မဿဲ 8
8
အနာကြီးရောဂါသည်တစ်ဦးကို ကျန်းမာစေတော်မူခြင်း
1ယေရှုသည် တောင်ပေါ်မှ ဆင်းကြွတော်မူသောအခါ လူအုပ်ကြီးသည် နောက်တော်သို့ လိုက်ကြ၏။ 2ထိုအခါ အနာကြီးရောဂါသည်တစ်ဦးသည် ကိုယ်တော်ထံသို့ လာ၍ ဒူးထောက်လျက် “သခင်… သခင်အလိုတော်ရှိလျှင် အကျွန်ုပ်ကို စင်ကြယ်စေနိုင်ပါသည်” ဟု လျှောက်လေ၏။
3ယေရှုသည်လည်း လက်တော်ကို ဆန့်၍ ထိုသူကို တို့ထိတော်မူပြီးလျှင် “ငါအလိုရှိ၏။ စင်ကြယ်စေ” ဟု မိန့်တော်မူ၏။ ထိုခဏအတွင်း၌ ထိုသူ၏ရောဂါသည်လည်း ပျောက်ကင်းလေ၏။ 4ထို့နောက် ယေရှုက ထိုသူအား “ဤအကြောင်းကို မည်သူ့ကိုမျှ မပြောနှင့်။ ယဇ်ပုရောဟိတ်ထံသို့ သွား၍ သူ့အားကြည့်ရှုစစ်ဆေးစေလော့။ သင့်ရောဂါပျောက်ကင်းကြောင်း လူတို့ရှေ့၌ သက်သေပြရန် မောရှေ၏ပညတ်ကျမ်းအတိုင်း ပူဇော်စရာများကို ဆက်သလော့” ဟု မိန့်တော်မူ၏။
ရောမတပ်မှူးတစ်ဦး၏ ယုံကြည်ခြင်း
5ယေရှုသည် ကပေရနောင်မြို့သို့ ကြွတော်မူသောအခါ ရောမတပ်မှူးတစ်ဦး#8:5 မူရင်းဂရိကျမ်းတွင် “တပ်မှူး” ဟု သုံးနှုန်းထားသည်။ ၈:၈ ၌လည်း ထို့အတူဖြစ်သည်။သည် ကိုယ်တော်ထံသို့ ချဉ်းကပ်၍ 6“သခင်… အကျွန်ုပ်၏ အစေခံတစ်ယောက်သည်#8:6 မူရင်းဂရိကျမ်းတွင် “ကလေး” ဟု ဖော်ပြထားသည်။ လေဖြတ်၍ ဝေဒနာပြင်းစွာ ခံစားလျက် အိပ်ရာတွင် လဲနေရပါသည်” ဟု လျှောက်လေ၏။
7ထိုအခါ ယေရှုက “ငါလာ၍ သူ့ကို ကျန်းမာစေမည်” ဟု မိန့်တော်မူ၏။
8သို့သော် တပ်မှူးက “သခင်… အကျွန်ုပ်သည် ထိုက်တန်သောသူ မဟုတ်သောကြောင့် အကျွန်ုပ်၏အိမ်မိုး အောက်သို့ သခင်ကြွလာတော်မူရန် မသင့်လျော်ပါ။ သခင်ရှိသည့်နေရာမှ အမိန့်တော်ကိုသာ ပေးတော်မူလျှင် အကျွန်ုပ်၏အစေခံသည် ပြန်လည်ကျန်းမာပါလိမ့်မည်။ 9ဤသို့ဆိုရခြင်းမှာ အကျွန်ုပ်သည် အမိန့်အာဏာအောက်တွင် ရှိသူဖြစ်ပြီး အကျွန်ုပ်၏လက်အောက်တွင်လည်း စစ်သားများရှိသောကြောင့် ဖြစ်၏။ အကျွန်ုပ်သည် တစ်ဦးကို ‘သွားလော့’ ဟု ပြောလျှင် သူသည်သွားရ၏။ အခြားတစ်ဦးကို ‘လာလော့’ ဟု ပြောလျှင် သူသည်လာရ၏။ အကျွန်ုပ်၏အစေခံကို ‘ဤအရာကို လုပ်ဆောင်လော့’ ဟု ပြောလျှင် သူသည် လုပ်ဆောင်ရပါ၏” ဟု လျှောက်လေ၏။
