Yohanes 1

Yupu ulamuka ani, aminyan talak ninye nong atonun dayukce, tukwak mutuku yayuk ati, nyabuk yupu

1Aning-aning nirya min kum uamuk talak ara, Yupu#1:1 Yupu – Yohanes arye sekuk buku noutamak ara, ‘Yupu’ nyabuka sekamuk ning ara, Yesus tenebukce sekuka ati, apasal noutamak ara, ‘Yupu,’ eipmunyopura, Yesus tenepnamlulume. ulamuk. Yupu ulamukce, Yupu ap, Allah ap neika ulamrik. Yupu ap, Allah ap, sik tonokuka. Yupu ara, Allah ulule. 2Allah arye, aning-aning min kum kwepdeiamuk talak ara, Yupu nyanyapnye Yesus ap, Allah ap neika ulamdika ani, atalak noutam ara, Yupu nyanyapnye birye aning-aning nirya kwepdeibuk. 3Yupu nyanyapnye, elce aning-aning nirya kwepdeibuk. Yata ning do nirya, Allah arye kwepdeibuk ning nirya ara, Yupu nyanyapnye, pil dobuk deice arye aning-aning nirya kwepdeibuk. Aulul ning yala-yala nirya ara, Yupu nyanyapnye, elcuk aning-aning nirya kwepdeibuk. Yuknye birye, tonok ning babye kum kwepdeibuke. 4Yupu, el ulamuk noutamak ara, kam una deiyok ning ulule. El noutamak kam una deiyok ning uamuk deice arye, tukwak ninye sik kuna noutamak ulamikbuk, Yupu arye ninye kanye pum tam dirina kipdeibuk. Kanye talima dirina arisululnye bira, el Yupu tonokuka. 5Tukwak ninye nirya ara, kanye kunukna ak ulamikibuk, anoutam ara, adirina deiyoknye birye dirina kililsulul bukni, tukwak ninye nirya ara, sik kanye talima noutamak kunuknauk ulula anya arye, sik nirya arye, ‘Dirina#1:5 Dirina laka yupu ani. Ton tamna weik bikamek nang arye, utenenyake. ‘Kume, Yohanes arye, nyalul yupu noutamak ara, “Tukwak mutuku noutamak pia malye ulul ning ap, pia malye wininyak ninye ap arye, Yesus ap, el nyalamuk yupu, Ninye Lyena Deiyok Yupu ap ati, ‘Anye yanipnamtibye, tenelamik bukni, sikce yanibuka kum kum kipdeipmanto ulamik. Ati ara, Yohanes arye, ayupu ‘Dirin,’ tenebukce, sekuke,’ tenenyake. Tonda, anang arye, ‘Yohanes arye, “Dirin” nyabuk ning ara, Ninye Lyena Deiyok Yupu moubuka kel bikna ati, sekuk. Yesus arye, el yupu bita kel bikina ati, kel kina deiyok ning dobuka, nun talima noutamak delisulul ati ara, awinisulul ning ara, dirin atonun usulule. Ati ara, Yohanes arye, “Dirin” nyabuk,’ tenenyake. deiyok ning aresululnye bira, ani’ tenen, elti, moubuka kum bikinyake.

6Minop talak, Allah arye dopreibuknye, nun dam yayuke. Anye el si ara, Yohanes ulamuk.#1:6 Yohanes bira Allah arye dopdeibukura, Yohanes arye, ‘Yesus ara, Dirina Deiyoknye usulule,’ lak nyalamukbuk, Yesus ara, kam una ati, Ninye Lyena Yupu ap, Dirina deiyok lak kina ap, Dib Yupu Nyana ap ati, bobuka nyalyayuke. Ninye arye Yesus ati, diba tenebikba, Yohanes arye aninye dobuka, mek dongobuk. Winilamuk ati, atalak ulamik ninye arye, elti, “Elda Yohanes Pembaptis,” nyabuka, asi sinyalamik. 7Yohanes yayuka deiyok ara, Allah arye, ‘Ninye talima Dirina Deiyoknye biti, Yohanes birye laka nyabuka petereplibuk, ninye mutuku-mutuku nirya kekebikirye, adirina deiyoknye dib tenebica deice arye, kam unamak’ tenen, dopdeibukba, Yohanes yayuke.

