मर्कुस 10
10
खातिपोकाको बारेता इसुको बिद्या
(मत्ति १९:१-१२; लुका १६:१८)
1इसु इङको थामेहेङ लाअ्तेङ यर्दन झोराको ओदोइपार यहुदिया माउजाता हानेहि। चेअ्सुमेअ्सुका वाकोता जोम्हि रो दिनाङ भाइपाङ वा एम्बालाइहेङ बिद्या पिलि तेङहि।
2फरिसिगेलाइ इसुकोता लोतेङ वासेहेङ जाच पातेङ हिअ्हि, “हाइ हासुङ ताइको बेअ्दोफा खातिपोलि एलाङ ना माएलाङ?” 3इसु एम्बालाइहेङ दोअ्हि, “मोसा नेलाइहेङ हाइ हुकुम पिकाहि?” 4एम्बालाइ दोअ्हि, “मोसा ते खातिपोतेङ ताइको बेअ्हेङ लाअ्लाउ बुङ ज्याङ दोअ्का हि।”#नियम २४:१-४; मत्ति ५:३१ 5कालाउ बुङ इसु एम्बालाइहेङ दोअ्हि, “नेलाइको कोन्धाङ थाङका हिनाङसिङ वा नेलाइहेङ इदोइ हुकुम लेखेपिहि। 6कालाउ बुङ सिरजाइको लाम्फासोङ परमेस्वर द्याङहेङ वाबाल रो बेबाल पातेङ बान्हाइहि।#सिरजाइ १:२७; ५:२ 7‘इदोङभाअ्सिङ द्याङ ताइको आबा आमाइहेङ लाअ्तेङ ताइको बेअ्दोफा मिलितेङहिखे। 8कालाउ इङको न्हेमि एलोङ जिउ जेनावा।’#सिरजाइ २:२४ एम्बालाइ न्हेमि माको, कालाउ बुङ एलोङ जिउ जेनावा। 9इदोइभाअ्सिङ परमेस्वर जाइहेङ एदोसाङ गासेका हि द्याङ माखेनाको।”
10साअ्ता हिलाउ चात्यागेलाइ आरोङ इदोइ बारेता इसुहेङ हिअ्हि। 11वा एम्बालाइहेङ दोअ्हि, “जाइ ताइको बेअ्दोफा खातिपोतेङ भेनेङदोफा बिहु पाखे, इङको वाको खिलापता दुस्चर पावा।#सिरजाइ ५:३२; १ कोरिन्थि ७:१०-११ 12कालाउ हिदिङ बेबाल ताइको केअ्हेङ लाअ्तेङ भेनेङदोफा बिहु पाखे पानु, वा दुस्चर पावा।”
इसु रो जामालाइ चोमालाइ
(मत्ति १९:१३-१५; लुका १८:१५-१७)
13इसु ताइको खुर ताअ्तेङ सहसाम्पा प्याको दोअ्तेङ द्याङगेलाइ ताइको जामालाइ चोमालाइहेङ वाकोता चुमाहि। इदोइ तिङतेङ चात्यागेलाइ इङको द्याङगेलाइहेङ हाकाराइहि। 14कालाउ बुङ इसु इदोइ तिङतेङ चेरताम्पातेङ चात्यागेलाइहेङ दोअ्हि, “म्हुइका जामालाइ चोमालाइहेङ काङकोता लोलि पिसु, एम्बालाइहेङ मारोकेसु, हाइदोनु सादेलको सारभि इसिकालाइकोङ एइ। 15जातिङको का नेलाइहेङ दोअ्ताङका, जाइ सादेलको सारभिहेङ एलोङ म्हुइका जामाल भाइपाङ मार्हुकावा, वा हेअ्लाउ इङकोलिअ्ता दुल्लि मानिनावा।”#मत्ति १८:३ 16कालाउ इसु एम्बालाइहेङ कोल्हेता बाअ्तेङ एम्बालाइर्हुता ताइको खुर ताअ्तेङ सहसाम्पा पिहि।
एमि गिर्हि द्याङ
(मत्ति १९:१६-३०; लुका १८:१८-३०)
17इसु दामाता हानेकाताङ पालाउ एमि द्याङ धाअ्तेङ लोतेङ वाको आगाता तिर्हो थोहि रो वासेहेङ हिअ्हि, “ओइ रेम्का मास्टर, हेअ्लाउ मानासाका ज्यान निङलि का हाइ पालिगोयाङ?” 18इसु इङकोहेङ दोअ्हि, “ना कासेहेङ हाइपालि रेम्का दोखेना? परमेस्वरसो बाहेक हासु बुङ रेम्का मान्थु। 19ना परमेस्वरको इदोइ हुकुमगेलाइ ते गेखेना, ‘मासेअ्लि, बेबिचार मापालि, माखुलि, ढाटाइका दासि मापिलि, माठगिलि, आबा रो आमाइहेङ मान पालि।’”#दामालाअ्का २०:१२-१६; नियम ५:१६-२० 20कालाउ इङको इसुहेङ दोअ्हि, “मास्टर, इदोइ गोताङ ते का काङको वाजालाइसो दोङ मानितेङ हिघा।” 21इसु इङकोहेङ दायातेङ खाङहि रो दोअ्हि, “नासेहेङ एलोङ चिजको दरकार हि। हाने रो नाङको जे जेथे हि पिअ्तेङ मान्थुकालाइहेङ पि। ना सादेलता हिका टाका निनाना, कालाउ लोतेङ कासेहेङ पिताइ।” 22इदोइ काथा हिङतेङ इङको द्याङ ताइको र्हाइ झामा पाहि रो पिर मानितेङ हानेहि, हाइदोनु इङकोदोसा हेन्जाङ टाका काउरि हिघाहि।
