Kejadian 4
4
1Adam ap, el kil Hawa ap neika ulamdika ani, Hawa mi bomuka ani, aminyan ara, el mi deibukura, “Allah el si Yahweh arye, meliamnuk deice arye, ami deipmana ati, el si ara Kain,” nyabuk. 2Sik daulamika ani, aminyan yuk talak ara, ami el weit koproba ton deibukce, “El si ara Habel,” nyabuka deibuk. Nepnin balamdika ani, Habel arye, ninye wein ning domba basam talibuka weilamuk bukni, Kain bira talye wa wina ap, kouna ap, aninguk talibuka pil dolamuk. Kam ulamle ning ara, kum weilamuk. 3Sik nirya daulamika ani, Kain birye, ‘Allah el si Yahweh, el si erena ati, na koulamse ning bobuka, Allah arepnune,’ tenebukce, el wa wibuka koulamuk ning, libuka arelyayuk.
4Bukni, Habel elda, talye ning kum bukni, el weilamuk domba basam arye, delilamuk ning ara, min yuma domba mi obuka kalibukce, pia teleb ning tup ap, meta ap, weik ning dobuka arelyayuk. Arelyayukba, Allah el si Yahweh arye, Habel el boyanmok ning ati dinmokce, Habel ap, aning ap ati, kanye deibuk. 5Bukni, Kain arye boyanmok ning ap, Kain el nong ap, ati, Allah arye dinmokce, kanye kum deibuk. Kanye kum deibuk ati, Kain bikukce, yu weik ubukba, el urasin yuprobuk.
6Winibuk ati, Allah el si Yahweh arye, Kain biti nyabuk. “Anda yata deiyok ati, yu upmakilba, an urasin yupropmalam do? 7Dipkoprop teleb ninguk winipminyopura, narye kanye deibuka, ‘Telebe’ kum tenepnamakin do? Bukni, teleb ninguk kum winipminyopura, kanye moupnulyame. Malye winina deiyok ning, mining dam upmakile. Isa Mutuku Dongonye arye, tonok aik pum bukmace ninye ati, ‘Se, aninye malye kipdeipnune’ tenen, pia patapliba, bublan dam bukuka, pia kalikuka dilamle touk, malye kipdeipmanto akunum upmakile. Bukni, an adiparyuk malye kibuka, amalye una ara, bataknulyame,” Allah arye nyabuk.
8Nyabuk bukni, aminyan ara, Kain birye, el weit koproba Habel ati, tenepce arye nyabuk. “Weito, an ap nun bai talye binaname,” nyabukba, banmarika ani, bai mutuku noutamak unmarek talak ara, Kain birye, el weit Habel biti, onmoka ani, oplobukba, Habel dibuk. 9Dibukba, Allah el si Yahweh arye, Kain ati asipdeyuk. “An weit koproba Habel bira, danaka unmal do?” nyabuka asipdeyukura, Kain birye, “Yo, na walwale. Nara, na weit koproba Habel, el kalikuka dinanye ununa ati nyanmanilam do?” nyabuka pilibuk.
10Nyabuka pilibukba, Allah el si Yahweh arye, nyabuk. “Se, anda yata winipmamu do? Kekelyame! An weit koproba, el ining tuku deice sakmoa arye, ngalukunmalba kekepne. 11Wini talak ara, narye supkinyeura, an nong deice, ikin ning weik unamkile. Anti supdongopkine. An taruk arye, an weit koproba oplopmomba, el ining tuku deice sakmokak ara, tamubuka tonap, kum binamlyame.
12Tonda, dan mutuku do nirya, tukwak mutuku nirya, wa wibuka koupnalam bukni, paplirye el nong pia kum upnamkile. Aning-aning nirya kum papnamkilba, talye diamuk pil donalame. Wini talak arye, dipdongobuka doyanamle talak nirya ara, ‘Amutuku binun do, omutuku binun do?’ tenen, teniltonauk upkiliba, tukwak mutuku im sirya, mutuku sirya nirya noutamak arye, pia balsusunuk unalame,” nyabuka wenebuk.
13Nyabukura, Kain birye tamubuka, Allah el si Yahweh#4:13 Yahweh – Allah el si koproba ara, Yahweh ulule. Ibrani yupu nyanyak kili sal arye ‘Allah el si koproba ara, lakak arye kum nyaptibnye’ tenen, ilil ulula ati ara, sikce huruf YHWH aninguk sekenyake. Bukni, ‘YHWH’ ahuruf uk sekipyopura, ayupu nyana ara, ‘Walwal upsilyak’ tenen, nunce, ‘Yahweh’ sekenyabe. Indonesia Alkitab ara, Allah el si Yahweh ulul sukum ara, ‘TUHAN’ sekenyake. Ayupu bikna ati, laka nyan yupu nomor 49 dipdelulume. ati nyabuk. “Se, na wenena ati, ikin ning weik, na nong deice deipnilam ning ara, na ikin weik upnile. Aning ara, kum winiptinye.
