लुका 20
20
1येसुइ मन्दीर्हाङः परमेस्वर्कोः पेओ कुरा स्यान्ती तोतोक् बेलाहाङः ताङ्ह्ओ पुरोहीत्लम्मा धर्मा स्यान्ओमयःमा अरु यहुदीलम्कोः ताङ्ह्ओ मान्तालम्कुस् ओउःकःताङ् वाङ्ती 2“लौ नाङ्इ अनम्ह् मन्दीर्हाङः जाङ्ह्ओ काम् जाङ्ह्साकायःपाय् ‘सुइतेः ताक्तेःआ सुइतेः ल्होक्तेःआ’ त तोताङी दा” त दाय्ह्ती ओउःमयःइ व्हत्थातो 3“लौ यात्ज्योः ङाइ व्हत्ओ ङ्हालेः त्याङ्ती तोनाङ्स दा ओहाङःसैको ङा नीङ्कः त्याङ्नाङः” त दाय्ह्ती येसु दाय्ह्आ। 4“युहनाकायः सुखेइलो बाप्तीस्मा जाङ्ह्लाङ् ल्होक्आथै परमेस्वर्खेइ ल्होक्आथैया मान्तालम्खेइया” त दाय्ह्ती येसु द्यान्ह्ती व्हत्आथास। 5इत व्हत्ओ सायःआक्तीको ओउः ताङ्ह्ओ मान्तालम्पाय् लयःमयःकुस् नोःकाय्आकाय् “गत त्याङ्इ दा। ङी ‘परमेस्वर्इ ल्होक्आथै’ त त्याङ्चाङी त खेःया ओउःपाय् ‘ओउःत झ्यान्ते दोह् हायःतीतेः युहनाकोः नोःराय्तेः ङ्हाम्ती सायःतेःआक्नीली’ त ओउःइ तोनाःतय्ही। 6खेःल ङीइ ‘मान्तालम्इ ल्होक्आथै’ त त्याङ्चाङी त खेःया सबै मान्तालम्इ ङीकः ल्हुङ् मल्ह्तो स्याव्ती ङीकायः बाङ् आप्ती सात्नाःतय्ही यादो। इमयः सबैइलेः ‘युहनापाय् परमेस्वर्इ ल्होक्ओ ओउःकोः कुरा छ्यानःओ मान्ता लेःआः’ त ओउःमयःइ ताःनानी” त दाय्ह्ती लयःमयःकुस् नोःकाय्आक्तीको 7“लौ ङी त्याङ्सा चीःङुसुलु” त दाय्ह्ती ओउः ताङ्ह्ओ मान्तालम् दाय्ह्आकाय्। 8“लौ उया सुइ ङाकायः काम् जाङ्ह्लाङ् ल्होक्आताङः त दाय्ह्सा ङाइमा छ्यान्ह्ती तोसा ग्याङल” त दाय्ह्ती येसुइ तोआथास।
9ओहाङःसैको येसुइ फेरीलेः स्यान्ओ वीनःराय् ल्हाक्ती तोआथास। “यात्चाक्इ धाक्सायः स्यास्ओ राङ् पेतो जाङ्ह्आकान्! ओउः राङ् जाङ्ह्आक्तीको ओउः राङ्कोः धनीपाय् अरु देस्ताङ् आल्सा खेःतो। ओउः त झ्यान्ते अरु मान्तालम् हुम्ती वानःती ओउःमयःकायः राङ् मेनःताक्ती ल्युङ्ह्ताक्ती गम्आकान्। 10ओहाङःसैको अरु देस्ताङ् आल्ती मुतोक्हाङः धाक्सायः मीन्लेःआ। धाक्सायः मीन्तोक् बेलाहाङःपाय् ओउः राङ्कोः धनीइ लयःकोः भाक् लेःसाकायः यात्चाक् नोकरी मान्ता ल्होक्आकान्। ओउः नोकरीपाय् आल्ती राङ्ताङ् दाह्ती वाङ्लेःतो ती ओउः राङ् मेनःओलम्इ धनीकोः भाक् पाय्क्सा ग्यामाःत झ्यान्ते ओउः नोकरीकायः चुम्ती घान्ती सोह्लेः द्यानःआथै। 11ओउःत झ्यान्ते ओउः राङ्कोः धनीइ अरु नोकरी ल्होक्उतो ओउःकायःमा ओउः राङ् मेनःओलम्इ घान्ती थोःती रेव्तो हायःआक्तीको सोह् द्यानःआथै। 12फेरी ओउः राङ्कोः धनीइ अरु नोकरी ल्होक्उतो ओउःकायः ओउः राङ् मेनःओलम्इ थोःती वयःताक्आक्तीको बारीकोः बाहीरताङ् क्लाःआथै। 