मर्कस् 10
10
1ओउःतलेः येसुइ स्यान्ती तोआथास ओहाङःसैको तोआक्तीको येसु चीङ्ती आल्ती यहुदीया देस्हाङः च्योल्ती योर्दन् खोला त्यात्ती ओउः खोलाकोः उःसैकोः दस्ताङ् दाह्आकाय्। ओहाङः दाह्आक्तीको फेरीलेः मान्तालम् येसुकःताङ् हुम्ती वाङ्आकाय्। ओउःमयःकायः येसुइ अनम्ह्लो लेखा स्यान्आथास। 2ओहाङःसैको स्यान्तोक् बेलाहाङः ओउः फरीसी त तोओलम् येसुकःताङ् ल्हुङ्तुक् योलाङ् वाङ्ती “लौ गोय्चोःपाय् लयःकोः बुधीकायः सीङ्का तात्ती बयःसा स्याव्नाःया स्याव्लया गततेः तोतेःनाः” त दाय्ह्ती व्हत्थातो 3“मोसा त तोओइ नीङ् यहुदीया मान्तालम्कायः गत तोतेःआकाय्” त दाय्ह्ती येसु दाय्ह्आ। 4“ ‘सीङ्का तात्ओ कागत् लेखआक्तीको मान्ता लयःकोः बुधी फेसा स्याव्लेःनाः’ त दाय्ह्ती मोसाइ ताक्आकान्” त दाय्ह्ती फरीसीलम् त्याङ्इतो 5“माः रैस ओउःतलेः ताक्उतो नीङ्कोः ल्हुङ् चाक्तो स्याव्ती परमेस्वर्कोः ङ्हा बयःओ कुरा सायःसा ग्यातेःइली ओउःत खेःओकायः ह मोसाइ सीङ्का तात्ओ कुरा तोती लेखओ खेःतो। 6ल्हाव्ह्दैबाङ् जाङ्ह्तोक्हाङःसै परमेस्वर्इ गोय्चोःमा मोमःचोःमा नीस् जात्लेः जाङ्ह्ती गम्आकान्। 7ओउःत झ्यान्ते यात्चाक् गोय्चोःपाय् लयःकोः आमा आपाकोः कीम् फेती लयःकोः बुधीकुस् भेनाःच। 8ओहाङःसैको ओउःनीस् पय्क्चाः आङ् ब्राङ्ती काःतय्ङ्ह्ती यातैज्योः मान्तालो लेखा स्याव्नाःच। 9ओउःत खेःओ सुसु पय्क्चाःनीस्कायः परमेस्वर्इ काःतय्ङ्ह्ती बयःआकान् ओउः नीस्कायः सुइमा फेकाय्ताक्लाम्” त दाय्ह्ती येसुइ तोआथास। 10एत तोआक्तीको येसु कीम्हाङः पोक्आक्तीको ओउःकुस् वाह्ओमयः “ओउः सीङ्का तात्ओ कुरा पेतो छ्यानःताङी दै” त दाय्ह्ती व्हत्आथै। 11“लौ सुसुइ लयःकोः बुधी फेती अरु मोमःचोः वानःचानी ओउःइ ङ्हाकोः बुधीकायः रेव्तो हायःती जार् जाङ्ह्नानी। 12फेरी सुसु मोमःचोःइ लयःकोः बुधा फेती अरु गोय्चोःकः पाय्ह्चै ओउःइलेः ङ्हाकोः बुधाकायः रेव्तो हायःती जार् जाङ्ह्नानी” त दाय्ह्ती येसु त्याङ्आ।
13ओहाङःसैको ओउःत त्याङ्आक्तीको मान्तालम्इ हौलम्पाय् “इकायः दीन्ह्पाःथै” दाय्ह्ती येसुकःताङ् वानःसा बोङःनीतो येसुकुस् वाह्ओमयःइ जान्ती येसुकःताङ् वाङ्सा ताक्थासल। 14एत खेःओ च्यवःती येसु ल्हुङ् मल्ह्ती “खेःल इ हौलम्कायः त्याःलाम् ङाकःताङ् वाङ्पै। इलो खेःओलम्पाय् परमेस्वर्कोः राजीहाङः मुसा दोःलेःनै। 15दोङ्सी दाय्ह्भनाङ् परमेस्वर्कोः राजी पोक्साकायः नीङ्इ हौलम्लो लेखा स्याव्ती ङ्हाम्सा खेःतेःनै बा खेःतेःल त खेःया पोक्सा दोःल” त दाय्ह्ती 16येसुइ हौलम्कायः स्योताङ् स्योताङ् लयःकोः खोक्हाङः गम्ती क्रुत्इ दीन्ह्ती ओउःमयःकायः परमेस्वर्कः तेती तोआकान्।
