Yohanes 12

Maria arye nintong teleb mek dobuka, Yesus si erena ati, el yan deice dikeibuk yupu

1Sik Yahudi yala ninye arye weik Kaplina ati Kwalina ati, ‘Naku barye sum tonap akunum mabibyopura, kwalipnamabe’ tenen, kintinibik sum ara, Yesus arye Betania mutuku biyuk. Betania mutuku ara, Lazarus diamukba, Yesus arye kam bukeibuk mutuku anyuka. 2Asum ara Betania mutuku nang arye, ‘Nun ni Yesus ati kipnamap’ tenen, din ning weik kintinibuka deipmek. Din ning kintinibuka deipmekba, Marta ara, aning dipnuyik ninye ati, dina bokuka arilbanmok. Lazarus ara, el ap, Yesus ap, yuk nang ap, neika bukuka din dinmek.

3Sik din dinmek talak ara, Maria arye nintong teleb mek, el si ara narwastu, dekna pia weik ning dobuka, Yesus el kina ati, el yan deice dikeibuk. Dikibukce, Maria el kisok potong cang kil anya arye, el potong talibuka, Yesus el yan deice kilibuk. Anirya winibukura, anyaik pum nirya nintong teleb ning ara weik arye banmokba, sik nirya kekebik.

4Maria arye winibukura, Yesus wipdeiyamuk nang kan-kan, tonoknye Yudas Iskariot arye, yu ubukba malye yupu nyabuk. Yudas ara, aminyan talak, ‘Malye nang arye Yesus opnamak’ tenen, ninye yupu delilbinamuknye. 5Yudas arye nyabuk. “Anintong teleb mek ara, yata ati talye dikipmal do? Amek dobuka, yuk nang ati dekmatipyopura, yo bok weik doproptibirye, ninye bona utotowa talina kum nang melibuka ati areptibye. Amek dekna ara, mitik kume. Tonoknye keting tamun tonok deice arye pil dolamtua ani, keil uang dinge weik 300 denari#12:5 denari yo bok – Yunani yupu deice arye, 300 denari sekik. Denari ara, kil uang ulul bukni, tonok sum pil dona dekna ati arilamik. Ati ara, 300 denari ning ara like tonok sum 300 sum pil don deice arye dolamik touk ubuk. Ara, amek dobuka dekmatingopura, keil uang keting tamun tonok uptopura doproptinge. doproptue.” Yudas arye nyabuk.

6Yudas arye ayupu nyabuk ara, talye bona utotowa talina kum ninye ati, bico tenebukce kum nyabuk. Tenepce nyabuk. Ayupu nyabuk deiyok ara, elda ubula donanye ulamuka anya arye, Yesus ap el mapu silip ap arye, sak pum bisik dongobuka delilamik yo bok talibuka, kaliknanye ulamuk. Winilamuk bukni, el patalamuk touk, asak pum bisik arye talye ubula dololamukce, el babye tenelamuk ning ati, dekelolamuk.

7Yudas arye el yupu nyabuk ati, Yesus arye nyabuk. “Akil ati ayupu nyaplam ning ara bataklyame. Allah arye tenyamuk touk, akil arye akunum winipmanile. Aning ara laka nyapnusine. Ara, aminyan na opnikibuk, dipnamne talak ara, na nong weipnamniaka ati, akil arye, na nong kintinina pil atonun akunum winipmanile. 8Talye bona utotowa talina kum ninye ara, doyanamle talak noutamak nirya, anggun ap ansinibuka unamlume. Bukni, na ap, anggun ap, neika pia kum unamabe. Nara, amutuku tia talakuk unamne,” Yesus arye nyabuk.

9Ayupu nirya nyanmek talak ara, yuk nang arye, “Yesus unmal aik ani,” nyabuka laka nyalbanmekba, Yahudi yala nang, yupa weik dilyayik. Dilyanmeka deiyok ara, ‘Yesus eiptibye’ tenen, tonda, ‘Lazarus bira, diamuk bukni, Yesus arye anye bira kam bukdeibukba, anyaik pum unmala anya arye, el Lazarus babye eiptibye’ tenen, dilyayik. 10-11Ura, Yesus arye Lazarus kam bukibuk ati ara, Yahudi yala nang yupa weik arye, Yesus ati dib tenebikce, el tam kipropmeka ati, sik Yahudi yala deiyok nang yu weik ubuk. Yu ubukba, Allah arena ati weik deiyok nang arye, ‘Kume, Yesus eluk kume. Tonda, Lazarus ap opnamabe,’ tenenmekce, yupu talinmek.

