Lukas 8

Yala ning dokna ati, nyabuk yupu

(Matius 13:2-23; Markus 4:1-20)

1Atalak noutam ara, Yesus arye, weik asik dolamikak ap, ninye mitik anun ulamikak ap, balamukce, Allah arye ninye lyeplirye, sik kanye talima talinamle yupu, laka teleb yupu peterelamuk. Peterepra balamuk talak nirya ara, elce wipdeiamuk nang obarye 12 nang ap, melibuka balamik. 2Tonda, isa talyamneura, Yesus arye yakuka dopkwetepnarye kwetelamuk kilapu ap, uk dilamukbuk kwetelamuk kilapu ap, Yesus ap balamik. Tekbarye isa talyamuk kil, el si ara Maria, Magdalena kwetebuk kil ap, Herodes el aik pil dolamuknye Kusa, el kil Yohana ap, Susana ap, ton yuk kilapu weik tonap neika balamik.

3Tonda, Herodes el aik pil dolamuknye Kusa, el kil Yohana ap, Susana ap, ton yuk kilapu weik ton ap neika balamik. Akilapu nirya arye, sik talilamik ning deice arye, Yesus ap, el mapu ap, sik patapne ning ara, dekuka arelamik. 4Yesus arye peterenmokura, el dam yanuka wekmek nang ara, amutuku-amutuku dana-dana tam nirya arye, ulamik nang pia weik bulubuka yanmekce, awekmek ninye ati, el yupu peterenmok. Apeteremok yupu noutamak arye, adomon yupu ton nyabuk.

5“Anggun kekeplulume, tonok sum arye wa wibuka, duk yala dokonmok. El yala dokonmokura, ton yala ara el bobanmok karen bisik noutamak sakuk. Sakamukbuk, yuk nang arye yan yanibikba, talye maka yayik akarye dobuka diprobik. 6Ton yala ara doknin banmokura, keil deice arye mirin tuku mitik anun uamukak sakuk. Sakukce daupmoka ani, mirin tuku mitik anunuk uamukak arye, minop pabuk. Pabuk bukni, yating tukwak teleb ubuka kum biyuk akarye, keting deibukura, keting bupu arye, kel-kel abuka kolubuk.

7Atalak aryuk, ton yala ara doknin banmokbuk, tirmangka weiyang-weiyanga kan-kan noutamak sakuk. Dawinipnin balamoka ani, bongopmokura, tirmangka weiyang-weiyanga weik ubukce, apabmok ning koupdongobukce, angkalung kipdongobukura, wen-wen alamuk. Wen-wen alamuka anya arye, duk kum mulamuk. 8Aning ara kum mulamuk bukni, yala tonok dokuk ning ara, mirin tuku teleb ak sakuk. Mirin tuku deice sakuk ning ara, pabukce nebukopura, duk moulamuk. Yala tonok-tonok sakukura, duk moulamuka ara, yupa pia weike seratus moubuk,” Yesus arye winipmanto yupu nyabukopura, ayupu ton nyabuk. “Amul aupmasilyeura, ayupu kekepmanto nang ara, ‘Ayupu deiyoknye dan do’ tenen, kekepnamlulume,” nyabuk.

9Ayupu akunum nyabukopura, aminyan Yesus el yuk unmok talak ara, Yesus el dopromuk nang obarye, 12 nang arye, asipdeyik. “Naio, nunda ayupu deiyok ap nong ap kum kekepmapa arye bita kum bikmabe, domon yupu deice arye nyaminye ning ara deiyok yata ati do? Nun kum kekepmapa atia,” nyabuka asipdeyik.

10Asipdeyikura, Yesus arye tamubuka nyabuk. “Narye, ‘Allah arye ninye weik lyeplirye, sik talima talinamle,’ nyasinye yupu ara, Allah arye nyapdeipnukura, na mapu anggunti, nong noutamak ning nyasunune. Bukni, yuk talye nang ati aning ara, domon yupu deice arye, bol deice ninguk nyanune. Anang ati domon yupu deice aryuk nyanuna deiyok ara nyapnusine. Ara, Allah yupu laka nyalamuknye, nabi Yesaya arye, ‘Ninye winipnamak’ tenen, sekamuk touk, wini talak unyak ninye akunum wininyaka ati, sik kekenak ara, domon yupu uk nyanune. Yesaya sekamuk yupu ara ani.”

