Kejadian 20

1Ura, aminyan talak ara, Abraham birye, el ulamuk mutuku Kanaan mutuku batakuka, outam mutuku biyukce, Negeb tam bukni, Kades mutuku atam, Sur mutuku otam noutamak binuka unmok. Daunmok bukni, tia talak ati, ninye deiyoknye Abimelek arye taleamuk mutuku, Gerar mutuku binuka unmok. 2Amutuku noutamak unmok talak ara, Abraham birye el kil Sarah ati, “Akil ara, na makal kil uk ulul,” nyabukba, amutuku taleamuknye, Abimelek birye, ‘Akil dopnun’ tenen, doprobuk.

3Doprobuk bukni, tonok lukunyan noutamak ara, el lengdar mapmok talak ara, Allah arye el dam nyalyayuk. “Ance dopmalam kil ara, yuknye birye akunum dobuka anya arye, wenepnamkinlarya. Anda dipmantonye akunum unmalame,” nyabuka wenebuk.

4-5Ura, Allah arye Abimelek biti, ayupu nyalyayukura, Sarah akunum dopmok bukni, sik neika min kum mapmarika anya arye, Abimelek birye nyabuk. “Se, na nio, akil dopmanua ara, ‘Malye winipmance, yuknye kil ubula dopropnun’ tenen, kum winipmanue. Akum bukni, talye mangkau kanye bobuka, akil dopmanue. Ura, anye Abraham birye, ‘Akil ara, na makal kil ulule,’ nyapnuke. Tonda, akil Sarah birye elti, ‘Anye bira, na du koproba,’ nyabuka pilipmanil ati ara, mambul upnile. Na malye winipman ning deiyok ati, na talipsiba, amutuku unyak ninye nirya, talye mangkau kanye bobuka unyaka anya arye, nun nirya ati, talye mangkau asa wenepsimince, opnusilam do?” nyabuk.

6Nyabukba, el lengdar mapmok talak ara, Allah arye Abimelek biti nyabuk. “Diba, na kele. Anda talye mangkau kanye bopmomce, akil dopmome. Narye, ‘Malye uplyak’ tenen, kalikuka dinmakunuba, na yupu min kum yanipmanilame. Winipmamu deice arye, akil ap, an ap, min kum mapmarume.

7Wini talak ara, anye Abraham ati, el kil dobuka tuba tamubuka arepnulyame. Elda, na yupu lak nyana deiyoknye ulula anya arye, elce nati moropnilyeura, kum opnamakine. Tuba kam unalame. Bukni, ance akil dobuka tuba tamubuka el akanye biti, kum arepminyopura, na pia dipkoprob nyapkine. Narye wenebuka opsiniba, an babye an asik nang babye, nirya dipnamlume.” Allah arye Abimelek biti nyabuk.

8Nyabukba, sik mapmeka berekukura, Abimelek birye, el amu tam ulamik ninye deiyok nang nirya yukubukba, yayikura, aning nirya laka nyabukba, sik nirya ilil weik ubuk. 9Ilil weik ubukba, Abimelek birye, Abraham yukubukba, el dam yayukura, Abimelek birye, Abraham biti nyabuk. “Anda, yata malye winin ning, nun nong deice deipmasilam do? Narye anti, yata malye winin ning winipmakinba, ance tamubuka malye winipdeipmasilamba, Allah arye na ap, na talinun ninye nirya ap ati, wenepnamsil do? Ance nunti, malye winipdeipmasilam ning ara, weik ikine. Pia mem ning deice arye, ance malye winipdeipmasilame.

10Winipmasilama deiyok ara, yata deiyok ati, aning malye winipmasilam do, asipdenukin,” nyabuk. 11Nyabukba, Abraham birye tamubuka nyabuk. Kume, na tenipmanu ning ara, laka nyapnusine. Narye anggunti tenepmasina ara, ani. Kume, amutuku ninye arye, na ni koprop Allah ati, el si erebuka, el si erebikirye, elti, ilil pia kum ulule. Winibuka kum unyak ninye anya arye, sikce na kil ati, ‘Akil ara urasin teleb kil anya arye, dopnuyabe,’ tenebikirye, ‘Na ti opnicak,’ tenepsise.

12Tonda, ‘Akil ara, na makal kil,’ nyapse ara, mitik anun dib nyapse. Na ni koprop arye, akil deibuk bukni, nun nin tonok kume. El lin yuk, na nin yuk anya arye, nun mutuku unyaba ara, aning teleb uka anya arye, akil dopse. 13Dopseura, na ni Allah arye, “An ni koprop dam, Ur-Kasdim mutuku batakuka, talye pata mutuku binuka unalame,” nyapnuk talak arye, na kil ati nyapse. “Anda, kanye delinilyama ati ara, ‘Yuk nang arye, na opnicak’ tenen, nun binanam mutuku noutamak nirya ara, yuk nang kekena ati, ayupu nyanamnilyame. ‘Anye bira, na du koproba anya,’ nyanamnilyame nyapse.” Abraham birye nyabuk.

14Nyabukopura, Abimelek birye Sarah dobuka, tuba tamubuka Abraham biti arebuk. Arebukce, Abraham el namin kina ati, domba basam ap, sapi basam ap ara, ‘Talye piluk dopnamniyak’ tenen, yo bok arye dekuka, sal ap, kilapu ap, ‘Abraham el pil melibuka donamak’ tenen, dobuka arebuk. 15Arebukce, ayupu nyabuk. “Ura, na talinun mutuku nirya an eipmalam anya arye, ‘Amutuku ara, una telebe,’ nyapmalam touk, talye mangkau asa bimince, unalyame. Teleb uka nyapkine,” Abraham ati nyabuk.

16Nyabukce, Sarahak ayupu nyabuk. “An du koproba ati ara, dekna weik ning, el si ara perak, 11.5 kilo urdem arepne. Adekna weik ning bobuka deipman ara, talye ati kume. Ara, narye anti, mangkau kanye bobuka, malye winipkise ning ati, arepmakine. Ati, an ap, neika ulalum ninye nirya ap arye aning eipmake. Ati ara, yuk ninye nirya arye, ‘Akil malye winibuke,’ kum nyapnamkiyake. Adeice arye akunum teleb kipdeipkine,” Abimelek birye, Sarah ati nyabuk.

17-18Ura, Abimelek birye, mangkau kanye bobuka Sarah dopmok talak ara, Allah el si Yahweh arye, el wenena ati, ‘Abraham dobuk kil dopmuka anya arye, moupdeipnamle’ tenen, ikin ning arebuk. Ara, Abimelek el kil ap, el pil melin kilapu nirya ap ara, el asik nang bukni, el aik ulamik kilapu nirya ati, ‘Sik mapu tonap kum deipnamak’ tenen, you kilapu una deiyok ning arebukba, sik nirya you kilapu ulamik. Allah arye wenebukba, you kilapu ulamik ati, Abraham birye, Allah ati morobuk. Ara, ‘Allah arye Abimelek el aik kilapu nirya kwetepnul’ tenen, morobukba, Allah arye, akilapu nirya kwetebuk.

Currently Selected:

Kejadian 20: EIPA

Highlight

Copy