Yesus arye, Yerusalem mutuku yayuk talak winibuk ning ati, nyabuk yupu

12Maria arye, Yesus yan deice nintong teleb mek dikeibukba, sik mapmeka berekukopura, Yesus ap, el mapu ap, ‘Yerusalem mutuku binuyap’ tenen, bisik banmek. Banmekbuk, yuk nang arye Yerusalem mutuku lak nyalbiyikba, weik kwalina ati Yerusalem mutuku bulupmek nang kekebikce, kanye deibik. 13Kanye deibikce, ‘Yesus eipdabirye, el yanganmal bisik yangabuka deibibirye, elti, si erepnuyap’ tenen, amutuku ninye winilamik touk, yo bata cebuka bobikce, Yesus yanganmok bisik bik-bik abuka biyik. Bisik banmek talak ara, ayupu weik arye nyanmek. Sik nyanmek yupu ara ani.

‘Hosana,#12:13 Hosana – Ayupu Hosana ara Ibrani yupu ulule. Ayupu deiyok ara, ‘Lyepnamsile’ tenen nyalamik. Atalak ulamik Israel nang arye, Allah el si erena ati ayupu ton nyalamik. Anye birye Lyepnamsile. Nun Ni Koprop Allah arye wipdeibukura, Allah el si deice arye yanmalanye bira, Allah weik arye meliplibuk, telebuk unamle.

Nun Israel ninye nirya, nun Weik Ninye Deiyoknye, nun Raja atia. Allah arye anye biti weik arye meliplibuk, telebuk unamle.’ (Mazmur 118:25)

Yesus yanganmok bisik unmekce, neika banmek ninye arye ayupu nirya nyanmek. 14Yesus ara, ‘Yerusalem mutuku binun’ tenen, keledai basam winiryuk ning, ninye ton kum bukuka balamik basam eibuka dobukabukce, akeledai basam balye tam bukuka bisik banmok. Winibuka banmok ara, minop talak Allah yupu noutamak sekamik ning, nong dukdongopnamuk ati winibuk. Nabi Zakaria arye minop talak sekamuk yupu ara ani.

15‘Yerusalem#12:15 Yerusalem – Ton Allah yupu buku noutamak ara, mutuku si Sion nyanyake. Ara minop talak nyalamik si ati sekenyak bukni, amutuku ara, Yerusalem mutuku uk ulula anya arye, amutuku si ati, nunce Yerusalem mutuku sekupu. mutuku unyak ninye ara, ilil una meme. Anggun dilulume. Anggun Weik Ninye Deiyoknye, keledai basam winiryuk ning balye deice bukuka yanganmasile.’ (Zakaria 9:9)

Zakaria arye minop talak nyalamuk touk, Yesus arye asum winibuk.

16Aning nirya winiryuk winipmok talak ara, Yesus el mapu arye moubuka kum tenebikce, aning nong noutamak ara, kum bikik bukni, aminyan talakuk Yesus dibukura, Allah arye kam bukdeibukce, ‘Weik mambulnye unamle’ tenen, erepdeibukce, pia teleb kipdeibukba, Yesus im deice welebiyukopura, atalak aniryuk, Yesus el mapu aning nirya moubuka tenebikce, bikik.

Ara aminyan talak ara, sikce, ‘Se, diba de. Allah yupu laka nyalamik nang, sik nabi nang arye Yesus ati yupu seklamik touk, Betania wekupu sum arye, Yesus arye aning nirya winibuk. Tonda, sik nabi nang arye seklamik ning atonun, nun atalak unmapu ninye arye Yesus ati akunum winibupu,’ tenen, bikik. 17Yesus ap banmek nang nirya arye, ‘Yuk ninye weik arye kekenamak’ tenen, Yesus arye Lazarus keil deiya pum bisik yukupce, kam bukeibuk ning ara, weik arye laka nyalbanmek.

18Sik laka nyanmekba, ninye weik kekebikce, ‘E, Yesus ara weik mambul pil, ninye kum winipmanto ning, akunum winipmala anya arye, dilbibirye, el ap epdatibye’ tenen, Yesus yanganmok bisik banmek. 19Ninye yupa weik arye Yesus dam balamikbuk, sik Farisi nang arye nyapdayik. “Se, anye biti yupu sekmaba ara, nong kum upnamsile. Dipdelulume, amutuku-amutuku ninye nirya ara, el tam kipropmaka atia,” nyabuka nyaldanmek.