8Yohanes bira, ninye kanye talima noutamak dirina deiyok ning arisulul deiyoknye kum ulamuk bukni, adirina deiyoknye biti, ‘Kanye pum tam dirina arelulula deiyoknye eipnirye, elti, laka nyabuka peterenamne’ tenen, Yohanes yayuke. 9Ninye mutuku-mutuku nirya sik melina ati, dirina deiyok ning arena deiyoknye, Dib Koprop Dirina Deiyoknye yanamuka ati, Yohanes bira, kintinilina ap, laka lena ap ati yayuke.

10Ninye Kanye pum tam Dirina Arina Deiyoknye bira,#1:10 Ninye talima Dirina Arina Deiyoknye bira, Yesus uka. Ninye talima noutamak dirina arisululnye bira, aning ara kam una ap, ninye lyena yupu ap, moubuka kel bikna deiyok ning ati, talima pum tam dirina deiyok ning nyanyabe. tukwak mutuku noutamak yanuka ulamuk. Kanye Talima pum tam Dirina Deiyoknye birye, tukwak ulul ning nirya ara, el pil dobuk deice aryuk kwepdeibuk bukni, dib tenena kum, talye tukwak mutuku ninye arye, ‘E, anye bira ani’ tenen, moubuka kum bikamik. 11Kanye pum tam Dirina Arina Deiyoknye birye, ‘Aninye ara, na tenen, ninye yala unamak’ tenyamuk ninye kan-kan, Israel ninye#1:11 Israel ninye nyabuka ara, Israel yala ninye, sik weik deiyok nang ninye weik tam ara, Yesus ati, ‘Nun lik’ tenen, bataklamik. Yuk talye Israel ninye mitik tonun aryuk, Yesus ati diba tenelamik. sik dam yanuka ulamuk bukni, aninye arye elti, kanye deibuka dib tenebuka kum dololamik. El ti, ‘Nun lik’ tenen, bataklamik. 12Bukni, yata mutuku ninye do nirya, Kanye pum tam Dirina Deiyoknye bira, el si Yesus ap ati, dib tenebuka, kanye deibuka dololamik ninye nirya ati, weik mambul ning areamuk. Ara, Allah el mapu koprop kilina deiyok ning aribuk deice arye, elti, dib tenelamik ninye nirya, Allah el mapu koprop kililamukba, Allah arye aninye lyelamuk.

13Allah el mapu kililamsuk nyapmasina ara, talye ninye arye deibiceba, dadeipdanin yangalamak ninye atonun ati kume. Tonda, ninye sik kanye aryuk, ‘Mapu deipnuyap,’ tenelamak atonun winina deice arye kume. Tonda sal arye, ‘Nun kilapu arye mapu deipnamsiyak,’ tenelamaka atonun ati kum nyapne. Aning kum bukni, aninye nirya ara, Allah arye sikti, ‘Na mapu unamak’ tenen, wipdeiamsuk deice arye, Allah el mapu koprop kililamsuke.

14Yupu#1:14 Yupu – Yohanes arye, ‘Yupu’ nyabuka sekuk ning ara, Yesus ati sekuk. nyalamapnye bira, ninye nong atonun dayukce, tukwak mutuku yayukura, nun kan-kan noutamak neika ulamubu. El pia teleb ubuka ulamukba, elilamubu. El pia teleb ulula ara, talye ati kume. Ara Allah el Mi Koprop tonok ululnye bira, el uka. Allah el Mi Koprop ulamukce, el dipkoprop una ap, el dipkoprop yupu nyana ap, el kanye aryuk tukwak ninye ati bico tenebuka, pia melina deiyok ning ap, anye deice weik arye uamuk. Nun ni koprop Allah arye anye bira dopdeipsukba, pia telebuk ulamukak, elilamubu.

