मर्कस् 8
8
1ओहाङःसैको यात् दीन्हाङः फेरीलेः नाःतो मान्ता हुम्ती वाङ्आकाय्। वाङ्आक्तीको ओउःमयःइ वानःओ जेःगा सोय्ह्ती द्योक्लेःआ त झ्यान्ते येसुइ लयःकुस् वाह्ओमयःकायः गोत्ती 2“लौ इ मान्तालम्पाय् ङाकुस् सुम् दीन्च्युक् मुआक्ती द्याह्पाय् ओउःमयःकोः जेःगा नाःल। ओउःमयःकोः योङ्क्राय्ओ योती ङाकायः आन योनःआताङः। 3लःलयःमयःकोः कीम्ताङ् जेःगा बयःमाःत ल्होक्नाङःसु त खेःया ल्याम्हाङः योङ्क्राय्इ तोय्ङ्ती तोन्चै कोय् कोय् आन लोक्तोसै वाङ्आकाय्” त दाय्ह्ती येसुइ तोथासतो 4“इलो खेःओ मान्ता याक्मालो बेलाङ्हाङः गत हायःती इच्युक् नोःतोलम्कायः सोर्चाःथास” त दाय्ह्ती येसुकुस् वाह्ओमयःइ व्हत्आथै। 5“नीङ्कःहाङः गुच्युक्केरः लाङ् मुनाः ती” त दाय्ह्ती येसुइ व्हत्थासतो “सात्केरःलेः” त ओउःमयः दाय्ह्ती त्याङ्आकाय्। 6ओहाङःसैको येसुइ ओउः हुम्ती मुओलम्कायः लाङ्गनःहाङः च्युङःताक्ती ओउः सात्केरः लाङ्पाय् त्याक्ती परमेस्वर्कायः “च्युता” त दाय्ह्ती तोआकान्। एत “च्युता” त तोआक्तीको ओउः लाङ् फन्ह्ती लयःकुस् वाह्ओमयःकायः ल्हाती सबैकायः दोल्कावःताक्आकान्। 7फेरी यात्नीस् र्युम्ह्ङाःमा येसुइ ओउःतलेः त्याक्ती परमेस्वर्कायः तोआक्तीको सबैकायः दोल्कावःताक्आकान्। 8ओहाङःसैको ओउः दोल्कावःओ जेःगा जेःती सबैइ तुक् कोस्तोलेः जेःआकानी। जेःआक्तीको वेओ य्हुन्ह्लम् रोत्ती सात्गोता धाकर्हाङः ब्लीङ्तो काआकानी। 9य्हुन्ह्लम् धाकर्हाङः काआक्तीको हुम्ओ मान्तालम्कायः येसुइ पाय्ह्लाङ् ल्होक्आथास। ओउः हुम्ती मुओलम्पाय् चार् हजार् खेःइतो।
10ओहाङःसैको हुम्ओ मान्तालम् पाय्ह्लाङ् ल्होक्आक्तीको येसुमा लयःकुस् वाह्ओमयःमा दोङ्गाहाङः लन्ह्ती आल्ती दल्मनुथा त तोओ देस्हाङः दाह्ती वाङ्आकाय्। 11ओहाङः दाह्ती वाङ्आक्तीको फरीसीलम् येसुकःताङ् वाङ्ती “लौ परमेस्वर्कायः तोती ङीकायः ग्याङ्ह्राय् छ्यानःताङी दा” त दाय्ह्ती “ओउःइ खाय्नौया खाय्उलुया” त म्हर्ती योलाङ् वाङ्ती तोआकानी। 12ओउःत तोओ सायःआक्तीको येसु ल्हुङ्हाङः ल्हय्ङ्ह् सास्ती “तेन्छ्याङ्कोः मान्तालम्पाय् दोह् हायःतीतेः आन ग्याङ्ह्राय् योसा बोङःतेःनानी। दोङ्सी दाय्ह्भनाङ् नीङ् ग्याङ्ह्राय् योसा बोङःओलम्कायः ग्याङ्ह्राय्कोः दोह्मा छ्यानःतेःइली” त दाय्ह्ती येसु दाय्ह्आ। 13एत दाय्ह्आक्तीको येसु आल्ती फेरी दोङ्गाहाङः लन्ह्ती ताङ्ह्ओ दुम्हान्कोः उःसै आल्आकाय्।