17ओउःत हायःआक्तीको येसु चीङ्ती आल्आ। आल्ती वाह्तोक्हाङः यात्चाक् तन्ती येसुकायः स्यवलाङ् वाङ्आ। येसुकायः बाःती स्यवती “अ जय्कुमःओ गुरुय ङापाय् सीआक्तीको गलमा द्योक्मालो रौ जीङः दोःसाकायः ङाइ द्याह् दोह् हायःसा खेःनाङः ती” त दाय्ह्ती व्हत्थातो 18“ङाकायःपाय् दोह् हायःतीतेः ‘जय्कुमःओ’ त तोतेःनाःची। परमेस्वर् झुङ्आले जय्कुमःओलेः खेःनाः बा। 19लौ परमेस्वर्इ उय्ह्लेहाङः गानाक्ती बयःओ ऐन्कोः कुरा नाङ्इ चीःतेःनौ। मान्ताकायः सात्लाम् अरुकोः बुधीकुस् जार् जाङ्ह्लाम्। अरुकोः माल्ताल्लम् कुःलाम्। अरुकायः माःती गाल्तुम्ती तोओ कुरा नोःलाम्। अरुकोः पैसा जेःलाम्। लयःकोः आमा आपाइ तोओ कुरापाय् पेतो वाय्क्तीलेः जाङ्ह्उ। इ सबैलेः जाङ्ह्सा खेःतो” त दाय्ह्ती येसु त्याङ्आ। 20“अ गुरुय इ ङाइ हौलम् खेःतोक्हाङःसैकोः जुदालेः सायःती गम्आलाङः” त दाय्ह्ती ओउः मान्ता दाय्ह्आ। 21ओउःत दाय्ह्आक्तीको येसुइ ओउः मान्ताकायः राप्ती योआथै “नाङ्इ यातै कुरा हतेः जाङ्ह्तेःधाङ्तेःउलु। लौ पाय्ह्ती नाङ्कोः गह्र्पाय् दोह् गुच्युक् मुनाः ओउःच्युक्लेः जुदा वीनःउ दा। वीनःआक्तीको ओउःकोः मोल्कोः पैसापाय् जेःसा दोःमालो ह्र्यात्लम्कायः वेःती बयःउसु ओहाङःसैको सबै फेती ङाकुस् वाह्अ। ओउःत हायःआक्तीको लाङ्काहाङः नाङ्पाय् आनतेः दोःतेःनाः बा” त दाय्ह्ती येसुइ तोथातो 22ओउः कुरा सायःती ओउः मान्ता ल्हुङ् झ्योम्ती आन लीह्ती पाय्ह्आ ओउःपाय् आन साहु खेःतो। 23ओउः मान्ता लीह्ती पाय्ह्आक्तीको येसुइ लयःकुस् वाह्ओमयःकायः त्यास्ती योती “ओउःच्युक् नाःतो नाःओ मान्ताकायः परमेस्वर्कोः राजीताङ् पोक्सा आन चाक्तो लेःआः बा” त दाय्ह्ती येसु दाय्ह्आ 24ओउःत दाय्ह्ओ सायःती येसुकुस् वाह्ओमयः अलङ् धलङ्त सायःआकायःइसी “माः है हौलम्य परमेस्वर्कोः राजीहाङः पोक्साकायः पैसा झाक्ती क्युओलम्कायः आन चाक्जेःतो। 25ओउःत हायःओसै उत्स्याः ग्याप्कोः घाङ्हाङः योल्ह्ती ज्याल्सा ङोस्आनाः बा” त दाय्ह्ती येसुइ तोआथास। 26ओउःत तोओ सायःआक्तीको येसुकुस् वाह्ओमयः न्हाङ्तोलेः ग्याङ्ह्ती “ओउःत खेःया सुलो ओउःकोः राजी पोक्ती रौ जीङः दोःचै” त दाय्ह्ती नोःकाय्आकाय्। 27ओउःमयः नोःकाय्ओ चीःती येसुइ “एत जाङ्ह्सालेः मान्ताखेइ जुगाङ् खाय्नीली परमेस्वर्खेइ दोह् खेःयाकायःमा जाङ्ह्सालेः खाय्आनौ” त दाय्ह्ती तोआथास 28“लौ ङीपाय् जुदालेः फेती नाङ्कुस् वाह्ओ लेःआः ङी” त दाय्ह्ती पत्रुस् दाय्ह्आ। 