‘Talye asing aryuk elininyak bukni, ‘Deiyok ani,’ tenebuka kum kel bikinyake. Na nyanye yupu ara, bol deice ninguk amul arye kekenyak bukni, ‘Deiyok anye,’ tenebuka kum kel bikinyake. Talye kekeltakanyake.’ (Yesaya 6:9)

“Yesaya arye sekiamuk yupu akunum nyapsine. Minop arye sekiamuk bukni, wini talak unyak ninye ati, ‘Wininamak,’ kunum tenyamuka ati, narye ayupu nyapsine,” Yesus arye nyabuk.

11Anggun na mapu ara, yuk talye nang wininyak atonun kum winilalum nang anya arye, yala doknin banmoknye, nyapmanu yupu deiyok ara, laka nyapnusine. Adomon yupu nyapmasunu ara, nong ara lakak nyapnusine.

Yala ning dokonmok ning ara, Allah yupu peterena atia. 12Doknin banmok talak, bisik noutam sakmok ning ara, ‘Allah yupu peterenmakibuk, kekepnuyap,’ tenebice talak, Isa Mutuku Dongonye arye malye winin ning deiyoknye birye, adiparyuk sik talima noutam arye, Allah yupu dalubuka dololule. Dololula arye diba kum tenebiceura, Allah arye aninye ara kum lyelule.

13Ton ninye ara, yala keil deice sakmokto ning ara, Allah yupu peterenmaceura, kekebikirye kanye deibuka, diba tenebikirye adiparyuk dolonyake. Diba tenebuka dolonyak bukni, yala ning yating tukwak teleb ubuka kum binamuk arye, koulubuka atonun, anang ara, Allah yupu pia min kum dolokirye, minopce batakanyake. Ara, diba tenebikca ati, yuk nang arye yu uplibuk, ikin ning sik nong deice deililamakopura, tonda yuk ikin ning yalyopura, adiparyuk Allah Yupu kekepmace ning ara batakanyake.

14Ton ninye ara, Allah yupu kekebuka dolonyak bukni, yala ning tirmangka weiyang-weiyanga kan-kan sakmok ning atonun wininyake. Allah yupu kekekirye, diba tenebuka dobolbanyak bukni, aminyan sik kanye kum wisilule. Yo duk kum moulamle touk, teleb ubuka kum wininyake. Ara, tukwak mutuku noutamak arye, ‘Aning arye teleb winiptinye do, aning arye teleb winiptinye do?’ tenen, tenelana deice arye batakanyake. Tonda, “Bona weik doproptinyeura, telebuk uptinye,” nyabuka, sikce talye nyaltakanyake. Tonda, aning-aning yala-yala weik teneplibuk, ‘Winiptinye, aning ton doproptinye,’ tenekca deice arye, Allah yupu batakanyake.

Winikca ara, tirmangka weiyang-weiyanga arye papmok ning koupdongobukce, angkalung kipdongobukura, wen-wen anmok touk, aning-aning nirya pia tenelamaka deice arye, Allah yupu kekelamak ning ara, batakiceura, duk kum moulule. Ara, teleb ubuka kum kekekirye, Allah yupu pia kum dobolbanyake.

15Anang ara wininyak bukni, yuk ninye ara, yala doknin banmokura, mirin tukwak sakukura, duk weik arye moubukce, yupa pia weik seratus moubuka touk, unyake. Sik kanye talima ara pia teleb nang anya arye, Allah yupu kekebikirye, diba tenebiceura, ikin ning awablyeura, batakna kum aryuk, pia talibuka wininyake. Allah yupu diba tenebuka, kanye deibuka pia dololamak ninye ara, Allah el pil weik arye donyake. Yesus arye el mapu ati nyabuk.

Yesus arye, ‘Na mapu ara, batakna kum arye, na yupu moubuka kekebikirye, pia talibuka unamak’ tenen, domona deice arye weisa ati, nyabuk yupu

16Yesus arye, el mapu obarye 12 nang ati adomon yupu nyabuk. “Anggunda weisa ubukapmunce, aik pum boyangalulum ning ara, kau pum bisik singipdongopnamabe. Tonda amsuna dangabuka, ‘Weisa singipdongopnamap’ tenen, ubuka yangalulum do? Aning ara kumde. Weisa upmunce, abilinga taram ak deililulume. Ara dirina weik uplibuk, aik pum wamlye ning, ‘Laka eipnamak’ tenen, abilinga taram ak deililulume. Na babye, aweisa atonun pil donirye, ninye talima pum tam dirina kilinune.

