मत्ती 7
7
1अरुखेकायः गाल्तुम्ती नोःलाम् ओहाङःसैको उया परमेस्वर्इ नीङ्खेकायः तुम्ती तोतेःइली। 2गत हायःतीलो नीङ्इ अरुखेकायः तय्छनःती योती न्युम्ह्ताक्तेःनानी ओउःतलेः परमेस्वर्इ नीङ्खेकायः तय्छनःती योती न्युम्ह्ताक्तेःनै। 3नाङ्कोः लयःकोः मीक्हाङः मुओ सीङः च्यवःमाःत दोह् हायःतीतेः अरुकोः मीक्हाङः मुओ धान्ह् च्यवःतेःनौ। 4नाङ् मीक्पाय् सीङःइ जुगाङ् क्रावःतेःनाः त खेःया पेतो च्यवःमाःत झ्यान्ते नाङ्इ अरुकोः मीक्सै पोक्ओ धान्ह् वाय्सा गत हायःती खाय्तेःचौ र। 5लयःकोः मीक्हाङः पोक्ओ सीङः वाय्आक्सा खेःतो। ओउःत हायःआक्तीको ह अरुकोः मीक्सै पोक्ओ धान्ह् वाय्सा खाय्तेःनौ। इलो लेखा अरु मान्ताकायः पेमालो गाल्तुम्ओ कुरा नोःमाःत लयःकोः काम् पेतो जाङ्ह्आक्उ। 6प्याक्कायः मान्तालम्इ पेओ चीस्लम् बयःनीली उया ओउः चीस्पाय् प्याक्इ झोतीलेः वाय्नानी। ओउःलो लेखालेः परमेस्वर्कोः छय्ङ्तो कुरा रेव्तो मान्तालम्कायः बयःलाम् उया ओउः कुरापाय् दोह्मा म्हर्माःत नीङ्कायः लीह्सीःओ द्यान्ह्ती पाय्क्तेःनै।
7नीङ् परमेस्वर्कः तेती तोन ओहाङःसै ओउःइ बयःतेःनै बा। ओउःकोः कुरा बोङःनु ओहाङःसै नीङ् दोःतेःनै। ओउःकःताङ् धाङ्ती वाङ्न ओहाङःसै ओउःइ नीङ्कायः रोम्तेःनै। 8सुसुइ तेचनै ओउःकायःलेः दोःनै सुसुइ बोङःचानी ओउःइलेः च्यवःनानी सुसु धाङ्चनै ओउःपाय् रोम्ओलेः स्याव्नै। 9नाङ्कोः चोःपाय् नाङ्कःसै लाङ्खे तेचाः त खेःया सुइमा ‘लौ नोह्अ इपाय् लाङ्लेः’ त दाय्ह्ती बाङ्खे बयःचौ र। 10नाङ्कोः चोःपाय् ङाःखे तेचाः त खेःया सुइमा ‘लौ नोह्अ इपाय् ङाःलेः’ त दाय्ह्ती रुखे बयःचौ र। 11खेःल नीङ्इ लयःकोः चोःकायः पेतोलेः बयःतेःनानी बा। ओउःत झ्यान्ते नीङ् पेओ खेःमालोलम्खेइपाय् लयःकोः चोःलम्कायः पेतो बयःसा चीःतेःनानी त खेःया दोङ्सीलेः नीङ्कोः परमेस्वर् आपाखेइ ओउःकः तेओलम्कायः न्हाङ्तीलेः पेतो बयःनौ। 12फेरी दोह् दोह्लो अरुखेइ नीङ्कायः जाङ्ह्सा झाक्तेःचै ओउःलेः नीङ्खेइ अरुकायः जाङ्ह्नु दा। ओउःत हायःओ उय्ह्लेकोः आखरःहाङःमा परमेस्वर्कोः कुरा छ्यानःओमयःमा दाय्ह्ती स्यान्ओ खेःतो। 13लौ परमेस्वर्कोः मीतो उमःओ ल्याम्खेहाङः वाह्ती आल्न दा। ओउः होल्ओ क्राङ्ह् खेःमालो ल्याम्खेइ मान्ता ह्र्योङःताक्ती वाय्ओहाङः दाक्लेःनौ। ओहाङःखे नाःतो मान्तालम् वाह्नै। 14ओउः मीओ ल्याम्खे वाह्सा दुक्सापाय् दुक्लेःनाः पेतो जीङः दोःताक्ओहाङः दाक्नौ। ओउःखे नाःतो मान्तालम्इ च्यवःसा खाय्नीली।