14Asum arye, ‘Amutuku noutamak ara kum unalame,’ nyabuka, talye buru mutuku yakdonoknilama ati, an uminyak ara, neika kum unaname. An ap kum elananame. Kanye bokoltolamniliba, tukwak mutuku im sirya, mutuku sirya nirya, talye balamneba, yata ninye arye do, eipnicopura, talye mangkau arye oplonamniyake,” nyabuk.
15Nyabukba, Allah el si Yahweh arye, Kain biti tamubuka nyabuk. “Kume. Anyapmalam tonun kum winipnamkile. Yatanye do, Kain biti oplinye bira, narye nyapdeipniba, anye biti kwang dakuka opnamake. Ara, tonok talak uk kume, tekbarye nukuka, kwang dakalanamake,” nyabuk. Allah arye nyabukce, ‘Yata ninye do nirya, Kain eibikirye, obicak’ tenen, yupu sekelongona ati, Kain el nong deice ara, pitin kilina ning deibuk. 16Winibukopura, Kain birye, Allah el si Yahweh, el ulamukak batakuka, buru tam mutuku, el si ara Nod mutuku binuka ulamuk. Nod mutuku ara, Eden mutuku bukni, otam keting yangan tam ulamuk.
17Kain daulamuka ani, el kil ap, sik neika daulamdika ani, el kil arye, sik mi deibuk mi ara, ‘El si ara, Enok,’ nyabuka si dobuk. Ami deibuk talak ara, Kain arye, weik asik domuka ati, anyasik mutuku si ara, Henok mutuku nyabuka sisibuk. 18Daulamika ani, Henok akunum nebukopura, elce deibuk mi el si ara Irad. Aminyan talak ara, Irad arye, Mehuyael deibuk. Mehuyael arye, el mi Metushael deibuk. Metushael birye, el mi Lamek deibuk.
19Lamek akunum nebukopura, kil bitinye dobuk. Ton kil el si ara Adah. Ton kil, el si ara Sila ulamuk. 20Lamek el kil Adah arye, sik mi el si ara, Jabal deibuk. Jabal nebukce, mi deibukba, dadeipdanin balamika ani, delilamik ninye babye, sikce tenda asik dopnin balamika ani, ninye yupa arye weinyak ning ayala-yala nirya, domba do, kambing do, sapi do, weinyake. Aning nirya weinyak ninye ara, sik deiyoknye bira, Jabal ulamuk.
21Jabal el weit koproba si ara, Jubal ulamuk. Sik binggong nyena kecapi ap, suling ap, talibuka nyanyak ninye ara, sik deiyoknye bira Jubal ulamuk. 22Tonda, Lamek el kil Silah arye, mi ton deibuk. Elce deibuk mi si ara, Tubal-Kain ulamuk. Elda kat ning el si ara, tembaga ap, besi ap dobuka, pil don ning alat-alat yala weik kintinibuka delilamuk. Tubal-Kain el weit kil si ara, Namah ulamuk.
23Tonok talak ara, Lamek arye el kilapu bitinye ati nyabuk. “Adah ap, Silah ap, anggun kekepnururume. Yuknye birye, na opnamanukbuk, narye elti, anye akunum oplopse. Ara, kwitnye birye opnamanukba, narye elti, akunum opseba dibuk. 24Allah arye, ‘Yata ninye do, Kain biti obicopura, narye nyapdeipniba, like tekbarye deice arye, kwang dakalanamake,’ nyabuk. Ati, opnicopura, na kanye ara, yupa weik tujuhpuluh tujuh kali deice arye, kwang dakna telebe,” nyabuk.
25Aminyan talak Adam ap, Hawa ap daulamdika ani, Hawa arye sal mi ton deibukce, ‘El si ati Set,’ nyabuka deibuk. Asi nyabuka deiyok ara, ‘Kain arye, na mi Habel opnukba, el pununa ati, Allah arye melipnukba, ami akunum arepmanile,’ tenebukce, el mi si Set nyabuk. 26Set nebukopura, el mi ton deibukce, el si ara, Enos nyabuka deibuk. Atalak noutamak ara, ton tukwak ninye arye, deiyok koubuka, ‘Allah el si Yahweh arye melipsetu’ tenen, el si Yahweh erebuka moronmek. Allah morona deiyok bikna talak ara, atalak arye, deiyok koubikce, Allah el si Yahweh ati morolamik.
Currently Selected:
Kejadian 4: EIPA
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