15Dib tenelamik ninye ati, mek dongolamuknye Yohanes Pembaptis birye,#1:15 Yohanes Pembaptis – Abuku noutamak ara, anye bira tonok bukni, el si ara, Yohanes ton, tonda Yohanes Pembaptis ton nyanyabe. Pembaptis nyanyap ning ara, ninye arye Yesus ati dib tenepnopura, Yohanes arye aninye dobuka mek dongolamuka ati, Yohanes Pembaptis nyanyabe. ninye kanye noutamak dirina deiyok ning aresululnye biti, weik yupu arye nyalamuk. “Ayanmalba, eipmalumnye bira, akunuma. Min arye elti, nyalamsise. Na min yasibuk aminyan tam yanamlanye bira, na min kum deiamnik talak, el akunum kam ulamuka anya arye, elda weik mambulnye ulirye, na deice tam ulule. Nara, mambul kumnye binya arye, elda na deice tam ulule. Nara, mambulnye kum bukni, elda weik mambulnye ulule.” Yohanes birye nyabuk.

16Anye bira, elce tukwak ninye ati, bico tenena deiyok ning ap, melina ap, lyena deiyok ning ap, weik arye kanye ulamuk deice arye, teleb ning weik areamsukce, teleb kililamsukba, nun nirya dololamubu deice arye telebuk unyabe. Elce pia teleb ning arilamsukce, teleb kililamsuk touk, wini talak babye, pia tuba aresulule.

17Ayupu nyapmasina deiyok ara, ani. Ara, Allah arye, ‘Wininamlume, aning ara kum wininamlume,’ nyapdeiamukba, Musa kekebukce sekeiyamsuk mem yupu nirya ara, Musa deice arye areamsuk. Bukni, dipkoprop winina deiyok ning ap, Allah arye el kanye aryuk nunti bico tenesilirye, melibuka lyesulul ning deiyok ning ap, tukwak ninye ati melilana deiyok ning ap, ninye lyena deiyok ning nirya ap ara, Yesus Kristus deice arye arisulule. 18Minop talak arye dipdongobuka, wini talak noutamak nirya arye, nun tukwak ninye arye, Allah el urasin pia kum elilamubu. Bukni, nun ni Allah, el ulyak ululnye, el Mi Koprop, Allah ap neika ururaknye bira, Yesus arye Allah el ulul ning laka elilule. Yesus el ulamuk ning ap, yupu nyalamuk ning ap deice arye, Allah el ulul ning lak kibuka laka nyalamsuke.

Dib tenelamik ninye mek dongolamuknye, Yohanes birye, “Allah arye, ‘Ninye weik lyeplirye, sik kanye talima talinamle,’ tenen, wipdeiamuknye, Ninye Lyenanye Kristus, na dipkoprop kum unune,” nyabuk yupu

19Ura, sik Yerusalem mutuku ulamik Yahudi yala deiyok nang arye, yupu nyapdeibikba, sik Yahudi nang Lewi yala nang ap, Allah el si erena aik#1:19 Allah el si erelamik aik ati, laka nyana yupu ara, laka nyana yupu nomor 15 dindelelume. pum tam arye, Allah ati arena deiyok nang, sik imam nang ap arye, Yohanes dam yayikce, “Anda yatanye do?” nyabuka asipdeyik. 20Asipdeyikba, Yohanes arye, duknuna pia kumce, lak deice arye nyabuk. “Allah arye, ‘Ninye Lyepnamle’ tenen, wipdeibukce, dopdeipsuknye, Ninye Lyena Deiyoknye, Kristus ara,#1:20 Kristus – Ibrani yupu deice arye ‘Mesias’ nyanyake, Yunani yupu deice arye ‘Kristus’ nyanyake. Si bitinye bukni, Allah arye, ‘Anye bira, Ninye Lyena Deiyoknye unamle’ tenen, wipdeiamuknye Yesus ulule. Tonda lak len yupu nomor 3 dipdelulume. na kum unune. Nara, Kristus kume,” nyalamuk.