23कालाउ इसु कोरबितिङ खान्तेङ ताइको चात्यागेलाइहेङ दोअ्हि, “धनिगेलाइहेङ सादेलको सारभिता दुल्लि हेथे मुस्किल हि।” 24इसुको दोअ्का इदोइ काथाता चात्यागेलाइ भारभुसाइहि। कालाउ बुङ वा आरोङ एम्बालाइहेङ दोअ्हि, “जामालाइ, टाका काउरिता आस ताअ्कालाइ स्वर्गको सारभिता दुल्लि मुस्किल हि। 25गिर्हि द्याङहेङ सादेलको सारभिता दुल्काखान्तेङ ते भुरुङ बिन्दुको कानासो उटहेङ दुल्लि सुकाका ज्यावा।” 26इदोइ हिङतेङ चात्यागेलाइ झन भारभुसाइतेङ इसुहेङ दोअ्हि, “एन्सानु हासु मुक्ति निङलि द्वाङ?” 27इसु एम्बालाइहेङ खान्तेङ दोअ्हि, “इदोइ द्याङगेलाइको भाअ्सिङ ते मादोका हि, कालाउ बुङ परमेस्वरको भाअ्सिङ हाइदोङ माको, हाइपानु परमेस्वरको भाअ्सिङ गोताङ काम जेङलि दोखे।”
28कालाउ पत्रुस इसुहेङ दोअ्हि, “खाङ, केलाइ गोताङ लाअ्न्हाहि रो नासेहेङ पिताइदोङन्हाखे।” 29इसु दोअ्हि, “जातिङको का नेलाइहेङ दोअ्खा, जाइ काङको भाअ्सिङ रो रेम्काबानालको भाअ्सिङ दादाओने, बाइओने आबाआमाइ, चान चामिन्दिगेलाइ, साअ्द्वार रो जाघाजिमिन लाअ्खे, 30इङको सान्ताइका दोसादोसाङ साइ गुना हेन्जा दादाओने, बाइओने आबाआमाइ, चान चामिन्दिगेलाइ, साअ्द्वार रो जाघाजिमिन इदोङ पहरता निनावा। कालाउ लोका जुगता हेअ्लाउ मानासाका ज्यान निनावा। 31कालाउ बुङ हेन्जाङ लाम्फा जेङकालाइ न्हुअ्तावा रो न्हुअ्कालाइचाहिँ लानावा।”#मत्ति २०:१६; लुका १३:३०
इसु सुमखे ताइको सिकाको बारेता कथन पाका
(मत्ति २०:१७-१९; लुका १८:३१-३४)
32ओबालाइ यरुसलेमभारि हानेदोङघाहि, इसु चात्यागेलाइको आगाआगा तेदोङ घाहि। चात्यागेलाइ भारभुसाइका हिघाखे रो बो न्हुअ्न्हुअ् लोकालाइ थिका हिघाखे। कोलाउ वा ताइको तेन्हे चात्यागेलाइहेङ आरोङ एपाहा चुमपुतेङ ताइमिर्हुता जेङलिलोका काथागेलाइ एम्बालाइहेङ हिङपाहि। 33वा दोअ्हि, “खाङसु, केलाइ यरुसलेम हानेदोङन्हाखे। इन्ता का द्याङको चानहेङ मुल धामिगेलाइ रो धरममास्टरगेलाइको खुरता जिम्मा प्यावा। एम्बालाइ वासेहेङ सेअ्लि गोयाङ दोअ्तेङ बो जात्यागेलाइको खुरता जिम्मा प्यावा। 34कालाउ एम्बालाइ वासेहेङ गिल्ला पावा, थोअ्तावा, छरि म्हेअ्तावा रो सेअ्तावा। कालाउ बुङ सुम्निता वा आरोङ सिन्हुतेङ ल्होकावा।”
याकुब रो युहन्नाको बिनइ
(मत्ति २०:२०-२८)
