मत्ति 23
23
धरम मास्टर रो फरिसिगेलाइहेङ चेतानि
(मर्कुस १२:३८-३९; लुका ११:४३,४६; २०:४५-४६)
1कालाउ इसु द्याङगेलाइहेङ रो ताइको चात्यागेलाइहेङ एसा दोअ्हि: 2“धरम मास्टर रो फरिसिगेलाइ मोसाको लेखेका नियम धिरपालि खाबारा निङका हि। 3इदोङभाअ्सिङ एम्बालाइको दोअ्का काथा पासु रो मानेसु। कालाउ बुङ एम्बालाइ पाकाभाइपा चाहिँ मापासु, हाइपानु एम्बालाइ बिद्या ते पिखे, कालाउ बुङ इङकोमाफिक मापाखे। 4एम्बालाइ बोमिहेङ चाहिँ धरम करमको ल्हिका बोकाना फुपाखे, कालाउ बुङ ताइमिचाहिँ इङको बोकाना फुलिते माको आङगुलिहोइ बुङ मासाइखे। 5एम्बालाइ ताइको गोताङ काम द्याङगेलाइहेङ तिम्पालि भाअ्सिङ पाखे। एम्बालाइ नियमको काथाहेङ बाराबाराका जन्तर बान्हाइतेङ लागाइखे रो धरम हिघा दोअ्तेङ तिङपालि ताइको धाबाता र्हिर्हिङका फुरकागेलाइ लागाइखे।#मत्ति ६:१; नियम ६:८; गान्देका १५:३८ 6एम्बालाइ भात्यारता आदरको थामे रो कचहरिसाअ्गेलाइता मुल थामेगेलाइ मोन्दाताखे, 7बाजारगेलाइता सेउपाका भोखे रो द्याङगेलाइ मास्टर दोअ्का मोन्दाताखे।
8“नेलाइहेङ हासुङ ‘मास्टर’ मादोअ्ताको, हाइपानु नेलाइको मास्टर एलोङ हि, नेलाइचाहिँ झाराङ दादाओने हिसुन्हा। 9नेलाइ सुमिङता हासुहेङ ताइको आबा मादोअ्सु, हाइपानु नेलाइको एलोङ खिनिङ आबा हि जाइ सादेलता हि। 10नेलाइहेङ हासुङ ‘मास्टर’ मादोअ्ताको, हाइपानु नेलाइको एलोङ खिनिङ मास्टर हि जाइ ख्रिस्ट हि। 11नेलाइता जाइ झाराङखान्तेङ बाराका हि, इङको नेलाइको सेवापाका ज्यावा।#मत्ति २०:२६-२७; मर्कुस ९:३५; १०:४३-४४; लुका २२:२६ 12जाइ ताइमिहेङ बारापावा, इङको झाराङखान्तेङ म्हुयावा रो जाइ ताइमिहेङ म्हुइपावा इङको झाराङखान्तेङ बारावा।#लुका १४:११; १८:१४
चिम्काटागेलाइको खिलापता चेतानि
(मर्कुस १२:४०; लुका ११:३९-४२,४४,५२; २०:४७)
13“धिकार धरम मास्टर रो फरिसिगेलाइ! नेलाइ चिम्काटा हिसुन्हा। हाइपानु नेलाइ सादेलको सारभिको फिनु गिअ्का हिसुन्हा। नेलाइ ताइमि बुङ लिअ्ता मादुल्सुखेना रो लिअ्ता दुल्लि ना ताइमिङ दुल्सुखेना ना भोकालाइहेङ बुङ दुल्लि पिसुखेना।
14[“धिकार नेलाइहेङ, धरम मास्टर रो फरिसिगेलाइ! नेलाइ चिम्काटा हिसुन्हा। हाइदोनु नेलाइ रान्दिगेलाइको साअ्द्वार घिङपिसुखेना रो ताइमिहेङ धरमाति तिङपालिको भाअ्सिङ र्हिर्हिङका पुकार पासुखेना। इदोइखातिर बो खान्तेङ नेलाइ हेन्जा डाँड निङस्वाना।]
