Luk 22

1Nandi isango ja pěmbě e ha ’bě na ilanda i ma tubakwě, na, Isango j‘ Ikunduwa, i diyakindi ja bě piělě. 2Ka prist ja meolo na balěndi ba vaha ugono mwabu uka weyaně mâ; ’kabojana ba bangakindi bato.

3Ka děvil ea ngiya o ulema mua Judas a ma tubakwě, na, Iskariât, ua tango ea jomu na bebale. 4Ka mâ‐a ’la pělě na ’aju, ka mâ‐a tinga na prist ja meolo na ngâwě, nyang‘ ’aju e ka kândě Mâ o bâ‐ba jadi. 5Ba yěnekindi mbya, ka bâ‐ba panganě mâ na ba ka vi mâ dâlě. 6Ka mâ‐a yohaně; a ka vahaka egombe e kândânâkě Mâ o bâ‐ba jadi o ebimba e ha ’bě.

7Ka buhwa boa pěmbě e ha ’bě na ilanda boa pâ, o Ikunduwa i ka weywě. 8Ka Mâ‐a loma Pitě na Jân, na, Kěkěni ka kenjaki hwě ni Ikunduwa, ho jeni. 9Ka bâ‐ba vâ na Ju, na, O ka vaha lě ho kenjakě ove? 10Ka Mâ‐a vâ na bâ, na, Hilakěteni, inyěni o ka ngiyěni o mboka, moto a ka lati n‘ inyěni omě, bapěngo imâgi ja miba; o ka vitanaki mâ ni o ndabo ’aju e ka ngiyě. 11N‘ inyěni oa vâni na momo uyam‘ ua ndabo, na, Uyokwidi a vwi na nâvě, na, Ikenga ja bangi ijamě i ka jě Ikunduwa na beyokwedi beamě, i l‘ ově? 12A ka leviděndi inyěni ilika via ’ba iněně bonguěngo: o ka kenjakěni omě. 13Ka bâ‐ba vala, ka bâ‐ba kâbidě ka Mâ‐a ma languwa bâ: ka bâ‐ba kenjě isango.

14O iwěla i ipâkidi, ka bâ na jomu ja metodu na metodu mebale ba diyanidě. 15Ka Mâ‐a vâ na bâ, na, N‘ iyombuwa ndi ’jamě i yombwakidi o ja Ikunduwa těkadi n‘ inyěni n‘ Umba na taka o yěně betuniya: 16ikabojana Mbi vâki n‘ inyěni, na, Mba je pě jâ, kabo o jâ i ka hohonganě o ipangiya ja Anyambě. 17Ka Mâ‐a nângâ imâgi, ka Mâ‐a vě akeva, na, Nângâkâni ekae, o ka kabanakiyani inyi mětě n‘ inyi mětě. 18Ikabojana Mbi vâki n‘ inyěni, na, Mba mâtě pě ebuma e‘ ukâdi, kabo ipangiya ja Anyambě ja pâ. 19Ka Mâ‐a nângâ pěmbě, ka Mâ‐a vě akeva, ka Mâ‐a pěhě eâ, ka Mâ‐a vě bâ, na, Nyol ’amě e didi věwěngo o pěl‘ ’anyu nd‘ ekaně: hakani ekae iyongidě jamě. 20Ka Mâ‐a vě pě imâgi, beja pa, na, imâgi těkadi i ndi panga ea kya na makiya mamě, ma tâkě o pěl‘ ’anyu. 21Ndi hilakěteni, enâ ea a kândâkě ’Mba e te n‘ Umba o tagulu. 22Pâkwěpâkwě Mwana moto a kěkěte, kâ eâ e pangakudwě: ndi maguga na moto tě a ka kândiyě bâ Mâ! 23Ka bâ‐ba yalě iuwana bâ mětě na bâ mětě, na, nja didi o bâ‐ba jadi a mbakě o ha elombo těkae.