14ओहाङःसैको आल्तोक्हाङः येसुकुस् वाह्ओमयःइ जेःगा वानःसा म्हेःआकानी ओउः दोङ्गाहाङः यात्केरः लाङ् ह मुओ 15ओउःत चीःती “लौ नीङ्इपाय् धय्ती योसा खेःतेःइतो। फरीसीकोःमा हेरोद् राजाकोः लाङ् फोताक्सा ओखोत् त्याक्तेःचानी” त दाय्ह्ती येसुइ गानाक्ती तोथासतो 16“लौ ङीइ लाङ्पाय् वानःतय्हीली त झ्यान्ते ओउःतलेः तोआताङी” त दाय्ह्ती येसुकुस् वाह्ओमयः लयःमयःकुस् नोःकाय्आकाय् 17ओउःमयः नोःकाय्ओ कुरा येसुइ चीःती “दोह् हायःतीतेः ‘लौ ङीइ लाङ् वानःतय्हीली त झ्यान्ते ओउःत तोआताङी’ त दाय्ह्ती नोःकाय्तेःनै। ओउःपाय् खेःल बा। नीङ्इ ङाकोः कुरा पेतो चीःतेःधाङ्तेःनीलीया चीःसापाय् चीःसालेः खाय्तेःनानी नीङ्कोः ल्हुङ् ग्यामालो यादो। 18नीङ् मीक् मुओलेः च्यवःतेःनीली नो मुओलेः सायःतेःनीली ओउः ङाइ जाङ्ह्ओ म्हेःतेःआकानी यादो। 19अनम्ह् ङाइ पास्केरः लाङ् फन्ह्ती पास् हजार्च्युक् मान्तालम्कायः सोर्ती बयःआलाङःसु ओउः बेलाहाङः गुच्युक् धाकर्कायः ब्लीङ्ताक्ती वेआ य्हुन्ह्लम् रोत्ती कातेःआकानी” त दाय्ह्ती येसुइ व्हत्आथास “बारगोताकायः” त त्याङ्आकाय् 20“फेरी अरु बेलाहाङः ङाइ सात्केरः लाङ् चार् हजार्कायः सोर्आक्तीको ओउः बेलाहाङःलेः गुच्युक् धाकर्कायः ब्लीङ्तो कातेःआकानी” त दाय्ह्ती फेरी व्हत्माआथास। 21“सात्गोतालेः” त दाय्ह्ती त्याङ्आकाय् “ओउःत खेःओ नीङ्इ ङाकोः कुरा चीःतेःधाङ्तेःनीलीया” त दाय्ह्ती येसु नोःआ।
22ओहाङःसैको दोङ्गाहाङः वाह्ती आल्ती बेथ्सैदा त तोओ गाव्ताङ् दाह्ती वाङ्आकाय्। ओहाङः दाह्ती वाङ्आक्तीको येसुकःताङ् यात्चाक् मीक् जुगाङ् लोक्ओ मान्ता काःहाल्लाङ् वानःती “लौ इकायः च्यवःताक्साकायः दीन्ह्उ दै” त दाय्ह्ती तेती तोआकानी। 23एत तेती तोआक्तीको येसुइ ओउः मीक् लोक्ओ मान्ताकायः गाव् बाहीरताङ् ज्योती लात्ती आलःआथै। ओहाङः आलःआक्तीको येसुइ ओउः मीक् लोक्ओ मान्ताकोः मीक्हाङः द्युर् द्युरःती लयःकोः क्रुत्इ झाम्आथै। क्रुत् झाम्आक्तीको “लौ नाङ्इ द्याह् च्यवःतेःनौया च्यवःतेःधाङ्तेःउलुया” त दाय्ह्ती व्हत्आथै। 24ओहाङःसैको ओउः मान्ता त्यास्ती योती “माः रैस मान्तालम्पाय् वाह्ओ सीङःलो लेखा रब रब त च्यवःनाङः बा” त दाय्ह्ती ओउः मीक् लोक्ओ मान्ता त्याङ्आ। 25ओउःत झ्यान्ते येसुइ ओउःकोः मीक्पाय् फेरीले दीन्ह्आथै। दीन्ह्आक्तीको ओउः मान्ताकोः मीक् पेतो स्याक्ती लेङःचेर् त च्यवःआकान्। 26“लौ द्याह् ओउः गाव् भीत्रताङ् द्यान्ह्माःत लयःकोः कीम्ताङ् पाय्ह्अ। फेरी ङाइ जाङ्ह्ओ काम्पाय् सुकायःमा ल्हाक्ती छ्यान्ह्तेःचनौ” त दाय्ह्ती येसुइ पाय्ह्लाङ् ल्होक्आथै।