21Nyabukba, sik Yahudi yala deiyok nang arye Yohanes ati asipdeyik. “Ati anda yatanye ulyam do? Minop talak Allah yupu laka lelamuknye, nabi Elia ulyam do? Minop talak Musa birye, ‘Amenyan talak weik mambul nabinye yanamlarya,’ nyabuka nyapdeiamsuknye ulyam do?” nyabuka asipdeyikbuk, Yohanes arye, “Na kume,” nyalamuk. 22Nyabukba, sik anang arye, “Ati an bidamnye arye, an bidamang ati yata yupu nyalyam do? ‘Na aunune,’ nyabuka laka nyapsiminba, nun dopdeipmasiaka deiyok nang dam laka nyalbinamapa anya arye, anda, yatanye ulyam do?” nyabuka asipdeyik. 23Asipdeyikba, Yohanes arye, Allah yupu laka nyalamuknye, nabi Yesaya sekamuk yupu dobuka, ayupu deice arye nyabuk. Ayupu ara ani.

‘Allah el yupu lak nyalinanye birye, ninye kum ulamikak arye, weik yupu deice arye nyanune. Nun Weik Ninye Deiyoknye yanamle bisik ara, funguk yalinamlulume.’ (Yesaya 40:3)

24Yohanes arye, nabi Yesaya sekamuk yupu dobuka nyabuk. Nyabukba, Yerusalem deiyok nang arye dopdeipmekba, amutuku yanmek Farisi#1:24 Farisi nyalamik ning ara, Allah arye minop talak, ‘Aning wininamlulume, aning ara, pia kum wininamlulume,’ nyalamuk yupu, Musa arye sekeiamuk yupu ara, weikto arye kel bikamikce, peterena deiyok nang ulamik bukni, Yesus ati diba kum tenelamik. Tonda, laka nyana yupu nomor 10 dindelelume. nang arye Yohanes ati, asipdeyik. 25“Ance, ‘Nara, nabi Elia kume. Ninye Lyena Deiyoknye Kristus kume. Tonda, Musa arye nyapdeiamukba, Israel ninye arye, ‘Weik mambul Allah yupu laka nyalamuknye, nabinye tonok#1:25 nabinye tonok – Ayupu nyabiknye ara, Musa ati nyabik ton yanamlarya’ tenen, kintinililamiknye kume. Anang kum unune,’ nyapmasilame. Ati ara, yata deiyok ati yuk ninye dobuka mek dongolyam do?” nyabuka asipdeyik.

26Asipdeyikba, Yohanes arye anang ati nyabuk. “Kume. Nara, dib tenenyak ninye dobuka, mek sirika arye dongonun bukni, anggun kan-kan noutamak aululce, lakak tikilulnye bira anggunce, ‘Anye bira ani’ tenen, moubuka kum biklume. 27Na minopce yanamse bukni, anye bira, aminyan talak tikilyanamle. Anye bira, pia weik mambulnye anya arye, nara mambul kumnye, el amu tam unune. Ati ara, el yan tatang deice kitilamle ning, el sandal tapu ara, melibuka kum loptinye. Nara, el amu tam unirye, mambul kumnye unun atia,” Yohanes arye nyabuk.

28Anyapmasin yupu nirya ara, Yordan mek koubuka otam mutuku, amutuku si ara Betania mutuku, Yohanes arye dib tenyamik ninye dobuka, mek dongolamuk mutuku ulamuk.

Yesus ara, ninye mutuku-mutuku nirya, sik malye winin ning wenena ati, pununanye ulula ati, “Elda Domba Mi Atonye ulule,” nyabuk yupu

29Anang arye Yohanes ati asipdeyik sum bukni, mapmeka, anyuku sum ara, Yesus arye Yohanes el dam yanganmokba, Yohanes eibukce, nyabuk.

