मर्कुस 16
16
इसु सिकासो सिन्हुका
(मत्ति २८:१-८; लुका २४:१-१२; युहन्ना २०:१-१०)
1माइसाका दिना#१६:१ माइसाका दिना सुकरबार दिलिमा तु बजे सुरु जेङतेङ सानिबार दिलिमा तु बजे दोघाखे। दोकान्हुसो मरियम मग्दलिनि, याकुबको आमाइ मरियम रो सलोमि मालामालाका आतर इसुको सिका जिउता लागाइलि चोल्हि। 2आथारको लाङदिना एर्हिमाङ बेला ल्होलाउ एम्बालाइ तोमता हानेहि। 3दामाता हानेकाताङ पालाउ एम्बालाइ ताताइमिता दोअ्दोङ घाहि “केलाइको भाअ्सिङ तोमको नुइको उन्ठुइ हासु लाअ्पाप्यावा?” 4जेलाउ एम्बालाइ तोमता थुकाहि कोलाउ तोमको इङको उन्ठुइ लाअ्पातेङ ताअ्का तिङहि। इङको उन्ठुइ हेन्जा बाराका हिघाहि। 5कालाउ तोमलिअ्ता दुल्तेङ एम्बालाइ जेका धाबा लागाइका एमि धाना द्याङहेङ दाम्पाहा योम्तेङहिका तिङहि रो इदोइ तिङतेङ एम्बालाइ थिहि। 6कालाउ बुङ वा एम्बालाइहेङ दोअ्हि, “माथिसु, नेलाइ नासरतको इसुहेङ भोदोङसुखेना, जाइ कुरुसता टाइगाइन्हाका हिघाहि। वा सिन्हुतेङ ल्होका हि। वा इता मान्थु। वासेहेङ ताअ्का थामे खाङसु। 7हानेसु, वाको चात्यागेलाइ रो पत्रुसहेङ दोअ्पिसु, वा नेलाइको आगाआगा गालिलता हानेदोङखे। वा नेलाइहेङ दोअ्काभाइपाङ नेलाइ वासेहेङ इन्ताङ तिङस्वाना।”#मत्ति २६:३२; मर्कुस १४:२८ 8एम्बालाइ तोमसो ओल्हेतेङ धाअ्हि रो एम्बालाइ भारभुसाइतेङ थितेङ फिरदोङघाखे। कालाउ एम्बालाइ हासुहेङ हाइदोङ मादोअ्हि, हाइपानु एम्बालाइ थिका हिघाहि।
इसु चात्यागेलाइकोता देखालपिहि
(मत्ति २८:९-२०; लुका २४:१३-५३; युहन्ना २०:११-२३; साल्तेङ दिङगिल्का १:४-११)
9[इसु आथारको लाङ दिनाको र्हिमाङ इसु सिन्हुतेङ ल्होकान्हुअ्सो वा लाम्फा मरियम मग्दलिनिकोता देखाल पिहि। इङकोसो इसु न्हिअ् लोङ मासान ओल्हेपाका हिघाहि। 10मरियम मन्दलिनि हानितेङ वाको चात्यागेलाइहेङ इदोइ बानाल हिम्पाहि। एम्बालाइ बिलाप पातेङ खारतेङ हिघाखे। 11कालाउ बुङ जेलाउ इसु सिन्हुतेङ मरियम मन्दलिनिकोता देखाल पिहि दोअ्का काथा एम्बालाइ हिङहि, कोलाउ एम्बालाइ मासाअ्हि।
12इङकोन्हुअ्सो न्हेमि चात्यागेलाइ देराभारि हानेकाताङपाका पहरता एम्बालाइकोता इसु भेनेङ आकारता देखाल पिहि। 13कालाउ एम्बालाइ घुरितेङ हानितेङ बोमिगेलाइहेङ दोअ्पिहि। कालाउ बुङ एम्बालाइ ओबालाइहेङ बुङ खान्धुर मापाहि।
14इङकोन्हुअ्सो इसु तेए चात्यागेलाइकोता एम्बालाइ चालि योम्का पहरता देखाल पिहि। कालाउ एम्बालाइको कोन्धाङ थाङतेङ खान्धुर मापानाङसिङ वा एम्बालाइहेङ हाकाराइहि। हाइदोनु इसु सिकासो सिन्हुतेङ ल्होकान्हुअ्सो वासेहेङ तिङकालाइको काथा एम्बालाइ खान्धुर पाका मान्थुघाहि।
15कालाउ इसु एम्बालाइहेङ दोअ्हि, “गोताङ दुनियाता हानितेङ गोताङ सिरजाइहेङ रेम्काबानाल हिम्पासु।#साल्तेङ दिङगिल्का १:८ 16खान्धुर पाका रो चिभुअ्लि र्हुका बानच्यावा, कालाउ बुङ खान्धुर मापाका दोसि ज्यावा। 17खान्धुर पाकालाइदोफा इदोइ चिनोगेलाइ ह्यावा: काङको मिङता एम्बालाइ मासानगेलाइ ओल्हेपावा। एम्बालाइ नावा राउगेलाइता धुयावा। 18एन्बालाइ पुह्याँगेलाइ रिमावा रो हिदिङ बिसहिका चिज आम्लाउ बुङ हिदिङ किसिमसो इङको एम्बालाइको खति मापावा। एम्बालाइ रोगाइकालाइर्हुता ताइको खुर ताअ्तावा रो एम्बालाइ एलावा।”
19प्रभु इसु एसापा चात्यागेलाइदोफा धुइलिदोकान्हुअ्सो वा सादेलता तोल्हेन्हाहि रो परमेस्वरको दाम्पाहा योम्हि।#साल्तेङ दिङगिल्का १:९-११ 20इङकोन्हुअ्सो चात्यागेलाइ चारपाहाङ हानितेङ गोताङ थामेता वाको रेम्काबानाल पारचार पाहि। प्रभु एम्बालाइदोफा हितेङ काम पाहि रो चिनोगेलाइसो बचनहेङ सत्ते ठर्हाइहि।]#१६:२० इदोइ दारजागेलाइ आधे पुर्ना स्रोत बाइबलता मान्थु।
Currently Selected:
मर्कुस 16: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
