Kejadian 19

Allah arye Sodom mutuku ap, Gomora mutuku ap obuka kum danaibuka ati, nyabuk yupu

1Asum bukni, keting kumupnuyuk talak ara, sik bitinye nang, ara im deice pil don nang, Malaikat bitinye arye, Sodom mutuku antanap dongobuka wiamik poka bublan dam yarik. Bublan dam yarik talak ara, Lot abukmokak epdayik. Lot birye abitinye nang eibukopura, ‘Si ereipnun’ tenen, tikuka sik dam biyukce, kisok kanupdongobuk. Winipmokce, taruk arebuka, “Telebe,” nyabuk.

2“Na ni yapu, pera mutuku arye yanganmarumba, ben dupmasila ati ara, na aik yarumunyeba, anggun yan mek liknusine. Anggunda, ninye asik nang anya arye, na aik neika mapnamabe. Mapmapya, bereklyopura, anggun tenepmarum touk, beren tam koprop do, keting noutam do, panabuka binamarume,” nyabuk. Nyabuk bukni, anang bitinye arye, “Teleb nyapsilam bukni, nunda anggun aik dam bukni, talye buru tam mana ara, teleb uka,” nyaprik.

3Nyapdik bukni, Lot birye, “Kume, na aikuk neika mapnamabe,” nyabuka, mikip arye nyabuka ati, el ap el aik biyik. Biyikce, aik wekikura, Lot birye sik din ning aning-aning weik memebuka deibuk. Tonda, din ning el si ara roti, nena kum ning dabuka deibukura, diprik. 4Diprikura, sik nirya Lot el aik pum mapnuyik talak ara, Sodom mutuku noutamak ulamik ninye, wisi nang ap, kam nang ap, dana-dana tam nirya arye bulubuka yayik. Bulubuka yayikce, Lot el aik dam yana warikmekce tikmek.

5Yupa weik bulubuka, el aik dana-dana tam nirya tikmekce, yupu mikip arye nyabik. “Loto, ‘An aik mapnunam’ tenen, arup yanmarung nang dan do? Anang bitinye dobuka, an aik buru tam dopkwetepsutumba, nunce anang bitinye dobuka, talye ubula neika mapnuyabe,” nyabik. 6Nyabikbuk, Lot kekebukce, ‘Aninye ap yupu talilbinun’ tenen, el aik pum arye, buru tam tikilbiyukce, el aik bublan tirikdongobuk.

7Sik noutamak tikilbiyukce, ayupu nyabuk. “Se, na kayapu. Apia malye ning ara, bataknululume. ‘Anang bitinye ati, talye ubula neika mapnuyabe’ tenen, kintinipmalum ning ara, pia malye winina anya arye, bataklulume,” nyabuka yupu sekuk. 8Nyabukce, ayupu ton nyabuk. “Kume, anango, aninye asik nang bitinye ara, na aik yanuka mapnuraka anya arye, na sikti, kaliknune. Bukni, anggun namin kina ati ara, na kilmapu bitinye ara, ninye min kum doprika ati, akilmapu bitinye dopropmunce, anggun tenepmalum touk winiplulume,” nyabuka morobuk.

9Nyabuka morobuk bukni, Sodom mutuku nang arye, ilil kum asa, yu weik ubukba, yupu weika arye nyabik. “Anda yata ati, ayupu nyapmasilam do? Minopa arye ayalumba, nunce, ‘Telebe, nun mutuku noutamak unalam ara, teleb uka,’ nyabupuba, nun mutuku noutamak neika unyap bukni, wini talak ara, ance nunti, ‘Winiplulume, winiplulume, aning ara, kum winipnamlume,’ nyabuka, yupu kum seksutume. Anda yatato weiknye tenepdalamce, nyapmasilam do? An diamuk uplyame. Kumopura, an ninye asik nang bitinye ati, mitik malye kipdeipnuyap bukni, an kum tunim apminyopura, nunce anti, weik malye kipdeipnukiyabe,” nyabik. Nyabikce, adiparyuk, ‘El bublan mikip arye kukuka talye wekelbinuyap’ tenen, Lot el aik bisik bublan dam binuka borunmek.

10‘Bublan daknamap’ tenen, borunmek bukni, sik malaikat bitinye arye, Lot el aik pum tam arye, bublan mikip asa tirikdikce, Lot el nong talibuka, aik pum dongopmarikce, bublan kunci tirikdongopdikba, anang binmanto kum ubik. 11Malaikat nang arye winiprikopura, sik Sodom mutuku malye nang ati, asing kupdeipdikba, bublan ati enmek bukni, ‘Bublan ara, asukum’ tenen, kum eibik.

