Luk 20

1E diyakindi, buhwa bâkâ o jâ hwi tědině, A yokwakidě bato o těmpěl, a kalakiya sango eyamu, ka prist ja meolo na balěndi na batodu ba pâ o Mâ‐a jadi, 2ka bâ‐ba kala na Ju, na, Langwakiya hwě, ngud‘ ’âvě e hanakě belombo těkabe? tombe a lě nja a věkid‘ Âvě ngudi těkaně? 3Ka Mâ‐a yavwana ka Mâ‐a vâ na bâ, na, Mbi ka uwa tepě inyěni ndaga pâkâ; n‘ inyěni oa languwi ’Mba ni: 4Baptisma ea Jân, e diyakindi ea Hěvěn, ipě ea bato? 5Ka bâ‐ba hokolaniya bâ mětě na bâ mětě, na, Oningě hoa vâ na, ea viya oba; A ka vwi, na, Nd‘ o ’nyakidě li o kamidi mâ ni nandě? 6Nd‘ oningě hoa vâ, na, Ea bato; bato běhěpi ba ka bweyi hwě malale: ’kabojana ba ditakidi na Jân a diyakindi usâki. 7Ka bâ‐ba timbwana, na, ba yâle o languwa pělě ’aju e vakiyedi. 8Ka Jisus a vâ na bâ, na, N‘ Umbamba languwe tepě inyěni ipangiya jamě i hanakě belombo těkabe.

9Jâ ndi jaju ja yalě o kaniya bâ ukanakâdi těkamu; Momo n‘ uhuhu a liyakindi mwanga, ka mâ‐a dikiya muâ baliyi, ka mâ‐a ’la o ehe ea yaviděngo ulingo uyaba. 10O hongodi ka mâ‐a loma uhayi o baliyi ba jadi, nana ba věke mâ bebuma bea mwanga: ndi baliyi ba bomaki mâ, ka bâ‐ba timbě mâ naně. 11O njo ’pâkwě ka mâ‐a loma uhayi upâkwě: ka bâ‐ba boma tepě mâ, ka bâ‐ba ha mâ ihadi vi‘ ihâni, ka bâ‐ba timbě mâ naně. 12Njo ’pâkwě ka mâ‐a loma ua balalo: ka bâ‐ba luma tepě mâ, ka bâ‐ba uhwa mâ o uhěngě. 13Jâ ndi j‘ upangiyi mua mwanga ja vâ, na, Mbi hakě lě na ě? Mbi ka lomandi mwan‘ ’amě a tândâkě: e te diyaka na ba ndi ba běkě ba yěningě mâ na bâ‐ba dilě mâ. 14Nd‘ o baliyi ba yěněki mâ, ka bâ‐ba hokolaniya bâ mětě na bâ mětě, na, Ujigi nd‘ ekamu: vakani, ho weyaki mâ ni, na ekuha ea bě eahu. 15Nonaně, ka bâ‐ba pumě mâ o mwanga o bwebwe, ka bâ‐ba weya mâ. Upangiyi mua mwanga a ka ha lě bâ ovaně na ě? 16A ka viyandi ka jilidě baliyi těbaně, na mâ‐a vě mwanga bapâkwě. O bâ‐ba yoki eâ bâ, na, E diyake nonaně. 17Ka Mâ‐a hilě bâ, ka Mâ‐a vâ, na, E di lěndwěngo ekae e lě, na,

Ilale ja balongi i kiyakidi, jâ ndi ja bě pě molo mu‘ itududu?

18Moto uěhěpi a kwakě o ilale těkadi a ka bukiyandi; ndi uaju a ka kwě uěhěpi, i ka nyingi mâ.

