप्ला अन्न खेरा फाप्कीन ओतेकी थेबा थोक खाईन डिक्पा चाला ओतान।
21मि गाङेताङ ठेता खित्च्येते दिनगी छोमु हेरोद गेल्बो गेल्बोकी खोन्च्येते दामी दामीते खोलाकताङ श्रीपेज खोन्गीन सिंहासन लाक्तु देत्सुङ। थेमे थेकी थेरू ओताते मि गाङे दोन्दु भाषण खिताला स्यूसुङ। 22थेकी भाषण खित्जीन थेरू जम्मा ओङा ओताते मिओनगी थेला छ्ये जोइनकामा “ओहो, दिनी मिकी बात खाबाते मेन, ल्हे बात च्योकराङ थोकीदुक,” सिनकामा छेरा खिताला स्यूसुङ। 23थेबेकी थोक खाईन थे खोरोङला ल्हा ईन सिन छेरा खित्जीनोङ थे छ्याःङ मिसिरा खाईन खाराक्पा देत्सुङ। थोक खाईन परमेश्वरला मान माक्याबेकी खित्सादु थे बेलालाराङ प्रभु परमेश्वर दूतज्यीगी थेला सजाय बिन्सुङ। थेमे थे बु ग्याप्कीन स्यिसुङ।
24थे बेले नाङपाराङ झन मि काल्बेईकी परमेश्वर बात थोकीन थे बात ङेन्दाला स्यूसुङ। 25बारनाबासताङ शावलचेन खोपरोङगी यरूशलेमदु केल वाबाते पैसा बिन्गीन च्याकीन एन्टिओखियामा ग्युरगीन गाल्सुङ। थेबा ङिबोकी मर्कूस सिराते यूहन्नालाङ थेबाताङराङ टीकीन खेरसुङ।
Currently Selected:
शक्ति काम 12: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