17Ara, Allah arye ninye nirya lyeplirye, talinamle ning ara, lak kina kum arye duknyamukura, ninye nirya bita kum kel bikinyake. Bukni, Allah arye aning duknyamukura, ninye bita tenebuka, kum kel bikinyak ning nirya ara, lak uplyopura, ninye nirya kel biknamake. Ara, weisa dirinarye, aik pum uplye ning laka uplibuk elilamak touk, na peterenye ning ap, winiye ning ap deice, Allah arye duknupdeiyamuk arye ninye kum tenelamik ning ara, lak upnamle.

18Aning ati ara, na peterepsin yupu ara, talye amul deice arye kum kekenamlulume. ‘Talya amul arye kekeltakanyap do, moubuka kekenyap do?’ tenen, moubuka tenenamlulume. Na yupu peteresinibuk kekemunce, ‘Deiyok anye,’ tenenepmunce talibuka unamlume. Ara talye ati kume. Allah yupu kekena ati, Allah arye kel kina deiyok ning arisilyeura, moubuka kekekirye, aninguk batakna kum arye, talibuka unyak nang ara, Allah arye kel kina deiyok ning weik arye tabakuka arilibuk, weik arye kel biknin banamake. Bukni, yata nang do nirya, lik ati, amul deice kekeltakanyakce, Allah yupu kum talibuka wininyak nang ara, sik min arye mitik anunuk kel bikamice ning babye, kum upnamle,” Yesus arye nyabuk.

Yesus arye, “Na nin yape atonun ninye ap, na weit yape atonun ninye ap ara ani,” nyabuk yupu

(Matius 12:46-50; Markus 3:31-35)

19Yesus el lin koprop ap, el weit yape koprop ap arye, ‘Yesus ap yupu talipnuyap’ tenen, Yesus ulamuk aik yayik. Aik dam tikilyayik bukni, ninye pia weik bulukmeka ati, Yesus dam kum yanmanto ubik. 20Winibukura, yuk nang arye, Yesus ati nyabik. “An nin ap, an weitcapu ap, aik lilun dam tikelyanmakce, ‘Yesus ap yupu taliptibye’ tenen, enmakiake,” nyabik. 21Nyabikopura, Yesus arye, “Na nin yapu ap, na weitcapu ap ara, nyapnusine. Ara, dan nang do nirya, Allah yupu kekebikirye, aninguk talibuka dobolbalamice nang ara, sikda, na weitcapu ap, na weit kilapu ap, na nin yapu ap atonun unyake,” nyabuk.

Yesus arye weik piridipna ap, mok ap, wininmok ning, kum danibuk yupu

(Matius 8:23-27; Markus 4:36-41; Yohanes 6:16-21)

22Tonok sum ara, Yesus arye Galilea mekwen lilun pia peterenmok ani, el mapu 12 obarye nang ati nyabuk. “Nunda mek lia bukna yo deice bukuka, mekwen deice bibirye, otam wekelbinuyabe,” nyabuk. Nyabukce, mek lia bukna yo deiceuk bukikura, el mapu 12 obarye nang babye, el damuk wekelbiyikopura, sik dem mekwen deice banmek. 23Sik banmek karen ara, Yesus ara mapmok. Mapmokura, sik nirya banmek talak ara, weik firidipna ap, liman ap, mok ap winibukce, mekwen weik arye lonting-lonting anmokce, mek lia bukna yo pum mek wekukce, ikin arye mek lia bukna dobuka, mekwen pum wekmanto unmok.

24Aning nirya wininmok talak ara, Yesus ara, mapmok. Yesus mapmok ati, el mapu obarye 12 nang arye, “Buklyame,” nyabuka bukeibik. Yesus ati nyabik. “Naio, nun mekwen dipmanto unmasil ning ara, mambul unmasile,” nyabik. Nyabikura, Yesus mapmoka bukuka tikukce, weik firidipna donmok ati, “Weik firidipna tunimaplyame,” nyabuk. Mekwen lonting-lonting anmok ara, “Mekwen tunimaplyame,” nyabukopura, pia tunim abuk.