24Ba diyaki tepě na jomano, na, nja ka langwě boněně wa. 25Ka Mâ‐a vâ na bâ, na, Mepolo mea Betomba me pangakiyi bâ; na ba yambakiyi bâ ba tubakwě na ba hakě bwamu. 26Ndi oa diyeni nonaně: nd‘ a ka diyě boněně o ’nyěni o jadi, a diyake ka nděmbě mětě; a ka diyě molo, ka a hakiyě. 27Mětě nja di boněně wa, a diyakě o beja, ipě a hakiyě? hanga na a diyakě o beja? ndi Mbi nd‘ o ’nyěni o jadi ka a hakiyě. 28Inyěni ndi ba bembidi n‘ Umba o mayějudwě mamě. 29Mbi kenjiděndi ’nyěni ipangiya, ka Paia a di ’Mba kenjiyěngo. 30Na ovaně nd‘ inyěni o ka diyěni o jakani o mâtâkâni o tagulu ’amě o ipangiya jamě, diyango o beka o yěkěkiděni jomu ja miyâ na miyâ mabale ma Israěl.

31K‘ Upangiyi a vâ, na, Saimân, Saimân, hilakěte, Setan a yombwakand‘ inyěni ovaně nd‘ o mâ‐a ka hěkě inyěni pani ka hwit. 32Ndi Mbi kaliyendi o pěl‘ ’âvě, na ovaně nd‘ ikamidě jâvě i ka měndě i nyange: o âvě‐o ka diyě oa ’luwa, o ka yâdâkidě bana ba nyângwě. 33Ka mâ‐a vâ na Ju, na, Upangiyi, mbi te kokěngo na o vala na nâvě, o ndabo ’a meboka, na iwedo. 34Ka Mâ‐a vâ, na, Pitě, Mbi langwakiyand‘ âvě, na, kuba ea kâkâle o buhwa těkabo, nd‘ o hâhě njo ilalo na oa ’wě ’Mba.

35Ka Mâ‐a vâ na bâ, na, o ’Mba‐mbi lomakidi inyěni o diyi na elandi ea dâlě, na elandi ea kola, na makogo, o nyamakindini elombo? Ka bâ‐ba vâ, na, Na vilolombo. 36Jâ ndi jaju ja vâ na bâ, na, Nd‘ o kya těkaně, a di na elandi ea dâlě, a nângâke eâ, a di na elandi ea kola a hake nyanga tě; a ha ’bě n‘ ukwala mu‘ ibâtâ, a hambakidě ngâi ’aju, na mâ‐a hamba umbâkâ. 37Mbi vâki n‘ inyěni, na, e di lěndwěngo ekae e ka hânjâbiyi n‘ Umba, Ka Mâ‐a langwě na bahayi ba bobe: ’kabojana belombo be jadi o pěl‘ ’amě be te n‘ ihuku. 38Ka bâ‐ba vâ, na, Upangiyi, hilakěte mekwala myi ibâtâ mebale nd‘ ekame. Ka Mâ‐a vâ na bâ, na, Ea bi twětwě.

39Ka Mâ‐a puma, ka Mâ‐a ’la o ukodi mua Alivi te ka Mâ‐a ma haka mběmbě; ka beyokwedi beaju bea vitě Mâ. 40O Mâ‐a diyedi A bě iboko tě, ka Mâ‐a vâ na bâ, na, Kalakiyani, banga oa ngiyani iyějudwě. 41Ka Mâ‐a věngěmě o bâ‐ba diyakidi pani ka ihwa ja ilale, ka Mâ‐a kwa na mabângâ ka Mâ‐a kaliya, na, 42Paia, oningě oa panga, věngěkidě ’Mba imâgi těkadi; ndi, hanga upango muamě, nd‘ umuâvě, u hamake. 43Ka enjěl e viya oba ea pumiya Mâ, e ka yâdâkidě Mâ. 44O Mâ‐a diyakidi a ka yěněkě meadi ka Mâ‐a kaliya pě n‘ iněně: ebabadi ’aju ea bě bwěsě ona matâi ma makiya maněně ma kwaka o he. 45O Mâ‐a umwedi ikaliya, ka Mâ‐a pâ o beyokwedi beaju be jadi, ka Mâ‐a kâbidě bâ‐ba tikaka na ngěbě, 46ka Mâ‐a vâ na bâ, na, O yaka li na nde? těmekěni, o ka kalakiyani, banga oa ngiyani iyějudwě.