19Ka prist ja meolo na balěndi ba buta o nangidě benâ o Mâ‐a jadi o iwěla tědině; ndi ba bangakindi bato: ’kabojana ba yěněki na A kanakiyi bâ ukanakâdi těkamu. 20Ba ka běmběkě Mâ, ka bâ‐ba loma ndâdu, i pumakiyedi ona bato bayamu, nana ba ka bweyandi ndaga jaju, na ovaně nd‘ o ba ka pâdě Mâ o ngudi na ipangiya ja gâven. 21Ka bâ‐ba uwa Mâ, na, Uyokwidi, ho yowěngo na o vâkândi na nâvě o yokwakidě hohonganěngo, na nâvě oa yěněkě moto uěhěpi pivi, nd‘ o yokwakiděndi njeya ea Anyambě pâkwěpâkwě: 22E te hohonganěngo na ho věkě Sisar pago, ipě e ibě? 23Nd‘ A yěněkindi ugono muabu, ka Mâ‐a vâ na bâ, na, O yějěkiyě li Mbi na nde? 24Levakidi ’Mba ni fura. E lě na uvela na dina ja nja? Ka bâ‐ba timbwana na vâ, na, Bea Sisar. 25Ka Mâ‐a vâ na bâ, na, Věkěni Sisar belombo be di bea Sisar, na Anyambě belombo be di bea Anyambě. 26Ba yâle o bweya ndaga jaju o boho boa bato: ka bâ‐ba mama iyavwana jaju, ka bâ‐ba vâlâmiyě vo.

27Ka Sadusi jâkâ i ma hâhâkâ nana o ’bě n‘ ipumbuwa, ja pâ o Mâ‐a 28jadi; ka bâ‐ba uwa Mâ, na, Uyokwidi, Mosěs a lěnděkiyi hwě, na, Oningě mwana nyangwě na moto a wa, na mâ‐a dika mwajo, a wa a diye na bana, na mwana nyangwě a ka nângâkâ mwad‘ ’aju, na mâ‐a tědě mwana nyangwě ibângâ. 29O diyaki ba nyangwě pâkâ hěmbwědi: ka ua bohoboho ua nângâ mwajo, ka mâ‐a wa a diye na bana. 30Ka ua babale a nângâ mâ o bobaka, ka mâ‐a wa a diye na mwana. 31Ka ua balalo a nângâ mâ; eâ nyanga tě te ea hěmbwědi tě eěhěpi; ba wakite ba dike bana. 32O madikanido ka ua mwajo a wa tepě. 33A ka diya lě ovaně mwad‘ ’a nja o ipumbuwa? ’kabojana běhěpi hěmbwědi tě te ba baki mâ. 34Ka Jisus a timbwana ka Mâ‐a vâ na bâ, na, Bana ba he těkaně ba bakandi, na bâ‐ba věkwě o maba: 35Ndi ba ka yěnwě weyango na o pahiya ehe těe ně, n‘ ipumbuwa j‘ iwedo, ba baka, na bâ‐ba věkwě o maba: 36na bâ‐ba yalě pě o wa: ’kabojana ba diyakate ba bě bwěsě ka enjěl; ba běndi bana ba Anyambě, ba diyaki bana ba ipumbuwa. 37Ea na bato ba pumbwakandi, pě lě na Mosěs a levakiděte o ele, o mâ‐a tubakě Jěhova, na Anyambě ea Ebraham, na Anyambě ea Aisak, na Anyambě ea Jekâb. 38Ikabojana A ’bě Anyambě ea ba di wewe, ndi A ea ba di mihâ: ’kabojana běhěpi ba te o Mâ‐a jadi miha. 39Jâ ndi ja balěndi bâkâ ja timbě, na, Uyokwidi, oa vwi bwamu. 40Oviya ’vaně b‘ uwaka pě Mâ nyuwě na vilolombo.

41Ka Mâ‐a vâ na bâ, na, E lě ndi eabu e vâkě na Kraist a Mwana ua Devid? 42Devid mâ mětě a ka vâkâ o ejanganangobo ea Psamu, na,

Jěhova a vâki n‘ Upangiyi muamě, na, Diyaka o enâ ’amě eyomi, 43Kabo Mba ta panga baloni bâvě ebonga ’vě e pitakiyě.

44Devid a tubaka Mâ, na, Upangiyi, nd‘ A lě mwan‘ ’aju na ě?

45Ka Mâ‐a vâ na beyokwedi beaju o matâ ma bato běhěpi, na, 46Kelevakani na balěndi, ba vahakě o tamwaka na ngâi iyaba, ba tândâkâ mahomwě o mahambanido, na bediya beněně o sinegâg, na lolika la betiyango o masango. 47Ba pukulakě mandabo ma mealika, na bâ‐ba haka makaliya mayaba iyaba ja bato: bâ baně ba ka duwi pě ivomudwě iněně wa.

Currently Selected:

Luk 20: BNG1895

Highlight

Copy