29“दोङ्सी दाय्ह्भनाङ् सुसुइ ङाकायःमा ङाकोः पेओ समचार् तोसाकायःमा लयःकोः कीम्मा लयःकोः आमा आपालम् चोःलम् बुधीमा नाःचोङ् पुःचोङ्लम्मा राङ्लम्मा फेबत्नाःताङः 30ओउः मान्तालेः आन नाःतो कीम्लम् राङ्लम् आमा आपालम् चोःलम् पुःचोङ् नाःचोङ्लम्मा इ ल्हाव्ह्दैबाङ्हाङः मुतोक्हाङः न्हाङ्तोलेः दोःनै। इपाय् दोःआनाः लीह्सीःओमा वाङ्लेःनाः लोन्ते ओउःकायः गलमा द्योक्मालो रौ जीङःमा दोःआनाः। 31नाःतो तेन्छ्याङ्कोः ताङ्ह्ओ मान्तालम्खेपाय् लोन्तेसै मीतो स्याव्नै अरु तेन्छ्याङ्कोः मीओ मान्तालम्खे लोन्ते ताङ्ह्ओ स्याव्नै” त दाय्ह्ती येसुइ तोआथास।
32ओउःतलेः येसुइ तोआथास ओहाङःसैको यरुसालेम्ताङ् आल्ओ ल्याम्हाङः वाह्तोक्हाङः येसुखेइ ङ्हासै स्यालःती वाह्ओ खेःतो। एत च्यवःती ओउःकुस् वाह्ओमयः ग्याङ्ह्ती “यरुसालेम्हाङः दोह् दयःनाः” त म्हर्ती रैती गुल्ह्आथै। ओहाङःसैको येसुइ ओउः बारजन लयः छ्युङ्ह्ओमयःकायः लयःकःताङ् गोत्ती ओउःकायः लोने स्याव्सा कुरा स्यान्आथास। 33“लौ ङीपाय् द्याह् यरुसालेम्ताङ् आल्नाःतय्ही। ओहाङः दाह्तोक्हाङः ओउः मान्ताकोः चोःत तोओकायः अरुइ चुम्ती ताङ्ह्ओ पुरोहीत्लम्मा धर्मा स्यान्ओमयःकःताङ्मा दाक्नाःथै। ओउःमयःताङ् दाक्आक्तीको ओउः ताङ्ह्ओ पुरोहीत्लम्मा धर्मा स्यान्ओमयःइमा ‘लौ इकायः सात्साआः’ त दाय्ह्ती ओउःकायः यहुदी खेःमालोलम्कःताङ् सात्लाङ् दाक्नानी। 34ओउः यहुदी खेःमालोलम्कःताङ् दाक्आक्तीको ओउःकायः रेव्तो हायःती हेला क्लाःती द्युर् द्युरःतीमा लाइ स्राप्आक्तीकोमा सात्लेःनानी। सात्सापाय् सात्नानी सुम् दीन् पुत्आक्तीको ओउःपाय् उह्ती च्योक्आनाः” त दाय्ह्ती येसुइ लयःकायः स्याव्सा खेःओ कुरा छ्यान्ह्आथास।
35ओहाङःसैको जबदी त तोओकोः गोय्चोःचोःनीस् याकुब् युहना त तोओ येसुकःताङ् वाङ्ती “लौ गुरुय नीचीकायः यात्ज्योः कुरा जाङ्ह्चाक्ताङःच दै” त दाय्ह्ती तोआकाचु 36“लौ उया दोह्तेः झाक्तेःनाःज तोनाङ्ज” त दाय्ह्ती येसु त्याङ्आ 37“लौ नाङ्कोः राजीहाङः नीची नीस् पुःचाःकायः मन्तरी स्याव्ताक्ताङःच दै यात्चाक् नाङ्कोः ङोय्सै यात्चाक् नाङ्कोः वेःसै च्युङःती स्याव्पाङःच” त दाय्ह्ती तेआकाच 38“दोह्लो ततेः तेआकाज नीङ्जीइ तय्ह्तेःजुलु। ङाच्युक् लीह्जम् लीह्ओ नीङ्जीइ गोरःसा खाय्तेःचाःजुया खाय्तेःजुलु” त दाय्ह्ती येसुइ व्हत्थाचतो ती 39“खाय्नाङःचु है” त दाय्ह्ती त्याङ्आकाच “माः रैस नीङ्जी ओउःच्युक् लीह्ओ गोरःसातेः गोरःतेःनाःज बा 40मन्तरी गम्ओ हुकुम् बयःसा बुरु ङापाय् खेःङल ङाकोः आपाइ छ्युङ्ह्ओ मान्तालम् ह ओउःलेः ङाकोः ङोय्सै वेःसै च्युङःसा दोःनै” त दाय्ह्ती येसुइ तोआथाच। 