“Ninye mutuku-mutuku nirya, sik malye winin ning kum kilina ap, ‘Sik kum dipnamak’ tenen, pununa ap deiyoknye, Allah arena ati Domba Mi Atonunye#1:29 Domba Mi Atonunye nyanyapnye bira, Yesus ati nyanyabe. Nyanyaba deiyok ara, minop talak ninye malye winin ning pununa ati, domba basam mi olamikce, ‘Allah arye nun malye winin ning nirya kum kipdeplirye, namin kipnamsil’ tenen, adomba mi obuka, Allah ati arilamik touk, nun malye winina ati, Yesus punupsukce, namin kipsukce lyepsuke. Lyepsuknye bira, Yesus ulule. Ati ara, ‘Elda Domba Mi Atonunye ulule,’ nyanyabe. bira, ayanmal atia. 30Ambusum arye, na Yohanes arye anggunti, ‘Na yanmasibuk, aminyan talak yanamlanye bira, na min kum deiamnik talak monop arye akunum ulamuka ati, elda weik mambulnye unamle bukni, nara mambul kumnye unune. Ati el amu tam ulamnibuk, elda na deice tam pia unamle,’ nyapmasise. Ayupu ati nyapmasinanye bira, ayanmalanye akunuma. Elti ayupu nyapmasise.

31Narye, ‘Anye bira ani’ tenen, el nong min kum bikamse bukni, na bikamse ning ara nyapnusine. Narye dib tenenyak ninye mek dongonuna deiyok ara, yuk kume. Deiyok ara, Israel ninye nirya arye, ayanamalanye biti moubuka kel bikikirye, ‘E, Allah arye ninye lyena ati, wipdeiamsuknye bira, el uka tenenamak’ tenen ati, apil donune. Tonda, anye el ulul ning nirya lak upliba, ‘Israel ninye arye moubuka kel kinamak’ tenen, narye dib tenenyak ninye dobuka mek dongopnin yangalamse.” Yohanes arye nyabuk.

32Nyabukce, ayupu tonap dukdongobuka nyabuk. “Na asing arye eipse ning laka nyapnusine. Allah El Dib Kanye ara, yalma maka atonun dayukce, im deice arye anye el nong deice yanuka bukukba eipse. Allah El Dib Kanye ara, anye ap el kanye pum tam tuba urudake. 33Anye bira, na babye kum bikamtinye bukni, ‘Yohanes birye dib tenenyak ninye mek dongonamle’ tenen, dopdeipnukce Allah arye, nyapnuke. ‘Allah El Dib Kanye im deice yalirye, el nong deice bukuka, el talima noutam pia aunamlanye bira, el akunuma. Anye birye yuk dib tenenamak nang ati, Allah El Dib Kanye dobuka arenamsile,’ nyabuka laka nyapdeipnuke. Winibuka laka nyapdeiamnuk atonun, aning nirya akunum winibukba eipse ati, ‘Anye bira Yesus adano’ tenen, akunum bikamse. 34Aning eipse ati, narye anggunti laka nyapsine. Ayanmalanye Yesus ara, Allah el Mi Koprop ulule.” Yohanes birye nyabuk.

Yesus arye deiyok koubuka, el yupu kekebuka el ap banamik nang, el mapu wepdeibuk yupu

35Yohanes birye ayupu nyabukura, sik nirya mapmeka berekukopura, sik unmek mutuku uk, Yohanes ap, el yupu kekebuka melilamrik nang bitinye ap aunmek. 36Daunmekbuk, Yesus arye sik dam biyukba, Yohanes eibukce nyabuk. “Anggun dipdelulume. Ninye mutuku-mutuku nirya, sik malye winin ning kum kilina ap, ‘Sik kum dipnamak’ tenen, sik pununa ap deiyoknye bira, akunum yanmala atia. Allah el arena ati Domba Mi Atonunye bira, abanmal atia,” nyabuk. 37Nyabukura, Yohanes el yupu kekebuka melilamrik nang bitinye kekeprikopura, Yesus bayukura, adiparyuk sikda el aminyan tam melibuka birikce, el ap neika banmek.