10ယေရှုသည် ထိုတပ်မှူး၏ စကားကို ကြားသော် အံ့သြတော်မူလျက် နောက်တော်သို့ လိုက်သောသူများဘက်သို့ လှည့်၍ “သင်တို့အား ငါအမှန်ဆို၏။ ထိုကဲ့သို့ ယုံကြည်ခြင်းရှိသောသူတစ်ဦးကိုမျှ အစ္စရေးလူမျိုးထဲ၌ ငါမတွေ့ဖူးသေး။ 11သင်တို့အား ငါပြောဆိုသည်မှာ လူမျိုးခြားများစွာတို့သည် အရှေ့အရပ်နှင့် အနောက်အရပ်မှ လာ၍ ကောင်းကင်နိုင်ငံတော်၏ စားသောက်ပွဲ၌ အာဗြဟံ၊ ဣဇာက်၊ ယာကုပ်တို့နှင့်အတူ စားသောက်ကြလိမ့်မည်။#8:11 မူရင်းဂရိကျမ်းတွင် “လျောင်းကြလိမ့်မည်” ဟု တွေ့ရှိရသည်။ ပထမရာစုအရှေ့အလယ်ပိုင်း၌ အစာစားသုံးရာတွင် စားပွဲရှေ့၌ထိုင်၍ စားသုံးလေ့မရှိပါ။ ကြမ်းပြင်ပေါ်၌ အခြားတစ်ဦးအပေါ် မှီလျောင်း၍ စားပွဲကိုဦးတည်ကာ စားသောက်လေ့ရှိသည်။ 12နိုင်ငံတော်သားများဖြစ်သော အစ္စရေးလူမျိုးတို့မှာမူ အပြင်ဘက်မှောင်မိုက်သောအရပ်သို့ နှင်ထုတ်ခံကြရလိမ့်မည်။ ထိုနေရာ၌ သူတို့သည် အံကြိတ်၍ ငိုကြွေးရလိမ့်မည်” ဟု မိန့်တော်မူ၏။
13ထို့နောက် ယေရှုက ထိုရောမတပ်မှူးအား “အိမ်သို့ ပြန်လော့။ သင်၏ယုံကြည်ခြင်းအတိုင်း ဖြစ်ပြီ” ဟု မိန့်တော်၏။ ထိုသို့ မိန့်တော်မူသည့်အချိန်၌ပင် တပ်မှူး၏ အစေခံသည် ပြန်လည်ကျန်းမာလေ၏။
လူများစွာကို ကျန်းမာစေတော်မူခြင်း
14ယေရှုသည် ပေတရုအိမ်သို့ ကြွသောအခါ ပေတရု၏ ယောက္ခမသည် ဖျားလျက် အိပ်ရာထဲ၌ လဲနေသည်ကို မြင်တော်မူ၏။ 15ယေရှုသည် ထိုအမျိုးသမီး၏ လက်ကို တို့ထိတော်မူလျှင် အဖျားပျောက်လေ၏။ ထိုအခါ သူသည် အိပ်ရာမှ ထပြီးလျှင် ယေရှုအား ဧည့်ခံလေ၏။
16ထိုညနေတွင် လူတို့သည် နတ်ဆိုးပူးသူများကို ယေရှုထံတော်သို့ ခေါ်ဆောင်လာကြ၏။ ယေရှုသည် ထိုနတ်ဆိုးတို့ကို အမိန့်ပေး၍ နှင်ထုတ်တော်မူ၏။ ဖျားနာသောသူအားလုံးကိုလည်း ကျန်းမာစေတော်မူ၏။ 17ဤအရာသည် ပရောဖက်ဟေရှာယအားဖြင့် မိန့်တော်မူသော ဘုရားသခင်၏စကားတော်အတိုင်း ဖြစ်ပျက်လာရန်ပင် ဖြစ်၏။ ထိုဟောပြောချက်မှာ
“ကိုယ်တော်သည် ကျွန်ုပ်တို့၏ ဖျားနာခြင်းနှင့်
ရောဂါဝေဒနာများကို ယူဆောင်သွားတော်မူ၏”#8:17 ဟေရှာ ၅၃:၄။