13ओउःत हायःआक्तीको ओउः राङ्कोः धनीपाय् ‘लौ द्याह् दोह् हायःचाङः ती। छ्यो ङाकोः लयःकोः ल्हुङ् गोरे चोःलेः ल्होक्नाङः। ओउःइ तोओ कुरापाय् ओउः राङ् मेनःओलम्इ एङःती रोम्नाःथै यादो’ त म्हर्ती लयःकोः चोः ल्होक्आकान्। 14ओहाङःसैको ओउः धनीकोः चोः दाह्ती वाङ्ओ च्यवःती ‘लौ उया इपाय् राङ्कोः धनीकोः ओकोलो चोः लेःआः रैस। इकायः चुम्ती सात्नी दा। ओहाङःसैको आपा सीआक्तीको इ राङ्पाय् ङीकोःलेः स्याव्आनाः’ त दाय्ह्ती नोःकाय्ती 15ओउः राङ् मेनःओलम् चोःकायः चुम्ती राङ् बाहीरसै ताती सात्ती वाय्आकानी। दोङ्सीलेः लयःकोः चोःकायः ‘सात्आकानी’ त चीःआक्तीको ओउः राङ्कोः धनीइलेः राङ् मेनःओलम्कायः दोह् हायःनौ दाय्ह्सा। 16ओउःइ राङ्ताङ् पाय्ह्ती ओउः रेव्ओ मान्तालम्कायः चुम्ती सात्ती वाय्नाःथास बा। वाय्आक्तीको ओउः राङ्पाय् अरुइ मेनःसाकायः बयःलेःनौ” त दाय्ह्ती येसुइ तोआथास। ओउःत तोओ सायःती “इत हायःओ परमेस्वर्इ त्याःपाः दै” त दाय्ह्ती येसुकोः कुरा सायःओलम् दाय्ह्इतो 17येसुइ ओउःमयःकायः योती “खेःल इ कुरापाय् परमेस्वर्कोः आखरःहाङः लेखती मुलेःनाः माःर ‘कीम् जाङ्ह्ओलम्इ ङ्हा ताती वाय्ओ बाङ्पाय् लोनेः कीम् गाराकोः मुल्बाङ् स्याव्आनाः’ त दाय्ह्ती दाय्ह्ओ लेखती मुनाः। 18सुसुइ ओउः मुल्बाङ्हाङः त्योक्ती तोन्चै ओउःखेकायः बाङ्इ छुक्ती जीक्ताक्नाःथै। सुसुकायः ओउः बाङ्इ क्रामःनाःथै ओउःकायःलेः दान्ह्तोलेः स्याव्नाः” त दाय्ह्ती येसुइ स्यान्ती तोआथास। 19ओउःत तोओ सायःआक्तीको “इ वीनःराय् तोती ङीकायः पेमालो तोआतय्ही” त दाय्ह्ती नोःकाय्ती ओउः बेलाहाङः ओउः धर्मा स्यान्ओमयःमा ताङ्ह्ओ पुरोहीत्लम्इमा येसुकायः चुम्सा बोङःनीतो ओहाङः हुम्ती मुओ मान्तालम्कः रैती झ्यान्ते येसु मन्दीर्हाङः स्यान्ती मुतोक्हाङः ओउःकायः चुम्सा दोःइली।
20ओउःत हायःती झ्यान्ते “लौ इ येसुकायः गाल्तुम्ती चुम्सा गत हायःतीलो दोःनाःतय्ही” त दाय्ह्ती ओउःमयःइ येसुकायः ल्युङ्ह्ती सायःती मुओ खेःतो। ओहाङःसैको ओउःमयःइ येसुकायः गाल्तुम्सा बोङःओ मान्तालम् ओउःकःताङ् ल्होक्आकानी “नीङ्इ व्हत्ओ कुरापाय् ओउःइ पेतो त्याङ्सा खाय्उलु त खेःया ङीइ ओउःकायः गाल्तुम्ती चुम्ती रोमी सर्कार्कायः ल्हासा खाय्नाःतय्ह्नी” त दाय्ह्ती ओउः मान्तालम्कायः ल्होक्आकानी। इत ल्होक्ओ मान्तालम्पाय् येसुकःताङ् दोङ् कुराकायः बोङःओ मान्तालो लेखा वाङ्ती 21“लौ गुरुय नाङ्इ ओजायःतलेः दोङ् कुरा ह तोतेःनौ। सुकःमातेः रैमाःत नाङ्इ परमेस्वर्कोः दोङ् कुरातेः स्यान्तेःनौ बा इत ङीइ चीःनाङःसु। 