Yesus arye, ‘Anang opnamaniake’ tenen, laka nyabuk yupu

20Ara, atalak ara, weik Kaplina ati Kwalina ati, ninye yupa pia weik Yerusalem mutuku bulubuka wekelbiyik. Aninye kan-kan arye, Yunani yala nang ton unmek. 21Sik Yunani yala nang arye, Pilipus el dam yayik. Pilipus ara, Galilea tam noutamak bukni, mutuku si Betsaida mutukunye ulamuk. El babye Yerusalem mutuku unmokak, sik Yunani yala nang yayikce, nyabik. “Amio, Yesus nyalamaknye bira, ‘Nun ap epdatibye’ tenen, patasila, ati moropkiyape,” nyabik. 22Nyabikura, Pilipus el weit Anderias ati, laka nyalbiyukura, sik bitinye arye, Yesus ati laka nyalbirik. 23Nyalbirikura, Yesus arye nyabuk.

“Nara, Ninye Mi Koprop Atonunye biti, Allah arye pia teleb winipdeipnamnil talak akunum yanmasile. 24Domon yupu nyapnusin ara, pia dipkoprop ulule. Yakong duk tonok, tukwak deice sakuka poulbilirye, kum lyuplyopura, tonok dukuk pia unamle. Bukni, lyupliba dawamlya ani, aminyan talak betekliba, paplirye, duk pia weik moupnamle. 25Yatanye do, yata kil do, sik bidamang kam una ati, ‘Na ning,’ tenebuka, ubicopura, aminyan talak dibikibuk, dipkoprop kam pia kum unamake.

Bukni, yata ninye do nirya, tukwak mutuku unyak talak nirya arye, ‘Na kam una ara mambul kum bukni, Yesus el ning ara mambul weike,’ tenebikirye, na ning atibuk tuba tenenauk ubicopura, dibikce babye, aminyan talak kam pia unamake. 26Yata ninye do nirya, na amu tam bukuka, na yupu kekebikirye, na pil ati dokcopura, na unye touk adiparyuk wininamake. Na ban bisikuk adiparyuk melinamniyake. Tonda, na unun mutuku nirya, na mapu unamake. Na amu tam bukuka, na yupu kekebikirye, na pil ati donilinye biti ara, na Ni Koprop Allah arye, anye erebuka teleb kipdeipnamle.” Yesus arye nyabuk.

27Nyabukce, ayupu ton nyabuk. “Wini talak ara, na mambul kanye bopmane. Yata yupu nyaptinye do? ‘Naie, atalak ikin ning na nong deice deipnamaniyaka ati, lobuka lyepnilyame,’ nyaptinye do? Kume. Aning ara kum nyaptinye. Dipkoprop ‘Winipnamniyak’ tenen, wini talak unune. 28Ati na ni Allah, ‘Ninye nirya an pia teleb winiminya ara, lak kibuka eibikirye, kel kipnamak’ tenen, ance anminingsi erepnamlyame.” Yesus arye nyabuk. Yesus arye nyabukba, im deice noutamak arye, ninye yupu atonun yupu arye, Allah arye nyabuk. “Akunuma minop talak noutamak arye na si ereipse. Ila tonap na si ereipnamne,” nyabuk.

29Ayupu im deice arye nyabukura, awekmek nang nirya arye lelimuk kekebik bukni, ‘Allah arye nyapmasile’ tenen, kum kel kibikce sikce, ‘Ara liman lelimuk kekebabe,’ tenebik. Ton nang arye, ‘Aning ara limang yupu kum bukni, Allah el im deice pil donanye, malaikat Yesus ati, ayupu nyapdeipmale,’ tenebuka nyabik.

30Nyabikura, Yesus arye awekmek nang ati nyabuk. “Ayupu kekenmaluma ara, anggun melina ati nyabuk. Na melina ati kume. 31Wini talak ara, tukwak unyak ninye nirya ati, Allah arye yupu bokeipnamsile. Allah arye tukwak mutuku nirya talilya Deiyoknye, malinye Isa Mutuku Dongonye ati, malye kibukaplirye, bai tam atonun dopkwetepnamle. 32Bukni, nara, tuku deice tam erepdeipnilyopura,#12:32 tuku deice tam erebnikcopura – Yesus arye ayupu nyabuk ning ara, ‘Wanwanun yo deice deipnikirye, na nong erebuka opnamniyak,’ tenen nyabuk. narye ninye mutuku-mutuku nirya ati, yukupnibuk, ninye weik arye na tam kilonamniyake. Aninye ara lyepnirye, na mapu kipdeipnamsine.” Yesus arye nyabuk.

