मत्ती 20
20
1“लौ परमेस्वर्कोः राजी इलो लेखालेः। यात्चाक् आन राङ् नाःओ मान्ता वाः गोःओहाङः खेत्ल्या बोङःलाङ् आल्आ। 2आल्ती खेत्ल्याकायः क्रुस्ती ‘लौ दीन्भरीकोः काम् जाङ्ह्झ्याङ्कोः ङाइ दस् रुपीया बयःनेःनाङ्स’ त दाय्ह्ती होम्काय्ती ओउः खेत्ल्याकायः काम् जाङ्ह्लाङ् ल्होक्आकान्। 3ओउःमयःकायः ल्होक्आक्तीको लोने न्याम् जुगाङ् दाह्ओ बेलाहाङः ओउः राङ् नाःओ मान्ताइ अरु अरु काम् जाङ्ह्सा बोङःओ मान्तालम् च्यवःआकान्। 4ओउःमयः च्यवःती ‘लौ ङाकायः राङ्कोः काम् जाङ्ह्लाङ् आल्न दा। नाङ्कोः जाङ्ह्झ्याङ्कोः पेतो बयःनेःनाङ्स’ त दाय्ह्ती ओउःमयःकायःमा ल्होक्आकान्। ल्होक्आक्तीको ओउः खेत्ल्यामा राङ्ताङ् आल्आकाय्। 5ओउःमयः आल्आक्तीको ओउः राङ् नाःओ मान्ताइ न्याम् तोकोतोय्ह्त मुओहाङःमा घेल्ती मुओहाङःमा अरु खेत्ल्याकायः क्रुस्ती काम् जाङ्ह्लाङ् ल्होक्आकान्। 6न्याम् याह्ओ बेलाहाङःमा अरु मान्तालम् क्रुस्ती ‘लौ दोह् हायःतीतेः दीन्भरीकायः काम् जाङ्ह्माःत ल्युङ्ह्ती मुतेःनै’ त दाय्ह्ती व्हत्उतो 7‘ङीपाय् काम् दोःङीली ओउःत झ्यान्ते ङी नल्आय् गुल्ह्आय्त मुआलाङी’ त दाय्ह्ती त्याङ्आकाय्। ‘लौ उया नीङ्मा ङाकोः राङ्ताङ् काम् जाङ्ह्लाङ् आल्न दा। नीङ्कोः जाङ्ह्झ्याङ्कोः पेतो बयःनेःनाङ्स’ त दाय्ह्ती ओउःमयःकायःमा ल्होक्आकान्। 8ओहाङःसैको न्याम् ब्लक्आक्तीको ओउः राङ् नाःओ मान्ता ‘लौ खेत्ल्यालम्कायः लःलयःकोः जाङ्ह्झ्याङ्कोः त्याक्साकायः वानःउसु दा। ओउः लोने वाङ्ओलम्खेकायः ङ्हा वानःती बयःउसु ओउः ङ्हा वाङ्ओलम्खेकायः लोने बयःउसु’ त दाय्ह्ती नोकरीकायः तोआकान्। 9ओहाङःसैको ओउः न्याम् याह्तोक्हाङः वाङ्ओलम्कायः दस् दस् रुपीया बयःथासतो 10-11ओउः बीहानसै काम् जाङ्ह्ओ मान्तालम्कायःमा ओउःतलेः दस् दस् रुपीया बयःआथास। एत च्यवःआक्तीको ओउःमयः ‘ङीखेकायः ओउः लोने वाङ्ओलम्सै न्हाङ्तोलेः बयःसा खेःतो’ त म्हर्ती लती 12‘लौ इमयः लोने वाङ्ओलम्खे यातै घन्ताकोः काम् जाङ्ह्ओ ह खेःइतो ङीखेइ दीन्भरीकायः न्याम् रावःओहाङः काम् जाङ्ह्आलाङःसु। इमयःकायःजा ङीकुस् घार्ती बयःसा स्याव्आक्ल बा’ त दाय्ह्ती ओउः राङ् नाःओ मान्ताकायः य्हवःती तोआकानी। 13‘लौ हौय ङाइ पेमालो जाङ्ह्ओ खेःङल। नाङ्कोः जाङ्ह्झ्याङ्कोः “दस् रुपीया स्याव्लेःनाः” त ङाकुस् होम्काय्ती तोतेःआची माःर। 