25Anirya akunum tunim abukopura, Yesus arye el mapu obarye 12 nang ati nyabuk. “Anggun min nati dib tenepnulum ning ara, dan tam upmasila arye, ilil weik upmasil do?” nyabuk. Nyabukura, el mapu arye sik, ‘Se’ tenen, ngalukik, akarye ilil weik ubukaura, asildanmek. “Yesus ara yatatonye ulul do? Mok firidipna babye, mekwen babye, el yupu nyaplyeura, el nyaplye touk kekebuka kum danalule,” nyabik.

Tonoknye, el kanye pum tam wekamuk Isa Mutuku Dongonye, Yesus arye yakuka dopkwetebuk yupu

(Matius 8:28-34; Markus 5:1-20)

26Weik firidipna ap, limang ap, akunum tunim abukopura, mekwen deicauk banmeka ani, Galilea mekwen otam Gerasa mutuku biyik. 27Biyikopura, Yesus ara mek lia bukna yo deice arye, tukwak tikilbiyuk. Tikilbiyukura, amutukunye tonok, isa arye uryamuknye, ninye weilamik keil si dam arye kubuka abukce, Yesus dam yayuk. Anye bira, ninye aik kum ulamukce, talye nong bananguk ninye weilamik keil pum bisik ulamuk.

28Amutuku ulamik ninye arye, ‘Isa uryamuknye nun yana opsilyak’ tenen, kawat rantai tapu arye, el taruk ap, yan ap, tapu koubuka deililamikura, aisa uryamuka mikip deice arye, el nong mikip kibuka, mikip weik ulamukce, atapu buluklobuka balamuk. Buluplonak arye, bik-bik abuka ninye pia kumak balamuk. 29Yesus mekwen kup-kup tikilbiyuk talak ara, isa uryamuknye bira Yesus eibukopura, Yesus dam bik-bik abuka yayuk. Yayukce, weik arye ngalukukabukce, gutam tuku dipdongobukce gisok talipdongobuk.

Yesus arye anye uryamuk isa ati, “Isao, anda anye bira el talima ak talipluma ara batakmince, kutukuka bindoplyame,” nyabukce, ayupu nyanmok talak ara, anye bira el kanye auryamuk isa ara, weik yupu arye Yesus ati labisibuk. “Anda yata wiripnamasilama ati, yanmalam do? Allah el mikip weik ulirye, yuk allah-allah nirya bisilulce, aning-aning nirya deice tam ulul Allah ara, Yesus anda, Allah el Mi Koprop ulyame. ‘Se, weika arye kum opnusilam’ tenen, moropkiayape,” nyabuka, aisa weik yupu arye Yesus ati nyabik.

30Nyabikopura, Yesus arye aisa ati asipdeyuk. “An si ara yatanye do?” nyabuka asipdeyuk. Nyabuka asipdeyukura, isa mer arye elak tamubuka nyabik. “Nunda weik wekupu ati, nun si kum nukmanto upsuk. Nun si kum nukmanto anya arye, nun si ara Legion#8:30 Legion nyanyaka deiyok ara ani. Legion ara, yin talin nang sik kong pia weik ati, isa mer arye, ‘Nun si ara Legion,’ nyabuka si silamik. Aisa ara, yupa weik anya arye, tonok si kum nyabik bukni, Legion uk nyabik. nyasinyake,” nyabik. 31Tonda, aisa mer arye, ‘Allah arye pia malye ninye ap, malye isa nirya ap, dongopnamla pum bisik dopkwetepsilyak’ tenen, Yesus ati weika arye moronmek. Ayupu nyabuka moronmek ning ara, Yesus arye aisa mer ati, ‘Anye bira talima pum tam talyaluma ara kutukuka bindoplulume,’ nyapdeipmoka ati, moronmek.

32Yesus ati moronmek talak ara, ninye arye weilamik basam, yupa pia weik amutuku asik taram tamak tuku dinmek. Basam arye tuku dibuka aunmeka ati, aisa mer nirya arye Yesus ati moronmek. “Aunmak basam nong pum bisik, ‘Wekelbilulume,’ nyapsio. Aning nyapsutumopura, abasam wekel bitibye,” nyabuka moronmek. 33Moronmekura, Yesus arye, “Telebe, anye bira el talima taliplum ning ara kutukuka buru tam bindoplulume,” nyabukura, adiparyuk isa talyamuknye talima pum tam arye kutukukabikce, basam nong pum bisik wekelbiyik. Wekelbiyikopura, abasam yupa weik, amutuku taram arye bik-bik abuka, kulukuka banmeka ani, mekwen pum bisik wekik. Wekikopura, abasam nirya mekwen dibik.

