युहन्ना 5
5
पोखरिता कुज्या एल्का
1इङकोन्हुअ्सो यहुदिगेलाइको पारबा हिघाहि रो इसु यरुसलेम हानेहि। 2यरुसलेमता भेराफिनुको भेर्पा ना लोङ धाअ् हिका एलोङ पोखरि हि, जाइहेङ हिब्रु राउता बेथस्दा दोअ्खे। 3इन्ता हेथे मासाअ्धेकालाइ, मिमातिङका, नेङगारा, कुज्यागेलाइ साल्हालाङतेङ हिघाखे। [एम्बालाइ चि हेथे पहर हेङगालाइन्हाखे दोअ्तेङ र्हुमघाखे। 4हाइदोनु परमप्रभुको एलोङ चर पहरपहरता पोखरिता खुअ्तेङ चि हेङगालाइपिघाखे रो चि हेङगालाइन्हाकान्हुअ्सो जाइ लाम्फा चि लिअ्ता दुल्घाखे, जिसिकाङ रोगाइका हिलाउ बुङ इङको एल्घाखे।]#५:४ इदोइ दारजा लाम्फाको हेन्जाङ बाइबलता मान्थु।
5इन्ता एकुरितेयेअ् बाअ्सारसो मासाअ्धेका ए मि द्याङ हिघाहि। 6इसु इङकोहेङ इन्ता साल्हालाङतेङहिका तिङहि, कालाउ र्हिङका पहरसो इङको इदोइ हालतता हिघाहि दोअ्तेङ गेतेङ इसु इङकोहेङ दोअ्हि, “हाइ ना एल्लि भोखेना?”
7मासाअ्धेका इसुहेङ दोअ्हि, “मास्टर, जेदोङ पहर चि हेङगालाइन्हापाखे इङको पहर कासेहेङ पोखरिता दुल्पापिका काङको हासुङ द्याङ मान्थु, का हानेकाहानेकाताङ काखान्तेङ लाम्फा भेनेङ द्याङ चिता धासेखे।”
8इसु इङकोहेङ दोअ्हि, “जाअ्, ताइको सिदाउ तोल्हे रो ते।” 9कालाउ ओदोङघरि इङको द्याङ एल्हि रो ताइको सिदाउ फातेङ वा हानेहि।
इङको दिना माइसाका दिना हिघाहि। 10एन्सा जेङलाउ एल्पापिका इङको एल्का द्याङहेङ यहुदि आगुवागेलाइ दोअ्हि, “नानि ते माइसाका दिना एइ, नासेहेङ सिदाउ फालि उचित मान्थु।”#नहेम्याह १३:१९; यर्मिया १७:२१
11इङको एम्बालाइहेङ दोअ्हि, “जाइ कासेहेङ एल्पाहि, वा दोङ दोअ्हि, ‘ताइको सिदाउ फातेङ ते।’”
12एम्बालाइ इङकोहेङ हिअ्हि, “नासेहेङ सिदाउ फातेङ ते दोअ्का द्याङ हासु एइ?”
13ताइमिहेङ एल्पाका इङको द्याङ हासु हिघाहि दोअ्तेङ वा नाल्का मान्थुघाहि। हाइदोनु इङको थामेता चेअ्सु जेङका हिनाङ इसु इन्तासो हानेलिदोका हिघाहि।
14इङकोन्हुअ्सो इसु वासेहेङ थानता दुसुतेङ दोअ्हि, “खाङ, ना एल्का हिन्हा। आरोङ कुकरम मापा रो नार्हुता आरोङ मारेम्का माल्वाको।” 15ताइमिहेङ एल्पाका ते इसु हिघाहि दोअ्तेङ इङको द्याङ यहुदि आगुवागेलाइहेङ हिम्पाहि।
परमेस्वरको चानसो ज्यान
16कालाउ यहुदि आगुवागेलाइ इसुहेङ सान्ताइलि तेङहि, हाइदोनु वा इदोइ काम माइसाका दिनाता पाका हिघाहि। 17कोलाउ इसु एम्बालाइहेङ दोअ्हि, “काङको आबा एलाथिकापा काम पादोङखे रो का बुङ काम पादोङखा।” 18इदोइखातिर यहुदि आगुवागेलाइ इसुहेङ सेअ्लि आरोङ हेन्जा बल पातेङ दोअ्हि, “हाइपानु वा माइसाका दिना बाधा पाका काम खिनिङ माको, कुलाउ ताइमिहेङ परमेस्वरको एनास बान्हाइतेङ वा परमेस्वरहेङ ताइकोङ आबा दोअ्का हिघाहि।”
19इसु एम्बालाइहेङ दोअ्हि, “जातिङको का नेलाइहेङ दोअ्ताङका, चान ताइमिङ हाइ दोङ पालि माद्वावा, कुलाउ आबा जेदोङपाका तिङखे इङकोङ खिनिङ पाखे, हाइपानु आबा जेदोङ पाखे, चान एन्साङ पाखे। 20हाइदोनु आबा चानहेङ इन्ताना पाखे रो वा ताइमि पातेङहिका गोताङ काम चानहेङ तिम्पाखे। इदोइ खान्तेङ बारा काम वा चानहेङ तिम्पावा रो नेलाइ भारभुसाइस्वाना। 21हाइदोनु जेसापा आबा सिकालाइहेङ सिन्हुपाखे रो एम्बालाइहेङ ज्यान पिखे। एन्सा दोङ चान बुङ जाइहेङ लाल्सा पाखे, इङकोहेङ ज्यान पिखे। 22हाइपानु आबा हासुकोङ निया मापाखे, कुलाउ गोताङ निया पाका काम चानहेङ पिकाहि, 23कोलाउ झाराङ चानहेङ मान पाको, जेसापा एम्बालाइ आबाहेङ मान पाखे। चानहेङ मान मापाकालाइ वासेहेङ दिङगिल्का आबाहेङ बुङ मान मापाखे।
