मत्ती 14
14
1ओहाङःसैको येसुकोः कुरा गालील अन्चल्कोः हेरोद् राजाइ सायःआकान्। 2सायःआक्तीको “लौ ओउः तेह्काल सीओ बाप्तीस्मा बयःओ युहनालेः उह्ती च्योक्ती देङी सेलः स्याव्नाः ओउःत खेःओ ओउःइ युहनाकोः ताङ्ह्ओ काम्लम् जाङ्ह्सा खाय्नौ” त दाय्ह्ती हेरोद्इ लयःकोः नोकरीलम्कायः तोआकान्। 3-4अनम्ह्लो हेरोद् राजाइ लयःकोः फीलीप् त तोओ हौकोः बुधी हेरोदीयस्त तोओकायःलेः लयःकोः बुधी जाङ्ह्ती वानःआकान् ओउःकोः हौ सीधाङ्माखाहाङः। ओउःत देह्मालो मोमःचोः हेरोद् राजाइ वानःआकान् त युहनाइ चीःती ओउःइ हेरोद्कायः आन जान्आकान् “लौ इलो देह्मालो मोमःचोः वानःसा जुगाङ्मा स्याव्ल” त दाय्ह्ती युहनाइ जान्ती तोआथै ओउःत खेःओ हेरोद् राजाइ युहनाकायः चुम्ती पानःती झ्याल्खानहाङः गम्आथै। 5झ्याल्खानहाङः गम्उतो अरु मान्तालम्इ “युहना त तोओपाय् पेओ परमेस्वर्कोः कुरा छ्यानःओ मान्ता लेःआः” त दाय्ह्ती नोःकाय्ती झ्यान्ते ओउःकायः हेरोद्इ सात्सा ग्याल “ङाकः सबै मान्तालम् ल्हुङ् मल्ह्तो स्याव्चै” त दाय्ह्ती रैती युहनाकायः सात्आक्उलु। 6ओहाङःसैको लोने हेरोद् राजाकोः दोःओ दीन्हाङः ओउःइ भोस् जाङ्ह्आकान्। भोस् जाङ्ह्तोक्हाङः हेरोदीयस्कोः चोःद्याङ् वाङ्ती सबैकोः मीक्हाङः स्याह्ती हेरोद्कायः आन म्रोताक्आथै। 7ओउःत झ्यान्ते “लौ दोह् दोह्तेः झाक्ती तेतेःनाःची ओउःलेः बयःनेःनाङ् बा सत्ते ताम्बजेः ङाइ बयःनेःनाङ्” त दाय्ह्ती हेरोद्इ चोःद्याङ्कायः तोथातो 8ओउः मोमःचोःइ ओउःकोः आमाइ ङ्हासै स्यान्ओ कुरा दाय्ह्ती “लौ बाप्तीस्मा बयःओ युहनाकोः तालाङ्पाय् थाल्हाङःलेः वानःती बयःची दै” त दाय्ह्ती आपाकायः त्याङ्ती तोआकान्। 9एत तोओ सायःती हेरोद् राजा आन लीह्तो स्याव्ओ खेःतो सबै पहुनाकोः मीक्हाङः “ङाइ दोह् खेःयामा बयःनेःनाङ्” त दाय्ह्ओ ङ्हा तोती गम्आकान् त झ्यान्ते “लौ युहनाकोः तालाङ् वानःपाः” त दाय्ह्ती 10हेरोद्इ यात्चाक् सीपाहीलेः युहनाकायः पाल्ती सात्साकायः ल्होक्आकान्। 11ओहाङःसैको ओउः सीपाही आल्ती युहनाकायः पाल्ती सात्आक्तीको ओउःकोः तालाङ् थाल्हाङः लात्ती वानःती हेरोद्कोः चोःद्याङ्कायः बयःआथै। बयःआक्तीको ओउःपाय् चोःद्याङ्इ त्याक्ती लयःकोः आमाकायः ल्हाआकान्। 12ओहाङःसैको “युहनाकायः सात्आकानी” त दाय्ह्ओ सायःती युहनाकुस् वाह्ओमयःइ वाङ्ती ओउःकोः म्हाङ् लात्ती आलःती पाम्ह्ती गम्आकानी। पाम्ह्ती गम्आक्तीको ओउःमयः येसुकःताङ् आल्ती युहनाकोः कुरा ल्हाक्ती छ्यानःआथै।