ဟူ၍ ဖြစ်၏။
ယေရှုနောက်တော်သို့ လိုက်ခြင်း၏ အကျိုးဆက်
18ယေရှုသည် မိမိပတ်လည်၌ရှိသော လူထုကို မြင်တော်မူလျှင် တပည့်တော်တို့အား တစ်ဖက်ကမ်းသို့ ကူးရန် ညွှန်ကြားတော်မူ၏။
19ထိုအခါ ကျမ်းတတ်ဆရာတစ်ဦးက “ဆရာတော်ကြွသည့် မည်သည့်နေရာကိုမဆို အကျွန်ုပ်လိုက်ပါမည်” ဟု လျှောက်လေ၏။
20သို့သော် ယေရှုက “မြေခွေးတို့၌ နေစရာ တွင်းရှိ၏။ ငှက်တို့၌ နားစရာအသိုက်ရှိ၏။ လူသား#8:20 “လူသား” သည် ယေရှုက မိမိကိုယ်တိုင်အတွက် သုံးသော ဂုဏ်ပုဒ်ဖြစ်သည်။၌မူ ခေါင်းချစရာနေရာပင် မရှိ” ဟု မိန့်တော်မူ၏။
21အခြားတပည့်တော်တစ်ဦးက “သခင်… အိမ်သို့ပြန်၍ အကျွန်ုပ်၏ဖခင်ကို ဦးစွာ သင်္ဂြိုဟ်ခွင့်ပြုတော်မူပါ” ဟု လျှောက်လေ၏။
22သို့သော် ယေရှုက “ယခုပင် ငါ့နောက်သို့ လိုက်လော့။ ဝိညာဉ်ရေးရာ၌ သေဆုံးနေသောသူတို့သာ မိမိတို့၏လူသေကို သင်္ဂြိုဟ်ပါစေ#8:22 မူရင်းဂရိကျမ်းတွင် “လူသေတို့သည် မိမိတို့လူသေကို သင်္ဂြိုဟ်ပါစေ” ဟူ၍ ပါရှိသည်။” ဟု မိန့်တော်မူ၏။
လေမုန်တိုင်းကို ငြိမ်သက်စေတော်မူခြင်း
23ထို့နောက် ယေရှုသည် လှေပေါ်သို့ တက်တော်မူ၍ တပည့်တော်များနှင့်အတူ အိုင်တစ်ဖက်ကမ်းသို့ ကူးဖြတ်တော်မူ၏။ 24ရုတ်တရက် အိုင်ထဲတွင် လေပြင်းမုန်တိုင်းကျလာသဖြင့် လှေသည် လှိုင်းတံပိုးများအောက်တွင် နစ်လုမတတ်ရှိ၏။ သို့သော် ထိုအချိန်တွင် ယေရှုသည် အိပ်စက်နေတော်မူ၏။ 25တပည့်တော်တို့သည် ကိုယ်တော်ထံသို့ ချဉ်းကပ်၍ နှိုးပြီးလျှင် “သခင်… ကယ်တော်မူပါ။ အကျွန်ုပ်တို့ရေနစ်သေရပါတော့မည်” ဟု အော်ဟစ်လျက် လျှောက်ကြ၏။
26ယေရှုက “ယုံကြည်ခြင်းအားနည်းသောသူတို့… အဘယ်ကြောင့် ကြောက်လန့်ကြသနည်း” ဟု မိန့်တော်မူပြီးနောက် ထ၍ လေနှင့် လှိုင်းတံပိုးအား အမိန့်ပေးကာ ဆုံးမတော်မူ၏။ ထိုအခါ လေနှင့် လှိုင်းတံပိုးတို့သည် ချက်ချင်းငြိမ်သက်သွားလေ၏။
27တပည့်တော်တို့သည် အံ့အားသင့်လျက် “ဤသူသည် မည်သူနည်း။ လေနှင့် လှိုင်းတံပိုးတို့ပင်လျှင် သူ့ကို နာခံကြသည်” ဟူ၍ ပြောဆိုကြ၏။
