Matius 3

‘Yesus aminyan yanamle’ tenen, Yohanes arye Yesus bisik kintinilina ati, nyabuk yupu

(Markus 1:3-8; Lukas 3:2-17)

1Atalak ara, ninye una ap, mok cena ap kum ulamukak, Yudea tam noutamak arye, Yohanes min arye ninye mek dongolamuknye yayuk. Yayukopura, ayupu peterelamuk. 2Yohanes peterelamuk ning ara, ani. “Anggun nirya, anggun kanye talima malye tenelulum ning ap, anggun malye winimunye ning ap batakuka, kanye dangupmunyeura, Allah arye amalye ning nirya kum daneiplirye, namin kipnamsile. Winipnamlum ning, ara Allah arye ninye weike lyeplirye, sik kanye talima talinamle talak, akunum dam upmala ati, anggun malye winimunye ning nirya bataknululume,” nyabuk.

3Anye Yohanes ara, elda talinye kume. Allah yupu laka nyalamuknye nabi Yesaya arye, “Bisik Kintinilinanye yanamle,” nyalilamuk touk, anye bira Yohanes ayanmale. Yesaya arye domon yupu nyalilamuknye ara, ani.

‘Na Allah ara, na yupu laka nyalinanye birye, mok cena ap, ninye ap, kumak arye, ayupu nyanamle. Winibuka nyanamle. “Ninye Deiyoknye nun ni Allah yanamla ati, bisik punguk yalinamlulume. Nun Deiyoknye binamle bisik ara, punguk yabuka kintininamlulume,” nyanamle.’ (Yesaya 40:3)

4Yohanes arye unta basam bola kobuka, potong kepman baju wibuka ongolamuk. Abasam bolauk deiyatinga delilamuk. Tonda, Yohanes arye mong mek ap, sul kwising ap, dilamuk.#3:4 Yohanes winilamuk ning – Yohanes arye mong mek ap, sul kwising ap dibuka, unta basam bola kobuka potong kepman baju wibuka ongolamuk ning ara, sik minop talak Allah yupu laka nyalamik nang, nabi-nabi arye ton winilamik. Adeice arye ninye nirya, ‘E Yohanes ara, dipkoprop Allah yupu laka nyananye, nabi ulule,’ tenelamik. 5Weik asik dolamik mutuku, Yerusalem mutuku ulamik ninye ap, Yudea tam noutamak ulamik ninye ap, Yordan mek duman ulamik ninye ap, yupa weik arye Yohanes peterelamukak kekelbalamik. 6Balamikce, sik malye ulamik ning, yuk ninye kekelamikak arye, lakak laka nyabuka batakik. “Nun dipkoprop malye winilamupe,” nyabuka, sik malye winilamik ning lak akarye, laka nyabuka bataklamikba, Yohanes arye adib tenelamik ninyeuk dobuka, mek ongolamuk. Aninye dobuka, mek dongolamuk mek si ara, Yordan mek.

7Aninye mek dongolamuk bukni, elce diba tenena ninye mek dongolamukak, sik Farisi#3:7 Farisi nang ara, Yahudi yala ninye, sik deiyok nang ulamikce, agama pil dona deiyok nang ulamik. Tonda, Yesus ati diba kum tenelamik. Tonda lak lyen yupu nomor 10 dipdelelume. nang ap, Saduki nang ap dilyayikba, eibukopura, anang ara, tuba malye winilamika anya arye, sikti, ayupu nyabuka wenebuk. “Anggun yu una ap, tenepce arye, talya yupu nyabuka, duknuna ap winimunya ara, ninye ton kwatima duknubuka mapmalya arye, si tolamsil touk winilulume. Yatanye birye sikti, ‘Allah arye, malye winin ninye wenebuka opnamle,’ nyabikba kekeplumce, ‘Allah arye nun opsilyak’ tenen, bik-bik abuka bilum do? Yata nang arye, anggunti ayupu laka nyapsuk do?” Yohanes arye sikti, nyabuka wenebuk. Nyabukce, ayupu ton nyabuk.