14ओउःत खेःया नाङ्कोः पैसा त्याक्ती पाय्ह्अ। ङाइ लोने वाङ्ओलम्कायः नाङ्च्युक् नाःतो बयःसा झाक्लेःनाङः। 15ङाकोः पैसा ङाइ लयः झाक्ती बयःसा खाय्नाङः माःर। ङाइ लोने वाङ्ओलम्कायः पेतो बयःनाङःसु त खेःया दोह् हायःतीलेः ल्हुङ् मल्ह्तो स्याव्तेःनाः’ त दाय्ह्ती यात्चाक्कः त्याङ्आ। 16इतलेः परमेस्वर्कोः राजीहाङः ओउः लोने वाङ्ओलम्खे ङ्हा स्याव्नै फेरी ओउः ङ्हा वाङ्ओलम् लोने स्याव्नै” त दाय्ह्ती येसुइ स्यान्ती तोआथास।
17ओउःतलेः येसुइ स्यान्ती तोआथास। ओहाङःसैको यरुसालेम्ताङ् आल्ती आल्तोक्हाङः येसुइ ओउः बारजन छ्युङ्ह्ओमयःकायः लयःकःताङ् गोत्ती 18“लौ दा ङी द्याह् यरुसालेम्ताङ् आल्नाःतय्ही। ओहाङः दाह्आक्तीको ओउः मान्ताकोः चोः त तोओकायः अरुइ चुम्ती ताङ्ह्ओ पुरोहीत्लम्कःताङ्मा धर्मा स्यान्ओमयःकःताङ्मा दाक्नाःथै। ओउःमयःकःताङ् दाक्आक्तीको ओउः ताङ्ह्ओ पुरोहीत्लम्मा धर्मा स्यान्ओमयःइमा ‘लौ इकायः सात्साआः’ त दाय्ह्ती 19ओउःकायः यहुदी खेःमालो मान्तालम्कःताङ् सात्साकायः दाक्नानी। ओउःमयःकःताङ् दाक्आक्तीको ओउःमयःइ रेव्तो तोती लाइ स्राप्आक्तीको ओउःकायः क्ल्याय्ओ सीङःहाङः खील्इ योकोःताक्ती सात्नानी। सात्सापाय् सात्नीतो सुम् दीन् पुत्आक्तीको ओउःपाय् उह्ती च्योक्आनाः” त दाय्ह्ती येसुइ लयःकायः स्याव्सा खेःओ कुरा छ्यान्ह्आथास।
20ओहाङःसैको जबदीत तोओकोः गोय्चोःचोःनीस् लयःकोः आमाकुस् येसुकःताङ् तेलाङ् वाङ्आकाय्। वाङ्ती ओउःनीस्कोः आमाइ येसुकायः बाःती स्यवती 21“लौ दोह् दोह्तेः झाक्तेःनाः” त दाय्ह्ती येसुइ व्हत्थातो “लौ नाङ्कोः राजीहाङः ङाकोः चोःनीस्कायःजा मन्तरी स्याव्ताक्बत्ची दै। यात्चाक् नाङ्कोः ङोय्सै यात्चाक् नाङ्कोः वेःसै च्युङःती नाङ्कोः गुल्ह्दाङ् मान्तानीस् स्याव्जेःपाःच” त दाय्ह्ती तेआ। 22“दोह्लो ततेः तेतेःआकाज नीङ्जीइ तय्ह्तेःजुलु। ङाच्युक् लीह्जम् लीह्ओ नीङ्जीइमा गोरःसा खाय्तेःनाःजुया खाय्तेःजुलुया” त येसुइ दाय्ह्ती व्हत्थाचतो ती “खाय्आनाङःचु है” त दाय्ह्ती ओउःनीस् त्याङ्आकाच। 23“माः रैस नीङ्जी ओउःच्युक् लीह्ओ गोरःसातेः गोरःतेःनाःज बा। गुल्ह्दाङ् गम्ओ हुकुम् बयःसाचाक्लेः ङापाय् खेःङल ङाकोः आपाइ छ्युङ्ह्ओ मान्तालम् ह ओउःलेः ङाकोः ङोय्सै वेःसै च्युङःसा दोःनै” त दाय्ह्ती येसुइ तोआथाच। 