15“धिकार नेलाइहेङ, धरम मास्टर रो फरिसिगेलाइ! नेलाइ चिम्काटा हिसुन्हा। हाइपानु नेलाइ बोमिहेङ ताइको धरमता चुमालि भाअ्सिङ जाहादि रो बोमुलुक गेलाइता घुराइगिल्सुखेना। इङको नेलाइको धरमता लोकान्हुअ्सो इङकोहेङ ताइमिखान्तेङ न्हेगुना पातेलता हानेलि सोबाइका बान्हाइसुखेना।
16“धिकार कान्हा आगुवागेलाइ! नेलाइ दोअ्सुखेना, ‘हासुङ थानको केरा चालाउ हाइदोङ माज्याङ, कालाउ बुङ थानको सोनाको केरा चालाउ इङको केराहोइ धेउन्हावा।’ 17निरबुदि रो कान्हागेलाइ! नेलाइ हिदोइचाहिँ बाराका दोअ्सुखेना? सोना ना सोनाहेङ पुनित पाका थानहेङ? 18आरोङ नेलाइ ‘थामे साइतेङ केरा चालाउ हाइदोङ माजेङखे, कालाउ बुङ इन्ता चार्हाइका चिजहेङ साइतेङ केरा चालाउचाहिँ केरा लोङखे’ दोअ्तेङ धिरपासुखेना। 19कान्हागेलाइ! नेलाइ हिदोइचाहिँ बाराका दोअ्सुखेना? चार्हाइका चिज ना चार्हाइका चिजहेङ पुनित पाका थामेहेङ? 20इदोइखातिर थामेको केरा चाकालाइ थामेको रो इन्ता चार्हाइका गोताङ चिजको केरा चाखे। 21एन्साङ पातेङ थानको मिङता केरा चाकाचाहिँ थान रो इङकोलिअ्ता हिकाको मिङता केरा चाखे। 22सादेलको मिङता केरा चाकाचाहिँ परमेस्वरको गादि रो इदोइता हिकाको मिङता केरा चाखे।#यसैया ६६:१; मत्ति ५:३४
23“धिकार नेलाइहेङ, धरम मास्टर रो फरिसिगेलाइ! नेलाइ चिम्काटा हिसुन्हा। हाइपानु नेलाइ पुदिना, सोमपोइ रो जिराको ते भागको ए भाग पिसुखेना। कालाउ बुङ नियापालि, दायापालि रो खान्धुर पालिदोका नियमको मुल काथागेलाइको चाहिँ नेलाइ वास्ताङ मापासुखेना। इङको बो काथाको दोसादोसाङ नियापालि, दायापालि रो खान्धुर पालि दोका जेङलिगोयाङ।#लेबि २७:३० 24कान्हा आगुवागेलाइ! नेलाइ भुसुनाहेङ साल्सुखेना, कालाउ बुङ उटहेङ चाहिँ निअ्सुखेना।
25“धिकार नेलाइ, धरम मास्टर रो फरिसिगेलाइ रो चिम्काटागेलाइ! हाइदोनु नेलाइ थालि रो बाति बाहार खिनिङ मान्झेसुखेना, कालाउ बुङ लिअ्ता चाहिँ दिअ्का रो तामिहेङ खिनिङ फोमपातेङ चुमाका मारेम्का काथागेलाइहोइ पोङघापासुखेना। 26ओइ कान्हा फरिसिगेलाइ! लाम्फा थालि रो बातिको लिअ्तापाहा मान्झेसु, कालाउ बाहारपाहा बुङ मान्झेन्हावा।