12Winiprikopura, Lot biti asipderik. “Amutuku noutamak ara, an aik ninye ton aunyak do? Ara, an mapu ap, an kilmapu ap ara, akilmapu dobik nang ara, an mapu silip nirya dobuka, amutuku batakuka binulame. 13Deiyok ara, nun bitinye nang arye, amutuku nirya wenebuka kum kipdeipnimirye, sirya daknaname. Lyun nintong welelamleba, ninye kekelamak touk, amutuku unyak ninye arye, pia malye-malyeuk wininyakba, Allah el si Yahweh arye kel bikukce, lik weik ubuka anya arye, elce, ‘Amalaikat bitinye nang arye, amutuku kum daniepnamdake’ tenen, dopdeipmasilaba, yanmaname,” nyabuka, laka nyaprik.

14Anang arye nyaprikba, Lot bira, bikbik abuka biyukce, el kilmapu arye, moun dilamik nang ati, “Amutuku batakuka buru bindoplulume. Allah el si Yahweh arye, amutuku nirya wenebuka kum daneiplirye, sirya daknamale,” nyabuk. Nyabuk bukni, anang sik kam nang anya arye, ‘Kume, nun kwit Lot bira, talye ati nyapmasile,’ teneprik.

15Daunmarika ani, mapmeka, berekukopura, sik malaikat bitinye arye Lot biti, mikip yupu arye nyaprik. “Loto, ance an kil ap, an kilmapu ap, dopropmince bindoplulume. Deiyok ara, Allah arye minpola amutuku sirya dakuka opnula ati, tuba aupminyopura, anggun babye opnamsile,” nyapmarik.

16Ayupu ara, mikip arye nyapmarik bukni, Lot bira, ‘Binun do, kum do?’ tenen, teniltonauk unmok ati, sik Malaikat nang arye Lot ap, el kil ap, el kilmapu bitinye ap, sik taruk talipdakuka, anyasik batakuka, amutuku buru tam bobuka bobirik. Ara, Allah el si Yahweh arye, Lot ap, el mapu silip ap ati, ‘Minopce kum opnaman’ tenen, lo arebuka anya arye dobuka bobirik.

17Bobirikopura, ayupu nyaprik. “Anggun nirya ara, ‘Nun babye opsilyak’ tenen ati, bikbik abuka bimunce, lyepdanamlulume. Amutuku lyu noutamak nirya, dikdik sena kume, pia bikbik abuka, banauk unamalulume. Tonda, ‘Nun mutuku tonap eipnuyap’ tenen, otam banmamunyak arye, tuba tamubuka amutuku tam dilina pia meme. Mutuku dup mutuku bikbik abuka banamalulume. Kumopura, anggun babye dipnamalume,” nyaprik.

18Sikce nyapdik bukni, Lot birye tamubuka morobuk. “Se, na ni yapu. ‘Na tenepmanye touk winiptinye’ tenen, moropsine. 19Anggunce nati, talye mangkau arye opmanutum bukni, bico tenepmanurumce, na ap, na mapu ap akunum lyepmasurume. Bukni, ‘Mutuku dup welebuka binyopura, ikin weik upniliba, na minopce dipnamane,’ tenepne.

20Ati anggun ton dipderurume. Otam ara, ninye aik mitik asik dobika ara, ‘Bitibye’ tenen, moropsine. Amutuku ara, mitik mutuku anya arye, otamuk bitinyopura, teleb uka. Otam binyopura, Allah arye kalikuka lyepnutue,” nyabuka morobuk. 21Morobukba, tonok im deice pil donanye, malaikat birye nyabuk. “Ura, telebe. Aning moropmanilam touk kekepkine. Omitik asik dobikak ara, kum kum daneipnune.

22Bukni, omutuku bana ati, minpola bikbik abuka bilulume. Anggun bisik noutamak tuba binumunye talak ara, Sodom mutuku wenebuka kum optinye. Asik obiminyopura, deiyok koupnune,” nyabuk. (Aning ati, atalak bukni, dipdongobuka wini talak babye, Lot birye nyabuk mutuku si ara, Soar mutuku nyalamak. Ara, Ibrani yupu deice ara, ‘Mitik mutuku’ tenena ati, nyanyake.) 23Lot ap, el mapu silip, sik nirya bikbik abuka banmeka ani, atalak ara bisik banmeka ani, inibukba, tuba banmeka ani, berekuk. Mitik nun ninye aik dobuka ulamika dam banmek talak ara, keting sirya deibuk.

24Keting deibukba, Allah el si Yahweh arye, im deice arye uku buk ap, uku dilamle keil ap, pia weik dopkwetepmokba, mok celamle atonun sakanmokce, Sodom mutuku ap, Gomora mutuku ap sik deiceak sakanmok. 25Sakanmokce, uku buk arye amutuku-amutuku nirya dibukba, kum dayuk. Ara, amutuku bitinyeuk kum bukni, amutuku lyu noutamak domik asik nang nirya ap, ninye ap, sik weilamik kam un ning, basam do, ayam do, sapi do nirya ara, talye tukwak arye palamuk ning yo do, maning do, aning-aning ayala-yala nirya, kum danibuk.