24“जातिङको, का नेलाइहेङ दोअ्ताङका, जाइ काङको कथन हिङखे रो कासेहेङ दिङगिल्काहेङ खान्धुर पाखे, इङकोदोफा असिम ज्यान हि। इङको नियाता मालोखे, कुलाउ सिकासो इङको ज्यानता दुल्का हि। 25जातिङको, का नेलाइहेङ दोअ्खा, इङको पहर लोदोङखे रो इङको पहर एलाङ एइ, जेलाउ सिकालाइ परमेस्वरको चानको गाला हिनावा रो हिङकालाइ सिन्हुतावा। 26हाइदोनु जेसापा आबा ताइमिङता ज्यान हि, एन्सा दोङ वा चानहेङ बुङ ताइमिङता ज्यानको मुल जेङका खाबरा पिका हि। 27कालाउ वासेहेङ नियाको ठहर पाका खाबारा पिका हि, हाइदोनु वा द्याङको चान एइ।
28“इदोइता माभारभुसाइसु, हाइदोनु इङको पहर लोदोङखे, जेलाउ तोमता हिकालाइ झाराङ द्याङको चानको गाला हिनावा रो बाहार ओल्हेतेङ ल्वावा। 29कालाउ रेम्का काम पाकालाइचाहिँ सिन्हुतेङ असिम ज्यान निनावा रो मारेम्का काम पाकालाइ चाहिँ दार भोग्यावा।#दानिएल १२:२
30“का ताइमिङ हाइदोङ पालि मादोखा। जिसिका का हिङखा, इन्सिकाङ निया का पाखा रो काङको निसाप मुनासिप जेङखे, हाइपानु का ताइको लाल्सा माभोखा, कुलाउ कासेहेङ दिङगिल्काको लाल्सा भोखा।
31“एदि का ताइको बारेता ताइमिङ दासि पिघा पानु काङको दासि सत माज्यावा। 32काङको बारेता दासि पिका परमेस्वर आबा हि रो वा काङको बारेता जेदोङ दासि पिखे, इङको दासि सत ठर्ह्यावा।
33“नेलाइ चिभुअ्लि पिका युहन्नाकोता हिअ्लि दिङगिलसुन्हा, कालाउ वा सतको दासि पिका हि।#युहन्ना १:१९-२७; ३:२७-३० 34का र्हुका पाका दासि द्याङको माको, कुलाउ नेलाइको छुटकारा ज्याको दोअ्तेङ का इदोइ काथा दोअ्खा। 35युहन्ना जोल्का रो चिल्काका गिसा हिघाखे रो नेलाइ वाको फाइसालाम्काता आतुइसा पहर खिनिङ लेङचालि राजि जेङसुन्हा।
36“कादोफा जाइ दासि हि, इङको युहन्नाको खान्तेङ बाराका हि। हाइपानु जेदोङ कामगेलाइ आबा कासेहेङ पिकाहि, इङको काम का पादोङखा। कालाउ वाआङ काङको बारेता दासि पिदोङखे, आबा कासेहेङ दिङगिल्का एइ। 37कासेहेङ दिङगिल्का आबा ताइमिङ काङको बारेता दासि पिका हि। वाको गाला नेलाइ हेअ्लाउ हिङका मान्थुसुन्हा रो वाको आकार बुङ हेअ्लाउ तिङका मान्थुसुन्हा।#मत्ति ३:१७; मर्कुस १:११; लुका ३:२२ 38वाको कथन नेलाइता माहिखे, हाइदोनु जाइहेङ वा दिङगिल्हि, नेलाइ वासेहेङ खान्धुर मापासुखेना। 39नेलाइ धरमकिताबता भोसुखेना, हाइदोनु इन्ता असिम ज्यान निङखे दोअ्तेङ नेलाइ फोमपासुखेना। 40काङको बारेता दासि पिका इङकोङ धरमकिताब एइ, कुलाउ नेलाइ ज्यान निङलि काता लोलि इन्कार पासुखेना।
41“का द्याङगेलाइसो बाखिन्का भोका माको। 42कुलाउ परमेस्वरको इन्ताना नेलाइता मान्थु दोअ्तेङ का गेखा। 43का ताइको आबाको मिङता लोका हिघा, कुलाउ नेलाइ कासेहेङ मार्हुसुखेना। भेनेङ हासुङ ताइकोङ मिङता लोहि पानु इङकोहेङ र्हुस्वाना। 44नेलाइ हेसापा खान्धुर पालि दोस्वाना, जेलाउ बे नेलाइ मान भोसुखेना। कालाउ इङको मानको भोका मापासुखेना, जाइ एखिनिङ परमेस्वरसो लोखे।
45“का नेलाइहेङ आबाको आगाता फतुर लागायाङका दोअ्तेङ फोममापासु। नेलाइहेङ फतुर लागाइका ते मोसा हि, जाइता नेलाइ ताइको आस ताअ्का हिसुन्हा। 46हाइदोनु नेलाइ मोसाहेङ खान्धुर पाका हिनु कासेहेङ बुङ खान्धुर पासुधाना, हाइपानु वा काङको बारेता लेखेका हिघाखे। 47कुलाउ नेलाइ वाको लेखेका काथागेलाइ खान्धुर मापासुन्हा पानु, काङको दोअ्का हेसापा खान्धुर पास्वाना?”
Currently Selected:
युहन्ना 5: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