33Yesus arye, “Tuku deice tam erepdeipnilyopura,” nyabukba, ara wanwanun yo deice deibuka, el nong erebuka opnamik ning ati, ‘Na yupu kekenamak ninye kel kipnamak’ tenen, nyabuk. 34Yesus arye ayupu nyabukura, awekmek nang arye nyabik. “Allah arye nyapdeibukura, Musa arye sekeiyamsuk yupu noutamak arye peterelamsikba, kekelamupe. Ara, Allah arye, ‘Ninye Lyepnamle’ tenen, wipdeibukce, dopdeipsuknye, ‘Kristus ara, elda pia kam unamlanye,’ nyabuka peteresinyake. Ati ara, ance, ‘Ninye Mi Koprop Atonunye adiparyuk ereipnamniyake,’ nyapsilam ning ara, yata deiyok ati ayupu nyapmasilam do? Tonda, ‘Ninye Mi Koprop Atonunye,’ nyapsilamnye#12:34 Ninye Mi Koprop Atonunye yupu sekik ning ara, minop talak sik Nabi-nabi nang arye sekik. ‘Anye bira, im deice arye yanamle bukni, ninye nong atonun dalirye, yanamle’ tenen, Ninye Mi Koprop Atonunye nyabuka sekamik. Aning ara, el Yesus uka bukni, el yayukba, ninye nirya arye, aning moubuka kum bikamik. Tonda, laka nyan yupu nomor 22 dipdelulume. bira, yatanye biti nyapsilam do? Elda yatanye ulul do?” nyabuka asipdeyik.

35Nyabikura, Yesus arye domon yupu deice arye tamubuka nyabuk. “Wini talak ninye moubuka kel bikna ati, dirina upsil ning ara, anggun ap mitik anunuk, anggun neika unamsile. Dirina tuba wapsilye talak ara, teleb bisik adiparyuk banamlulume. Aminyan talak ara, kunuknauk unamsila ati nyapsine. Kunuknak balinye bira, el bisik banmalya ara, moubuka kel kum biktue.

36Dirina tuba wapsilye talak ara, anggun kanye talima adirina ning deice deibuka, dib tenepnululume. Ara talye ati kume. ‘Nunda dirina deiyoknye, el dirina mapu unamabe’ tenen, dirinanye, nati dib tenepnululume. ‘Winipnamlum’ tenen, nyapsine,” Yesus arye nyabuk. Yesus arye ayupu nyapdongobuk ning ara, aninye asukumuk batakuka, dungnubuka biyukbuk, sikce el ton kum eipmek.

Yahudi yala deiyok nang arye Yesus ati, pia dib kum tenebik yupu

37Ura, Yesus arye ninye kum winipmanto ning, pil aning-aning nirya dolamukbuk, sik Yahudi yala deiyok nang ton elilamik bukni, sikce Yesus ati pia diba kum tenebik. 38Sik diba kum tenebika deiyok ara, Allah yupu laka nyalamuknye, nabi Yesaya arye nyalilamuk yupu, ayupu nong upnamuka ati, dib kum tenebik. Nabi Yesaya arye nyalamuk yupu ara ani.

‘Nun ni Allah, el yupu nunce peterelamubu yupu ara, yata mutuku ninye dib tenenyak do? Kekeltakanauk unyake. Tonda, an mikip deice, weik mambul pil dolyam bukni, yata mutuku ninye eibikirye, moubuka kel bikinyak do?’ (Yesaya 53:1)

39Yesaya arye nyalamuk touk, sik Yahudi yala ninye arye Yesus ati diba kum tenebik. Tonda, Yesaya arye yukak nyalamuk touk, anang ara diba kum tenepmanto nang ulamik. Yahudi yala ninye arye, diba kum tenepmanto ulamika deiyok ara, Yesaya arye minop talak sekamuk yupu deice arye, akunum laka nyalamuk. Ayupu ara ani.