38Melibuka banmarikbuk, Yesus arye el aminyan tamubuka dipdeyukce, abitinye nang dobolyanganmarikba eibukce, ayupu nyabuk. “Anggunda yata ning patasiliba, dobolyanganmanurum do?” nyabuka, asipdeyuk. Asipdeyukura, sik yupu deice arye, “Rabi#1:38 Rabi nyaprika ara, sik yupu deice, ayupu deiyok ara peterena deiyoknye biti nyalamik. Anda dan mutuku binuka unulam do?” nyabuka asipderik. 39Nyaprikura, Yesus arye tamubuka, “Yarumunce, na binuka unamne mutuku eipnamrurume,” nyabuk. Yesus arye nyabuka ati, sik ap bisik banmeka ani, Yesus unmok aik eibikce, atalak nirya ara, el ap neika unmekbuk, sintam talak keting jam 4 atonun kibuk.

40Ara, Yohanes birye nyalamuk yupu kekelamrik bukni, aminyan talak ara, Yesus melibuka banmarik nang bitinye bukni, tonoknye el si ara Anderias. Anderias, el du koprop ara, el si ara Simon Peterus ulamuk. 41Yesus ap, abitinye nang ap, neika unmekba, keting jam 4 ubukba, Anderias min winibuk ning ara, el du kopropa Simon biti enmoka ani, eibukce, Simon biti nyabuk. “Na duo, Ninye Lyena Deiyoknye, Mesias#1:41 Mesias nyalamiknye bira Ibrani yupu deice, Ninye Lyena Deiyoknye biti, ‘Mesias’ nyanyake. Nunda asi ton, tonda, ‘Kristus’ ton nyanyap bukni, anye el Yesus tonok ati nyanyabe. Tonda, lak len yupu nomor 3 dipdelulume. nyalamaknye bira, nun akunum eipdanmaname,” nyabuk. (Anderias birye ayupu nyabuk ning ara, Allah arye, ‘Ninye weik lyepnamle’ tenen, wipdeiamuknye, Kristus ati nyabuk.)

42Nyabukce, el du Simon bobuka Yesus dam boyayuk. Boyayukopura, Yesus arye Simon biti dipdeyukce, ayupu nyapdeibuk. “Anda, wisinye an ni kopropa, Yohanes birye deipkuk mi Simon ulyame. Bukni, wini talak arye dipdongobuka, oyanamle talak ara, Aramaik yupu deice arye Kefas#1:42 Kefas ara, Aramaik yupu deice arye nyanyake. Sik Yunani yupu deice arye Kefas nyanyake. Asi nirya deiyok ara, keil ati nyanyake. Nun yupu deice arye, asi tonok ati, Peterus nyanyabe. nyanamake.” Yesus arye nyabuk. (Yunani yupu deice arye Kefas biti ara Peterus nyalamake.)