နတ်ဆိုးပူးနေသောလူနှစ်ဦးတို့ကို ကျန်းမာစေတော်မူခြင်း
28အိုင်တစ်ဖက်ကမ်းရှိ ဂါရစ#8:28 “ဂါရစ” အချို့လက်ရေးမူကျမ်းများတွင် “ဂါဒရဒေသ၊” အချို့တွင် “ဂါဂရဒေသ” ဟု ဖော်ပြထားသည်။ဒေသသို့ ကြွသောအခါ နတ်ဆိုးပူးသူနှစ်ဦးတို့သည် သင်္ချိုင်းဂူများအကြားမှ ထွက်လာ၍ ယေရှုနှင့် တွေ့ဆုံကြ၏။ ထိုသူတို့သည် အလွန်ဆိုးသွမ်းသဖြင့် မည်သူမျှ ထိုသင်္ချိုင်းလမ်းကို ဖြတ်မသွားနိုင်ကြပေ။
29ထိုသူတို့က “ဘုရားသခင်၏သားတော်… ကိုယ်တော်သည် အကျွန်ုပ်တို့နှင့် မည်သို့ဆိုင်သနည်း။ ဘုရားသခင် သတ်မှတ်ထားတော်မူသော အချိန်မတိုင်မီ ကိုယ်တော်သည် အကျွန်ုပ်တို့ကို ညှဉ်းဆဲရန် ဤနေရာသို့ ကြွလာတော်မူသလော” ဟူ၍ ယေရှုကို အော်ဟစ်ပြောဆိုကြ၏။
30ထိုသူတို့နှင့် မလှမ်းမကမ်းတွင် ဝက်အုပ်ကြီးတစ်အုပ်သည် အစာစားနေ၏။ 31နတ်ဆိုးတို့က “အကျွန်ုပ်တို့ကို နှင်ထုတ်မည်ဆိုပါက ထိုဝက်အုပ်ထဲသို့ ဝင်ခွင့်ပြုတော်မူပါ” ဟု တောင်းပန်ကြ၏။
32ယေရှုက “သွားကြလော့” ဟု မိန့်တော်မူ၏။ ထို့ကြောင့် နတ်ဆိုးတို့သည် ထိုသူတို့အထဲမှ ထွက်၍ ဝက်အုပ်ထဲသို့ ဝင်ကြ၏။ ထိုဝက်တစ်အုပ်လုံးသည် မတ်စောက်သောတောင်စောင်းအတိုင်း အိုင်ကမ်းပါးသို့ တစ်ဟုန်ထိုးပြေဆင်း၍ ရေနစ်သေဆုံးကြ၏။
33ဝက်ကျောင်းသောသူတို့သည် မြို့သို့ ထွက်ပြေး၍ လူအပေါင်းတို့ကို ထိုနတ်ဆိုးပူးခံရသောသူတို့၌ ဖြစ်ပျက်ခဲ့သမျှအကြောင်းကို ပြောပြကြ၏။ 34ထိုအခါ တစ်မြို့လုံးရှိလူတို့သည် ယေရှုထံသို့ သွားကြ၏။ ယေရှုကို တွေ့သောအခါ မိမိတို့အရပ်မှ ထွက်ခွာသွားတော်မူရန် တောင်းပန်ကြ၏။
Currently Selected:
မဿဲ 8: BCB
Highlight
Share
Copy
Want to have your highlights saved across all your devices? Sign up or sign in
ခေတ်သစ်မြန်မာ သမ္မာကျမ်း™
မူပိုင်ခွင့်၊ © Biblica Inc. ၁၉၈၅၊ ၂၀၂၄
ခွင့်ပြုချက်ဖြင့် အသုံးပြုသည်။ ကမ္ဘာတစ်ဝန်းမူပိုင်ခွင့်များရယူပြီးဖြစ်သည်။
Burmese Contemporary Bible™
Copyright © 1985, 2024 by Biblica, Inc.
Used with permission. All rights reserved worldwide.