13ओहाङःसैको ओउःमयःइ छ्यानःओ कुरा सायःआक्तीको येसु गालील त तोओ ताङ्ह्ओ दुम्हान्ताङ् आल्ती दोङ्गाहाङः लन्ह्ती मान्ता याक्मालो थाव्ताङ् दाह्ती वाङ्आ। आल्तोक् बेलाहाङः “येसु उनोकोताङ् आल्नाः” त अरुइ सायःती गाव् गाव्सै मान्तालम् ग्ल्युङ्ह्ती द्याङ् द्याङ्हाङः वाह्ती येसुकायः गुल्ह्आकानी। 14ओहाङःसैको ओउः थाव्सै वाङ्ती नोःतो मान्तालम् हुम्ती वाङ्ओ येसुइ च्यवःती ओउःमयःकायः योनःती योती झ्यान्ते जीक्ओलम्कायः स्याक्ताक्आकान्। 15ओहाङःसैको ओउःत हायःदा हायःदापाय् न्याम् याह्आथास। न्याम् याह्ती झ्यान्ते ओउः येसुकुस् वाह्ओमयः ओउःकःताङ् वाङ्ती “लौ देङे न्याम् याह्आतय्ही। इहाङःपाय् कीम् नाःमालो थाव्लेः खेःनाः जेःगामा दोह्मा नाःल बा। इ सायःती हुम्ओ मान्तालम्कायः द्याङ्तो द्याङ्तो गाव्ताङ् जेःगा बोङःलाङ् ल्होक्पाःथास” त दाय्ह्ती तोथातो 16“खेःल ओउःमयः आल्सा परल। नीङ्इतेः जेःगा बयःनुसु दा” त दाय्ह्ती येसु त्याङ्आ। 17एत त्याङ्आक्तीको “ङीकःहाङः दोह्मा नाःल पोङाकेरः लाङ्मा नीस्मोसा र्युम्ह्ङाः ह मुनाः” त दाय्ह्ती त्याङ्इतो 18“लौ उया ङाकःताङ् वानःन दा” त दाय्ह्ती 19येसुइ हुम्ओ मान्तालम्कायः लाङ्गनःहाङः च्युङःताक्आन्। ओउःमयःकायः च्युङःताक्आक्तीको येसुइ ओउः पोङाकेरः लाङ्मा नीस्ज्योः ङाःमा त्याक्ती लाङ्काताङ् त्याव्ती योती परमेस्वर्कायः “च्युता” त तोआकान्। एत तोआक्तीको येसुइ ओउः लाङ्मा ङाःमा फन्ह्ती वेःती ओउःकुस् वाह्ओमयःकायः ल्हाती दोल्कावःसाकायः बयःआकान्। 20ओउः लाङ्मा ङाःमा सबै हुम्ओ मान्तालम्कायः दोल्कावःआक्तीको ओउःमयःइ ओउः जेःगा त्याक्ती कोस्तोलेः जेःआकानी। जेःच्युक् जेःआक्तीको लाङ्कोःमा ङाःकोःमा वेओ य्हुन्ह्लम् सेक्ती हुम्ह्ती बारगोता धाकर्हाङः काती ब्लीङ्ताक्आकानी। 21ओउः जेःगा जेःओलम् पास् हजार्च्युक् गोय्चोःलम् खेःइतो ओउःमयःकुस् मोमःचोःलम्मा हौलम्मा खेःइतो।