35इङकोन्हुअ्सो जब्दियाको न्हेमि चानगेलाइ, याकुब रो युहन्ना इसुकोता लोतेङ दोअ्हि, “मास्टर, केलाइ नादोफा जे र्हेन्हाखे ना केलाइको भाअ्सिङ पि दोअ्का केलाइको लाल्सा हि।” 36इसु एम्बालाइहेङ हिअ्हि, “नेलाइको भाअ्सिङ का हाइ पाप्याङका दोअ्का नेलाइको लाल्सा हि?” 37एम्बालाइ इसुहेङ दोअ्हि, “नाङको प्रतापता केलाइता एमि नाङको दाम्पाहा रो भेनेङ नाङको केपाहा योम्लि निङका मन्जुरि केलाइहेङ पि।” 38कालाउ बुङ इसु एम्बालाइहेङ दोअ्हि, “नेलाइ हाइ र्हेदोङसुखेना, इङको नेलाइ मागेस्वाना। हाइ जेदोङ तु:को बातिसो का आमाङका, इङको नेलाइ आम्लि दोस्वाना? का जेदोङ चिभुअ्लि र्हुकाहिघा हाइ नेलाइ बुङ र्हुलि दोस्वाना?”#लुका १२:५० 39एम्बालाइ वासेहेङ दोअ्हि, केलाइ द्वाङ। इसु एम्बालाइहेङ दोअ्हि, “जेदोङ तु:को बातिसो का आमाङका, इङको नेलाइ आमस्वाना रो जेदोङ चिभुअ्लि का र्हुका हिघा इङको नेलाइ र्हुस्वाना। 40कालाउ बुङ काङको दाम्पाहा रो काङको केपाहा योम्लिपिलिचाहिँ का पिका माको, इदोइ ते जाइजाइको भाअ्सिङ त्यार पातेङ ताअ्का हि वासेहेङ प्यावा।”
41इदोइ हिङतेङ तेमिङ चात्यागेलाइ याकुब रो युहन्नादोफा चेरताम्पाहि। 42कालाउ इसु एम्बालाइहेङ ताइकोता काइतेङ दोअ्हि, “नेलाइ गेसुखेना, बोजात्यागेलाइता राज पाकालाइ नेलाइहेङर्हुता हक चालायावा। कालाउ नेलाइको बाबारकालाइ नेलाइर्हुता खाबरा पावा।#लुका २२:२५-२६ 43नेलाइताचाहिँ एन्सा माज्याको। कालाउ बुङ नेलाइता जाइ बारालि लाल्सा पाखे, इङको नेलाइको सेवा पालि गोयावा।#मत्ति २३:११; मर्कुस ९:३५; लुका २२:२६ 44कालाउ नेलाइता लाङलि लाल्सा पाखे, इङको झाराङको कामत्या जेङलिङगोयाङ। 45हाइपानु का द्याङको चान सेवा निङलि माको, कालाउ बुङ सेवा पालि रो हेन्जाङहेङ लाअ्पालि भाअ्सिङ ताइको बायु पिलि लोका एइ।”
इसु मि मातिङका बारतिमैहेङ एल्पाका
(मत्ति २०:२९-३४; लुका १८:३५-४३)
46इङकोन्हुअ्सो इसु चात्यागेलाइदोफा यरिहोता लोहि। वा ताइको चात्यागेलाइ रो हेन्जाङ द्याङगेलाइसुदाङ यरिहोसो ओल्हेलाउ तिमैको चान बारतिमै दोअ्का एमि कान्हा र्हेतेङचाका, दामाको आलिता योम्तेङ हिघाहि। 47जेलाउ वा नासरतको इसु लोका हि दोअ्का हिङतेङ र्हिकाइतेङ दोअ्हि, “ओइ इसु, दाउदको चान,#१०:४७ दाउदको चान यहुदिगेलाइ “ख्रिस्ट इसु” दाउदको खालसो ल्वाङ दोअ्तेङ आस पाका हिघाखे। कासेहेङ दाया पा।”
48इन्ता हिका हेन्जाङ द्याङगेलाइ वासेहेङ सिकापा ह्याको दोअ्तेङ हाकाराइहि। कालाउ बुङ वा झन बारा गाला पातेङ र्हिकाइतेङ दोअ्हि, “ओइ दाउदको चान, कासेहेङ दाया पा।” 49कोलाउ इसु थिङगाइपा जाअ्तेङ दोअ्हि, “इङकोहेङ काइसु।” कालाउ एम्बालाइ इङको कान्हाहेङ एसा दोअ्तेङ काइहि, “ना लेन्चा, वा नासेहेङ काइदोङखे, मारफा लोउ!” 50कालाउ ताइको गुअ्का धाबा थाल्तेङ इङको जुरुक्पा ल्होहि रो इसुकोता लोहि। 51इसु इङकोहेङ दोअ्हि, “ना हाइ भोखेना, का नाङको भाअ्सिङ हाइ पाप्याङ?” इङको कान्हा बिनइ पातेङ इसुहेङ दोअ्हि, “मास्टर, का मिँ तिङलि निनाको।” 52कालाउ इसु इङकोहेङ दोअ्हि, “नाङको दामा हाने, नाङको खान्धुरसो नासेहेङ एल्पाका हि।” ओदोङघरि वा मिँ तिङहि रो दामाता इसुहेङ पिताइहि।
Currently Selected:
मर्कुस 10: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