22ओउःत खेःया इ कुरा द्याह् पेतोलेः त्याङ्ती तोताङी दा। ङीकोः देस्कोः सीजर् माहाराजाकायः कर्कोः पैसा बयःसा स्याव्नाःया स्याव्लया दोह्तेः दाय्ह्तेःनाः” त दाय्ह्ती येसुकायः व्हत्थातो ती 23येसुइ ओउःमयःकोः पेमालो ल्हुङ्तुक् चीःती 24“लौ यात्ज्योः पैसापाय् छ्यानःवानःनाङ्स दा” त दाय्ह्ती येसु दाय्ह्आ। यात्ज्योः कर् पाय्क्सा पैसा छ्यानःआक्तीको “लौ इ पैसाहाङः सुकोः रुप् मुनाः। ओहाङः सुकोः मय्ङ्मा लेखती मुनाः त तोची दा” त दाय्ह्ती येसुइ व्हत्थासतो “इपाय् सीजर् माहाराजाकोः लेःआः” त दाय्ह्ती त्याङ्आकाय् 25“ओउःत झ्यान्ते ओउः पैसापाय् सीजर् माहाराजाकोः लेःआः माःर। दोह् खेःयामा सीजर्कोः लेःआः मुनाः ओउःखेलेः सीजर्कायः पाय्क्पाः दोह् खेःयामा परमेस्वर्कोः लेःआः ओउःखेलेः परमेस्वर्कायः पाय्क्पाः” त दाय्ह्ती येसु त्याङ्आ। 26येसु इत व्हाय्तोलेः त्याङ्ओ सायःती ओउः व्हत्लाङ् वाङ्ओलम् आन ग्याङ्ह्ती अरु दोह्मा दाय्ह्सा खाय्नीली। हुम्ती मुओ मान्तालम्कोः मीक्हाङः ओउःकायः गाल्तुम्ती तोसा दोःइली।
27ओहाङःसैको लोने सादुकी त तोओ मान्तालम्मा येसुकःताङ् वाङ्आकाय्। ओउः सादुकीलम्पाय् “मान्ता सीआक्तीको रौ जीङःपाय् नाःल सुमा उह्ती च्योक्इली” त दाय्ह्ती स्यान्ओ खेःइतो। 28ओउःमयः येसुकःताङ् वाङ्ती “अ गुरुय उय्ह्लेहाङः मोसाइ ‘लौ बुधापाय् चोः दोःमाःत सीनाः त खेःया ओउः सीओ मान्ताकोः बुधीकायः ओउःकोः हौइ वानःसा खेःतो लयःकोः पुःकोः रधीङः गम्सा थेङा’ त दाय्ह्ती लेखती गम्ओ खेःतो। 29ओउःत खेःया इ कुरा सायःउ दा। सात् पुःचोङ् खेःइतो। सात् पुःचोङ् खेःतो जेथा पुःइ बुधीलेः वानःउतो लयःकोः चोः दोःमाःत ओउः जेथा सीआ। 30जेथा पुः सीआ त खेःओ ओउःकोः बुधी माय्ह्ला हौखेइ वानःआकान्। वानःआक्तीको ओउः माय्ह्ला हौमा चोः दोःमाःत सीआ। 31ओउःत झ्यान्ते ओउः मोमःचोःकायः साय्ह्लाखेइ वानःथातो ओउःमा चोः दोःमाःत सीलेःआ। ओउःत हायःदा हायःदा ओउः मोमःचोःकायः ओउः सात् पुःचोङ्इ स्योताङ् स्योताङ् वानःइतो सबै चोः दोःमाःत सीआकाय्। 32ओहाङःसैको सबैसै दप्ती ओउः मोमःचोःमा सीआ। 33लौ उया तोताङी दा। ओउः मोमःचोःमा सात् पुःचोङ्मा सीआक्तीको उह्ती च्योक्ती रौ जीङः दोःनै त खेःया ओउः मोमःचोःपाय् सुकोः बुधी स्याव्सा खेःतो। ओउःपाय् सात् पुःचोङ्कः पाय्ह्आ” त दाय्ह्ती येसुकायः व्हत्आकानी। 34“ल्हाव्ह्दैबाङ्कोः मान्तालम्पाय् मोमःचोः वानःनानी गोय्चोःकुस् पाय्ह्नै। 35सीआक्तीको लाङ्काताङ् आल्सा रौ जीङः दोःसा स्याव्ओलम्खेपाय् मोमःचोः वानःमानीली गोय्चोःकुस् पाय्ह्माइली 36फेरीलेः सीमाइली। ओउःमयःपाय् ‘परमेस्वर्कोः उह्ती च्योक्ओ चोःलम्’ त तोसा स्याव्ती परमेस्वर्कोः लाङ्काकोः ल्होक्ओमयःलो लेखा मुलेःनै। 