22ओहाङःसैको मान्तालम्इ जेःती खाय्आक्तीको ओउःकोः ङ्हासै येसुइ लयःकुस् वाह्ओमयःकायः दुम्हान्कोः उःसै दोङ्गाहाङः ल्होक्आथास। ओउःमयःखे दोङ्गाहाङः लन्ह्ती आल्तोक्हाङः येसुखेइ हुम्ओ मान्तालम्कायः पाय्ह्लाङ् ल्होक्आथास। 23सबै पाय्ह्आक्तीको येसु स्यालुङ्ताङ् परमेस्वर्कायः तोलाङ् लन्ह्आ। ओहाङःसैको न्याम् ब्लक्ती ज्याल्ओहाङः येसुखे स्यालुङ्हाङः लयः झुङ्आले मुओ खेःतो 24ओउः दोङ्गाहाङः वाह्ओलम्खे दुम्हान्कोः ल्हाक् बादीङ्हाङः मुइतो स्यालःमारुः जोक्तो वाङ्ती झ्यान्ते ओउः दोङ्गा वाह्ताक्सा खाय्नीली। 25ओहाङःसैको दोङ् याह्दीङ्हाङः येसुपाय् तीःकोः माल्गहाङः वाह्ती दोङ्गाताङ् वाङ्आ। 26ओउः दोङ्गाहाङः मुओ येसुकुस् वाह्ओमयःइ येसु तीः माल्गहाङः दोम्इ वाह्ओ च्यवःती ओउःकायः तय्ह्माःत झ्यान्ते “ओउःपाय् लान् लेःआः यादो वाङ्नाः” त रैती दाय्ह्ती आन हीह्आकाय्। 27ओउःमयः हीह्माकादे येसुपाय् “लौ ल्हुङ् धोमाय्तो रैमाःत मुन ङा लेःआः बा” त दाय्ह्ती तोमाकादे। 28येसु एत तोआक्तीको “अ प्रभुय नाङ् लेःतेःआः त खेःया ङाकायःपाय् ‘लौ तीःकोः माल्गहाङः वाह्ती ङाकःताङ् वाङ्अ’ त तोची दै” त दाय्ह्ती पत्रुस्इ तोथातो 29“लौ उया वाङ्अ” त दाय्ह्ती येसुइ तोआथै। येसु एत तोआथै त खेःओ पत्रुस् दोङ्गासै ग्ल्युङ्ह्ती तीःकोः माल्गहाङः वाह्ती येसुकःताङ् वाङ्खेःतो 30तीःहाङः वाह्तोक्हाङः ओउः मारुःइ साङ्ह्ओ तीः च्यवःती पत्रुस्पाय् रैती तीःहाङः ज्युप्खेःआ “अ प्रभु ङाकायः दल्ताक्ची दै” त दाय्ह्ती गोःउतो 31पत्रुस् गोःओ कुस्ब्रक्त येसुइ क्रुत् प्योती ओउःकायः चुम्आथै “लौ नाङ् ङ्हाम्चोःचाक्तेः खेःतेःनाः दोह् हायःतीतेः पेतो ङ्हाम्तेःचीली” त दाय्ह्ती येसुइ व्हत्आथै। 32ओहाङःसैको ओउः नीस्चाक् दोङ्गाहाङः लन्ह्ती वाङ्आक्तीको मारुःपाय् अम्आ। 33एत च्यवःती ओउः दोङ्गाहाङः मुओलम् येसुकायः लुङ्ती ताङ्ह्ताक्आकानी “दोङ्सीलेः नाङ्पाय् परमेस्वर्कोः चोः लेःतेःआः” त दाय्ह्ती दाय्ह्आकाय्। 34ओहाङःसैको ओउःमयः दोङ्गाहाङः वाह्ती दुम्हान्कोः उःसै गनेसरेत् त तोओ देस्ताङ् दाह्आकाय्। 35दाह्आक्तीको ओहाङःकोः मान्तालम्इ येसुकायः तय्ह्ती ओउः देस्कोः इःसै उःसै ल्होक्ती सबै जीक्ओलम्कायः गोत्ती वानःआकानी। 36वानःआक्तीको “लौ इ जीक्ओलम्इ नाङ्कोः नाय्कोः दोर ह दीन्ह्पानी ओहाङःसै सेलः स्याव्नै” त दाय्ह्ती तेइतो सुसु जीक्ओइ येसुकोः नाय् दीन्ह्आकानी ओउःलेः जुगाङ् सेलः स्याव्आकाय्।
Currently Selected:
मत्ती 14: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