27ओहाङःसैको ओउः मान्ताकायः ल्होक्आक्तीको येसुमा ओउःकुस् वाह्ओमयःमा सीजारीया फीलीपी त तोओ देस्ताङ् दाह्ती ओहाङःकोः गाव् गाव्हाङः तोमःती आल्आकाय्। आल्ती ल्याम्हाङः वाह्तोक्हाङः “लौ ङाकायःपाय् मान्तालम् गत नोःनै ‘इपाय् सुलो’ त व्हत्तोक्हाङः मान्तालम् गत गत त्याङ्नै” त दाय्ह्ती येसुइ ओउःकुस् वाह्ओलम्कायः व्हत्आकान्। 28“यात्नीस्खे नाङ्कायः ‘बाप्तीस्मा बयःओ युहना लेःआः’ त नोःनै अरुखे ‘एलीयालेः’ अरुखे ‘यात्चाक् परमेस्वर्कोः कुरा छ्यानःओ मान्ता लेःआः’ ओउःतलेः दाय्ह्ती नोःनै” त दाय्ह्ती ओउःमयः त्याङ्इतो 29“लौ नीङ्खेइ गततेः तोतेःनानी” त दाय्ह्ती येसुइ व्हत्थासतो “नाङ्पाय् परमेस्वर्इ तोती गम्ओ ख्रीस् लेःतेःआः” त दाय्ह्ती पत्रुस् त्याङ्आ। 30एत त्याङ्आक्तीको “लौ इ कुरा सुकायःमा छ्यान्ह्तेःचानी दा” त दाय्ह्ती येसुइ तोआथास।
31ओहाङःसैको येसुइ अरु कुरालेः स्यान्ती तोती “ओउः मान्ताकोः चोः त तोओपाय् आन लीह्ओ गोरःसा खेःतो यहुदीलम्कोः ताङ्ह्ओ मान्तालम्मा धर्मा स्यान्ओमयःमा ताङ्ह्ओ पुरोहीत्लम्इमा ल्हुङ् मल्ह्तो स्याव्ती ओउः मान्ताकोः चोःकायः सात्नानी। ओउःकायः सात्सापाय् सात्नीतो सुम् दीन् पुत्आक्तीको ओउःपाय् उह्ती च्योक्तीलेः वाङ्नाः” त दाय्ह्ती येसुइ लोने स्याव्सा कुरालेः क्लोनःतो स्यान्ती तोआथास। 32ओउःत तोओ सायःआक्तीको पत्रुस्इ येसुकायः एकान् मुसा थाव्ताङ् आलःती “लौ इलो ताङ्ह्ओ कुरा स्याव्साकायः स्याव्लाम्” त दाय्ह्ती काय्थातो 33येसुखे ल्हेःती अरु लयःकुस् वाह्ओमयःकायः योती “लौ पाय्ह्अ नाङ्पाय् सैतान् त तोओलेः परमेस्वर्कोः कुरा म्हर्माःत मान्ताकोः कुरा झुङ्आले म्हर्तेःनाः बा” त दाय्ह्ती पत्रुस्कायः जान्आकान्। 34ओउःत जान्ती तोआक्तीको येसुइ लयःकुस् वाह्ओमयःकायःमा अरु हुम्ती मुओ मान्तालम्कायःमा ओउःकःताङ् स्यान्लाङ् गोत्आकान् “लौ सुसु ङाकुस् वाह्सा म्हर्नै ओउःलेः लयः झाक्ओ कुरा म्हयःसती ङाकुस् वाह्सा थेङा लीह्सीःओ गोरःसामा सीसापाय् सीच्युक्लेः ग्याती मुसा खेःतो। 35सुसुखे ङाकोः काम् जाङ्ह्सा थेङालेः ‘लौ ङा झाक्ओ कुरा फेसामा ग्याङल ङा सीसामा ग्याङल’ त म्हर्चै ओउःलेः लोनेः सीती वाय्तो स्याव्लेःनै। सुसुखे ङाकोः काम् जाङ्ह्सा थेङा सीबत्नाःताङः ओउःपाय् रौ जीङः दोःलेःनै। 36माः रैस यात्चाक्इ ल्हाव्ह्दैबाङ्कोः सबै दोःसाकायः लयःकोः जीङः वाय्ओ लेःआः ओउःपाय् दोह् पेतो स्याव्चाः र आह्रेलेः दोःओआः बा। 37लयःकोः जीङःपाय् मान्ताइ लेःसा जुगाङ् दोःल दोह् खेःयामा बयःती लेःसा दोःल। 38सुसुलो तेन्छ्याङ्कोः रेव्तो जाङ्ह्ओ मान्तालम्कःहाङः ङाकःमा ङाइ तोओ कुराकःमा ब्लाय्क्चनै ओउःकः ङा मान्ताकोः चोः त तोओपाय् लोनेः वाङ्सा दीन्हाङः ब्लाय्क्लेःनाः। ओउः दीन्हाङःपाय् ओउः मान्ताकोः चोः आपालो लेखा अङ्ग थङ्गत ताङ्ह्तो स्याव्ती ल्होक्ओमयःकुस् वाङ्नै” त दाय्ह्ती येसुइ स्यान्ती तोआथास।
Currently Selected:
मर्कस् 8: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