40‘Allah arye aninye ati, asing kun ning akunum aribuk. Tonda, sik kanye talima noutamak ara, kat akunum kibuk. Allah arye aninye ati, asing kuna ap, talima kat una ap, akunum aribukba wininyake. Sik asing arye teleb kibuka kum elinyake. Sik kanye talima noutamak ara, ‘Deiyok ani’ tenen, moubuka kum tenenyake. Sik kum kel bikmanto pia ulamika ani, sik malye winin ning batakuka balye tamubuka, na tam kum kipnamake. Sik malye wininyak ning bataktingopura, narye sikti, kwetebuka, teleb ulilamtinye bukni, sikda talima kat ninye anya arye, aning kum wininamake. Allah arye nyabuk.’ (Yesaya 6:10)

41Allah el yupu laka nyalamuknye, nabi Yesaya arye, minop talak ayupu nyamuk ning ara, Yesus pia teleb winipnamuk ning moubuka tenyamukce, aning nirya min kum winibuk talak, Yesus winipnamuk ning ati, laka nyalilamuk.

42Yahudi yala ninye pia weik arye Yesus ati, diba kum tenebik talak noutam akuk, ton ninye ara, Yahudi yala ninye sik deiyok nang kan-kan ulamik nang babye, yupa mitika arye ton dib tenebik. Yahudi yala deiyok nang, tonok-tonok arye Yesus ati, dib tenebik bukni, sikda utenebik. ‘Se, Farisi nang arye, “Nun nirya Allah yupu peterenyap aik, anggun ton kum bitume. Anggun yuke,” nyabuka wenepsikcak’ tenen, Yesus dib tenebik ning ara, yuk nang kekenak lakak kum nyabik.

43Yahudi yala deiyok nang, tonok-tonok dib tenebik nang bukni, laka kum nyabika deiyok ara, ‘Allah arye kanye deipsuturye, sikda teleb nang, tenepsutu babye, mitik mambule. Bukni ninye arye, teleb nang tenepsitingce, kanye deipsitinga ara, weik mambule,’ tenenauk ulamika ati, kanye lamabuka unmek. ‘Yesus dib tenepmabe,’ nyabuka laka kum nyalamik.

44Ton talak ara, Yesus arye ayupu nyabuk. “Yata ninye do nirya, nati diba tenepnikcopura, ara natibuk diba kum tenenyake. Diba tenepnica deice arye, na dopdeipnuknye Allah ap ati, diba tenenyake. 45Anggunce nati eilinululum talak nirya ara, na dopdeipnuknye babye, Allah elilulume. 46Nara, dirina atonun upsirye, tukwak mutuku noutamak yase. Dirina atonun yanuka ununa ara, ‘Na ti diba tenenyak ninye nirya ara, kuna akuk, tuba kum unamak’ tenen, tukwak yasirye, unune.” Yesus arye nyabuk. 47Nyabukce, ayupu ton nyabuk.

Na yupu peterebikibuk, amul deiceuk kekelul bukni, ayupu talibuka kum dobolbalinye bira, narye anye biti yupu bokuka kum wenepnamne. Deiyok ara, narye, ‘Tukwak mutuku ninye nirya ati, yupu bokipnirye wenebuka oplopnamne’ tenen, kum yase. Aning kum bukni, ‘Ninye nirya ati lyepnamne’ tenen, tukwak mutuku yase. Adeiyok ati ayupu nyapsine. 48Bukni, nati bataklirye, na yupu talibuka kum dobolbalirye, na yupu yaninululnye biti ara, yupu bokolina deiyoknye ulula anya arye, nati batakanululnye biti yupu bokeipnamle. Na yupu kum kekenyak ninye ara, sikti, yupu bokolina ap, wenena ap deiyok ning ara, aulule. Ara, sirya talak ara, narye nyapdeiyamsise yupu deice arye, aninye ati, yupu bokuka wenepnamle.

49Aning ara talye ati kum nyapsine. Narye nyasinye yupu nirya ara, na kanye tenen ning aryuk kum peteresunune. Aning kum bukni, na Ni Koprop Allah, na dopdeipnuknye birye, ‘Ance nyanamlam yupu ara ani. Yupu nyanamlam talak ara, winibuka, winibuka nyanamlyame,’ nyapdeipnuk touk, anyuk nyalamsirye, tuba nyasunune. 50Na kele, Allah arye, ‘Wininamlulume,’ nyasilye yupu nirya kekebuka melipmunyopura, aminyan talak pia kam una deiyok ning arisilyopura, kam pia unamlume. Ati, na nyasinye yupu nirya ara, talye yupu uk kum ulule. Ayupu nirya, na Ni Koprop Allah arye, ‘Nyanamlyame,’ nyapnuk touk, anyuk nyasunune. Yesus arye nyabuk.

Currently Selected:

Yohanes 12: EIPA

Highlight

Copy