मत्ति 17
17
इसुको जिउ फेरिन्हाका
(मर्कुस ९:२-१३; लुका ९:२८-३६)
1इङकोको तु दिनान्हुअ्सो इसु पत्रुस, याकुब रो वाको ओने युहन्नाहेङ खिनिङ दोसाङ चुमपुतेङ झाउका आरदाङर्हुता हानेहि। 2एम्बालाइको आगाता वाको गोताङ जिउ फेरेन्हातेङ र्हाइ बेलाभाइपाङ चिल्काहि रो वाको धाबा बुङ साने भाइपा जेल्हाल्हाहि। 3कालाउ ओदोङघरि मोसा रो एलिया देखाल पितेङ इसुदोफा काथा पालि तेङहि। 4इदोइ तिङतेङ पत्रुस इसुहेङ दोअ्हि, “ओइ प्रभु, केलाइ इता हिका रेम्का जेङहि। नाङको लाल्सा हिनु का इता सुम लोङ हिकाथामे बान्हायाङका। एलोङ नाङको भाअ्सिङ, एलोङ मोसाको भाअ्सिङ रो एलोङ एलियाको भाअ्सिङ।”
5पत्रुस धुइका धुइकाताङ, चोलका बादेल एम्बालाइहेङ थुम्हि रो इङको बादेलसो एलोङ गाला हिङहि, “या काङको मोन्दाताका चान एइ, याकोदोफा का हेन्जाङ लेङचाघा, याको काथा हिङसु।”#सिरजाइ २२:२; ले २:७; यसैया ४२:१; मत्ति ३:१७; १२:१८; मर्कुस १:११; लुका ३:२२; नियम १८:१५; २ पत्रुस १:१७-१८ 6जेलाउ चात्यागेलाइ इदोइ हिङहि, कालाउ एम्बालाइ थितेङ पोम्भेलेहि। 7कालाउ बुङ इसु लोतेङ एम्बालाइहेङ साइतेङ दोअ्हि, “ल्होसु, माथिसु।” 8जेलाउ एम्बालाइ ताइको मिँ तोल्हेहि, कालाउ इसुबिना एम्बालाइ बो हासुहेङ मातिङहि।
9कालाउ आरदाङसो लेता खुअ्काताङ पालाउ इसु चात्यागेलाइहेङ दोअ्हि, “जेलाउथिकापा का द्याङको चान सिकासो सिन्हुतेङ माल्होपासाधाउ, नेलाइ इदोइ नजरको काथा हासुहेङ मादोअ्सु।”
10कालाउ चात्यागेलाइ वासेहेङ एसा दोअ्तेङ हिअ्हि, “कालाउ हाइपालि धरममास्टरगेलाइ लाम्फा एलिया लोलिगोयाङ दोअ्तेङ दोअ्खे?”#मलाकि ४:५ 11इसु एम्बालाइहेङ दोअ्हि, “एलिया जातिङको दोङ ल्वावा रो वा गोताङ काथा आरोङ रुजुपावा। 12कालाउ बुङ का नेलाइहेङ दोअ्खा, ‘एलिया लाम्फा दोङ लोलिदोहोइ, कालाउ द्याङगेलाइ वासेहेङ मानाल्हि रो एम्बालाइ वासेहेङ मनलागि पाहि। एन्सा दोङ का द्याङको चान बुङ एम्बालाइको खुरसो पिर भोगिलि गोयाङका।’”#मत्ति ११:१४ 13कालाउ वा चिभुअ्लि पिका युहन्नाको बारेता एम्बालाइहेङ दोअ्का एइ दोअ्तेङ चात्यागेलाइ गेहि।
इसु मासान खोअ्का जामालहेङ एल्पाका
(मर्कुस ९:१४-२९; लुका ९:३७-४३)