24ओहाङःसैको ओउःनीस् येसुकुस् नोःकाय्ओ कुरा सायःती ओउः अरु दस्जन छ्युङ्ह्ओमयःइ ल्हुङ् जीक्आकाय्। 25ओउः दस्जन ल्हुङ् जीक्तो स्याव्ओ त येसुइ चीःती ओउःमयःकायः गोत्ती “लौ ल्हाव्ह्दैबाङ्कोः यहुदा खेःमालो जात्लम्कोः राजालम्इमा ताङ्ह्ओ मान्तालम्इमा लयःकोः मान्तालम्कायः आन खह्र्तोलेः गानाक्ती तोनानी इत नीङ्इ चीःतेःआकानी। 26-27नीङ्खेपाय् ओउः तोङ्ह्ओ मान्तालम्लो लेखा जाङ्ह्लाम्। सुसुतेः ‘ङाजा अरुसै ताङ्ह्लेःआनाङः’ त म्हर्तेःनै ओउः मान्ताइलेः अरुकायः काम् जाङ्ह्सा खेःतो। 28ओउःलो लेखालेः ओउः मान्ताकोः चोः त तोओमा अरुकायः ओउःकोः लयःकोः काम् जाङ्ह्ताक्लाङ् वाङ्ओ खेःल अरुकायः ओउःइलेः काम् जाङ्ह्लाङ् वाङ्ती ओउःमयःकायः रेव्ओसै दल्ताक्सा थेङा सीसा ग्याओ खेःतो” त दाय्ह्ती येसुइ तोआथास।
29ओउःतलेः येसुइ तोआथास ओहाङःसैको येसुमा ओउःकुस् वाह्ओमयःमा आल्दा आल्दापाय् यरीखो त तोओ सहर्सै आल्ती वाह्ओ बेलाहाङः अरु नाःतो मान्तालम् ओउःमयःकुस् हुम्ती वाङ्आकाय्। 30ओहाङःसैको हुम्ती वाह्तोक्हाङः नीस्चाक् मीक् लोक्ओ पैसा युङ्ती तेओ मान्ता ल्याम्कोः चीनःहाङः तेधै मुओ खेःचतो। ओउःनीस्इपाय् “लौ येसु वाङ्नाः” त दाय्ह्ओ सायःआक्तीको “अ प्रभुय नाङ् दावुद् राजाकोः प्लोमःदानेतेःआः बा। नीचीकायः योनःतीतेः सायःचाक्ताङःच दै। नीचीकायः योनःती सायःचाक्ताङःच दै” त दाय्ह्ती आन गोःचुतो 31येसुकोः वेङ्ह्ग चीङ्ह्ग हुम्ओ मान्तालम्इ “अ ङैमाःत मुज” त दाय्ह्ती तोथाचतो ओउः नीस्इ न्हाङ्तोलेः “अ प्रभुय नाङ् दावुद् राजाकोः प्लोमःदानेतेःआः बा नीचीकायः योनःती सायःचाक्ताङःच दै” त गोःआकाचु 32ओउःनीस्इ गोःओ सायःती येसु न्यास्ती नीस्चाक्कायः गोत्ती “लौ नीङ्जीकायः ङाइ दोह् हायःचेःनाङ्ज” त दाय्ह्ती व्हत्आकाचु 33“अ प्रभु नीचीकोः मीक् स्याक्ताक्बत्ताङःच दै” त दाय्ह्ती त्याङ्आकाच। 34ओउःनीस् ओउःत त्याङ्आक्तीको येसुइ ल्हुङ् योनःती ओउःनीस्कोः मीक् दीन्ह्आकान् मीक् दीन्ह्ओ कुस्ब्रक्त ओउःनीस्इ पेतो च्यवःआकाचु। च्यवःआक्तीको येसुकायः गुल्ह्आकाचु।
Currently Selected:
मत्ती 20: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
