Luk 1
1
1O baitě ba nângâkidi na enâ itědě j‘ ipakuwa ja belombo tě be kamakudwě pâkwěpâkwě o hwě ho jadi, 2te pani ka bâ‐ba bweyakidě hwě beâ, ba diyakidi oviya jali tali ja mihâ, na bahayi ba ndaga; 3e yěněněki tepě bwam‘ o ’mba‐mbi jadi, ’kabojana mbi jadi hânjâbiděngo ibweyidě ja belombo beěhěpi oviya jali mětě, ka lěndi y‘ âvě Tiâfilus uyamu hohonganěngo, 4na ovaně nd‘ âvě o ka yowě pâkwěpâkwě ea belombo tě ibeâvě be yokwakudwě ekabe.
5O diyaki na prist pâkâ, o hwi ja Hěrod y‘ upolo mua Judia, dina na Sakaraias, ua njamba ea Abaia: mwad‘ ’aju a diyakindi ua bana ba Erân, dina jaju i diyakindi Ilisebět. 6Na bâ babale ba diyakindi bayam‘ o boho boa Anyambě, ba tamwaka na belekanako na sale ja Upangiyi jěhěpi ba diye na njěnji. 7Bu diyaka na mwana, ’kabojana Ilisebět a diyakindi ekomba; na bâ běhěpi ba diyakindi batodu.
8E diyakindi, o mâ‐a hakidi ebano ’aju ya prist o boho boa Anyambě hohonganěngo na njamb‘ ’aju, 9hohonganěngo na ihadi via ebano ya prist mběi ’aju e diyakindi itumba ja uyâmbâ o mâ‐a ngakiyedi o těmpěl ya Upangiyi. 10Ka ebimba ya bato yěhěpi ya diya e kalakiya o bwebwe o ’gombe y‘ uyâmbâ. 11Ka enjěl ya Upangiyi ya pumiya mâ těměngo o pělě ’a ’nâ ’yomi ya âlta y‘ uyâmbâ. 12O Sakaraias a yěni yâ, a yěněki njuke, ka jângâ ja bweya mâ. 13Ndi enjěl e vâki na ju, na, O bangake, Sakaraias: ikabojana ikaliya jâvě i yokanindi; na mwad‘ ’âvě Ilisebět a ka jand‘ âvě mwa‘ momo, na nâvě oa vangidě mâ dina jaju na Jân. 14O ka diyi na mbya n‘ upeyo; baitě ba ka peyandi n‘ ijawě jaju. 15Ikabojana a ka diyandi boněně o boho boa Upangiyi, à mâte ivě tombe maku makolo; a ka diyandi londango n‘ Ilina Iyam‘, oviya ihuhu ja nyangwě. 16A ka ’ludi bana ba Israěl baitě o Upangiyi Anyambě ’abu a jadi. 17A ka ’land‘ o boho boaju n‘ ilina na ngudi ya Ilaias, ka ’ludě melema mea ba hangwě o bana ba jadi, na ba ha yokakiya o iyowě ja hohonganěngo; ka kenje bato kokěngo na Upangiyi. 18Ka Sakaraias a vâ na enjěl, na, Mbi ka yowě lě ekae na ove? ’kabojana mba běndi utodu na mwad‘ ’amě a toduwendi na hwi jaju. 19Ka enjěl ya yavwana ka yâ‐ya vâ na ju, na, Umba ndi Gebriěl e těměkě o pwanja ya Anyambě; mbi ma lomwěndi ka kala na nâvě, na ka levid‘ âvě sango t‘ iyam‘ ekadi. 20Ndi, hilakěte, o ka diyandi emukumuku, o diye na ngudi ya kala, kabo buhwa boa belombo těkabe bo ka hamě, ’kabojana ou kamidě ndaga jamě, i ka hamě o ’gombe ’abu. 21Ka bato ba venga Sakaraias, ba ka mamaka eaju e bembanakidi o těmpěl. 22O mâ‐a pumidi, a yâlě o kala na bâ: ka bâ‐ba yowě na a yěnindi ehihila o těmpěl; ikabojana a pěpěkidi bâ, ndi a kale. 23E diyakindi, o hwi ja ehavu ’aju i diyakidi i makiyate, ka mâ‐a timba o ndabo ’aju mětě.