37इ सीआक्तीको उह्ती च्योक्ओ कुरापाय् मोसाइमा लेखआकान् बा। मोसाइपाय् झ्युर्हाङः सायःओ कुरा लेखती प्रभुकायः ‘आब्राहाम् इसाक् याकुब् त तोओलम्कोः परमेस्वर् लेःआः’ त दाय्ह्ती दाय्ह्ओ लेखओ। 38ओउःइपाय् तोकानःलम्कोः ‘परमेस्वर्लेः खेःतो’ त तोउलु ओउःमयःकोः ‘परमेस्वर् लेःआः’ त तोआकान्। परमेस्वर्पाय् सीओ म्हाङ्कोः परमेस्वर् खेःल बा ओउःत झ्यान्ते ओउः सुम्चाक् उय्ह्लेकोः तोकानःलम् सीआक्तीको द्याह् परमेस्वर्कःहाङः उह्ती च्योक्ती मुधाङ्नै। ओहाङःसैको ओउः सुम्चाक् रौ जीङः दोःनै त खेःया अरुलम्कायःमा दोःलेःनै” त दाय्ह्ती येसुइ तोआथास। 39इत पेतो तोआक्तीको यात्नीस् धर्मा स्यान्ओमयःपाय् “लौ गुरुय नाङ् पेतोलेः त्याङ्तेःआ रैस” त दाय्ह्ती 40अरु कुरा व्हत्सा ग्यामालो खेःइतो।
41ओउःमयःखे अरु व्हत्सा ग्याइली येसुखेइ द्यान्ह्तीलेः “लौ परमेस्वर्इ ल्होक्ओ ख्रीस् त तोओकायः दोह् हायःतीलेः ‘ओउः वाङ्सा खेःओ ख्रीस्पाय् दावुद् राजाकोः प्लोमःदानेलेः’ त दाय्ह्ती मान्तालम्इ तोनानी। 42-43दावुद् राजापाय् लयःइ लेखओ भजन् आखरःहाङः ‘ “लौ नाङ्कोः दुस्मान्कायः क्लीमःधाङ्मा च्युक्हाङः ङाकोः गुल्ह्दाङ् स्याव्ती ङाकोः ङोय्दोसै च्युङःती मुअ” त दाय्ह्ती परमेस्वर्इ ङाकोः प्रभुकायः तोआकान्’ त दाय्ह्ती दाय्ह्ओ दावुद्इ लेखआकान्। 44इत लेखती दावुद् राजाइ ख्रीस्कायः ‘ङाकोः प्रभु’ त तोओ त झ्यान्ते ओउः ख्रीस्लेः दावुद् राजाकोः प्लोमःदाने ह खेःबाय्ल ओउःकोः प्रभु लेःआः” त दाय्ह्ती येसुइ स्यान्तीलेः तोआथास।
45ओहाङःसैको सबै हुम्ओ मान्तालम् सायःती मुतोक्हाङः ओउःइ फेरीलेः स्यान्ती तोती 46“लौ धर्मा स्यान्ओमयःकायः घीःती मुन दा दोह् हायःती दाय्ह्सा ओउःमयः लयःकोः नेह्रो ओर्ताक्ती गुरुलो लेखालेः झुह्र्ओ नाय्लम् लावती बजार्हाङः मान्तालम्कोः नमस्कार् त्याक्लाङ् वाह्सा आन झाक्नै। ओउःमयः थनःओ कीम्हाङःमा भोस् जाङ्ह्ओहाङःमा फोल्यावःती बयःसा थाव्लम्हाङः च्युङःती मुसामा छ्युप्नै। 47ओउःत हायःसा आन झाक्लेःनै ओउःमयःइमा बुधा सीओ मोमःचोःलम्कोः कीम्लम् माल्ताल्लम् आलःती जेःनानी ओउःत हायःनानी अरुकायः ‘लौ ङापाय् पेओ मान्ता लेःआः ङ’ त छ्यानःसा थेङा अरुकोः मीक्हाङः परमेस्वर्कायः आन ज्याङःतो तेती तोओ माःजाङ्ह्नानी। दोङ्सीलेः इलो खेःओ माःओ जाङ्ह्झ्याङ्कायः ओउःमयः लोनेः जोक्तोलेः न्युम्ह्तो स्याव्लेःनै बा” त दाय्ह्ती येसुइ तोआथास।
Currently Selected:
लुका 20: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