41ओहाङःसैको ओउःनीस्कुस् नोःकाय्ओ कुरा सायःती ओउः अरु दस्जन याकुब् युहना नीस्पुःचाःकः ल्हुङ् मल्ह्आकाय्। 42ओउः दस्जन ल्हुङ् मल्ह्तो स्याव्ओ त येसुइ चीःती ओउःमयःकायः गोत्ती “लौ ल्हाव्ह्दैबाङ्कोः यहुदी खेःमालो मान्तालम्कोः राजालम्मा ताङ्ह्ओ मान्तालम्इमा लयःकोः मान्तालम्कायः आन ज्योङःतोलेः गानाक्ती तोनानी इत नाङ्इ चीःतेःआकानी। 43-44नीङ्खेपाय् ओउः ताङ्ह्ओ मान्तालम्लो लेखा जाङ्ह्लाम्। सुसुतेः ‘ङाजा अरुसै ताङ्ह्ओ लेःआः ङ’ त म्हर्तेःनै ओउः मान्तालेः अरुकायः काम् जाङ्ह्सा मान्तालेः स्याव्सा खेःतो। 45ओउःलो लेखालेः ओउः मान्ताकोः चोःत तोओमा अरुकायः काम् जाङ्ह्ताक्लाङ् वाङ्ओ खेःल अरुकायः लयःइ काम् जाङ्ह्लाङ् वाङ्सामा ओउःमयःकायः ल्हाङ्ती सीसामा ग्याओ खेःतो” त दाय्ह्ती येसुइ तोआथास।
46ओउःतलेः येसुइ तोआथास ओहाङःसैको येसुमा ओउःकुस् वाह्ओमयःमा आल्दा आल्दापाय् यरीखो त तोओ सहर्ताङ् दाह्आकाय्। सहर्ताङ् दाह्आक्तीको ओहाङः च्योल्ती आल्तोक्हाङः ओउःमयःकुस् नाःतो अरु मान्तालम्मा वाह्आकाय्। वाह्तोक्हाङः यात्चाक् मीक् लोक्ओ पैसा युङ्ती तेओ मान्ता ल्याम्कोः छेव्सै तेधै मुओ खेःतो। ओउःकोः मय्ङ् बार्तीमै त तोओ ओउःकोः आपा तीमै त मय्ङ्ओ खेःतो। 47ओहाङःसैको ओउः मान्ता ल्याम्कोः छेव्सै मुतोक्हाङः “लौ नासरेत् गाव्कोः येसुलेः वाङ्आनाः” त दाय्ह्ओ सायःआक्तीको ओउः मीक् लोक्ओ मान्ताइ “अ येसुय नाङ् दावुद् राजाकोः प्लोमःदानेतेः ङाकायः योनःतीतेः सायःचाक्ची दै” त दाय्ह्ती आन गोःओ खेःतो 48नाःतो हुम्ओलम्इ “अ ङैमाःत मुअ” त दाय्ह्ती जान्ती तोथातो ओउःइ न्हाङ्तोलेः “अ नाङ् दावुद् राजाकोः प्लोमःदाने ङाकायः योनःतीलेः सायःचाक्ची दै” त दाय्ह्ती गोःआकान्। 49ओहाङःसैको ओउःकोः गोःओ सायःती येसु न्यास्ती “लौ ओउः गोःओ मान्तापाय् इताङ् गोत्ती वानःनु” त दाय्ह्आ अरुलम् “लौ ल्हुङ् धोमाय्ती मुअ। द्याह् चीङ्ती वाह्अ दा। येसुइ गोत्तेःनाः” त दाय्ह्ती ओउः मीक् लोक्ओकायः तोआथै। 50एत तोओ सायःती ओउः मान्ता लयःकोः क्रमःनाय् ल्ह्युन्आक् लुपुक्त चीङ्ती येसुकःताङ् वाङ्आ। 51येसुकःताङ् वाङ्आक्तीको “लौ नाङ्कायः दोह् हायःचेःनाङ्” त दाय्ह्ती येसुइ व्हत्आथै “अ प्रभु ङाकोः मीक् स्याक्ताक्बत्ची दै” त दाय्ह्ती ओउः मान्ता तेआ। 52“लौ उया नाङ्इ इतलेः ङ्हाम्तेःआची नाङ्कोः ङ्हाम्झ्याङ्कायः मीक् स्याक्तेःआ बा” त दाय्ह्ती येसु दाय्ह्ओ कुस्ब्रक्त ओउः मान्ताइ मीक्इ पेतो च्यवःआकान्। च्यवःआक्तीको येसुकायः गुल्ह्आकान्।
Currently Selected:
मर्कस् 10: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