47O Mâ‐a běkite a kalaka, hilakěte ebimba, na a ma tubakwě, na, Judas, ua jomu na babale, a kěkě o boho boabu, ka mâ‐a bakama na Jisus k‘ a pyâpyâ mâ. 48Ndi Jisus a vâki na mâ, na, Judas, o kândâki Mwana moto n‘ ipyâpyâ? 49O ba diyaki Mâ ulwaniděngo ba yěnidi be ka vitě, bâ na Mâ, na, Upangiyi, ho kokake n‘ ukwala mu‘ ibâtâ? 50K‘ umbâkâ uabu a koka uhayi mua prist ya molo ka mâ‐a lena mâ ditâ jaju iyomi. 51Ka Jisus a timbwana, na, Hukakiděni ovaně. Ka Mâ‐a kupaně ditâ jaju, ka Mâ‐a yongě mâ. 52Jâ ndi ja Jisus ja vâ na prist ja meolo, na ngawe ja těmpěl, na batodu, ba vakidi o Mâ‐a jadi, na, O pândini na mekwala na metumbe, ona o vakandini o mwibi u jadi? 53O Mbi diyaki n‘ inyěni o těmpěl buhwa ka buhwa, ou hambakiděni benâ o Umbi jadi; ndi iwěla janyu nd‘ ekadi, na ipangiya ja ivititi.

54Jâ ndi jabu ja nângâ Mâ, na vala na Mâ, ka bâ‐ba pâdě Mâ o ndabo ’a prist ea molo. Ka Pitě a vitě yaviděngo. 55O bâ‐ba latakidě diyâ o hanganě e‘ ikenga, bâ ’mě diyango, ka Pitě a diya tepě o ngalakabo ’abu. 56Ndi itângâ n‘ ihuhu i yěněki mâ diyango baka na veya, mâ mâ dihâ sii, mâ, na, Ekaně a diyaki tepě na Ju. 57Ka mâ‐a hâhâ mâ, na, Mwajo, mba ’wě Mâ. 58Vikikili kwěi k‘ upâkwě a yěně mâ, ka mâ‐a vâ, na, O tepě uabu. Ka Pitě a vâ na, Momo, mbi ’bě. 59Ulingo k‘ iwěla jâkâ tombango, k‘ upâkwě a vâ yâdiděngo, na, Mbambayě ekaně a diyaki tepě na ju; ’kabojana a ndi ua Galili. 60Ka Pitě a vâ, na, Moto, mba ’wě ka âvě o vâkě. A kalakate o mbenjě tě ea pâkâ, kuba e kâkâlâka. 61K‘ Upangiyi a vonguwa, ka Mâ‐a umbuwa Pitě. Ka Pitě a yongidě ndaga e‘ Upangiyi, nyang‘ ’aju a vâki na ju, na, Na kuba na kâkâlâkâ, o ka hâhiyi ’Mba nj‘ ilalo. 62Ka Pitě a puma o uhěngě, a ka eyaka nangudi.

63Ka bamo tě ba bweyaki Jisus ba diya ba ka věhěkě Mâ, ba bomaka Mâ. 64O bâ‐ba dibi Mâ mihâ, ba ka bweyaka Mâ o boho, na uwa Mâ, na, Sâkâkâ, nj‘ ’a bweyakě Âvě? 65Na belombo bepâkwě beitě beabu be ma kalaka o pěl‘ ’aju bokilaka.

66Buhwa bo yakate, ka batodu ba bato na prist ja meolo na balěndi ba lataniya, ka bâ‐ba pâdě Mâ o ’hoka ’abu, na, 67Âvě ndi Kraist? langwakiya hwě. Ka Mâ‐a vâ na bâ, na, Oningě ’Mba languwa inyěni, oa kamiděni: 68oningě ’Mba uwa tepě inyěni, oa yavwani ’Mba ni, n‘ inyěni oa huludě tepi ’Mba ni. 69Okava tombango vâkâna Mwana moto a diyendi o ’nâ ’yomi ea ngudi ea Anyambě. 70Ka bâ běhěpi ba vâ, na, O te Mwana Anyambě e? Ka Mâ‐a vâ na bâ, na, O ndini vângo na Mbi wě. 71Ka bâ‐ba vâ, na, Ho lě pi na nja mal‘ ě ma tali? ’kabojana hwě mětě ho yokindi oviya undumbu muaju mětě.

Currently Selected:

Luk 22: BNG1895

Highlight

Copy