8“Anggunda, ‘Nunce nun malye wininyap ning akunum batakape,’ nyabuka, talya yupu deice arye nyapnutum bukni, yo duk mouamlya ani, eklamle touk, dipkoprop bataktumce, diksukumuk uptumba eipsitinyopura, diba tenepsitinye. Ati, anggun malye winimunye ning, adiparyuk batakmunce, telebuk unululume. 9Tonda, anggunce, ‘Kume, nun deipkirik deiyoknye bira, Abraham usulula ati, Allah arye kum wenepnamsile,’ tenebuka kum nyapnamlulume. Aning ara, tenena kume. Allah arye, ‘Abraham el mapu na doproptinye’ tenen, pataptopura, talya ubuk keil arye bobuka, Abraham el mapu ton kintinipdeiptue. 10Yo wena#3:10 Yo wena nyabuka deiyok ara ani. Ara, malye winilamikce ninye ara, Allah arye aninye ati wenebuka oplopnamle talak, akunum dam upmasila ati, adomon yupu nyabuk. deiyoknye birye, yo wepnamala ati, el ya bobuka, yo deiyok dam kintinipmale. Teleb yo duk kum moulamle yo nirya ara, webukaplirye, uku dongopnamle.”

11“Anggun malye ning nirya batakmunba, mek sirika dem dongosunun bukni, nada mitik mambulnye anya arye, aminyan talak yanamla weik deiyoknye bira, elda weik mambulnye. Nada, mambulnye kum ati, pia malye piluk bukni, el sandal koulongon tapu narye kum loploptinye. Aminyan yanamlanye bira, el mikip pia weik ati, elce Allah El Dib Kanye arenamsile. Narye mek sirika, dem dongopsiniba, anggun nong nirya mek singilamle touk, aminyan yanamlanye bira, el mikip pia weike ati, elce Allah El Dib Kanye arepsiliba, anggun kanye talima nirya talinamsile. Uku arye malye ning dilamle touk, Allah El Dib Kanye arye, anggun malye winin ning nirya dobuka, kum kipdeipnamsile. 12Batce dipnulinye bira, batce bama labuka, uku dongoplirye, batce nonguk dilamle touk, Yesus arye ninye nirya bokuka, teleb ning doproplirye, malye ning bataknamle.#3:12 Batce bama – Allah yupu minop talak sekik ning ara, batce kum nyabik. Sikce, gandum ning ati, domon yupu nyabik bukni, ayupu deiyok ara atoto uka. Ninye arye din ning teleb ning yo lalina deice delilamak touk, Allah arye elti, diba tenebikirye, diksukumuk wininyak nang ara, aninye dobuka im deice deipliba, el ap neika pia unamake. Tonda, ninye arye, din ning bama labuka, uku dongolamak touk, Yesus arye malye winin ninye nirya dobuka, uku pia dilulak dongopnamle. Auku ara pia kum tangaptue, pia dinamle.” Yohanes arye awekmek nang nirya ati, adomon yupu nyabuk.

Yohanes arye Yesus mek dongobuk yupu

(Markus 1:9-11; Lukas 3:21-22; Yohanes 1:31-32)

13Yesus ara, ‘Yohanes arye, na mek dongopnamnil’ tenen, Galilea tam arye, Yohanes el peterelamukak Yordan mekin yayuk. Yayukce, “Mek dongopnilyame,” nyabuka morobuk. 14Morobuk bukni, Yohanes arye, ‘Nada malinye,’ tenebukce ayupu nyabuk. “Kume naio, teleb ning ara, ance nati mek dongopnutum bukni, ance na morolyanmanilam ara, yata ati do? Na kanye ara, aning kum winiptinye,” nyabuk. 15Nyabuk bukni, Yesus arye tamubuka nyabuk. “Kume, Allah arye nunti, ‘Winibuka diksukumuk unamake’ tenepsuk touk, diksukum ninguk wininuyaba ati, wini talak ance mek dongopnilyame,” nyabuk. Nyabukura, Yohanes arye telebe nyabuka Yesus mek dongobuk.

16Mek dongobukba, Yesus ara, mek pum arye mek wekabuka ani, tikilongoyuk bisikuk talak ara, adiparyuk Allah arye im deice kukeibukba, Yesus arye dinmok. Dinmokba, Allah El Dib Kanye ara, yalma maka atonun dayukce, Yesus el nong deice bulyayuk. 17Bulyayukopura, Allah im deice arye ayupu nyapdeibuk. “Anye bira, na Mi Koprop ulule. Narye elti, pia bico tenenuna anya arye, elti, na kanye pia deilinune,” Allah arye nyabuk. Nyabukopura, Allah El Dib Kanye arye, Yesus talima noutam nyapdeibukba, Yesus ara ninye pia kum ulamik mutuku, pata mutuku noutamak biyuk.#3:17 Yesaya 42:1

Currently Selected:

Matius 3: EIPA

Highlight

Copy