34Abasam weinmek nang eibikce, awinipmok ning nirya ati, ninye asik dolamik noutamak ap, bisik ak ap, laka nyapnin banmekura, ninye weik kekebikce, ‘Awinipmok ning eipnamap’ tenen, Yesus dam dilyayik. 35Yesus dam dilyayikce, isa yupa weik talyamukak, Yesus arye kwetebuknye, kanye deibukce, baju ongobuka bukmokak eibik. Eibikura, ilil weik ubuk. 36Min aunmeka eibik nang arye, winiryuk yanmek nang ati, anye bira, isa uryamukbuk, Yesus arye kwetebuk ning ap, basam nong wekikura, mekwen pum bisik wekik ning ap, anirya dukdongobuka, laka nyabik. 37Laka nyabikura, anang nirya kekebikopura, ilil pia weik ubuk ati, ‘Yesus ara, nun Gerasa mutuku nirya abatakuka, yukak bindoptu’ tenen, Yesus ati moronmek.

38Winibuka moronmeka ati, Yesus tuba tamubuka mek lia bukna yo deice biyukura, mek lia bukna yo deice bulbinuyuk talak ara, isa talyamukak, Yesus arye kwetebuknye birye, ‘Na ap, Yesus ap bitinimnye’ tenen, Yesus ati morobuk. 39Nyabuka morobukura, Yesus arye anye biti nyabuk. “Kume, ance tamubuka an mutuku kopropa nang ap, an aik nang ap ati, Allah arye bico tenepmakilce, pil weike dopmakil ning ara, laka nyalbinulyame,” nyabuk. Yesus arye nyabukopura, anye birye, el mutuku tamubuka biyukce, anyasik-anyasik noutam nirya, ayupu laka nyapnin balamukura, aninye nirya kekelamik.

Yesus arye, tonok kil, ining balamuk kil ap, dipmok kilmu ap, kwetebuk yupu

(Matius 9:18-26; Markus 5:22-43)

40Yesus binmok bisikuk, mek bukna yo deice tuba tamubuka yayukce, Galilea mekwen deice yayuk. Yayukura, ninye yupa weika arye, ‘Yesus tamubuka yanamal’ tenen, akunum bulubuka dinmekak arye, bisik dilbanmek. 41Sik nirya Yesus ap aunmekbuk, tonoknye el si Yarius yayuk. Yarius ara, Yahudi yala nang Allah yupu peterelamik aik, anyaik sik deiyok nang weik ulamikbuk, el ton ulamuk.

Yarius yayukce, Yesus eibukopura, ‘Yesus ati kipdopnun’ tenen, Yesus yan dam gutam dunupdongobuka, Yesus ati weika arye moronmok. 42“Na kilmu akunum dipmanto unmanila ati, ance na aik yaminyopura, na kilmu kwetepnutume,” nyabuka moronmok. Anye bira, el kilmu ara, (12) obarye keting tamun akunum nemuk. Akilmu dipmantu unmok ati moronmok. Ura, Yesus ap banmek ati, abulubuka wekmek nang nirya ap, neika banmekce, Yesus dam dana-dana nirya lipmekak arye banmek.

43Abanmek nang kan-kan noutamak ara, uk dilamukbuk, keting tamun 12 obarye, deice arye el ining balamuk kil neika banmek. Akil ara, ‘Sikce kwetepniting’ tenen, kweten nang dam weik balamukbuk, sik kum kwetepmanto wamik arye, uk tuba dilamuk. 44Yesus pil dolamuk ning kekebuka ati, elce utenebuk. ‘Yesus el cang baju, el si juba talye bol piptinyetoura, kwetepnute,’ tenebuk. Utenebuka ati, abanmek nang noutamak arye, Yesus el balye tam tikilyayukce, Yesus el deice ongopmok baju, el si juba bol pibuk. Yesus el cang baju bol pibukopura, adiparyuk, el ining balamuk ara, tunim abukura, teleb kibuk.

45Yesus ongomuk baju bol pipmok talak ara, adiparyuk Yesus arye, tamubuka, ayangan mek ninye nirya dipdonokdeyukce asipdeyuk. “Yata kil, yatanye birye, na cang baju, juba bol pipmanil do?” nyabuka asipdeyuk. Asipdeyukura, el ap balamik nang nirya arye, “Nunce kume,” nyanmek. Nyanmekura, Peterus arye Yesus ati nyabuk. “Ninye weik an dam lipmaka anya arye, ‘Yata wiribuka arye yatanye birye el cang baju, juba bol pipnamal do?’ tenen, kum kel kiptibye,” nyabuka asipdeyuk. 46Nyabuk bukni, Yesus arye tamubuka nyabuk. “Kume, na kele, sal do, kil do, tonoknye birye, na baju bol pilipmanilba, na mikip el nong deice binmale,” nyabuk.