27“धिकार धरममास्टर रो फरिसिगेलाइ! नेलाइ चिम्काटा हिसुन्हा। हाइपानु नेलाइ चुना लागाइका तोमभाइकाङ हिसुन्हा। इङको तोम बाहारपाहासो खाङलाउ ते रेम्का तिङखे, कालाउ बुङ लिअ्तापाहा सितेङ आइका हारा रो अपुनित काथा खिनिङ हिका हिखे।#साल्तेङ दिङगिल्का २३:३ 28एसाङ पातेङ बाहारसो खाङलाउ नेलाइ द्याङको आगाता धरमभाइपाङ तिङसुखेना, कालाउ बुङ लिअ्ता चाहिँ नेलाइको मन कपट रो कुकरमहोइ पोङघाका हि।
दोसिहेङ साजाइ
(लुका ११:४७-५१)
29“धिकार धरम मास्टर रो फरिसिगेलाइ रो चिम्काटागेलाइ! हाइपानु नेलाइ आगाधुइकालाइको भाअ्सिङ रेरेम्का तोमगेलाइ बान्हाइसुखेना रो परमेस्वरको हुकुमता लागितेङहिका पुनित जनगेलाइको तोमगेलाइ बुङ झिलिमिलि पासुखेना। 30कालाउ नेलाइ दोअ्सुखेना, ‘लाम्फा केलाइको आबा खालगेलाइ ते आगाधुइकालाइहेङ सेअ्हि। कालाउ बुङ केलाइ बुङ ओबालाइदोसा हिका हिनु केलाइ चाहिँ इन्सिका काम पालि ओबालाइहेङ मासाघाइधाङ।’ 31एसा दोअ्तेङ नेलाइ ताइमिङ इङको आगाधुइकालाइहेङ सेअ्काको खाल हिन्हाहि दोअ्का दासि नेलाइ ताइमिङ पिसुखेना। 32एला नेलाइको आजुखालगेलाइ थालेका कुकरमको काम पोङघा पासु।
33“ओइ पुह्याँगेलाइ, बिसहिका पुह्याँको चानगेलाइ! नेलाइ हेसापा पातेलको डाडसो खाअ्स्वाना?#मत्ति ३:७; १२:३४; लुका ३:७ 34इदोइखातिर का नेलाइकोता आगाधुइकालाइ, आकिलहिका द्याङगेलाइ रो धरममास्टरगेलाइ दिङगिलाङका। एम्बालाइता हेमिहेङ नेलाइ सेअ्स्वाना, हेअ्मिहेङ कुरुसता टाङगाइस्वाना, हेमिहेङ ताइको कचहरिसाअ्गेलाइता छरि म्हेअ्स्वाना रो पुरकिअ्पाङ सान्ताइस्वाना। 35एसापा दुसमान्थुका हाबिलको हितिसो थानको थामेको माझाता सेअ्न्हाका बेरेक्याहको चान जकरियाको हितिथिकापाको गोताङ फतुर नेलाइर्हुता पर्यावा।#सिरजाइ ४:८; २ इतिहास २४:२०-२१ 36जातिङको, का नेलाइहेङ दोअ्खा, इदोइ गोताङ काथाको फतुर इदोइ खालको पुरिङर्हुता दोङ पर्यावा।
इसु यरुसलेमहेङ चेतानि पिका
(लुका १३:३४-३५)
37“यरुसलेमको द्याङगेलाइ, यरुसलेमको द्याङगेलाइ! नेलाइ आगाधुइकालाइहेङ सेअ्सुखेना कालाउ नेलाइकोता दिङगिल्कालाइहेङ उन्ठुइहोइ तोसुखेना। जेसापा कियाको भुन्दि ताइ किचानगेलाइहेङ जोम्पाका भाइपा, का नेलाइहेङ हेअ्खे जोम्पालि भोघा, कालाउ बुङ नेलाइ माकिअ्सुन्हा। 38खाङ, नेलाइको साअ् उदादाङका जेनावा।#यर्मिया २२:५ 39हाइदोनु का नेलाइहेङ दोअ्खा, ‘परमप्रभुको मिङता लोका हेथे सहसाम्पा निङकालाइ हिसुन्हा’ मादोअ्पाधाउ, नेलाइ कासेहेङ मातिस्वाना।”#ले ११८:२६
Currently Selected:
मत्ति 23: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