24Hwi tědině kělěbě ka mwad‘ ’aju Ilisebět a kaha, ka mâ‐a kutamiya ngândě itano, na, 25Kakana ndi ka Upangiyi a hadi n’ umba o hwi jaju i ’mbuwi ’mba, ivěngidě j‘ ihubiya jamě o bato ba jadi.
26O ngândě y‘ utoba ka enjěl Gebriěl ya lomwě oviya Anyambě a jadi o mboka ya Galili, dina, na, Nasarět, 27o itângâ vya ndabo ya Devid i jadi, i diyakidi nyimwěngo na momo dina ja Josěf; dina j‘ itângâ i diyaki na Meri. 28Ka enjěl ya pâ o j‘ i jadi, na vâkâ, na, Mbolo, âvě o jadi hekudwěngo nangudi, Upangiyi a na nâvě: o n‘ ibâtâ o bajo ba jadi. 29O j‘ i yěni mâ, ka jâ‐ja yěně njuke na ndaga jaju, ka mâ‐a pikiliya na jângâ tě ja mbolo ekadi i ka diya lě na. 30Ka enjěl ya vâ na jâ, na, O bangake, Meri: ‘kabojana o duwindi ehekwě o Anyambě a jadi. 31Ndi hilakěte, o ka kahandi jemi, na nâvě oa ja mwa‘ momo, o ka vangakidě dina jaju, na, JISUS. 32A ka diyandi boněně, a ka tubwi, na, Mwana ua A did‘ oba mětě; Upangiyi Anyambě a ka vi mâ eka ya hangwě Devid: 33a ka pangiyandi ndabo ya Jekâb egombe yěhěpi; ipangiya jaju ja diye n‘ ihuku. 34Jâ ndi ja Meri ja vâ na enjěl, na, Ekae e ka diya lě na, o mbi ha yowěte momo? 35Ka enjěl ya yavwana ka yâ‐ya vâ na ju, na, Ilina Iyam‘ i ka pândi âvě o jadi, na ngudi ya A did‘ oba mětě e ka pugand‘ âvě: ovaně nd‘ o elombo tě ya holi eâvě e ka jayě yeně e ka tubwě, na, Mwana ua Anyambě. 36Ndi hilakěte, mwan‘ ’a ’kad‘ ’âvě Ilisebět, a kahindi mwa‘ momo o utodu muaju; ekaně ndi ngândě y‘ utoba na a ma tubakwě na ekomba. 37Ikabojana o ’bě na ’lombo e ka měndě e hame na Anyambě. 38Ka Meri a vâ, na, Hilakěte uhayi mua Upangiyi mua mwajo; e diyake n‘ umba hohonganěngo na ndaga ’vě. Ka enjěl ya věngěmě o mâ‐a diyakidi.
39O jâ hwi tědině ndi ja Meri i umwakidi, ka mâ‐a hadividě o vala o ’hiki y‘ ukodi, o mboka ya Juda; 40ka mâ‐a ngiya o ndabo ya Sakaraias, ka mâ‐a homa Ilisebět. 41E diyakindi, o Ilisebět a yoki mbolo ya Meri, ukěkě u ka sodaka mâ o ihuhu; ka Ilisebět a londa na Ilina Iyamu. 42Ka mâ‐a kala na joi kehěngo, na vâkâ, na, O n‘ ibâtâ o bajo ba jadi, ibâtâ na ebuma e jad‘ o ihuhu jâvě. 43Ekae e viye lě ’mba na ove, ya nyangwě y‘ Upangiyi muamě e pâdi o ’mba‐mbi jadi ekae? 44Ikabojana hilakěte, joi ja mbolo ’âvě ja běte i yokanaka o matâ mamě, ukěkě u ka sodaka ’mba o ihuhu na mbya. 45Ibâtâ na mâ‐a kamakidě: ’kabojana belombo tě be langwakudwě mâ o viya o Anyambě a jadi be ka hamandi. 46Ka Meri a vâ, na,
Ilina jamě i kenakě Upangiyi,
47N‘ ilina jamě i peyaki na Anyambě Uhungini muamě.
48Ikabojana A tanginindi ihubiya j‘ uhayi muaju mua mwajo: ’kabojana, hilakěte, oviya okava magona měhěpi ma ka tube ’mba, na, ibâtâ.
49Jambojana A di na ngudi A ’mba hango belombo beněně; na dina jaju i ndi holi.
50Ngěbě ’aju e nd‘ o ba bangakě Mâ oviya mbamba nala mbamba.