47Nyabukura, akil ara, Yesus kwetepmok ning, akunum kel kipmoka anya arye, ‘Mambul pil dopmanila ara, kum duknuptinye’ tenen, malye kanye bobuka, Yesus yan dam gutam dungupdongobukce, akil arye winipmok ning nirya ap, Yesus arye kwetepmok ning ap, aninye kekenmekak laka nyabuk. 48Akil arye aning nirya laka nyabukura, Yesus arye tamubuka akil ati nyabuk. “Na ka kilo, an diba tenepmanilama deice arye kwetepmakine. An kanye imun wamkuk ning ara, akunum kwetepmakine ati, telebuk kanye deibuka binamlyame,” nyabuk.

49Yesus arye ayupu tuba nyanmok talak ara, Yarius el aik ulamuknye birye, Allah yupu peterena aik deiyoknye, Yarius ati laka nyalyayuk. Laka nyalyayukce, Yarius ati nyabuk. “An kilmu akunum dipmakila ati, apeterenanye Yesus ati, yupu tonap kum nyapnulyame. Batakuklyame,” nyabuk. 50Anye birye ayupu nyabukura, Yesus kekebukce, ‘Danyablye’ tenen, luba kibukce Yarius ati nyabuk. “El nyapmal yupu ati, kekepmince ikin kanye bobuka, ilil una ap, teniltona ap meme. An kilmu kum dipmale. Ilil asa kum unulyam bukni, dib tenebuka talye kanye bobuka uminyopura, an kilmu narye kwetepnamkine,” nyabuk.

51Nyabukce, sik nirya, ‘Yarius aik binuyap’ tenen, banmeka ani, Yarius aik biyik. Biyikopura, ayangan mek nang nirya, ‘Sik yacak’ tenen, yupu sekdongobukura, sik anyakuk unmekbuk, Yesus ap, Peterus ap, Yakobus ap, el weit Yohanes ap ara, akilmu el li Yarius ap, el lin ap, sik yuk Yarius aik pum biyik. Yuk nang ap, Yarius aik kum wekik.

52Yarius el aik akunum wekik talak ara, anyaik dam unmek nang, sik weik arye engena ap, weik arye ngalukuka malye nyana ap, wininmekbuk, Yesus arye eibuk. Eibukce, anyaik malye nyanmekce, kweldanmek nang ati nyabuk. “Anggun weik arye malye, nyabuka, ngalukuka kweldanmaluma ara, bataklulume. Anggun tunimaplulume. Akilmu ara kum dipmale. Urdem mapmale,” nyabuk. 53Nyabukura, aunmek nang arye, akilmu akunum dipmoka ara, akunum bikmeka anya arye, Yesus ati akutunmek.

54Akutunmek ati, Yesus arye, akilmu taruk talibukce, ayupu nyabuk. “Na kilmu tiklyame nyapmakine,” nyabuk. 55Yesus arye nyabukura, adiparyuk adipmok kilmu, kanya bindopmoka ani, tamubuka el nong akuk yanuka wekukce, kam bukuk. Wekukopura, akilmu tikuk. Winibukura, Yesus arye nyabuk. “Akilmu el dina areplulume,” nyabuk.

56Yesus arye akilmu kwetebukopura, akilmu el lin ap, el li ap, se tenebuka, ngalukunmarik. Bukni, Yesus arye anang bitinye ati, “Awinipman ning ara, yuk ninye ati nyapra bana meme,” nyabuka yupu sekdongobuk.#8:56 Laka nyana meme – Yesus arye, “Akilmu kwetepman ning ara, yuk nang ati, laka nyalbana mem,” nyabuk ning deiyok ara, ani. Ara, ‘Ninye nirya arye, na Yesus ara, ‘Ninye Lyena Deiyoknye, Mesias aulule,’ tenepnikirye, ‘Kel kipnamninyaka’ tenen, nyabuk. El laka nyanyak talak, kabula anya arye, ayupu nyabuk.

Currently Selected:

Lukas 8: EIPA

Highlight

Copy