Jân 5

1Ekae tombango, o diyakindi na isango ja Jiu: ka Jisus a vala o Jěrusalěm.

2Nandi o Jěrusalěm o na etima o ihambanido ja medâmbě e tubakwě na emi ya Hibru, na, Betěsda, e jadi na belěmbě betano. 3Omě nd‘ o nangakiyě ebimba eněně, ea mebědi, pâgu, ba děhimakě, na bevande limbelimbe, ba vengakě ininganwě ja miba. 4Ikabojana enjěl e ma kěkěndi o ’gombe yâkâ o etima těeně ka ninganě miba: moto ka moto a ma pâkâ omě na bohoboho, oningě miba ninganwěngo, a yongakandi jângâ ja ebědi jěhěpi ijaju i diyanakě. 5Momo n‘ uhuhu a diyakind‘ omě, a diyakidi na ’bědi mabo ma mepuma malalo na mepuma logwambi. 6O Jisus a yěněki mâ bya, ka Mâ‐a yowě na a bembindi n‘ itingidi těvině egombe eyaba, ka Mâ‐a vâ na ju, na, O vahakand‘ o diya upeha? 7Ubědi a yavwanaki Mâ, na, Upangiyi, mbi ’bě na moto a vamakě ’mba o etima, oningě miba ninganwěngo: mbi běkěte mbi vaka, vâkâna upâkwě a pitakandi oboho n‘ umba. 8Ka Jisus a vâ na ju, na, Umwaka, nângâkâ ikondo jâvě, na nâvě oa tamuwa. 9Elěngiaha tepě momo tě a bě upeha, ka mâ‐a nângâ ikondo jaju, a ka tamwaka: buhwa tě bo diyakindi buhwa bo‘ Iyâjâ.

10Jiu ba vâkindi na a yongakudwě na, Bo ndi buhwa bo‘ Iyâjâ; e ’bě bwamu na nâvě o bapakě ikondo jâvě. 11A yavwanaki bâ, na, A ma panga ’mba upeha Mâ nd‘ a ma vâ n‘ umba, na, Nângâkâ ikondo jâvě, na nâvě oa tamuwa. 12Jâ ndi jabu ja uwa mâ, na, A lě nja moto ě a ma vâ na nâvě, na, Nângâkâ ikondo jâvě, na nâvě oa tamuwa. 13Ndi a yongakudwě a yowakě Mâ: ’kabojana Jisus a nyângâkindi o bâ‐ba jadi, ebimba ea bato e diyakindi iboko těvině. 14Ekabe tombango Jisus a duwaki mâ o těmpěl, ka Mâ‐a vâ na ju, na, Umbwakiyate oa bě ndi upeha: o hake pě bobe, obanga elombo ebe wa ya pâ o âvě o jadi. 15Ka momo tě a věngěmě, ka Mâ‐a languwa Jiu na A diyakindi Jisus a pangaki mâ‐a bě upeha. 16Ovaně nd‘ o Jiu ba haki Jisus njuke, na bâ‐ba ka vahaka o weya Mâ, ’kabojana A hakindi belombo těkabe o buhwa bo‘ Iyâjâ. 17Ndi Jisus a vâki na bâ, na, Paia a hakandi o ’gombe těkae, Mbi haka tepě. 18Ovaně nd‘ o Jiu ba vahaki pě o weya Mâ, ’kabojana Au weyaka kabo buhwa bo‘ Iyâjâ dipâ, ndi A vâki tepě na Hangwě ndi Anyambě, a pangaki Mâ mětě na Bâ na Anyambě ba te nyanga pâkâ.