15सु ना सु मान्तालम्इ ‘लौ ङापाय् परमेस्वर्कोः कुरा छ्यानःओ मान्ता लेःआः ङ’ त दाय्ह्ती माःतीलेः तोती वाङ्नै ओउःखेकायः पेतो योती धय्ती मुन ओउःमयःकायः योओ सायःओ बेलाहाङः ‘इ मान्तापाय् पेओलेः’ त ताःसीःनाः यादो खेःल ओउःमयःकोः ल्हुङ्तुक् जुगाङ् पेल। 16ओउःमयःइ जाङ्ह्ओ काम् योती ‘लौ इमयः दोङ्सीःओ तोओ मान्तालेः खेःल’ त चीःसा दोःतेःनै। राम्घाक्सीङःसै यसायः गलमा काव्ह्सा दोःल। राङ्चुःसै दुम्बुरीसायःमा काव्ह्सा दोःल बा। 17पेओ सीङःखेइ पेओ सायःलेः सायःनौ पेमालो सीङःखेइ पेमालो सायः सायःनौ माःदै। 18पेओ सीङःखेइ पेमालो सायः सायःसा खाय्माउलु। पेमालो सीङःखेइ पेओ सायः सायःसा गलमा खाय्उलु। 19ओउः सीङःखेकायः मान्ताइ ओल्ती खाम्ह्आक्तीको तुस्ओ सीङः जाङ्ह्नानी। ओउःलो लेखा ल्हुङ् रेव्ओ मान्तालम्इ पेओ काम् जाङ्ह्सा चीःनीली 20ओउःमयःइ पेओ काम् जाङ्ह्नीली त झ्यान्ते माःती तोओ स्यान्ओमयःकायः तय्ह्सा खाय्तेःनानी। 21ङाकायः ‘लौ प्रभु लेःतेःआः’ त दाय्ह्ती तोओमयःलम्कःहाङः सबै परमेस्वर्कोः राजीहाङः पोक्सा दोःइली। सुसुइ ङाकोः आपा झाक्ओ काम् जाङ्ह्नानी ओउःमयः झुङ्आले पोक्सा दोःनै। 22ओउः वाङ्सा खेःओ दीन्हाङः नाःतोलम्इ ङाकायः ‘अ प्रभुय ङीइ नाङ्कोः मय्ङ् पेह्ती परमेस्वर्कोः कुरा तोमाआलाङःसु लान्लम्कायः ल्हेस्ती वाय्ती आन ताङ्ह्ओ काम्लम् जाङ्ह्माआलाङःसु’ त दाय्ह्ती तोनाःताङः 23‘लौ नीङ् रेव्ओलम्कायः ङाइ गलमा तय्ह्नेःनाङ्सल ङाकःसै आल्न’ त दाय्ह्ती तोनाङःसु” त दाय्ह्ती येसुइ स्यान्ती तोआकान्।
24“ङाइ तोओ कुरा सायःती जाङ्ह्ओ मान्तापाय् कीम् जाङ्ह्साकायः पेतो चीःओ मान्तालो लेखालेः मुनै। ओउः कीम् जाङ्ह्सा चीःओ मान्ताइपाय् कीम्कोः रुत् चेनःबाङ्हाङः न्यास्ती गम्नौ 25ओहाङःसैको वेर् गाय्ध दर्कय्नी तीः वाङ्तोक्हाङः ओउः कीम्पाय् भमाःत ग्रमःतलेः मुनाः। गाय्ध वाङ्तोक्हाङः चेनःबाङ्हाङः जाङ्ह्ओ त झ्यान्ते ओउः कीम् ह्र्योङःल 26ङाइ तोओ कुरा ङ्हाम्ती जाङ्ह्सा ग्यामालो मान्ताखेपाय् कीम् जाङ्ह्सा चीःमालो मान्तालो लेखा मुनाः। ओउः मान्ताइपाय् कीम्कोः रुत् वङ्ह्ओ साःहाङः न्यास्ती गम्नौ। 27ओहाङःसैको गाय्ध वाङ्ती तीः वाती होती वाङ्तोक्हाङः ओउः कीम्पाय् भती जुगाङ् ह्र्योङःतीलेः वाय्नाः” त दाय्ह्ती येसुइ स्यान्ती तोआथास।
28-29ओउःत तोओ सायःआक्तीको ओउः हुम्ओ मान्तालम् “लौ इपाय् आन व्हाय्तोलेः तोनौ बा। अरुइ स्यान्माःत ओउःइ धर्मा स्यान्ओमयःसै लयः चीःती तोसा खाय्लेःनौ” त दाय्ह्ती ग्याङ्ह्ती नोःकाय्आकाय्।
Currently Selected:
मत्ती 7: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