51A levidi ngudi na enâ ’aju; A vanjanganiděndi b‘ iduba na iyebiyedi via melema meabu.
52A hubidi ba ngudi oviya bediya beabu, ka mâ‐a betidě ba hubiyango.
53A vulidi ba nja na belombo beyam‘; A timbakě benami naně.
54A hanindi uhayi muaju Israěl, iyongidě ja ngěbě ’aju;
55Ka Mâ‐a kalaki na ba hangwě bahu, na Ebraham, n‘ ibângâ jaju egombe yěhěpi.
56Ka Meri a diya na ju ba ngândě ilalo, ka mâ‐a timba o ndabo ’aju mětě.
57Nandi egombe ya Ilisebět y‘ ijadi ya hohonganěngo e diyaki ya pâ; ka mâ‐a ja mwa‘ momo. 58Ka ba ma bakaka na ju, na bana ba ’kadi baju ba yoka nyanga ya Upangiyi e levakidě mâ ngěbě ’aju ’něně; ka bâ ba peya na ju. 59E diyakindi, o buhwa boa logwambi, ka bâ‐ba pâ ka hěbě mwana; ka bâ‐ba vangidě mâ dina ja hangwě, na, Sakaraias. 60Ka nyangwě a yavwana ka mâ‐a vâ, na, Hanga nonaně; ndi a ka tubwi, na, Jân. 61Ka bâ‐ba vâ na ju, na, O ’bě na ijawě jâvě i di vangamango dina těkadi. 62Ka bâ‐ba ha hangwě ndembo, na, a vahaka lě mâ a tubakwě na. 63Ka mâ‐a uwa elombo e lěnděněkwě, ka mâ‐a lěndě, na, Dina jaju ndi Jân. Ka bâ běhěpi ba mama. 64Ka udumbu muaju mu‐a bumuwa o mbenjě pâkâ, ka emi ’aju ya hulama, ka mâ‐a kala, ka mâ‐a bendě Anyambě. 65Ka jângâ ja bweya ba diyakidi ulwaniděngo běhěpi: k‘ ivâdi těkadi jěhěpi ja hamana o ’hiki y‘ ukodi ya Judia yěhěpi. 66Ba yokaki jâ běhěpi ba nangakidi jâ o melema meabu, na, Mwa těkaně a ka diya lě nja jângâ‐ě! Enâ ya Upangiyi e diyaki na mâ.
67Ka hangwě Sakaraias a londa n‘ Ilina Iyamu, ka mâ‐a sâkâ, na,
68Ibâtâ na Upangiyi Anyambě ya Israěl; ikabojana a lumbiyendi, ka Mâ‐a vanguwa bato baju,
69A umudi hwě ibomba j‘ iyonga o ndabo y‘ uhayi muaju Devid;
70Pani ka Mâ‐a kalakidi n‘ udumbu mua basâki baju ba hole, ba diyakidi oviya jali ja he:
71Na ovaně nd‘ o hwě ho ka yongě oviya ndoba jahu, na oviya enâ ya ba lonakě hwě běhěpi;
72Ihaya ja ngěbě e yohanakudwě ba hangwě bahu, na o iyongidě ja panga ’aju e di hole;
73Ikana jaju i kanaki na hangw‘ ’ahu Ebraham,
74Na, A ka vi hwě, oningě hwě věngěměngo o ’nâ ya ndoba jahu, ho ka hakiya Mâ ho bange,
75Na hole na bwam‘ o boho boaju, hwi ja eměnâ ’ahu jěhěpi.
76Na nâvě mwana, o ka tubwi, na, usâki mua A did‘ oba mětě: ’kabojana o ka ’landi o boho boa Upangiyi ikenjě ja njeya jaju;
77Ivě ja bato baju iyowě j‘ iyonga na ivěngidě ja bobe boabu,
78Na ngěbě ya Anyambě ’ahu ebâbu; yâ ndi ya majenjina ma buhwa e lumbi hwě oviya ’ba,
79Ivě ja ba didi o ivitit‘ na ’dingihě y‘ iwedo bwe, itumbwana ja matambi mahu o njeya ya jonga.
80Ka mwana a tombuwa, a ka yâdâkiyě n‘ ilina, a diyakind‘ o nginga kab‘ o buhwa boaju bo levakudwě Israěl.
Currently Selected:
Luk 1: BNG1895
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1895.