19Jisus a yavwanakindi ka Mâ‐a vâ na bâ, na, Pâkwěpâkwě mětě Mbi vâki n‘ inyěni, na, Mwana a haye elombo mâ mětě, kabo eaju e yěněkě Hangwě a haka: ’kabojana belombo beaju be hakě, beâ tepě bea Mwana be hakě. 20Ikabojana Hangwě a tândâkândi Mwana, A leviděngo Mâ belombo beaju mětě be hakě beěhěpi: a ka levidě tepě Mâ behavu beněně wa na ekabe, ovaně nd‘ inyěni o jadi o mamanakani. 21Pani ka Hangwě a pumbwakidě bawewe, na Mâ‐a pangaka bâ mihâ; nonaně tepě o Mwana a pumbwakidě uaju a ka pangě. 22Ikabojana Hangwě a yěkěkidě moto; ndi A věngo Mwana yěkě yěhěpi: 23ovaně nd‘ o bato běhěpi ba ka dilě Mwana, pani ka bâ‐ba dilakě Hangwě. A ha dilakě Mwana, a dilakě Hangwě e lomaki Mâ. 24Mbi vâki n‘ inyěni pâkwěpâkwě mětě, na, A yokakě ndaga jamě, na mâ‐a kamakidě Mâ‐a lomaki ’Mba, a na eměnâ ya egombe yěhěpi, a pâye pě o makwa; ndi a tombindi oviy‘ iwedo nala eměnâ. 25Mbi vâki n‘ inyěni pâkwěpâkwě mětě, na, Iwěla i vakandi, i tepě kya těkaně, o bawewe ba ka yokě joyi ja Mwana Anyambě: ba ka yokě ba ka diyandi. 26Pani ka Hangwě a di na eměnâ mâ mětě, nonaně nd‘ o Mâ‐a di věngo Mwana, na A diake na ’měnâ mâ mětě; 27A věngo tepě Mâ ngudi e yěkěněkidě, ’kabojana A ndi Mwana moto. 28O mamakeni ekae: ’kabojana iwěla i vakandi, ja běhěpi ba jadi o malonga, ba ka yoki joyi jaju, ba ka pumbuwandi; 29ba di hango bwam‘, ipumbuwa ja eměnâ; ba di hango bobe, ipumbuwa j‘ ivomudwě.

30Mba haye elombo Umba mětě: Mbi yěkěkiděndi pani ka Umba‐mbi yokakě: yěkě ’amě e hohonganěngo; ’kabojana Mba vahaka upango muamě mětě, kabo upango mua Hangwě e lomaki ’Mba. 31Oningě Mbi pakwaka upako o pěl‘ ’amě, vâkâna upako muamě u ’bě pâkwěpâkwě. 32O n‘ upâkwě a pakwakě upako o pěl‘ ’amě, Mbi yowěngo na upako muaju u pakwakě o pěl‘ ’amě, u pâkwěpâkwě. 33O lomakiděndini o Jân a jadi, ka mâ‐a pakuwa upako o pâkwěpâkwě. 34Ndi Mba pahakiya upako o moto a jadi: ndi Mbi vâki belombo těkabe, na ovaně nd‘ inyěni o ka yongwěni. 35A diyakindi bwe e yodakě na e bumwakě: n‘ inyěni o diyakindi bâbângo na o peya na bwě ’aju o egombe. 36Mbi n‘ upako uněně wa na mua Jân: ikabojana behavu bea Hangwě be věki ’Mba na Mbi hânjâbâkidě beâ, beâ ndi ibeamě be hakě, be pakwakandi o pěl‘ ’amě, na, Hangwě nd‘ a lomaki ’Mba. 37Hangwě e lomaki Mba mâ mětě, a tepě pakuwango o pěl‘ ’amě. O ha yokeni joyi jaju egombe t‘ egombe, n‘ inyěni o ha yěněteni uvela muaju. 38O ’běni na ndaga jaju o inyěni o jadi: ’kabojana oa kamakiděni uaju a di lomango. 39Butakani Malěndwě; ’kabojana omě nd‘ inyěni o pikilakiyě na o ndini na eměnâ ya ’gombe yěhěpi: mâ ndi ma pakwakě o pěl‘ ’amě. 40Ndi oa viyeni o ’Mba‐mbi jadi, na ovaně nd‘ inyěni o ka pahiyě eměnâ. 41Mba pahakiya ihekudwě o bato ba jadi. 42Ndi Mbi yowěngo inyěni, na o ’běni n‘ itândě ja Anyambě o inyěni o jadi. 43Mbi pândi na dina ja Paia, ndi inyěni oa věhělěkidi ’Mbani: oningě upâkwě a viya na dina jaju mětě, mâ ndi uanyu a ka věhělidě. 44O l‘ o kamakiděni na? ba pahanakiyěni ihekudwě, n‘ inyěni oa vaheni ihekudwě i vakiyě Anyambě a jadi dipâ. 45O pikilakiyeni na Mbi ka tubandi inyěni o Hangwě a jadi: o n‘umbâkâ a tubakě, Mosěs, uanyu a pitakidě. 46Ikabojana o jaka o kamakiděni Mosěs, t‘ o kamakiděti ’Mbani: ’kabojana a lěnděkindi o pěl‘ ’amě. 47Nd‘ oningě o kamiděni malendwě maju, o ka kamidě li ndaga jamě na?

Currently Selected:

Jân 5: BNG1895

Highlight

Copy