Matyiu 11

1E diyakindi, o Jisus a běki hukiděngo isombiya ja jomu na beyokwedi beaju bebale, ka Mâ‐a věngěmě omě ka yokudě na ka kaliya, o mamboka mabu.

2O Jân a yokakidi o ndabo ya meboka kuma ya behavu bea Kraist, a lomakindi beyokwedi beaju bebale, 3ka mâ a vâ na ju, na, Âvě ndi Mâ‐a vakě, ipě ho umbwakiye pě upâkwě? 4Jisus a yavwanakindi ka Mâ‐a vâ na bâ, na, Kěkěni, n‘ inyěni wa languwani Jân ibeanyu be yokakě na be yěněkě: 5pâgu i yěněkě pě, bebokě be tamwaka, begâlani be yongakwě, poke i yokaka, bekengo be pumbwakudwě, mekuge me pakwakudwě sango eyamu. 6Nd‘ ibâtâ na uěhěpi a ka diyě a kâbe n‘ Umba.

7O bâ ba timbakidi, ka Jisus a yalě o vâ na bebimba o pělě ya Jân, na, O kěki lěni o nginga ka yěně nde? 8Tuka e ninganakě n‘ upupě? Nd‘ e lě nd‘ eanyu e kěkidi ka yěně? Momo bâtângo n‘ ibâtâ ibâbu? Ba bâtâkě ibâtâ ibâbu ba nd‘ o ndabo ja mepolo. 9Nd‘ e lě nd‘ eanyu e kěkidi ka yěně? Usâki? E! Mbi vâki n‘ inyěni, na, wa n‘ usaki. 10Ikabojana mâ nd‘ ekaně a di lěndwěngo, na,

Umbwakiya, Mbi lomindi utodu muamě o boho boâvě ka kenjě njeya ’vě o boho na nâvě.

11Mbi vâki n‘ inyěni pâkwěpâkwě na, O ba jakwě na bajo o ha pumiye usâki u di boněně wa na Jân ja Baptist; nd‘ a di yěviyěngo o ’pangiya ja Hěvěn a boněně wa na mâ. 12Oviya hwi ja Jân Baptist na pâ kya těkaně ipangiya ja Hěvěn i viyendi ka janjwě, na ba janjakě ba nângâ jâ na bwayě. 13Ikabojana Basâki běhěpi na Belekanako be sâkâkindi kwanga nala o Jân. 14Oningě wa bâbâni inângâ, Ilaias nd‘ ekaně a diyakidi a vaka. 15A di na matâ ma yokakě, a yokake. 16Ndi Mbi kwanakidě lě okava igona těkadi nde? I kwanaki bana ba didi o ihambanido diyediye ba kalaka na megangano meabu, 17na, Ho lângindi ’nyěni mabeka, ndi o yembeni; ho diyendi ’nyěni o jěbâ, ndi o hiluweni. 18Ikabojana, o Jân a vakindi aa je na mâ a mâte, na bâ na, A na děvil. 19Mwana moto ka vake A jaka na Mâ‐a mâtâkâ, na bâ na, Umbwakiyani, savulaka, n‘ umâti maku, mbweyi ya bayoli pago na bato babe. Ndi iyowě i huwudwengo na bana baju.

20Jâ nd‘ ijaju ja yalě ihembiya ja mamboka ma belemba beaju be di hamango wa, ikabojana b‘ uluwaka. 21Maguga na nâvě, Koresin! Maguga na nâvě, Bethseda! Ikabojana, belemba be di hamang‘ o inyěni o jadi be jaka na be hamakindi o Tair na Saidon, te ba diyaki ba bemba na ’luwa o bangisi na jubu. 22Ndi Mbi vâki n‘ inyěni, na, Ya Tair na Saidon ndi e ka hukaniyě, wa na eanyu, o buhwa boa yěkě. 23Na nâvě, Kapěrnaum, e didi betudwěngo oba, o ka hubwěnd‘ o Hěl. Ikabojana belemba be di hamang‘ o âvě o jadi be jaka na be hamakindi o Sâdâm, te a ngite na bwa buhwa těkabo. 24Ndi Mbi vâki n‘ inyěni, na, Ya ehe ya Sâdâm nd‘ e ka hukaniyě o buhwa boa yěkě wa na e âvě.

25Jisus a yavwanakindi o ’gombe těně, ka Mâ‐a vâ, na, Paia, Upangiyi mua oba na he, Mbi věkěnd‘ âvě akeva, ikabojana o kutiyango b‘ iyowě na ba bokeli belombo těkabe, na nâvě wa sala byâ mekěkě. 26E nonaně, Paia: ikabojana kakana ndi o yâ e yěněněkidi bwam‘ opěl‘ âvě. 27Paia a i ’Mba věngo belombo beěhěpi: o ibě na moto a yowudě Mwana, kabo Hangwě: o ibě tepě na a yowudě Hangwě, kabo Mwana, na uěhěpi wa Mwana a ka levidě Mâ. 28Ba hakě na ba di na maumba madilo běhěpi, vakani o Umba‐Mbi jadi, na Umba‐Mbi ka věndi ’nyěni iyâjâ. 29Nângâkâni panga ’amě o inyěni o jadi, n‘ inyěni o ka yokwakani o pěl‘ ’amě; ikabojana Mbi hwěi na ulema ubâbu: o ka duwandini ’yâjâ o malina manyu. 30Ikabojana pang‘ ’amě e ndi ebâbu, na jumba jamě i bohadi.

Currently Selected:

Matyiu 11: BNG1895

Highlight

Copy