Yesus arye Pilipus ap, Nataniel ap ati, nyabuk yupu

43Asum mapmeka berekukura, Yesus arye, ‘Galilea mutuku tam binamane,’ tenebukce, tonoknye el si ara Pilipus biti enmoka ani, eibukopura, nyabuk. “Pilipus, na melipnamnilame. Nun neika binamname,” nyabuka, Pilipus biti yukubuk. 44Ura, Pilipus nyalamiknye, el ap, Anderias ap, Peterus ap, sik nirya ara, mutuku si Betsaida mutuku ninye ulamik. 45Pilipus birye el kwit koprop Nataniel biti, enmoka ani, eipdarikopura, nyabuk. “Nataniel, Allah arye, ‘Wininamlume, aning ara kum wininamlume,’ nyabukba, Musa sekeiyamsuk yupu, el mem yupu noutamak arye, ‘Anye yanamle,’ nyabuka laka nyabuka sekamsuknye bira, nun ap akunum eipdanmabe. Tonda, Allah yupu lak nyalamik nang, sik nabi#1:45 Nabi, Allah el yupu laka nyan nang ara, Allah arye, ‘Ninye kekepnamak’ tenen, elce wibuka deiyamuk nang ati, el yupu laka nyabukopura, anang arye, yuk ninye nirya ati, laka nyalbalamik. Anang ara, nabi nang nyanyabe. Nabi nang sik laka nyan yupu nomor 25 dipdelulume. nang arye, yupu sekamik ning noutamak arye mambulnye nyalamiknye bira, akunum eipdanmabe. Anyapmakin anye bira, ara Yusuf birye deibuk mi Yesus, Nasaret mutukunye biti nyapkine,” Pilipus birye nyabuk.

46Nyabukura, Nataniel birye tamubuka nyabuk, “Ance, ‘Nasaret mutuku mambulnye yanmalba eipdanmape,’ nyapmanilam bukni, Nasaret mutuku ara min arye, pia mambul mutuku kum nyalamik ati, amutuku noutam arye, pia teleb ning uptu do? Amutuku noutam arye, weik mambul nang, teleb nang yasiting do?” nyabuka asipdeyuk. Asipdeyukba, Pilipus birye tamubuka, “Yo, anda ur dilyalyame,” nyabuk.

47Nyabukura, bisik banmarikbuk, Yesus arye Nataniel yanganmokak, eibukce, elti, nyabuk. “Anye bira, dipkoprop diksukumuk ulule. Anye bira, Israel yalanye ulule. El talima ak ara, tilila ning ap, tenepce winin ning ap, tonok babye ton kum ulule,” nyabuk. 48Nyabukura, Nataniel birye Yesus ati nyabuk. “Anda yata wiribuka bikamnutum do?” nyabuka asipdeyuk. Nyabukura, Yesus arye tamubuka nyabuk. “Kume, Pilipus birye min kum yukupmaku talak ara, kwarang yo duk moulamle yo deiyok dam koa bukmamuak, narye akunum eipmakune.”

49Nyabukura, Nataniel birye mambul kanye bobuka nyabuk. “Se, anda Peterena Deiyoknye, Rabinye dipkoprop ulyame. Na kele, anda Allah el Mi Koprop ulyame. Anda Israel yala ninye nun weik ninye deiyoknye, Sisinanye Raja unamsilame,” nyabuk.

50Nyabukura, Yesus arye tamubuka nyabuk. “Narye, ‘Kwarang yo duk moulamle yo deiyok dam bukmamubuk, eipmakune,’ nyapmakin deice arye, akunum dib tenepmanilame. Bukni, aning ara mitik mambul uka. Aminyan eipnamlam ning ara, pia mambul weik ning elinamlame,” nyabuk. 51Nyabukopura, Yesus arye ayupu tonap dukdongobuka nyabuk. “Anggun nirya ati, dipkoprop nyapsine. Sirya talak ara, im deice tam kukeipliba, Allah el im deice pil don nang, malaikat ara, nada Ninye Mi Koprop Atonunye,#1:51 “Ninye Mi Koprop Atonunye unune,” nyabuk yupu ara, Yesus arye el bidamnye biti nyapdayuk. Aning si ara, minop talak, sik nabi nang arye nyalamik. Deiyok ara, Ninye Lyena Deiyoknye bira, im deice arye yanamle bukni, ‘Ninye nong atonun dalirye, tukwak mutuku yanamle’ tenen, ‘Ninye Mi Koprop Atonunye’ nyalamik. na nong deice tuba tonap tamubuka welebinamak ning ara eipnamlume.” Yesus arye, anang nirya ati, nyabuk.

Currently Selected:

Yohanes 1: EIPA

Highlight

Copy