14इसु चात्यागेलाइदोफा द्याङको चेअ्सु हिका थामेता थुकालिलोकान्हुअ्सो एमि द्याङ वाको आगाता लोतेङ तिर्हो थोतेङ दोअ्हि, 15“प्रभु, काङको चानहेङ दायापि, हाइपानु इङकोहेङ झाकालोङकाबेथा खोअ्का हि रो बारा पिर भोगिदोङखे। वा जेलाउ मेता वाङखे, जेलाउ चिता दुल्खे। 16का इङकोहेङ नाङको चात्यागेलाइकोता चुमाघा, कालाउ बुङ एम्बालाइ इङकोहेङ एल्पालि मादोहि।” 17कालाउ इसु दोअ्हि, “ओइ खान्धुर मान्थुका रो आसाति खालको द्याङगेलाइ, हेअ्लाउथिकापा का नेलाइको दोफा ह्याङका? हेअ्लाउथिकापा का नेलाइहेङ सहितेङ हिलि? इङकोहेङ इता काङकोता चुमासु।” 18इसु इङकोता हिका मासानहेङ हाकाराइहि रो इङको ओल्हेतेङ हानेहि। कालाउ इङको वाजान ओदोङघरि एल्हि।
19कालाउ चात्यागेलाइ इसुकोता सिपापा लोतेङ दोअ्हि, “केलाइ इङकोहेङ हाइपालि ओल्हेपालि मादोन्हाहि?” 20इसु एम्बालाइहेङ दोअ्हि, “नेलाइको खान्धुर आतुइसा हिनाङसिङ एसा जेङका हि। जातिङको, का नेलाइहेङ दोअ्खा, नेलाइता एलोङ पासाइको चालाइ झोको खान्धुर हिनु इदोइ आरदाङहेङ ‘इतासो हाने’ दोअ्नु इङको हानावा। नेलाइको भाअ्सिङ जेङलि मादोका हाइदोङ मान्थु।#मत्ति २१:२१; १ कोरिन्थि १३:२; मर्कुस ११:२३ 21[कालाउ बुङ इदोइ खालको मासान चाहिँ पुकार रो म्हितुपाङ माहिसा ओल्हेपालि मादोखे।]”
इसु आरोङ ताइको सिका काथा पाका
(मर्कुस ९:३०-३२; लुका ९:४३-४५)
22जेलाउ ओबालाइ गालिल माउजाता जोम्हि कालाउ इसु एम्बालाइहेङ दोअ्हि, “का द्याङको चान द्याङगेलाइको खुरता पिन्हावा। 23एम्बालाइ कासेहेङ सेअ्तावा, कालाउ बुङ का सिकासो सुम्निता सिन्हुतेङ ल्होपान्हाङका।” इदोइ काथा हिङतेङ चात्यागेलाइ हेन्जाङ मन तु:पाहि।
इसु थानको तिरो तिरिका
24जेलाउ ओबालाइ कफर्नहुमता लोहि, थानको तिरो ल्होपाकालाइ पत्रुसकोता लोतेङ दोअ्हि, “हाइ नेलाइको मास्टर तिरो मातिरिखे?”#दामालाअ्का ३०:१३; ३८:२६ 25वा दोअ्हि, “तिर्यावा, हाइपालि मातिर्यावा?” पत्रुस साअ्ता दुल्कान्हुअ्सो इसु वासेहेङ दोअ्हि, “सिमोन, नाङको ठहर हाइ हि? दुनियाको राजागेलाइ तिरो हासुसो ल्होपाखे? ताइको चानगेलाइसो ना बोगेलाइसो?” 26पत्रुस दोअ्हि, “बोगेलाइसो।” इसु वासेहेङ दोअ्हि, “एन्सानु चानगेलाइ ते रहल निङका हि। 27कालाउ बुङ एम्बालाइ केलाइसो चेरमाताम्पाको दोअ्तेङ, चावान्दिता हानितेङ बल्सि थो रो लाम्फा देका हाया चुमा। इङकोको नुइ हेअ्लाउ ना एलोङ रुपाको टाका निनाना। इङको चुमपुतेङ नाङको रो काङको भाअ्सिङ एम्बालाइहेङ पि।”
Currently Selected:
मत्ति 17: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