26Sik malaikat bitinye arye, “Otam birumunce, atam ila tamubuka dilina meme,” nyapmarik bukni, Lot el kil arye, ‘Dipdenun’ tenen, balye tamubuka, Sodom mutuku tam dipdeyukura, luba danuka kat keil atonun bukni, ua keil dayuk.

27Sik nirya mapmeka, berekukura, Abraham bukukce, el aik batakuka, Allah el si Yahweh#19:27 Yahweh – Allah el si koproba ara, Yahweh ulule. Indonesia Alkitab noutam ara, Allah el si Yahweh ulul sukum ara, TUHAN sekenyake. Ayupu bikna ati ara, laka nyan yupu nomor 49 dipdelulume. ap, yupu talipmarikak binuka tikukce, otam dipdeyuk.

28Ara, el unmok mutuku kon tikmokak arye, weik lyu noutamak ubukba, otam Sodom mutuku ap, Gomora mutuku ap dipdeyuk. Dinmok bukni, aning-aning laka kum ubukba, weik tulum dem welenmokba, eibuk. Ara, weik wa sekenmakiba, tulum weik, welelamle touk wininmokak, eibuk. 29Allah arye, aning-aning nirya wenebukce, kum daneibuk bukni, Abraham birye moropmok touk, Lot lyebuk. Ara, aweik lyu mutuku noutamak ulamik ninye asik nirya, obuka kum daneibuk talak ara, Lot mapsilip ton kum obuk.

Lot el kilmapu arye, malye winiprik yupu

30Lot ap, el kilmapu bitinye ap, mitikto ninye asik dolamik Soar mutuku batakuka, yuk mutuku binuka ulamik. Winiryuk binmek talak ara, Lot ap, el kilmapu ap, weik keil deiya noutamak unmek. 31Daulamika ani, tonok sum ara, du kil arye el weit kil ati nyabuk. “Kume, weit kilo, tukwak mutuku im sirya, mutuku sirya nirya noutamak ara, sal arye kilapu dobikirye, neika mabiceura, mapu ton delinyake. Nunda ninye una kumak unyabe. Tonda, nun ni koproba ara, wisi akunum dayuke. Ati, yatanye birye dopsutuba, mapu deiptinimnye do?

32Ati ara, ‘Nun bitinye arye, mapu deiptinimnyeba, aminyan talak orketeng tamun nirya noutamak ara, nun yala nang kum dacak,’ tenen, nunce anggur mek kanye wangalamak mek kwebuka, nun ni koproba arepniminyeba, weik diplyopura, el kanye wangapliba, kanye diba kum bouplirye, kum bikdalyopura, nun ni ap maptibyeura, mi bopnaname,” nyabuk.

33Du kil arye nyabukba, alukunyanuk, sik bitinye arye sik ni koproba Lot ati, kanye wangalamak mek, anggur mek kwebuka areprikba, weik dipmok anya arye, el kanye wangabuk. Winipmokba, du kil arye, el li koproba mapmokak binuka mabuk. Akil arye, el li koproba ap mapmok talak babye, bukuka binmok talak babye, Lot arye kum bikmoke. Elda talye mangkau kanye bobuka mapmoke. Ara, anggur mek arya, el kanye wangapmoke.

34Sik mapmeka, berekukopura, du kil arye, el weit kil ati nyabuk. “Ambusum lukunyan ara, nun ni koproba ap, na ap mapmanume. Alukunyan babye atonun, anggur mek arepnimnyeba, weika arye deiplyopura, el kanye wangalamak talak noutamak arye, ‘An babye neika mapturumba, mi boptumba, aminyan talak nun yala kum dalyak’ tenen atia,” nyabuk. 35Nyabuka ati, aning atonun sik bitinye arye, sik ni koproba Lot biti, anggur mek kanye wangalamak mek areprikba, weik dipmokba, kanye bona kum ubuk ati, weit kil arye el li dam biyukce, sik neika mapmarik. Alukunyan babye, sik neika mapmarik talak babye, akilmu bukuka buru bindobuk talak babye, el li koprop arye, bita kum bikmok. Ara, kanye wangapmoka arya. 36Akilmapu bitinye ara, sik ni koprop Lot ap, neika mapmek deice arye, mi boprik.

37Aminyan talak, du kil arye sal mi deibukce, ‘El si ara, Moab,’ nyabuka si dobuk. Ami nebukce, mapu deibukba, sikce dadeipdanin balamika ani, deiamik ninye ara, sik si Moab yala ninye tuba nyanyabe. 38Akil, el weit kil babye, sal mi deibukce, ‘El si ara, Ben-Ammi,’ nyabuka sisibuk. Ami arye nebukce, deiamuk ninye ara, sik yala si Amon ninye tuba nyanyabe.

Currently Selected:

Kejadian 19: EIPA

Highlight

Copy