Jân 3

1O diyakindi na momo ua Farisi, dina na Nikodimâs, upangiyi mua Jiu. 2Mâ nd‘ a vakidi o Jisus a jadi na bulu, ka mâ‐a vâ na ju, na, Rabai, ho yowěngo na o ndi uyokwidi u di viyango Anyambě a jadi: ’kabojana o, ’bě na moto a didi a haka belembo tě ibeâvě be hakě ekabe, kabo Anyambě a di na ju. 3Jisus a yavwanakindi, ka Mâ‐a vâ na ju, na, Mbi vâki na nâvě pâkwěpâkwě mětě, na, Moto a yâlě o yěně egândâ ya Anyambě, kabo a ta jawě epakwě njo. 4Nikodimâs a vâki na ju, na, Moto a ka jawě lě pě, na, mâ‐a bě utodu? a ka ngiyi pě o ihuhu ja nyangwě epâkwě njo, na mâ‐a jawě? 5Jisus a yavwanakindi, na, Pâkwěpâkwě mětě Mbi vâki na nâvě, na, Kabo moto a jawě na miba na Ilina, běngě a ngakiye o ipangiya ja Anyambě. 6A di jawěngo na mehoni, a mehoni; na a di jawěngo n‘ Ilina, a ndi ilina. 7O mamake nyang‘ ’amě e ma vâ na nâvě, na, O jakwěni epâkwě njo. 8O upupě u vungakě o mu tândâkě, o ka yokate edungu ’aju, ndi o ’bě na ngudi e pakwakě o mu vakiyě, na o mu kěkě: nonaně tepě o moto uěhěpi a di jawěngo n‘ Ilina. 9Nikodimâs a yavwanakindi ka mâ‐a vâ na ’ju, na, Belombo těkabe be ka diya lě na? 10Ka Jisus a yavwana ka Mâ‐a vâ na ’ju, na, O ’bě hangwě ya Israěl, ndi oa ’wě belombo těkabe? 11Pâkwěpâkwě mětě Mbi vâki na nâvě, na, Ho kalakandi ibeahu be yowudě, na hwě‐ho pakwakandi ibeahu be di yěněngo; ndi inyěni oa nângâkâni upako muahu. 12Oningě Mba languwa inyěni belombo bea he, o kamiděni, o lě o kamakiděni, na, oningě Mba languwa inyěni belombo bea Hěvěn? 13O ’bě na moto a di betango o Hěvěn, kabo Mâ‐a vakiyed‘ o Hěvěn, Mwana‐moto a jad‘ o Hěvěn. 14Pani ka Mosěs a betakidě mbamba o nginga, nonaně tepě o Mwana‐moto a ka betwě oba: 15na a kamakidě Mâ uěhěpi a nyange, ndi a ka pahiyandi eměnâ ya egombe yěhěpi.

16Ikabojana nonaně ndi o Anyambě a tândâkidi he, ka Mâ‐a vě Mwan‘ ’aju umbâkâ, na, uěhěpi a ka kamidě Mâ, a nyange, ndi a na eměnâ ya egombe yěhěpi. 17Ikabojana Anyambě au lomaka Mwan‘ ’aju o he ka kwehě he, ndi kabo na ovaně nd‘ o he e ka yongě o Mâ‐a jadi. 18A kamakidě Mâ, a ’bě kwango: ndi a ha kamakidě Mâ, a kwi pâni, ’kabojana a ’bě kamiděngo dina ja Mwana Anyambě umbâkâ. 19Makwa nd‘ ekama, na, bwe ya pâ o hě, ndi bato ba tândâkândi ivititi wa na bwe, ’kabojana behadi beabu be ndi bobe. 20Ikabojana moto uěhěpi a hakě bobe a binaki bwe, na mâ‐a vaka o bwe, o banga behadi beaju be hěnjwě. 21Ndi a hakě pâkwěpâkwě, a pâkândi o bwe, na ovaně nd‘ o behadi beaju be ka yowaně, na be hamakandi na Anyambě.

22Belombo těkabe pa, ka Jisus na beyokwedi beaju be viya o ’hiki ya Judia; omě nd‘ o Mâ‐a diyaki na bâ, A baptaisanaka. 23Jân a diyaki tepě a baptaisanaka o Inon, piělě na Selim, ikabojana omě o diyakindi na miba maitě: ka bâ‐ba viya, na bâ na baptaisakwě. 24Ikabojana Jân a diyakite a t‘ o vamwě o ndabo ivititi. 25Beyokwedi bea Jân na Jiu, ba diyakindi na nyuwe o pěl‘ ’a itukwě. 26Ka bâ‐ba viya o Jân a jadi, ka bâ‐ba vâ na ju, na, Rabai, A diyakidi na nâvě o pělě ’pâkwě ya Jâdan, uâvě a pakwakě upako, umbwakiyate, A baptaisakandi, na bato běhěpi ba kěkěnd‘ o Mâ‐a jadi. 27Ka Jân a yavwana ka mâ‐a va, na, Moto a pahiye elombo, kabo ya věwě mâ oviya Hěvěn. 28Inyěni mětě o pakwakandini upako o pěl‘ ’amě, na mbi vâkindi, na, Mbi ’bě Kraist, ndi mbi ndi lomwěngo o boho boaju. 29A di n‘ ubâmbi, ndi ubayi: ndi mbweyi y‘ ubayi, ndi de e yokakandi joyi jaju, e peyakandi na ngudi eitě na joyi j‘ ubayi: mbya tě eamě ekaně e hohonganiděndi. 30A ka kenandi, ndi mbi ka hâlâviyěndi.

31A vakiyě oba, a ndi wa na běhěpi: a jadi ua he, a he, na mâ‐a kalaka tepě bea he: a vakiyě oba, a ndi wa na běhěpi. 32Ibeaju be di yěněngo n‘ ibeaju be di yokango, beâ ndi ibeaju be pakwakě; ndi o bě na moto a kamakidě upako muaju. 33A kamakidě upako muaju, a vaměngo o male maju na Anyambě a pâkwěpâkwě. 34Ua Anyambě a di lomango, a kalakandi ndaga ja Anyambě: ’kabojana Anyambě a věkě Mâ Ilina na ’yějâ. 35Hangwě a tândâ Mwana, A ndi věngo belombo beěhěpi o benâ beaju. 36A kamakidě Mwana, a na eměnâ ya egombe yěhěpi: ndi a ha kamakidě Mwana, a yěně eměnâ, ndi ngambi ya Anyambě e na ju.

Currently Selected:

Jân 3: BNG1895

Highlight

Copy